3 Ojtaquejequel ticnaic to a Jehová co Diosal, a bꞌabꞌel sbꞌat dꞌa eyichan̈ icha junoc cꞌacꞌ satanel masanil tastac. Ol acꞌjococh ebꞌ dꞌa yol e cꞌabꞌ, yuj chiꞌ ol e satn̈ejel ebꞌ, ol e pechanel ebꞌ dꞌa elan̈chamel, icha ix aj yalan Jehová. 4 Ayic toxo ix yiqꞌuel masanil ebꞌ anima chiꞌ Jehová dꞌa eyichan̈, man̈ e naꞌ to yuj e vachꞌil, yuj chiꞌ icha chiꞌ ix aji. Palta yuj schucal juntzan̈ chon̈abꞌ chiꞌ ol icꞌjoquel ebꞌ dꞌa eyichan̈ yuj Jehová. 5 Man̈ yujoc e vachꞌil, man̈ yujoc pax svachꞌil e bꞌeybꞌal yuj chiꞌ ol ex cꞌoch cajan dꞌa sat luum. Palta yuj schucal juntzan̈ chon̈abꞌ chiꞌ, ol satjoccanel ebꞌ dꞌa eyichan̈, yic vachꞌ tzꞌelcancꞌoch tas yalnac Jehová dꞌa ebꞌ co mam quicham, aton dꞌa vin̈aj Abraham, dꞌa vin̈aj Isaac yedꞌ dꞌa vin̈aj Jacob. 6 Ojtaquejequel an to man̈ yujoc e vachꞌil syacꞌ jun lum man̈ jantacoc svachꞌil chiꞌ Jehová dꞌayex yic tzeyiquej, palta a ex tic juneln̈ej te pit ex.

7 Naeccoti, bꞌat talaj satcꞌolal eyuuj to e tzuntzejnaccot yoval Jehová dꞌa eyibꞌan̈ dꞌa tzꞌinan luum. Atax quelnaccot dꞌa Egipto masanto on̈ javi dꞌa tic, te pitn̈ej tzeyutej e bꞌa dꞌay. 8 A dꞌa lum vitz Horeb e tzuntzejnac val cot yoval, yuj chiꞌ snibꞌejnac ex sateli. 9 Ayic in qꞌue dꞌa sjolom jun vitz chiꞌ yuj in chaan chabꞌ pachan̈ qꞌuen qꞌueen bꞌaj tzꞌibꞌabꞌiloch checnabꞌil, aton strato Dios quedꞌoc, 40 cꞌual yedꞌ 40 acꞌval eqꞌuin taꞌ, malaj jabꞌoc tas in vaꞌa, ma vuqꞌuej. 10 Slajvi chiꞌ, yacꞌan chabꞌ pachan̈ qꞌuen qꞌueen chiꞌ Jehová dꞌayin. A val Jehová chiꞌ tzꞌibꞌanoch schecnabꞌil chiꞌ dꞌa qꞌueen, juntzan̈ checnabꞌil yalnac dꞌa jolom vitz dꞌa cal cꞌacꞌ dꞌa jun cꞌu ayic molan on̈ ecꞌ taꞌ. 11 Ayic slajvi yecꞌcanbꞌat 40 cꞌual yedꞌ 40 acꞌval chiꞌ, yacꞌan chabꞌ qꞌuen yic trato chiꞌ dꞌayin. 12 Yalan icha tic: Eman̈xi dꞌa elan̈chamel, yujto a jun chon̈abꞌ ix iqꞌuelta dꞌa Egipto toxo ix sjuel sbꞌa. Max scꞌanabꞌajejlaj tas ix valaꞌ, toxo ix sbꞌo jun sdiosal ebꞌ nabꞌa oro. 13 Toxo ix vilaꞌ to te pit jun chon̈abꞌ tic. 14 Nitzel a bꞌa dꞌa vichan̈, ol in satel juntzan̈ anima tic, man̈xa bꞌaj ol bꞌinaj ebꞌ dꞌa sat luum tic. An̈ej dꞌa in̈tilal ol in bꞌo junoc nivan nación, te tecꞌan ol ajoc, tzijtum ol aj sbꞌisul dꞌa yichan̈ juntzan̈ anima tic, xchi Jehová.

15 Vemxita dꞌa jolom vitz bꞌaj n̈iln̈on sqꞌue cꞌacꞌ chiꞌ, vedꞌnac chabꞌ qꞌuen yic trato chiꞌ. 16 Axo vemxuli, vilani to toxo ix och e mul dꞌa yol sat Jehová co Diosal, yujto e bꞌo jun yechel vacax e diosaloc. Jun val rato eyiqꞌuel e bꞌa dꞌa spatic checnabꞌil yal co Diosal chiꞌ dꞌayon̈. 17 Yuj chiꞌ, in pocꞌanem chabꞌ pachan̈ qꞌuen qꞌueen chiꞌ dꞌa eyichan̈, spojbꞌat qꞌueen. 18 Slajvi chiꞌ vemxi n̈ojan dꞌa yichan̈ Jehová dꞌa 40 cꞌual yedꞌ 40 acꞌval. Maj in va jabꞌoc, maj vuqꞌuej jabꞌoc aꞌ eyuuj, yuj chiꞌ icha chiꞌ in cꞌulej, yujto te chuc e cꞌulej, e tzuntzejcot yoval scꞌol Jehová. 19 Te xiv in yujto cot yoval scꞌol Jehová chiꞌ dꞌa eyibꞌan̈ yic tzex sataneli. Palta jun, yabꞌto Jehová tas val dꞌay junelxo chiꞌ. 20 Cotpax yoval dꞌa vin̈ vucꞌtac aj Aarón, jabꞌxon̈ej maj satjoquel vin̈ yuuj. Palta tevi in yuj vin̈ yic tzꞌacꞌji nivancꞌolal vin̈. 21 Elan̈chamel in maqꞌuem vecnaj jun yechel vacax bꞌaj och e mul chiꞌ. Elan̈chamel in yumbꞌat dꞌa cal cꞌacꞌ. Slajvi chiꞌ in tenan pojoc, in tzipancanbꞌat dꞌa yol a aꞌ tzꞌemta dꞌa lum vitz chiꞌ.

22 Icha chiꞌ e cꞌulejpax dꞌa Tabera, dꞌa Masah yedꞌ dꞌa Kibrot-hataava. A val taꞌ e tzuntzejcot yoval scꞌol Jehová. 23 Aton yic yalan Jehová chiꞌ dꞌayon̈ dꞌa Cades-barnea to tzon̈ bꞌat quicꞌ lum ix yacꞌ dꞌayon̈. An̈ejtonaꞌ taꞌ e tenecꞌ tas yal co Diosal chiꞌ. Maj eyacꞌochlaj dꞌa e cꞌool, maj e cꞌanabꞌajej pax tas yalaꞌ. 24 Atax yic ex vojtacaneli voch ijan vilani to te pitn̈ej tzeyutej e bꞌa dꞌa Jehová. 25 Yujto maj e cꞌanabꞌajej, yuj chiꞌ yalaꞌ to ol ex sateloc, yuj chiꞌ em in n̈ojan dꞌa yichan̈ dꞌa 40 cꞌual yedꞌ 40 acꞌval chiꞌ. 26 Valan dꞌay icha tic: Mamin Jehová, man̈ a satel jun a chon̈abꞌ tic. A ach ix a colel yedꞌ ipal, ix icꞌanelta dꞌa Egipto yedꞌ a poder. 27 Nacot tas alnaccan dꞌa ebꞌ a checabꞌ, aton vin̈aj Abraham, vin̈aj Isaac yedꞌ vin̈aj Jacob. A spital juntzan̈ anima tic yedꞌ smul ebꞌ yedꞌ schuc pensaril ebꞌ, man̈ a nacoti, 28 yic vachꞌ max yal ebꞌ anima bꞌaj ix on̈ iqꞌuelta chiꞌ: Maj yal-laj yuj Jehová yicꞌancꞌoch jun chon̈abꞌ chiꞌ dꞌa lum bꞌaj yacꞌnac stiꞌ yacꞌan dꞌa ebꞌ, an̈ej to ix yicꞌbꞌat ebꞌ yic bꞌat yacꞌancham ebꞌ dꞌa taquin̈ luum yujto chacbꞌilel ebꞌ yuuj, xcham ebꞌ. 29 Acꞌ nivancꞌolal dꞌa jun chon̈abꞌil anima tic, yujto a chon̈abꞌ yaji. A ach ix iqꞌuelta dꞌa Egipto yedꞌ a poder, xin chi dꞌay.