Man̈ yujocn̈ej tas svaji ay co qꞌuinal
8
Scham val e cꞌanabꞌajan masanil checnabꞌil svalcanel tic dꞌayex, yic vachꞌ ol ex elcꞌochoc, ol te qꞌuibꞌ e bꞌisul, ol eyiquejcan lum luum yacꞌnac stiꞌ Jehová yacꞌan dꞌa ebꞌ co mam quicham. 2 Naeccot sicꞌlabꞌil, 40 abꞌil on̈ ecꞌ dꞌa taquin̈ luum yuj Jehová co Diosal. Ix yacꞌan co yaelal, on̈ yacꞌan proval yic syilaꞌ tato sco cꞌanabꞌajej schecnabꞌil, mato maay. 3 Ix quil syaelal yedꞌ vejel yuj Jehová. Ix lajvi chiꞌ, ix yacꞌan maná co vaeloc, juntzan̈ vael to man̈ cojtacoc, man̈ yojtacocpax ebꞌ co mam quicham. Icha chiꞌ ix on̈ yutej yic vachꞌ scojtaquejeli to man̈ yujocn̈ej tas vaji ay co qꞌuinal, palta to yuj masanil tas syal Jehová. 4 A co pichul ix co cꞌan dꞌa 40 abꞌil chiꞌ, maj lajviel-laj, maj malqꞌuelaj coc co bꞌeyi. 5 Naec val to icha junoc uninabꞌil scachji yuj smam, icha chiꞌ ix on̈ yutejpax Jehová. 6 Yuj chiꞌ yovalil tze cꞌanabꞌajej schecnabꞌil Jehová, ochan̈ec tzacꞌan yuuj, ayocabꞌ yelcꞌoch dꞌa yol e sat. 7 Yujto a Jehová co Diosal van ex yicꞌanbꞌat dꞌa sat lum luum man̈xo jantacoc svachꞌil, ay a aꞌ ay sjaj yedꞌ a aꞌ scot dꞌa lum nivac vitz. 8 A dꞌa lum luum chiꞌ, te vachꞌ tzꞌaj ixim trigo, ixim cebada, teꞌ uva, teꞌ higo, teꞌ granado yedꞌ teꞌ olivo. Te ay pax nocꞌ yal chabꞌ. 9 Ayic ayexxo ecꞌ dꞌa sat luum chiꞌ, man̈xalaj tas tze naꞌ yuj e vael yedꞌ junocxo tasi. A dꞌa scal qꞌuen qꞌueen ay taꞌ, ay qꞌuen hierro, axo dꞌa lum vitz ay qꞌuen cobre. 10 Vachꞌ ol ex va taꞌ, yovalil ol eyacꞌ yuj diosal dꞌa Jehová yujto vachꞌ lum luum ol yacꞌ chiꞌ dꞌayex.Mocabꞌ bꞌat Jehová satcꞌolal eyuuj
11 Tze yil val e bꞌa, mocabꞌ bꞌat Jehová co Diosal satcꞌolal eyuuj. Yovalil tze cꞌanabꞌajej schecnabꞌil, scꞌaybꞌubꞌal yedꞌ scachnabꞌil svalcanel tic dꞌayex. 12 Ayic vachꞌ ol ex vaoc, ol eyucꞌan aꞌ, cajanexxopax dꞌa e pat te vachꞌ, axo talaj tzꞌaji sbꞌat Jehová satcꞌolal eyuuj. 13 An̈ejtonaꞌ ayic ol te qꞌuibꞌ sbꞌisul nocꞌ e vacax, nocꞌ e calnel, ayic te ayxo qꞌuen plata yedꞌ qꞌuen oro dꞌayex yedꞌ jantacxo tastac, 14 axo talaj tzꞌaji tzeyicꞌanchaan̈ e bꞌa, sbꞌatcan Jehová co Diosal satcꞌolal eyuuj, aton jun icꞌannac on̈ elta dꞌa Egipto bꞌaj ayon̈ och checabꞌoc. 15 A Jehová chiꞌ ix on̈ cuchbꞌan dꞌa jun nivan tzꞌinan lum te ay smay, bꞌaj ay nocꞌ chan te ov yedꞌ nocꞌ sinaan, bꞌaj malaj a aꞌ, palta a ix icꞌanelta a aꞌ dꞌa sat qꞌuen qꞌueen yic scucꞌani. 16 Ix yacꞌan maná co va dꞌa tzꞌinan luum chiꞌ, jun vael to man̈ yojtacoc ebꞌ co mam quicham. Ix yacꞌoch yaelal dꞌa quibꞌan̈, ix on̈ yacꞌan proval, yic vachꞌ vachꞌxon̈ej tzon̈ elcꞌoch yuuj. 17 Ecꞌtalaj dꞌa e pensar e naan icha tic: A jantac co bꞌeyumal tic, a yedꞌ val co munlajel yedꞌ quip ix quicꞌaꞌ, xe chi talaj. 18 Palta naec val to a Jehová co Diosal tzꞌacꞌan e naꞌ yedꞌ eyip yic syal eyoch bꞌeyumal, yic vachꞌ tzꞌelcꞌoch strato yacꞌnac yedꞌ ebꞌ co mam quicham ichaton van quilan ticnaic.
19 Palta tato ol bꞌat Jehová co Diosal satcꞌolal eyuj jun, tato ol ex och tzacꞌan dꞌa spatic juntzan̈ comon dios, ol eyacꞌanem e bꞌa dꞌay yedꞌ eyem n̈ojan ejmelal dꞌay. Tato icha chiꞌ ol e cꞌulej, a in svalcan dꞌayex ticnaic, ol ex satjoquel yuj Jehová chiꞌ. 20 Icha val ol aj satel juntzan̈ chon̈abꞌ bꞌaj van eyicꞌjibꞌat chiꞌ yuuj, icha val chiꞌ ol aj e satel yuuj tato man̈ ol e cꞌanabꞌajej tas syalaꞌ.