A schon̈abꞌ Jehová sicꞌbꞌilel yuuj
7
Ayic ol ex yicꞌanbꞌat Jehová dꞌa sat lum luum bꞌaj yacꞌnac stiꞌ yacꞌan dꞌayex, aꞌ ol icꞌanel uqueꞌ nación te nivac, te ay yip dꞌa eyichan̈, aton ebꞌ hitita, ebꞌ gergeseo, ebꞌ amorreo, ebꞌ cananeo, ebꞌ ferezeo, ebꞌ heveo yedꞌ ebꞌ jebuseo. 2 Ayic ol yacꞌanoch juntzan̈ nación chiꞌ Jehová dꞌa yol e cꞌabꞌ, ol e satel ebꞌ smasanil, man̈ e bꞌo e trato yedꞌ ebꞌ, mocabꞌ ocꞌ e cꞌol dꞌa ebꞌ. 3 Man̈ eyacꞌ yicꞌlaj sbꞌa ebꞌ ix eyisil yedꞌ ebꞌ vin̈ yuninal ebꞌ. Man̈ eyacꞌpax yicꞌlaj sbꞌa ebꞌ vin̈ eyuninal yedꞌ ebꞌ ix yisil ebꞌ, 4 axo talaj tzꞌaji, tzꞌicꞌjibꞌat ebꞌ eyuninal chiꞌ yuj ebꞌ ix dꞌa spatic sdiosal, tzꞌoch ebꞌ ejmelal dꞌay, yuj chiꞌ scot yoval scꞌol Jehová, tzex satjiel yuj dꞌa elan̈chamel. 5 Tze satpaxel masanil sdiosal ebꞌ bꞌaj slesalvi, yaltaril yedꞌ qꞌuen qꞌueen yedꞌ te teꞌ yechel Asera bꞌaj tzꞌoch ebꞌ ejmelal. Tze n̈ustzꞌa smasanil. 6 A on̈ tic schon̈abꞌ on̈ Jehová Dios, sicꞌbꞌil on̈ elta yuj dꞌa scal masanil juntzan̈ nivac nación dꞌa sat lum luum tic, yic vachꞌ yicn̈ej Jehová chiꞌ tzon̈ ajcani.A tas yovalil scꞌulej ebꞌ israel
7 A val Jehová ix el dꞌa scꞌol ix on̈ sicꞌaneli, man̈ yujoc to nivan nación on̈, ina to jayvan̈ on̈n̈ej dꞌa yichan̈ juntzan̈xo nación chiꞌ. 8 Palta yujto xajan on̈ yuuj yic vachꞌ syaqꞌuelcꞌoch stiꞌ icha yutejnac yalan dꞌa ebꞌ co mam quicham, yuj chiꞌ on̈ yiqꞌuelta dꞌa Egipto bꞌaj ayon̈ och checabꞌoc, on̈ yicꞌanelta yedꞌ yipalil dꞌa yol scꞌabꞌ vin̈ sreyal Egipto chiꞌ. 9 Ojtaquejequeli to a Jehová co Diosal an̈ej val Dios. Tzꞌeln̈ejcꞌoch tas syal dꞌa ebꞌ xajanani, aton ebꞌ scꞌanabꞌajan schecnabꞌil. Ayn̈ej och yedꞌ ebꞌ yedꞌ dꞌa ebꞌ yin̈tilal ebꞌ yic ol bꞌeyn̈ejbꞌatoc. 10 Syacꞌan spac dꞌa ebꞌ schacaneli, elan̈chamel satel ebꞌ yuuj. 11 Yuj chiꞌ, scham val e cꞌanabꞌajan masanil checnabꞌil yedꞌ cꞌaybꞌubꞌal svalcanel tic dꞌayex.
Syacꞌ spac Jehová dꞌa ebꞌ scꞌanabꞌajani
12 Tato tze maclej val eyabꞌ masanil juntzan̈ checnabꞌil tic, tze cꞌanabꞌajani, ol yaqꞌuelcꞌoch strato Jehová co Diosal yacꞌnac eyedꞌoc, ol ochn̈ej eyedꞌoc icha ajnac yalan dꞌa ebꞌ co mam quicham. 13 Ol ex sxajanej Jehová, ol yacꞌan svachꞌcꞌolal dꞌa eyibꞌan̈, ol yacꞌanpax qꞌuibꞌ e bꞌisul. Ol yacꞌan svachꞌcꞌolal dꞌa yibꞌan̈ masanil tas ay dꞌayex: Dꞌa yibꞌan̈ ebꞌ eyuninal, e trigo, e vino, eyaceite, nocꞌ e vacax yedꞌ dꞌa yibꞌan̈ nocꞌ e calnel dꞌa sat lum luum bꞌaj yacꞌnac stiꞌ yacꞌan dꞌa ebꞌ co mam quicham. 14 Ay svachꞌcꞌolal Jehová dꞌa eyibꞌan̈ dꞌa yichan̈ masanil juntzan̈xo chon̈abꞌ. Malaj junoc ix ix to malaj yuneꞌ, ma junoc vinac to malaj yuninal dꞌa yol e chon̈abꞌ chiꞌ. Malaj pax junoc nocꞌ e molbꞌetzal nocꞌ to man̈ ol unevoc. 15 A Jehová ol ex colanel dꞌa jantac ilya icha val oval ilya eyilnac yecꞌ dꞌa ebꞌ aj Egipto. An̈ej dꞌa yibꞌan̈ ebꞌ ayoch ajcꞌolal dꞌayex ol em ilya chiꞌ yuj Jehová. 16 Yuj chiꞌ yovalil tze satel masanil juntzan̈ nación chiꞌ. A Jehová co Diosal ol acꞌanoch ebꞌ dꞌa yol e cꞌabꞌ, mocabꞌ ocꞌ e cꞌol dꞌa ebꞌ. Man̈ eyaqꞌuem e bꞌa dꞌa sdiosal ebꞌ yic man̈ ol ex yacꞌ juvoquel ebꞌ.
17 Vachꞌchom tze naꞌ icha tic: A juntzan̈ nación tic te ay yip dꞌa quichan̈, ¿tas val ol aj quicꞌanel dꞌa sat lum luum tic? vachꞌchom xe chi. 18 Palta man̈ ex xiv dꞌa ebꞌ anima chiꞌ. Naeccoti tas yutejnac ebꞌ anima Jehová dꞌa Egipto yedꞌ sreyal. 19 A on̈ tic quilnac val juntzan̈ tastac satubꞌtac yilji yedꞌnac yaelal yacꞌnaccot Jehová yedꞌ val yipalil dꞌa yibꞌan̈ Egipto chiꞌ ayic yicꞌannac on̈ elta taꞌ. Icha chiꞌ ol yutoc juntzan̈ chon̈abꞌ bꞌaj tzex xiv chiꞌ. 20 A Jehová ol acꞌanbꞌat jun nivan yaelal dꞌa scal ebꞌ, masanto ol satel masanil ebꞌ olto canoc yedꞌ ebꞌ olto scꞌubꞌejel sbꞌa dꞌayex. 21 Yuj chiꞌ, man̈ ex xiv dꞌa ebꞌ anima chiꞌ, yujto a Jehová co Diosal ayecꞌ dꞌa co cal, te nivan spoder. 22 A ol icꞌanel juntzan̈ nación chiꞌ dꞌa eyichan̈ dꞌa cꞌojancꞌolal. Man̈ junn̈ejoclaj tiempo ol satel ebꞌ, yic vachꞌ max te qꞌuibꞌchaan̈ nocꞌ chium nocꞌ tzex chiꞌani. 23 A Jehová co Diosal ol acꞌanoch ebꞌ anima chiꞌ dꞌa yol e cꞌabꞌ, ol och ebꞌ dꞌa xivcꞌolal masanto ol satel ebꞌ eyuuj. 24 A Jehová ol acꞌanoch sreyal ebꞌ dꞌa yol e cꞌabꞌ, ol e satanel ebꞌ, man̈xa bꞌaj ol bꞌinaj ebꞌ dꞌa yolyibꞌan̈qꞌuinal tic. Malaj mach ol yal scolan sbꞌa dꞌayex, masanil mach ol e sateli. 25 Tze n̈ustzꞌa sdiosal ebꞌ. Man̈ eyiqꞌuel qꞌuen plata ma qꞌuen oro ayoch dꞌay. Man̈ e nibꞌejochi yic vachꞌ max ex telviel yuuj. Man̈ eyixtejbꞌat e bꞌa, yujto a juntzan̈ chiꞌ schacji yuj Jehová co Diosal. 26 Yuj chiꞌ, malaj junoc tas to yajbꞌilel yuj Jehová tzeyicꞌbꞌat dꞌa e pat, yic vachꞌ max ex sateli. Masanil juntzan̈ chiꞌ, aycot yoval scꞌol Dios dꞌa yibꞌan̈, yuj chiꞌ yovalil tze yajcaneli.