7 A Jehová ol acꞌanoch ebꞌ eyajcꞌol dꞌa yol e cꞌabꞌ ayic ol yacꞌan oval ebꞌ eyedꞌoc. Dꞌa stzolal ol aj scot ebꞌ dꞌayex, palta sacleminac ol aj yel ebꞌ elelal dꞌayex.

8 Ol yacꞌ svachꞌcꞌolal Jehová co Diosal dꞌa yibꞌan̈ tastac tzeyicꞌ dꞌa e munlajel yedꞌ dꞌa yibꞌan̈ masanil tas tze cꞌulej. Icha val chiꞌ te tzalajcꞌolal ol ex ajecꞌ dꞌa sat lum luum ol yacꞌ Jehová chiꞌ dꞌayex.

9 Tato tze cꞌanabꞌajej masanil schecnabꞌil Jehová chiꞌ, tze bꞌeybꞌalani, ol ex yaln̈ejoch schon̈abꞌoc to sicꞌbꞌilex el yuuj, icha ajnac yalani. 10 Axo ebꞌ anima dꞌa masanil nación dꞌa yolyibꞌan̈qꞌuinal tic, ol yojtaquejel ebꞌ to sicꞌbꞌil ex el yuj Jehová, ol xiv ebꞌ dꞌayex. 11 A Jehová chiꞌ ol ex xajananoc: Tzijtum ol aj eyuninal yedꞌ yuneꞌ nocꞌ e molbꞌetzal nocꞌ, jantac ol aj sat eyavbꞌen dꞌa lum luum yacꞌnac stiꞌ dꞌa ebꞌ co mam quicham to ol yacꞌ dꞌayex. 12 Ol yacꞌancot n̈abꞌ dꞌa yibꞌan̈ lum luum tic dꞌa stiempoal, icha jantac tzꞌoch yopisio. Te vachꞌxon̈ej ol aj e munlajel. Masanil tastac ay dꞌayex, ol te qꞌuibꞌchaan̈, masanto ol yal eyacꞌan majanil dꞌa tzijtumoc nación. A exxo pax tic, malaj tas ol e cꞌan e majnej dꞌa junocxo mach. 13 Tato ol e cꞌanabꞌajej masanil schecnabꞌil Jehová co Diosal, aton masanil juntzan̈ svalcan dꞌayex ticnaic, sat ol ex aj dꞌa ebꞌ chꞌoc nacional chiꞌ, axo ebꞌ spatictac ol ajcan ebꞌ. Nivan ol aj eyelcꞌoch dꞌa yibꞌan̈ ebꞌ. Malaj bꞌaj ol ex acꞌjoc ganar yuj ebꞌ. 14 Icha chiꞌ ol ex ajoc, tato max eyiqꞌuel e bꞌa dꞌa spatic schecnabꞌil Jehová, tato max ex och tzacꞌan dꞌa spatic comon dios, yic tzeyacꞌanem e bꞌa dꞌay.

15 Palta tato man̈ ol e cꞌanabꞌajej masanil schecnabꞌil yedꞌ scꞌaybꞌubꞌal Jehová co Diosal, aton juntzan̈ van valan tic dꞌayex, ol ja val juntzan̈ catabꞌ tic dꞌa eyibꞌan̈: 16 Te chuc eyic dꞌa yol e chon̈abꞌ yedꞌ dꞌa e munlajel. 17 Syalelcꞌochi to malaj tas ol eyicꞌ dꞌa e munlajel chiꞌ, malaj pax tas ol e vaꞌa. 18 Ol javoc yaelal dꞌa yibꞌan̈ ebꞌ eyuninal, malaj svachꞌil ol aj sat eyavbꞌen. Man̈ ol qꞌuibꞌ yuneꞌ nocꞌ e vacax, yuneꞌ nocꞌ e calnel, yuneꞌ nocꞌ e chiva yedꞌ masanil nocꞌ e molbꞌetzal nocꞌ. 19 Chuc eyic bꞌajtacn̈ej tzex eqꞌui yedꞌ yic tzex meltzajxi dꞌa e pat.

20 Ol yacꞌcot yaelal Jehová yedꞌ ilcꞌolal dꞌa eyibꞌan̈. Toxon̈ej ol ex somchajel dꞌa masanil tastac ol e cꞌulej. Elan̈chamel ol ex satel yuj chucal tze cꞌulej yuj eyactancan Jehová chiꞌ. 21 A Jehová ol acꞌancot juntzan̈ ilya te ov dꞌa eyibꞌan̈, masanto ol ex satel dꞌa sat lum luum bꞌaj ol ex cajnaj chiꞌ. 22 Ol yacꞌpaxcot yabꞌil yabꞌil Jehová chiꞌ to ol ex cham yuuj, cꞌacꞌal ilya te chuc yedꞌ e malqꞌuei. Axo eyavbꞌen ol tacjoqueloc. Man̈xo ol yacꞌlaj n̈abꞌ, taquin̈ ol aj smasanil. Ol och tzꞌaubꞌ dꞌa e munlajel masanto ol yal e sateli. 23 Man̈xalaj n̈abꞌ ol cot dꞌa satchaan̈. Man̈xo ol yacꞌlaj sat eyavbꞌen dꞌa lum luum chiꞌ. 24 Man̈xalaj n̈abꞌ ol yacꞌaꞌ. Axon̈ej lum pococ yedꞌ qꞌuen arena ol em yuj Jehová co Diosal, masanto ol ex sateloc. 25 A Jehová chiꞌ ol ex acꞌanoch dꞌa yol scꞌabꞌ ebꞌ eyajcꞌool. Dꞌa stzolal ol aj e bꞌat dꞌa oval, axo ol ajoc, sacleminac ol aj eyel dꞌa ebꞌ. Ol sat scꞌool masanil nación dꞌa yolyibꞌan̈qꞌuinal tic ayic ol yabꞌan ebꞌ tas ol ex icꞌanoc. 26 A nocꞌ ostoc yedꞌ nocꞌ caltacteꞌal nocꞌ ol chianbꞌat e nivanil. Man̈xalaj mach ol xibꞌtan nocꞌ dꞌayex.

27 A Jehová ol acꞌan cꞌabꞌat e nivanil yuj mal yabꞌil, icha val ajnac ebꞌ aj Egipto. Ol qꞌuepax quiscꞌoy dꞌayex yedꞌ yaxcꞌa yedꞌ qꞌuilaj yabꞌil, man̈xalaj yan̈al juntzan̈ ilya chiꞌ. 28 Ol ex quistalaxoc, ol somchajel e cꞌool, man̈xo ol yal-laj eyilani. 29 Toxon̈ej ol ex ecꞌ machmon dꞌa chimcꞌualil, icha tzꞌaj yecꞌ machmon ebꞌ max ujitaxon yilani. Axo dꞌa masanil tas ol e cꞌulej, man̈xalaj tas ol elcꞌoch dꞌa vachꞌil. Ol ex te ixtaxeloc. Ilbꞌajcꞌolxon̈ej ol ex ajoc. Man̈xalaj mach ol ex colanoc. 30 A mach ol sbꞌo strato snupnaj yedꞌ junoc ix ix, chꞌocxo mach ol vay yedꞌ ix. Ol e bꞌoqꞌue junoc e pat, palta man̈xo ol ex cajnaj dꞌa yool. Ol eyavej junoc eyuva, palta man̈xo ol e lo sat. 31 Dꞌa val eyichan̈ ol smilcham nocꞌ e vacax ebꞌ ajcꞌool, palta man̈ ol e chiꞌ jabꞌoc schibꞌejal nocꞌ. Dꞌa eyichan̈ ol yicꞌbꞌat nocꞌ e bꞌuru ebꞌ, man̈xo ol yacꞌ meltzaj nocꞌ ebꞌ dꞌayex. Ol yicꞌbꞌat nocꞌ e calnel ebꞌ, man̈xalaj mach ol yal scolancan nocꞌ dꞌa ebꞌ. 32 Eyichan̈ val ol bꞌatcan ebꞌ eyuninal yedꞌ ebꞌ ix eyisil dꞌa yol scꞌabꞌ ebꞌ chꞌoc chon̈abꞌil. Toxon̈ej ol ex cꞌunbꞌoc e maclan sjax ebꞌ, palta man̈xa jabꞌoc tas syal eyuuj. 33 A ebꞌ anima man̈ eyojtacoc, a ebꞌ ol satanel masanil sat eyavbꞌen yedꞌ jantac e munlajel. Ol ex ixtaj val, obꞌiltacxon̈ej ol ex ajoc. 34 Ayic ol eyilan masanil juntzan̈ chiꞌ, toxon̈ej ol ex quistalaxcanoc. 35 Ol yacꞌ val cot yaelal Jehová dꞌa eyibꞌan̈, ol qꞌue yabꞌil yaxcꞌa dꞌa sjolom e penec, dꞌa e xubꞌ yedꞌ dꞌa masanil e nivanil. Man̈xo ol an̈taj jun ilya chiꞌ eyuuj.

36 Ol ex icꞌjocbꞌat yuj Jehová chiꞌ yedꞌ e reyal sicꞌbꞌiloch eyuuj dꞌa junoc nación to man̈ eyojtacoc, man̈ yojtacocpax ebꞌ e mam eyicham. Ataꞌ ol eyaqꞌuem e bꞌa dꞌa juntzan̈ comon dios bꞌobꞌil dꞌa te teꞌ, ma dꞌa qꞌuen qꞌueen. 37 Ol sat scꞌol juntzan̈xo nación yabꞌan tas ol ex utajoc. Ol aljoc e pecal, ol ex bꞌuchjoc yuj juntzan̈ chon̈abꞌ bꞌaj ol ex yicꞌbꞌat Jehová chiꞌ. 38 Te nivan in̈at ol eyavej, palta jabꞌn̈ej sat ol e moloꞌ, an̈ej nocꞌ cꞌulubꞌ ol cꞌuxanbꞌatoc. 39 Ol eyavej eyuva, ol e mesani, palta man̈ ol e bꞌixlaj sat, malaj vino ol eyuqꞌuej, an̈ej nocꞌ yaxtaj ol lajaneloc. 40 Ay teꞌ olivo dꞌa sat e luum, palta malaj yaceiteal teꞌ ol e cꞌanaꞌ yujto ton̈ej ol cꞌajbꞌanel sat teꞌ. 41 Ay eyuninal, ay eyisil, palta man̈ ol ajlaj ebꞌ eyedꞌoc, yujto ol icꞌjocbꞌat ebꞌ dꞌa juntzan̈xo nación. 42 Masanil te teꞌ syacꞌ sat dꞌa e chon̈abꞌ, pilan ol lajvoquel teꞌ yuj nocꞌ cꞌulubꞌ. 43 A ebꞌ chꞌoc chon̈abꞌil ayecꞌ cajan dꞌa e cal, nivanxo ol aj yelcꞌoch ebꞌ dꞌa eyichan̈, a exxo tic, man̈xalaj ol aj eyelcꞌochi yujto ol ex lajvoquemoc. 44 A ebꞌ chiꞌ, ay tas ol yal yacꞌan ebꞌ majanil, palta a exxo tic, man̈xalaj tas dꞌayex. A ebꞌ sat ol aj dꞌayex, a exxo tic spatictaquil ol ex ajcanoc.

45 Masanil juntzan̈ yaelal tic ol ja dꞌa eyibꞌan̈. Ol eyabꞌxon̈ej syail masanto ol yal e sateli, yujto maj e cꞌanabꞌajej masanil schecnabꞌil yedꞌ scꞌaybꞌubꞌal Jehová co Diosal ix yacꞌ dꞌayex. 46 A juntzan̈ yaelal tic schꞌoxcot yoval scꞌol Dios dꞌayex yedꞌ dꞌa ebꞌ eyin̈tilal dꞌa masanil tiempo. 47 Yujto maj eyaqꞌuem e bꞌa dꞌa Jehová co Diosal dꞌa tzalajcꞌolal yedꞌ dꞌa smasanil e cꞌool ayic ix yacꞌan svachꞌcꞌolal dꞌa eyibꞌan̈, 48 yuj chiꞌ yovalil ol eyacꞌ servil ebꞌ ajcꞌool ol yacꞌcot dꞌayex, ol eyabꞌ syail vejel, taquin̈tial, man̈ pichulal yedꞌ masanil yaelal. Ol eyabꞌ val syail yuj ebꞌ eyajcꞌool chiꞌ masanto ol yal e sateli.

49 A ebꞌ anima dꞌa junoc nación te najat bꞌaj slajvicꞌoch yolyibꞌan̈qꞌuinal tic, a ebꞌ ol yicꞌcot Jehová dꞌayex, yelcꞌolal ol aj scot ebꞌ icha sjen̈vi nocꞌ chꞌacbꞌa. Chꞌoc tiꞌal syal ebꞌ, man̈ ol eyabꞌlaj tas ol yal ebꞌ. 50 Te oval anima ebꞌ. Malaj yelcꞌoch ebꞌ icham anima yedꞌ ebꞌ unin dꞌa ebꞌ. 51 Ol schibꞌat yuneꞌ nocꞌ e molbꞌetzal nocꞌ ebꞌ, ol sloanbꞌat sat eyavbꞌen teꞌ ebꞌ, masanto ol ex ixtajval. Man̈xalaj e trigo, e vino, eyaceite, ma yuneꞌ nocꞌ e vacax yedꞌ yuneꞌ nocꞌ e calnel ol to can yuj ebꞌ, an̈ej to ol ex cham yuj vejel.

52 Ol och oyan ebꞌ ajcꞌol chiꞌ dꞌa spatictac e chon̈abꞌ. Ol javoc ebꞌ dꞌayex masanto ol yal yem lan̈naj smuroal e chon̈abꞌ chaan̈ yajqꞌuei yedꞌ bꞌaj scol sbꞌa ebꞌ soldado ayoch yipoc e cꞌool. Masanil juntzan̈ chon̈abꞌ ol yacꞌ Jehová co Diosal dꞌayex, ol laj yoymitej ebꞌ. 53-55 Ayic ol laj oymaj ebꞌ ajcꞌol chiꞌ dꞌa e chon̈abꞌ chiꞌ, axo yuj vejel ol e chianbꞌat eyuninal yedꞌ eyisil ix yacꞌ Jehová co Diosal. Vachꞌchom ay junoc vinac dꞌa e cal te vachꞌ syutej sbꞌa, palta yuj vejel chiꞌ ol schibꞌat yuninal. Man̈ ol yacꞌ jabꞌoc dꞌa yucꞌtac, dꞌa ix yetbꞌeyum to xajan yuuj yedꞌ dꞌa juntzan̈xo yuninal olto canoc. 56-57 Vachꞌchom ay junoc ix ix man̈ comonoc syutej sbꞌa dꞌa e cal, te bꞌeyum ix, malaj bꞌaj tzꞌem yoc ix dꞌa sat luum, ayn̈ejoch xan̈abꞌ ix, palta yujto man̈xa tas sva ix yuj bꞌaj oyanoch ebꞌ ajcꞌol dꞌa spatictac e chon̈abꞌ chiꞌ, ol schibꞌat yuneꞌ ix toto tzꞌalji yedꞌ smoj yuneꞌ chiꞌ. Man̈ ol yacꞌ jabꞌoc ix dꞌa vin̈ yetbꞌeyum, ma dꞌa juntzan̈xo yuneꞌ.

58 A Jehová co Diosal te vachꞌ, te ay smay, palta tato malaj yelcꞌoch dꞌayex, man̈ ol e bꞌeybꞌalejpax masanil juntzan̈ checnabꞌil tzꞌibꞌabꞌilcan tic, 59 ol yacꞌ val cot nivac yaelal co Diosal chiꞌ dꞌa eyibꞌan̈ yedꞌ dꞌa yibꞌan̈ eyin̈tilal. A val ilya te chuc ol yacꞌ dꞌa eyibꞌan̈ to man̈xalaj yan̈al. 60 Ol cot val juntzan̈ ilya dꞌa eyibꞌan̈, icha val juntzan̈ ilya icꞌannac ebꞌ aj Egipto, aton juntzan̈ bꞌaj te xivnac ex. Man̈xo ol el-laj juntzan̈ yaelal chiꞌ dꞌa eyibꞌan̈. 61 Ayto juntzan̈xo yaelal max bꞌinajlaj dꞌa juntzan̈ slolonel Dios tic ol javoc dꞌa eyibꞌan̈ yic tzex sateli. 62 A ex val tic ex vetisraelal, te nivanxo e bꞌisul, lajan exxo icha qꞌuen cꞌanal dꞌa satchaan̈, palta ol ex sateloc. Man̈xo nivanoc ol ajcan e bꞌisul, tato man̈ ol e cꞌanabꞌajej Jehová co Diosal. 63 Icha ix aj stzalaj scꞌol schꞌoxan svachꞌcꞌolal dꞌayon̈, ix yacꞌan qꞌuibꞌ co bꞌisul, icha pax chiꞌ ol aj stzalaj scꞌol yuj e sateli. Elan̈chamel ol aj ex yicꞌanxiel dꞌa lum luum bꞌaj toxo ol ex cajnaj tic. 64 A ex olto ex canoc, a Jehová ol ex saclemancanbꞌat bꞌajtac slajvicꞌoch yolyibꞌan̈qꞌuinal tic. Ataꞌ ol ex och ejmelal dꞌa juntzan̈ comon dios bꞌobꞌil dꞌa te teꞌ, ma dꞌa qꞌuen qꞌueen, aton comon dios bꞌaj max eyaqꞌuem e bꞌa, man̈ yacꞌnacocpaxem sbꞌa ebꞌ co mam quicham dꞌay. 65 Ayic ayex ecꞌ dꞌa juntzan̈ nación chiꞌ, man̈ ol eyicꞌ jabꞌoc eyip, malaj jabꞌoc tas bꞌaj ay eyalan eyicoꞌ. Yujto dꞌa xivcꞌolal ol ex ajecꞌ yuj Jehová taꞌ, cuseltacxon̈ej ol aj yilji e sat yuj ilcꞌolal. 66 Xivcꞌolal ol ex ajecꞌ dꞌa masanil tiempo yuj e chamel. Ol ex te xiv dꞌa cꞌualil yedꞌ dꞌacꞌvalil. 67 Ol ex te xiv val sicꞌlabꞌil yuj juntzan̈ te ay smay ol eyilaꞌ. A dꞌa qꞌuin̈ibꞌalil ol eyalaꞌ: Tzoc val qꞌuicꞌbꞌi, xe chama. Axo dꞌacꞌvalil ol eyalanxi: Tzoc sacbꞌi, xe chama. 68 Vachꞌchom ix yal Jehová to man̈xa bꞌaqꞌuin̈ tzex meltzaj dꞌa Egipto, palta a ol ex acꞌanxibꞌat taꞌ dꞌa yol barco. Ataꞌ ol e chon̈och e bꞌa schecabꞌoc ebꞌ eyajcꞌol chiꞌ, palta man̈xalaj mach ol ex mananoc, xchi vin̈aj Moisés chiꞌ dꞌa ebꞌ.