3 Tato ol e bꞌeybꞌalejn̈ej in cꞌaybꞌubꞌal, tze cꞌanabꞌajan in checnabꞌil, 4 ol vacꞌbꞌat n̈abꞌ dꞌa stiempoal, axo yacꞌan sat teꞌ eyavbꞌen teꞌ yedꞌ tas avabꞌil dꞌa lum luum chiꞌ. 5 Vanto e tecꞌan ixim e trigo, toxo pax ix qꞌuin̈bꞌi sat eyuva. Vanto e molan sat teꞌ eyuva chiꞌ, toxo ix japax stiempo yavchaj trigo junelxo, yuj chiꞌ ol ex vaoc, masanto ol ex bꞌudꞌjoc. Ol eyacꞌ val tzalajbꞌoc e cꞌol dꞌa yol e macbꞌen. 6 Te vachꞌxon̈ej ol ex ajecꞌ taꞌ. Ol ex vay dꞌa juncꞌolal, malaj mach ol ex xibꞌtanoc. Ol ex in col dꞌa nocꞌ chium nocꞌ yedꞌ dꞌa oval.

7 Ol el lemnaj ebꞌ ayoch ajcꞌolal dꞌayex, yuj eyespada ol cham ebꞌ, ol can teljabꞌ ebꞌ dꞌa eyichan̈. 8 A dꞌa ovan̈oc ex, ol el lemnaj 100-oc ebꞌ ajcꞌol chiꞌ. Axo dꞌa junoc 100 ex, ol el lemnaj 10 miloc ebꞌ. A ebꞌ ajcꞌol chiꞌ ol cham ebꞌ dꞌa eyichan̈ yuj eyespada. 9 Te vachꞌcꞌolal ol aj ex vilanochi. Ol vicꞌ val chaan̈ e bꞌisul, ol vaqꞌuelcꞌoch in trato eyedꞌoc. 10 Vanto e vaan ixim trigo molbꞌilcan eyuj yictax junabꞌi, ol e bꞌesancanel ixim yic ol e latzꞌanpaxoch ixim acꞌto chiꞌ.

11 Ol in cajnajn̈ej eyedꞌoc, man̈ ol ex in chaquel-laj. 12 Ol in ajn̈ejecꞌ dꞌa e cal. A in e Diosal in, a exxo tic in chon̈abꞌ eyaji. 13 A in Jehová e Diosal in, ix ex viqꞌuelta dꞌa Egipto, yic vachꞌ max ex cann̈ej checabꞌoc taꞌ. A in ix viqꞌuel jun munlajel man̈xo jantacoc syail ayoch dꞌa eyibꞌan̈. Yuj val chiꞌ man̈xo n̈ojanoc ex emi tzex bꞌeyeqꞌui.

14 Palta tato a ex tic man̈ ol e cꞌanabꞌajej, man̈ ol e bꞌeybꞌalej in checnabꞌil, 15 tato ol e patiquejel in bꞌeybꞌal tic, tato malaj yelcꞌoch juntzan̈ in checnabꞌil tic dꞌayex, tzeyixtanbꞌat in trato ix in bꞌo eyedꞌoc, 16 a in pax tic, aton juntzan̈ tic ol in cꞌulej eyedꞌoc: Ol vacꞌbꞌat xivcꞌolal dꞌa eyibꞌan̈. Ol vacꞌbꞌat juntzan̈ yabꞌil man̈xa yan̈al yedꞌ cꞌacꞌal yabꞌil ol cot dꞌayex syixtan yol e sat, ol pax yip e nivanil. Nabꞌaxon̈ej ol eyavej tastac, yujto a ebꞌ ayoch ajcꞌolal dꞌayex ol vaanbꞌat sat tas tzeyavej chiꞌ. 17 Ol in och ajcꞌolal dꞌayex, ol ex satel yuj ebꞌ eyajcꞌol chiꞌ. Ol ex can dꞌa yalan̈ yuj ebꞌ. Toxon̈ej ol ex el lemnajoc, vachꞌchom malaj mach tzex pechani.

18 Tato an̈ejaꞌ max in e cꞌanabꞌajej, vachꞌchom toxo ix javi juntzan̈ tic dꞌa eyibꞌan̈, masn̈ej ol qꞌuechaan̈ eyaelal vuj yuj e mul. 19 Ol vacꞌ lajvoquem eyacꞌumtaquil. Man̈xo ol yacꞌlaj n̈abꞌ, yuj chiꞌ man̈xa tas ol yal sqꞌuibꞌ dꞌa sat lum e lum chiꞌ. 20 Nabꞌaxon̈ej ol eyixtej e bꞌa e munlaji, man̈xalaj tas ol qꞌuibꞌ dꞌa sat lum luum chiꞌ. Man̈xo ol yacꞌpax sat teꞌ eyavbꞌen teꞌ.

21 Tato te pit ol eyutej e bꞌa dꞌayin, man̈ ol in e cꞌanabꞌajejn̈ej, ol te qꞌuechaan̈ yaelal dꞌa eyibꞌan̈ vuuj, ato syalaꞌ jantac e mul. 22 Ol vacꞌbꞌat nocꞌ chium nocꞌ dꞌa e cal, ol schianbꞌat eyuninal nocꞌ yedꞌ nocꞌ e molbꞌetzal nocꞌ, axo yemta e bꞌisul chiꞌ yuj nocꞌ, yuj chiꞌ man̈xa mach ol bꞌeyecꞌ dꞌa yoltac bꞌe.

23 Tato an̈ejaꞌ max e na e bꞌa yuj juntzan̈ chiꞌ, pitn̈ej tzeyutej e bꞌa dꞌayin, 24 a in xo, te nivan yaelal ol vacꞌbꞌat dꞌa eyibꞌan̈ yuj e mul chiꞌ. 25 Ol vacꞌbꞌat oval dꞌayex eyaelaloc, yuj in pacan dꞌayex yujto max e cꞌanabꞌajej in trato. Toxon̈ej ol ex bꞌat lemnaj e col e bꞌa dꞌa e chon̈abꞌ, palta ataꞌ ol vacꞌbꞌat cꞌacꞌal yabꞌil, icha chiꞌ ol aj e can dꞌa yalan̈ yuj ebꞌ vin̈ eyajcꞌol chiꞌ.

26 Ayic ol vicꞌanemta yel e vael, lajun̈van̈ val ebꞌ ix ix, junn̈ej ol sbꞌo svael dꞌa junoc cꞌacꞌ. Axon̈ej dꞌa echlabꞌil ol aj yecꞌ e vael chiꞌ dꞌa e patic. Ol ex vaoc, palta man̈ ol ex bꞌudꞌjoclaj.

27 Vachꞌchom ix eyil juntzan̈ yaelal chiꞌ, palta tato an̈ejaꞌ max e na e bꞌa, an̈ejaꞌ tze pitejn̈ej e bꞌa, 28 a in pax tic ol vacꞌ yovalil dꞌayex yedꞌ val yoval in cꞌool. Masn̈ej ol qꞌuechaan̈ eyaelal vuuj yuj e mul. 29 Ichato val chiꞌ ol e chianbꞌat ebꞌ eyuninal yedꞌ ebꞌ eyisil. 30 Ol in pojem juntzan̈ lugar bꞌaj tzex och ejmelal dꞌa e diosal, ol in macꞌpoj eyaltar yic incienso. Ol in molbꞌejqꞌue bꞌulan e nivanil dꞌa yibꞌan̈ juntzan̈ e diosal man̈ pitzanoc chiꞌ, yujto ol ex in chaqueli. 31 Ol laj in jucanbꞌat e chon̈abꞌ yedꞌ spatil e diosal chiꞌ. Man̈xo ol in tzalaj yuj sucꞌuqꞌuial sjabꞌ e silabꞌ.

32 Ol vacꞌ lajvoquem e chon̈abꞌ chiꞌ, axo ebꞌ ajcꞌol ol jacan cajan dꞌay, ol sat scꞌol ebꞌ yilan jun chiꞌ. 33 Ol ex vacꞌan saclem dꞌa scal masanil nación. Tzacꞌan vespada dꞌa e patic ol ex bꞌatoc. A e chon̈abꞌ chiꞌ, cuseltac ol ajcanoc, xivcꞌolaltac ol aj sjuvicanbꞌati. 34-35 Ichato val chiꞌ vachꞌ ol aj scan lum schꞌocojil dꞌa masanil tiempo ayic ayextoecꞌ dꞌa juntzan̈xo nación ayoch ajcꞌolal dꞌayex chiꞌ. Icha val chiꞌ ol aj yicꞌancan yip luum, icha stiempoal to maj yicꞌ yip lum eyuj dꞌa yalan̈taxo ayic ayex ecꞌ cajan taꞌ.

36 A ebꞌ eyin̈tilal pitzanto bꞌaj ay slugar ebꞌ eyajcꞌol chiꞌ, ol vacꞌ val och xivcꞌolal dꞌa yibꞌan̈ ebꞌ. Ol el lemnaj ebꞌ ayic ol yabꞌan ebꞌ yem cꞌotnaj junoc teꞌ xil teꞌ. Ol el ebꞌ ichato ay junoc mach tzacꞌanoch yedꞌ espada dꞌa spatic ebꞌ. Toxon̈ej ol comon telvoc ebꞌ, vachꞌchom malaj mach spechan ebꞌ. 37 Ol comon telvocbꞌat junjun ebꞌ, ichato van yel ebꞌ dꞌa oval, vachꞌchom malaj mach spechan ebꞌ. Man̈xalaj junoc ebꞌ ol to stecꞌbꞌej sbꞌa dꞌa yichan̈ ebꞌ ajcꞌool. 38 Ol lajvoquem ebꞌ dꞌa scaltac juntzan̈ nación chiꞌ, ichato a slugar ebꞌ ajcꞌol chiꞌ ol satanel ebꞌ. 39 A mach dꞌa scal ebꞌ eyin̈tilal pitzantocanecꞌ dꞌa schon̈abꞌ ebꞌ eyajcꞌol chiꞌ, ataꞌ ol cham ebꞌ yujn̈ej schucal, yuj pax smul ebꞌ smam yicham ebꞌ.

40-41 Ayic toxo ix in och ajcꞌolal dꞌayex chiꞌ, ayic toxo pax ex vacꞌcanbꞌat dꞌa schon̈abꞌ ebꞌ eyajcꞌool, yujto ix e pitej e bꞌa dꞌayin, tato ataꞌ sna sbꞌa scꞌol ebꞌ eyin̈tilal bꞌaj ix spitej sbꞌa ebꞌ chiꞌ dꞌayin, tato syaqꞌuem sbꞌa ebꞌ dꞌa vichan̈ yic syalanqꞌueta smul ebꞌ yedꞌ e mul a ex tic, 42 tato icha chiꞌ, ol in naancot in trato vacꞌnac to ol vacꞌ lum luum dꞌa vin̈aj Jacob, dꞌa vin̈aj Isaac yedꞌ dꞌa vin̈aj Abraham. 43 Palta a dꞌa yalan̈to chiꞌ, ol ex el dꞌa sat e luum chiꞌ. Ol can tzꞌinan luum, ol yicꞌan yip luum ayic man̈ ex ayoc ecꞌ taꞌ. Tzꞌacan ol aj e tupan el e mul, yujto ix e patiquejel in bꞌeybꞌal yedꞌ in checnabꞌil.

44 Vachꞌchom icha chiꞌ tzex vutej, ayic ayecꞌ ebꞌ eyin̈tilal dꞌa schon̈abꞌ ebꞌ yajcꞌol ebꞌ chiꞌ, man̈ ol in patiquejel-laj ebꞌ. Man̈ ol in satel-laj ebꞌ yic man̈ ol lajvoquecꞌ in trato ix vacꞌ yedꞌ ebꞌ yujto a in Jehová in, sDiosal in ebꞌ. 45 Axo ol ajoc to yuj svachꞌiloc ebꞌ, ol in nacot in trato ix in bꞌo eyedꞌoc ayic ix ex vicꞌanelta dꞌa Egipto. Dꞌa val yichan̈ juntzan̈xo chon̈abꞌ ix ex viqꞌuelta, yic vachꞌ tzin och e Diosaloc. A in ton Jehová in svalaꞌ, xchi Jehová dꞌa vin̈aj Moisés chiꞌ.

46 Aton juntzan̈ bꞌeybꞌal tic, checnabꞌil yedꞌ cꞌaybꞌubꞌal ix yacꞌ Jehová dꞌa jolom vitz Sinaí dꞌa vin̈aj Moisés yic scꞌanabꞌajan ebꞌ chon̈abꞌ israel.