2 Al juntzan̈ tic dꞌa ebꞌ etisraelal: Tato ay mach tzꞌacꞌan stiꞌ yacꞌan junoc anima dꞌayin Jehová in tic, palta snibꞌej smananel jun anima chiꞌ, yovalil syacꞌ stojol, stupuꞌ icha yalan jun lista tic, 3-4 icha echlabꞌ scꞌanchaj dꞌa in cajnubꞌ: A ebꞌ 20 abꞌil sqꞌuinal masanto dꞌa 60 abꞌil, tato vinac, yovalil tzꞌacꞌji 50 siclo qꞌuen plata stojoloc. Tato ix, 30 siclo plata syacꞌaꞌ. 5 Axo yuj ebꞌ oyeꞌ abꞌil sqꞌuinal masanto dꞌa 20, tato vinac, 20 siclo qꞌuen plata syacꞌaꞌ. Tato ix jun, 10 siclo qꞌuen syacꞌaꞌ. 6 Axo yuj ebꞌ unin jun ujal sqꞌuinal masanto dꞌa oyeꞌ abꞌil, tato vinac, oyeꞌ siclo qꞌuen plata syacꞌaꞌ. Tato ix jun, oxeꞌ siclo qꞌuen syacꞌaꞌ. 7 Axo yuj ebꞌ icham anima ecꞌxo dꞌa 60 abꞌil, tato vinac, 15 siclo qꞌuen plata syacꞌaꞌ, tato ix jun, 10 siclo qꞌuen syacꞌaꞌ. 8 Tato ay junoc anima yelxo val mebꞌaꞌ jun, max yal-laj yacꞌan icha sbꞌisul qꞌuen to chequel yaj chiꞌ, tzꞌicꞌchajcot dꞌa yichan̈ junoc vin̈ sacerdote, snaji jantac val syal yacꞌani.

9 Axo pax yuj nocꞌ nocꞌ to tzꞌacꞌjitaxon silabꞌil dꞌayin, masanil nocꞌ tzꞌacꞌji dꞌayin chiꞌ, chequel tzꞌajcan nocꞌ. 10 Max yal-laj sqꞌuexji nocꞌ yedꞌ junocxo nocꞌ, vachꞌchom vachꞌ nocꞌ, ma chuctac val nocꞌ. Palta tato sqꞌuexji nocꞌ, a nocꞌ sqꞌuexul chiꞌ, scanxon̈ej nocꞌ yedꞌ nocꞌ chequeltaxon yaj chiꞌ.

11 Axo pax yuj junoc nocꞌ nocꞌ man̈ vachꞌoctaxon yoch silabꞌil dꞌayin jun, a nocꞌ chiꞌ tzꞌicꞌjicot dꞌa junoc vin̈ sacerdote, 12 yic vachꞌ snaji jantac stojol nocꞌ, ato syalaꞌ chajtil yilji nocꞌ. Icha stojol nocꞌ ix naji yuj vin̈ sacerdote chiꞌ, ichan̈ej chiꞌ tzꞌajcan stojol nocꞌ yic schon̈chaj yuj yochcan stojol nocꞌ yicoc in cajnubꞌ. 13 Tato an̈ejaꞌ mach ay yic nocꞌ chiꞌ sgana smananpaxel nocꞌ jun, yovalil syacꞌ stojol nocꞌ nabꞌilxo chiꞌ, syacꞌan jabꞌocxo más dꞌa yibꞌan̈ stojol nocꞌ chiꞌ. 14 Tato ay mach syacꞌ spat dꞌayin, tato vachꞌ yaji, mato chuctac val yaji, a junoc vin̈ sacerdote snaani jantac val stojol. Icha chiꞌ tzꞌajcan stojol chiꞌ dꞌa juneln̈ej. 15 Palta tato a mach ay yic jun pat chiꞌ sgana smananeli, yovalil syacꞌ jabꞌocxo más dꞌa yibꞌan̈ icha stojol ix najican chiꞌ, ichato chiꞌ syicꞌanxi spat chiꞌ.

16 Tato ay junoc mach syacꞌ junoc macan̈ sluum dꞌayin, a stojol lum luum chiꞌ snaji, ato aꞌ jantac sat tas tzꞌel dꞌa sat luum. Tato bꞌalun̈eꞌ arroba ixim cebada tzꞌelta dꞌa luum, 50 siclo plata stojol luum.^* 17 Tato tzꞌacꞌji lum luum chiꞌ dꞌa yol yabꞌilal yoch qꞌuin̈ yic tzꞌel tas dꞌa libre, scanxon̈ej stojol lum icha ix aj snajican chiꞌ. 18 Palta tato ayic toxo ix lajviecꞌ jun abꞌil chiꞌ tzꞌacꞌji luum, a vin̈ sacerdote syal snaani jantac qꞌuen plata syal yacꞌji. Tzꞌicꞌjiemta jabꞌoc stojol luum, ato syalaꞌ jayeto abꞌil yic ol jax junxo abꞌil qꞌuin̈ chiꞌ.

19 Tato a junoc mach ix yacꞌ slum chiꞌ dꞌayin, sgana smananpaxeli, yovalil syacꞌ jabꞌocxo más dꞌa yibꞌan̈ icha stojol nabꞌilcani. Ichato chiꞌ syal yicꞌanxican sluum chiꞌ. 20 Tato max smanel lum mach ix acꞌan chiꞌ, palta to schon̈bꞌat lum dꞌa junocxo anima, tato icha chiꞌ, maxtzac yal smananxiel luum. 21 Ayic scan lum luum chiꞌ dꞌa libre dꞌa yabꞌilal e chaan qꞌuin̈ yic tzꞌel tas dꞌa libre, a jun lum chiꞌ, vic tzꞌajcan luum, axo ebꞌ sacerdote smacbꞌenancan luum.

22 Tato ay mach syacꞌ stiꞌ yacꞌan junoc lum luum dꞌayin to manbꞌil yuuj, man̈ smacbꞌenoctaxon yaji, 23 a junoc vin̈ sacerdote snaan stojol yedꞌ jun anima chiꞌ masanto sjax yabꞌilal qꞌuin̈ yic tzꞌel tas dꞌa libre. A dꞌa jun cꞌu chiꞌ syacꞌ stojol lum jun anima chiꞌ, ato aꞌ jantac ix aj snaji, tzꞌochcan qꞌuen tumin chiꞌ vicoc. 24 Axo yic sjax jun abꞌil chiꞌ, smeltzajxi lum dꞌa mach ix chon̈an chiꞌ, syalelcꞌochi aton jun mach aytaxon yic luum.

25 A stojol junoc tas sna ebꞌ sacerdote stupchaj icha qꞌuen tumin scꞌanchaj bꞌaj ay in cajnubꞌ. 20 geras yalil junjun siclo qꞌuen plata.

26 A sbꞌabꞌel yuneꞌ nocꞌ vacax, ma nocꞌ calnel, ma nocꞌ chiva, victaxon yaj a in Jehová in tic. Malaj mach syal yacꞌan juntzan̈ nocꞌ chiꞌ yofrendaoc dꞌayin yujto a sbꞌabꞌel yuneꞌ nocꞌ victaxon yaji. 27 Tato a sbꞌabꞌel yuneꞌ junoc nocꞌ to man̈ vachꞌoc icha yalan ley, syal smanjixiel nocꞌ yuj mach tzꞌacꞌan chiꞌ, ato syal jantac stojol nocꞌ ix naji, syacꞌ jabꞌocxo más dꞌa yibꞌan̈ icha stojol chiꞌ. Tato man̈oc mach ay yic nocꞌ chiꞌ smananeli, an̈ejaꞌ icha stojol nocꞌ nabꞌilxo chiꞌ, syal schon̈jiel yuj ebꞌ sacerdote.

28 Yaln̈ej tas tzꞌacꞌji dꞌayin dꞌa juneln̈ej, junoc anima, ma junoc nocꞌ molbꞌetzal nocꞌ, ma junoc lum luum to smacbꞌentaxon yaj jun mach tzꞌacꞌan chiꞌ, ma junocxo tasi, max yal-laj schon̈chaji, max yalpax smanjiel yuj mach ix acꞌani. Vicxo yaj dꞌa juneln̈ej. 29 Axo pax junoc anima toxonton ayoch chamel dꞌa yibꞌan̈, max yal-laj smanjieli. A jun anima chiꞌ yovalil tzꞌochxon̈ej chamel chiꞌ dꞌa yibꞌan̈.

30 A sdiezmoal sat masanil tas tzꞌavchaj dꞌa sat lum luum tic, vachꞌchom sat ixim, ma sat te teꞌ, victaxon yaji. 31 Tato ay junoc mach sgana smananel jun diezmo chiꞌ, yovalil syacꞌ jabꞌocxo más dꞌa yibꞌan̈ icha stojol chiꞌ.

32 Jun dꞌa lajlajun̈van̈ nocꞌ vacax, ma nocꞌ calnel, ma nocꞌ chiva, aton nocꞌ chiꞌ scan dꞌa diezmoal dꞌayin tato vachꞌ nocꞌ, ma ay spaltail nocꞌ. 33 Max yal-laj sicꞌlaj nocꞌ, ma sqꞌuexchaj nocꞌ yedꞌ junocxo nocꞌ chꞌoc yeli. Tato ay mach sgana sqꞌuexan nocꞌ, a nocꞌ bꞌabꞌel chiꞌ yedꞌ pax nocꞌ tzꞌacꞌji sqꞌuexuloc nocꞌ chiꞌ, scanxon̈ej nocꞌ schavan̈il. Max yalpaxlaj smanjiel nocꞌ, xchi Jehová dꞌa vin̈aj Moisés chiꞌ.

34 A dꞌa jolom vitz Sinaí ix yacꞌ juntzan̈ checnabꞌil tic Jehová dꞌa vin̈aj Moisés chiꞌ, yic chon̈abꞌ Israel yaji.