2 Al masanil juntzan̈ tic dꞌa ebꞌ etisraelal: Ayic ayexxo ecꞌ dꞌa sat lum luum ol vacꞌ dꞌayex chiꞌ, yovalil ol yicꞌ yip luum, yic tzin eyicꞌchaan̈ a in Jehová in tic. 3 An̈ej vaqueꞌ abꞌil tzex munlaj dꞌa sat e luum, axo dꞌa vaqueꞌ abꞌil chiꞌ syal e mesan teꞌ eyuva, tze molan sat. 4 Axo dꞌa yuquil abꞌil, yovalil scan lum yicꞌ yip sat yuj in eyicꞌanchaan̈. Malaj jabꞌoc tas tzeyavej dꞌa jun abꞌil chiꞌ, max yal-laj e mesan teꞌ eyuva. 5 Max yal-laj e jochanqꞌue vaan ixim trigo munil sqꞌuibꞌi, ayic toxo ix ecꞌ stiempoal jochoj trigo. Max yalpaxlaj e molan sat teꞌ eyuva chiꞌ to maj e mesaꞌ, yujto syicꞌ yip lum dꞌa jun abꞌil chiꞌ. 6 Masanil tastac sqꞌuibꞌ dꞌa sat lum dꞌa jun abꞌil yic syicꞌ yip lum chiꞌ, syal e vaani, syalpax svaan ebꞌ anima eyedꞌoc, aton ebꞌ vin̈ e checabꞌ, ebꞌ ix e checabꞌ yedꞌ ebꞌ smunlaj eyedꞌoc yedꞌ ebꞌ chꞌoc chon̈abꞌil ayecꞌ dꞌa e cal, 7 yedꞌ pax nocꞌ e molbꞌetzal nocꞌ yedꞌ nocꞌ caltacteꞌal nocꞌ ay dꞌa jun lugar chiꞌ. Yuj chiꞌ, masanil tas sqꞌuibꞌ dꞌa sat lum dꞌa jun abꞌil chiꞌ, aꞌ ol e va yedꞌ nocꞌ nocꞌ chiꞌ.

8 Uquel sbꞌischaj dꞌa uctac abꞌil. A uqueꞌ abꞌil chiꞌ sbꞌischaj dꞌa uquel, tzꞌelcꞌoch dꞌa 49 abꞌil. 9 Axo dꞌa slajun̈ilxo cꞌual yoch yuquil uj, aton jun cꞌu ayic tzꞌacꞌji tup mul, ataꞌ spuji qꞌuen trompeta dꞌa masanil yol e chon̈abꞌ. 10 Axo abꞌil 50, a yabꞌilal yoch qꞌuin̈ yic tzꞌel masanil tas dꞌa libre. A dꞌa jun abꞌil chiꞌ tzꞌalchajel yuj yel anima masanil dꞌa libre dꞌa yol e chon̈abꞌ, aton ebꞌ schon̈nac sbꞌa checabꞌvumal, yic vachꞌ spaxta ebꞌ smasanil dꞌa scal scꞌabꞌ yoc. An̈ejtonaꞌ ebꞌ schon̈naquel sluum scanxi lum yicoc ebꞌ. 11 Axo jun abꞌil 50 chiꞌ eyic yaj a ex tic, yuj eyel dꞌa libre. A dꞌa jun abꞌil chiꞌ, malaj tas tzeyavej, max e jochqꞌuelaj vaan ixim trigo ton̈ej sqꞌuibꞌchaan̈ dꞌa ichn̈ej taꞌ. Man̈ e mes teꞌ eyuva, man̈ e molpax sat teꞌ. 12 Nivanocabꞌ yelcꞌoch jun abꞌil chiꞌ dꞌa yol e sat. A tastac munil syacꞌ dꞌa lum luum chiꞌ tze vaꞌa.

13 Ayic scꞌoch jun abꞌil chiꞌ, junjun ex tze chaxi e lum e chon̈naquel chiꞌ. 14 Yuj chiꞌ, tato ayex tze chon̈oꞌ, ma tze man e lum dꞌa junoc eyetanimail, man̈ e naꞌ eyacꞌ ganar dꞌa spatic jun lum chiꞌ junjun ex. 15 A mach smanan chiꞌ, yovalil stupuꞌ, ato syalaꞌ jantac tiempoal ix ecꞌbꞌat yabꞌilal yoch qꞌuin̈ yic tzꞌel tas dꞌa libre chiꞌ. Axo mach schon̈vaj chiꞌ, yovalil scha stojol luum, ato syalaꞌ jayeto abꞌil ol molchaj sat tas avabꞌil yic ol jax junxo abꞌil yic tzꞌel tas dꞌa libre chiꞌ. 16 Ato syalaꞌ, tato nivanto yabꞌilal ol molchaj sat avbꞌen chiꞌ, icha chiꞌ ol aj stupchaj dꞌay. Tato quenxon̈ej yabꞌilal jun, quenxon̈ej pax stojol lum ol acꞌchaj dꞌay, yujto a sat avbꞌen chiꞌ schon̈chaji, ato syalaꞌ jayeto abꞌil smolchaji.

17 Man̈ e comon sayej chajtil tzꞌaj eyacꞌan ganar dꞌa spatic ebꞌ eyetanimail. Palta tze chꞌoxeli to ay velcꞌoch dꞌa yol e sat, yujto a in ton Jehová e Diosal in. 18 Scham val e cꞌanabꞌajan in checnabꞌil yedꞌ e bꞌeybꞌalan in bꞌeybꞌal tic. Tato ol e cꞌanabꞌajej, juncꞌolal ol ex ecꞌ dꞌa sat lum luum chiꞌ. 19 Te vachꞌ ol aj sat tas ol eyavej dꞌa luum. Tzalajcꞌolal ol ex cajnaj dꞌa sat luum, ol eyabꞌlej sat tas ol eyavej chiꞌ masanto ol ex bꞌudꞌjoc.

20 Talaj ol eyalaꞌ: ¿Tasto ol cabꞌlej dꞌa yuquil abꞌil chiꞌ, tato man̈ ol on̈ avalvoc, tato man̈ ol yalpax co molan sat tas avabꞌil chiꞌ? ta xe chi. 21 Man̈ eyacꞌ pensar, yujto ol vaqꞌuem in vachꞌcꞌolal dꞌa yibꞌan̈ tas tzeyavej dꞌa svaquil abꞌil chiꞌ. Ol ste aqꞌuej sat, yuj chiꞌ a jun chiꞌ cꞌocbꞌil syabꞌ eyabꞌlan dꞌa oxeoc abꞌil, 22 yuj chiꞌ ol eyabꞌlej sat tas tzeyavej ol e molcan chiꞌ, yacbꞌan tzex avvi dꞌa svajxaquil abꞌil. Olto eyabꞌlej tas molbꞌabꞌil chiꞌ eyuj yacbꞌan tzꞌelul sat tas tzeyavej dꞌa sbꞌalun̈il abꞌil.

23 A lum luum chiꞌ, max yal-laj e chon̈anel lum dꞌa juneln̈ej, yujto vic luum. A ex tic ton̈ej paxyalvum eyaj dꞌa sat luum, majan lum eyaj dꞌayin. 24 Tato ay junoc mach schon̈el sluum, syal smananxiel slum chiꞌ tato syal yuuj. 25 Tato ay junoc eyetchon̈abꞌ slajviel masanil tas ay dꞌay, yuj chiꞌ schon̈bꞌat slum dꞌa junocxo, a junoc te ayto yuj sbꞌa yedꞌ jun schon̈an slum chiꞌ syal smananxiel jun lum chiꞌ bꞌaj schon̈nac chiꞌ.

26 Palta tato ay junoc mach man̈xalaj junoc scꞌabꞌ yoc syal smananel sluum chiꞌ, tato smolchaj stumin schꞌocoj, syal smananxiel sluum chiꞌ. 27 An̈ej to snaji, jantacxo stiempoal schon̈anel luum, syacꞌanxi meltzaj jantac qꞌuen tumin dꞌa vin̈ manjinac luum chiꞌ, ato syalaꞌ jantacto tiempo ayic ol ja jun abꞌil yic tzꞌoch qꞌuin̈ yel tastac dꞌa libre, syicꞌanxi slum chiꞌ. 28 Palta tato max aj qꞌuen tumin chiꞌ yuuj yic smananxiel smacbꞌen chiꞌ, a lum sluum chiꞌ scann̈ej lum dꞌa yol scꞌabꞌ jun mach ix manan el chiꞌ, masanto scꞌoch junxo yabꞌilal yoch qꞌuin̈ yic tzꞌel tas dꞌa libre. Ato taꞌ librexo luum, syicꞌanxican lum vin̈ ix chon̈an chiꞌ.

29 Tato ay mach schon̈an junoc spat dꞌa yol nivac chon̈abꞌ ayoch smuroal, syal smananxieli ayic manto el-laj yabꞌilal schon̈aneli. 30 Palta tato maxto yal-laj smananel jun pat chiꞌ ayic manto cꞌoch jun abꞌil chiꞌ, a jun pat chiꞌ, scanxon̈ej dꞌa vin̈ ix manan chiꞌ dꞌa juneln̈ej yedꞌ dꞌa ebꞌ yin̈tilal. Maxtzac yal-laj yactajel dꞌa yabꞌilal qꞌuin̈ yic tzꞌel tas dꞌa libre. 31 A pax teꞌ pat bꞌaj man̈ ayococh smuroal chon̈abꞌ, lajann̈ej ichoc comon luum. Syal smanjixieli, ma yactajel dꞌa yabꞌilal qꞌuin̈ chiꞌ.

32 Axo ebꞌ levita, syal smananxiel spat ebꞌ dꞌa yaln̈ej tas tiempoal vachꞌchom ay dꞌa yol smuroal schon̈abꞌ ebꞌ. 33 Tato ay junoc levita max yal-laj smananxiel spat dꞌa yol smacbꞌen schon̈abꞌ, axo yic sjax yabꞌilal yoch qꞌuin̈ chiꞌ, syal yicꞌanxican spat chiꞌ, yujto a ebꞌ levita chiꞌ an̈ej spat ebꞌ ayoch smacbꞌenoc dꞌa yoltac e chon̈abꞌ. 34 A lum luum bꞌaj sva scalnel ebꞌ levita dꞌa spatictac chon̈abꞌ chiꞌ, max yal-laj schon̈anel ebꞌ, yujto svalabꞌ scalnel ebꞌ yajcan yuj schon̈abꞌ.

35 Tato ay junoc ebꞌ eyetchon̈abꞌ cajan dꞌa e lacꞌanil man̈xalaj jabꞌoc tas ay dꞌay, yovalil tzex colvaj dꞌay yic vachꞌ ayn̈ejecꞌ dꞌa e cal, icha tzꞌaj e colvaj dꞌa junoc chꞌoc chon̈abꞌil sbꞌeyecꞌ dꞌa e cal. 36 Man̈ e cꞌan yuneꞌ e tumin, ma stupil tastac ix eyacꞌ majanil dꞌa jun eyetchon̈abꞌ chiꞌ. An̈ej to tze chꞌoxoꞌ to ay velcꞌoch dꞌa yol e sat, yic vachꞌ ayn̈ejecꞌ jun eyetchon̈abꞌ chiꞌ eyedꞌoc. 37 Man̈ e cꞌan yuneꞌ qꞌuen tumin tzeyacꞌ majanil dꞌa jun eyetchon̈abꞌ chiꞌ, man̈ e macꞌpaxqꞌue stojol vael uqꞌuel tzeyacꞌ sqꞌuexaꞌ. 38 Yujto a in Jehová e Diosal in svalaꞌ, a in ix ex viqꞌuelta dꞌa Egipto yic svacꞌ lum Canaán dꞌayex yic tzin och e Diosaloc.

39 Tato ay junoc eyetchon̈abꞌ ayecꞌ eyedꞌoc, man̈xa jabꞌoc tas ay dꞌay, yuj chiꞌ schon̈ sbꞌa dꞌayex, man̈ eyutoc icha junoc e checabꞌ chꞌoc chon̈abꞌil, 40 palta ichaocabꞌ junoc munlajvum tzeyutej, ma icha junoc ton̈ej sbꞌeyeqꞌui. Syal smunlaj eyedꞌoc masanto sjax yabꞌilal yoch qꞌuin̈ yic tzꞌel tas dꞌa libre. 41 Slajvi chi, tzaxo yal yel yedꞌ yuninal dꞌa yol e pat, spax dꞌa scal ebꞌ scꞌabꞌ yoc bꞌaj aytaxon sluum. 42 Yujto a ex tic, in checabꞌ eyaji. A in ix ex viqꞌuelta dꞌa Egipto, yuj chiꞌ man̈ smojoc to tzex chon̈chajel dꞌa checabꞌvumal. 43 Man̈ te yajaloc tzeyutej e bꞌa dꞌa ebꞌ eyetisraelal schon̈ sbꞌa dꞌayex. An̈ej to ayocabꞌ velcꞌoch dꞌa yol e sat a in e Diosal in tic.

44 Tato e gana tze man e checabꞌ, vinac ma ix, syal e manan dꞌa scal juntzan̈xo nación dꞌa e lacꞌanil. 45 Syalpax e manan ebꞌ chꞌoc nacional ayecꞌ dꞌa e cal, ma yuninal ebꞌ ix alji dꞌa e cal, syal e manan ebꞌ eyicoc dꞌa juneln̈ej. 46 Axo yic tzex chami scan ebꞌ yicoc ebꞌ eyuninal. Syal yoch ebꞌ chiꞌ schecabꞌoc ebꞌ, palta malaj junoc eyetisraelal tic syal eyacꞌanoch e bꞌa yajalil dꞌa yibꞌan̈, yujto eyetchon̈abꞌ ebꞌ.

47 Tato ay junoc chꞌoc chon̈abꞌil, ma junoc anima ayecꞌ dꞌa e cal tic tzꞌoch bꞌeyumal, axo junoc eyetchon̈abꞌ junn̈ej cajan yedꞌoc tzꞌoch mebꞌail, schon̈an sbꞌa dꞌa jun chꞌoc chon̈abꞌil ayecꞌ dꞌa slacꞌanil chiꞌ, ma dꞌa junocxo ayto yuj sbꞌa yedꞌ jun chꞌoc chon̈abꞌil chiꞌ, 48 syal smananxiel sbꞌa, mato smanjiel yuj junoc scꞌabꞌ yoc, 49 ma yuj junoc to ayto yuj sbꞌa yedꞌoc. Tato tzaxo techaj yuj jun, syal smananel sbꞌa schꞌocojil. 50 Syicꞌ scuenta ebꞌ dꞌa yabꞌilal ayic ix schon̈anel sbꞌa chiꞌ, masanto sjax yabꞌilal qꞌuin̈ yic tzꞌel tas dꞌa libre. A stojol tzꞌacꞌji, ato syalaꞌ jantacxo yabꞌilal chiꞌ. Icha chiꞌ tzꞌaj yicꞌanpax scuenta jantac tumin tzꞌoch dꞌa spatic smunlajel, icha stojol scꞌu ebꞌ munlajvum. 51 Tato ayto scꞌochxi yabꞌilal chiꞌ jun, smananxiel sbꞌa, syacꞌan meltzaj jabꞌocxo qꞌuen tumin, ato syalaꞌ jantac ix schaꞌa ayic ix schon̈anel sbꞌa chiꞌ. 52 Palta tato quenxon̈ej tiempo scꞌoch yabꞌilal yic qꞌuin̈ chiꞌ, axon̈ej jabꞌxo chiꞌ stupuꞌ. 53 Lajanocabꞌ tzꞌutaj icha junoc ebꞌ smunlaj dꞌa yabꞌilal dꞌa junoc patrón, icha pax chiꞌ tzꞌutaj yuj jun chꞌoc chon̈abꞌil chiꞌ. Man̈ e cha ixtaj jun eyetchon̈abꞌ chiꞌ dꞌa eyichan̈.

54 Tato max yal smananel sbꞌa jun, axo yic scꞌoch yabꞌilal qꞌuin̈ chiꞌ, ataꞌ tzꞌactajel yedꞌ ebꞌ yuninal. 55 Yujto in checabꞌ eyaj a ex israel ex tic, a in val ix ex viqꞌuelta dꞌa Egipto. A in ton Jehová e Diosal in svalaꞌ, xchi Jehová dꞌa vin̈aj Moisés chiꞌ.