A aceite yic candil dꞌa scajnubꞌ Dios
24
Ix yalanpax Jehová dꞌa vin̈aj Moisés chiꞌ: 2 Al dꞌa ebꞌ etisraelal to syicꞌcot aceite ebꞌ dꞌayach, aton aceite te vachꞌ yic sat teꞌ olivo yic vachꞌ ayn̈ejoch scꞌacꞌal candil. 3 Axo vin̈aj Aarón sbꞌoanoch scꞌacꞌal, yic vachꞌ ayn̈ejoch scꞌacꞌal tzꞌecꞌ acꞌval dꞌa vichan̈ bꞌaj ay in cajnubꞌ bꞌaj tzin chꞌox in bꞌa, dꞌa yichan̈elta cꞌapac cortina bꞌaj ay scaxail in trato. A jun tic ley tzꞌajcan dꞌayex dꞌa masanil tiempo. 4 Vachꞌ tzꞌaj sbꞌojioch juntzan̈ candil chiꞌ dꞌa vichan̈ dꞌa yibꞌan̈ sbꞌachnubꞌal nabꞌa oro.A ixim pan ayoch dꞌa yichan̈ Jehová
5 Tzeyicꞌcot ixim harina te vachꞌ, sbꞌo lajchaveoc ixim pan, chan̈eꞌ libra ixim harina tzꞌoch dꞌa junjun ixim. 6 Slajvi chiꞌ tzꞌacꞌchajqꞌue ixim dꞌa sat jun mexa nabꞌa oro dꞌa vichan̈, cha tzol tzꞌajqꞌue latzꞌan ixim, vactac ixim dꞌa junjun latzꞌan. 7 Tzacꞌanpaxem incienso te vachꞌ dꞌa yibꞌan̈ junjun latzꞌan ixim pan chiꞌ. A incienso chiꞌ sn̈usjitzꞌa dꞌa vichan̈, yic schꞌoxani to vic yaj ixim pan chiꞌ. 8 Dꞌa junjun cꞌual icꞌoj ip tzꞌacꞌjiem ixim pan chiꞌ dꞌa vichan̈, yuj scꞌanabꞌajan ebꞌ etchon̈abꞌ israel in trato eyedꞌoc dꞌa masanil tiempo. Yovalil a ixim qꞌuixin tzꞌacꞌjiemi. 9 Axo juntzan̈ ixim pan tzꞌicꞌjiel chiꞌ, yic vin̈aj Aarón yedꞌ ebꞌ yin̈tilal yaj ixim dꞌa masanil tiempo. A ebꞌ chiꞌ svaan ixim pan chiꞌ dꞌa junoc lugar to vic yaji, yujto te nivan yelcꞌoch ixim dꞌa scal juntzan̈xo silabꞌ yictaxon ebꞌ sacerdote tzꞌicꞌjiel dꞌa juntzan̈ ofrenda sn̈usjitzꞌa dꞌa vichan̈, xchi Jehová chiꞌ.
Scham ebꞌ tzꞌalan chuc dꞌa sbꞌi Dios
10-11 Ay jun vin̈ aljinac dꞌa scal ebꞌ israel chiꞌ, israel snun vin̈, axo smam vin̈ aj Egipto. Selomit sbꞌi ix snun vin̈ chiꞌ, yisil vin̈aj Dibri, yin̈tilal Dan. A jun vin̈ chiꞌ ix yacꞌ oval vin̈ yedꞌ jun vin̈ mero val israel dꞌa campamento. A dꞌa jun oval chiꞌ, a vin̈ yuneꞌ ix israel chiꞌ ix och smul vin̈ yujto ix yal chuc vin̈ dꞌa sbꞌi Jehová, yuj chiꞌ ix icꞌjicot vin̈ dꞌa yichan̈ vin̈aj Moisés. 12 Ix tan̈vaj vin̈ masanto ix yal Jehová tas yovalil tzꞌutaj vin̈. 13 Ix yalan Jehová dꞌa vin̈aj Moisés chiꞌ icha tic:
14 Iqꞌuequelta vin̈ chuc ix alan chiꞌ dꞌa yol campamento, axo masanil ebꞌ ix abꞌan tas ix yal vin̈ chiꞌ, yacꞌocabꞌqꞌue scꞌabꞌ ebꞌ dꞌa sjolom vin̈, axo masanil ebꞌ chon̈abꞌ sjulqꞌuenancham vin̈. 15-16 Al juntzan̈ tic dꞌa ebꞌ etisraelal: A mach tzꞌalan chuc dꞌa in bꞌi a in Jehová e Diosal in tic, tzꞌoch smul, yovalil scham yuj smul chiꞌ. Masanil ebꞌ yetchon̈abꞌ sjulanchamoc. Vachꞌchom chꞌoc chon̈abꞌil, ma eyetchon̈abꞌ, tato syal chuc dꞌa in bꞌi, yovalil tzꞌoch chamel dꞌa yibꞌan̈.
17 A mach smacꞌancham junoc yetanimail, yovalil tzꞌochpax chamel dꞌa yibꞌan̈.
18 A mach smacꞌancham nocꞌ smolbꞌetzal nocꞌ junocxo mach, yovalil an̈ejaꞌ nocꞌ nocꞌ chiꞌ tzꞌacꞌjipax sqꞌuexuloc.
19 A mach smacꞌan junoc yetanimail, tato tzꞌechnaj yuuj, icha tas syutej chiꞌ, icha chiꞌ tzꞌutajpaxi. 20 Tato sqꞌuichaj yuuj, yovalil smacꞌjipax qꞌuichajoc. Tato tzꞌelta yol sat yuuj, yovalil tzꞌelpaxcot yicoꞌ, tato tzꞌel ye junoc mach chiꞌ yuuj, yovalil tzꞌelpax yicoꞌ. Icha val tas syutej junoc anima chiꞌ, icha pax chiꞌ tzꞌutajxi.
21 A mach smacꞌancham nocꞌ smolbꞌetzal nocꞌ junocxo anima, yovalil syacꞌ sqꞌuexul nocꞌ. Palta a mach smacꞌancham junoc yetanimail, a jun chiꞌ yovalil schami.
22 An̈ejaꞌ jun ley tic tzꞌoch yopisio dꞌa ebꞌ chꞌoc chon̈abꞌil yedꞌ dꞌa ebꞌ chon̈abꞌ israel. A in Jehová e Diosal in svalaꞌ, xchi Jehová dꞌa vin̈aj Moisés chiꞌ.
23 Icha chiꞌ ix aj yalan juntzan̈ chiꞌ vin̈aj Moisés dꞌa ebꞌ yetisraelal, yuj chiꞌ ix icꞌjielta vin̈ ix alan chuc dꞌa sbꞌi Jehová chiꞌ yuj ebꞌ dꞌa spatiquel campamento. Ataꞌ ix julqꞌuenajcham vin̈. Ix scꞌanabꞌajej ebꞌ scꞌulan icha val ix aj yalan Jehová dꞌa vin̈aj Moisés chiꞌ.