A ticnaic, ol e cꞌanabꞌajej masanil tas scalcan tic dꞌayex. 2-4 Ayic ol ex cꞌaxpajecꞌ dꞌa aꞌ Jordán yic ol ex och dꞌa sat lum luum te yax sat ol yacꞌ Jehová co Diosal dꞌayex, icha ajnac yacꞌan stiꞌ dꞌa ebꞌ co mam quicham, tze bꞌocanqꞌue juntzan̈ qꞌuen nivac qꞌueen dꞌa yich lum vitz Ebal, tzeyacꞌanoch qꞌueen taan̈ dꞌa qꞌueen. Tze tzꞌibꞌancanoch masanil juntzan̈ cꞌaybꞌubꞌal svalcan tic dꞌayex dꞌa qꞌueen. Tze cꞌulej jun tic ayic ayexxoecꞌ taꞌ. 5-6 Tze bꞌoanpaxqꞌue junoc altar dꞌa Jehová co Diosal. A qꞌuen qꞌueen tzeyacꞌoch chiꞌ dꞌay, man̈ e macꞌpoj qꞌueen, man̈ e tzeypax tojolbꞌoc qꞌueen. A dꞌa yibꞌan̈ jun altar chiꞌ tze n̈ustzꞌa silabꞌ dꞌa Jehová co Diosal. 7 Tzeyacꞌanpax silabꞌ schꞌoxan e juncꞌolal yedꞌ co Diosal chiꞌ. Ataꞌ tzex va dꞌa tzalajcꞌolal dꞌa yichan̈ Jehová chiꞌ. 8 Bꞌat ta satcꞌolal eyuj e tzꞌibꞌancanoch masanil juntzan̈ checnabꞌil svalcan tic dꞌayex dꞌa juntzan̈ qꞌuen bꞌaj ol eyacꞌoch qꞌuen taan̈ chiꞌ. Te vachꞌ tzeyutej e tzꞌibꞌancanochi yic chequel, xchi vin̈aj Moisés chiꞌ.

9 A vin̈aj Moisés, ajun ebꞌ sacerdote yin̈tilal Leví yedꞌnac vin̈, ix yalanxi vin̈ dꞌa ebꞌ chon̈abꞌ chiꞌ icha tic:

Ex vetisraelal, numan tzex aji, abꞌec val tas ol valaꞌ: A ticnaic toxo on̈ och val schon̈abꞌoc Jehová co Diosal. 10 Yuj chiꞌ yovalil tze cꞌanabꞌajej juntzan̈ checnabꞌil yedꞌ juntzan̈ scꞌaybꞌubꞌal Jehová svalcanel tic dꞌayex, xchi vin̈.

11 An̈ejtonaꞌ dꞌa jun cꞌu chiꞌ ix yalpax jun checnabꞌil tic vin̈aj Moisés dꞌa ebꞌ yetchon̈abꞌ chiꞌ:

12 Ayic toxo ex cꞌaxpajecꞌ dꞌa aꞌ Jordán, a ebꞌ yin̈tilalcan Simeón, Leví, Judá, Isacar, José yedꞌ Benjamín, tzꞌaj ebꞌ dꞌa yich vitz Gerizim, yic syal vachꞌ lolonel ebꞌ dꞌa yibꞌan̈ ebꞌ chon̈abꞌ. 13 Axo pax ebꞌ yin̈tilalcan Rubén, Gad, Aser, Zabulón, Dan yedꞌ Neftalí, tzꞌaj ebꞌ dꞌa yich lum vitz Ebal yic syalan catabꞌ lolonel ebꞌ dꞌa yibꞌan̈ ebꞌ chon̈abꞌ. 14 Axo ebꞌ yin̈tilal Leví, te chaan̈ syal juntzan̈ lolonel tic ebꞌ dꞌa ebꞌ yetisraelal icha tic:

15 Catabꞌil mach sbꞌoan junoc yechel comon dios dꞌa te teꞌ, ma dꞌa qꞌuen qꞌueen, syacꞌanoch dꞌa junoc lugar cꞌubꞌeltac yic tzꞌoch ejmelal dꞌay. A juntzan̈ chiꞌ yajbꞌilel yuj Jehová, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

16 Catabꞌil mach malaj yelcꞌoch smam snun dꞌa yol sat, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

17 Catabꞌil mach sqꞌuexan stzꞌacan̈il sluum yic stoqꞌuecꞌ sluum junocxo mach, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

18 Catabꞌil mach tzꞌacꞌan musansatil junoc anima max ujilaj yilani, axo dꞌa chꞌoc bꞌeal scheccanbꞌati, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

19 Catabꞌil mach scꞌulan tas man̈ tojoloc dꞌa ebꞌ chꞌoc chon̈abꞌil, dꞌa ebꞌ unin man̈xa smam, ma dꞌa ebꞌ ix ix chamnac yetbꞌeyum, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

20 Catabꞌil mach smulan yedꞌ ix yetbꞌeyum smam, yujto a mach scꞌulan icha chiꞌ, syacꞌ qꞌuixvelal smam chiꞌ, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

21 Catabꞌil mach smulan yedꞌ nocꞌ nocꞌ, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

22 Catabꞌil mach smulan yedꞌ schabꞌil yanabꞌ, yanabꞌ yuj smam ma yuj snun, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

23 Catabꞌil mach smulan yedꞌ ix sn̈iꞌ, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

24 Catabꞌil mach smacꞌancham junoc yetanimail dꞌa elcꞌaltac, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

25 Catabꞌil mach schaan tumin yic smacꞌancham junoc anima malaj smul, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.

26 Catabꞌil mach max cꞌanabꞌajan masanil schecnabꞌil Dios, xcham ebꞌ. Axo masanil ebꞌ chon̈abꞌ chiꞌ tzꞌalani: Ujocabꞌi, xcham ebꞌ.