Ofrenda dꞌa bꞌabꞌel sat tas tzꞌavchaji
26
Ayic cajan exxo ecꞌ dꞌa sat lum luum ol yacꞌ Jehová co Diosal dꞌayex, 2 ayic tze molan bꞌabꞌel sat eyavbꞌen dꞌa luum, tzeyicꞌanbꞌat dꞌa yol junoc mooch dꞌa jun lugar sicꞌbꞌilel yuj Jehová yic tzꞌoch scajnubꞌoc. 3 Ataꞌ tzex cꞌoch dꞌa yichan̈ ebꞌ vin̈ ayoch sacerdoteal dꞌa jun tiempoal chiꞌ, tzeyalan icha tic: A ticnaic, scal dꞌa yichan̈ Jehová co Diosal to cajan on̈xo dꞌa sat lum luum yacꞌnac stiꞌ yacꞌan dꞌa ebꞌ co mam quicham, xe chi. 4 Axo junoc vin̈ sacerdote schaanecꞌ jun mooch tzeyicꞌbꞌat chiꞌ, syacꞌanoch vin̈ dꞌa yichan̈ altar. 5 Slajvi chiꞌ tzeyalan dꞌa yichan̈ Jehová co Diosal icha tic:A ebꞌ co mam quicham, arameo ebꞌ, jayvan̈n̈ej sbꞌey ebꞌ yecꞌnac ebꞌ. A yecꞌnac ebꞌ chiꞌ, ton̈ej sbꞌeyecꞌ ebꞌ dꞌa sat luum yedꞌ nocꞌ snocꞌ. Ijan chamnac ebꞌ yuj vejel, yuj chiꞌ bꞌatnac ebꞌ dꞌa Egipto yedꞌ jayvan̈ yuninal. Ataꞌ ochnac ebꞌ chon̈abꞌil, man̈xo jantacoc ajnac sbꞌisul ebꞌ, te ay smay ebꞌ.
6 Palta te ilbꞌajcꞌol utajnac ebꞌ yuj ebꞌ aj Egipto chiꞌ. Yilnac val syaelal ebꞌ ayic yacꞌjinacoch ebꞌ dꞌa munlajel te ya.
7 Yuj chiꞌ, yalnac sbꞌa ebꞌ dꞌa Jehová co Diosal, aton sDiosal ebꞌ co mam quicham to scolvaj yedꞌ ebꞌ. Yabꞌnac Jehová chiꞌ tas yalnac ebꞌ, yilannacpax munlajel te ya bꞌaj ayoch ebꞌ chiꞌ. Ilbꞌajcꞌol utajnac ebꞌ bꞌaj ayoch checabꞌvumal.
8 Schꞌoxannac spoder Dios to ayxo smay yilji, ayic yicꞌannac elta ebꞌ dꞌa Egipto chiꞌ. Satubꞌtac yilji tas schꞌoxnac, laj xivnac ebꞌ aj Egipto chiꞌ yuuj.
9 On̈ yicꞌancot dꞌa sat jun lum luum te yax sat tic.
10 Yuj chiꞌ jun, tic squicꞌcot bꞌabꞌel sat cavbꞌen dꞌa sat lum luum ix yacꞌ Jehová co Diosal dꞌayon̈, xe chi.
Slajvi eyalan juntzan̈ lolonel chiꞌ, tzeyacꞌanoch teꞌ mooch chiꞌ dꞌa yichan̈ Jehová co Diosal, tzex em cuman dꞌa yichan̈. 11 Slajvi chiꞌ tzex tzalaj val yedꞌ eyal eyuninal yuj masanil tas ix yacꞌ Jehová chiꞌ dꞌayex. Tzeyavtan cot ebꞌ levita yedꞌ ebꞌ chꞌoc chon̈abꞌil ayecꞌ dꞌa e cal.
A juntzan̈ Diezmo
12 A dꞌa junjun yoxil abꞌil, tzeyacꞌan sdiezmoal masanil tas tzeyicꞌ dꞌa tastac tzeyavej. Tzeyacꞌan dꞌa ebꞌ levita, dꞌa ebꞌ chꞌoc chon̈abꞌil ayecꞌ dꞌa e cal yedꞌ dꞌa ebꞌ mebꞌaꞌ unin yedꞌ ebꞌ ix ix chamnac yetbꞌeyum, yic vachꞌ ay tas sva ebꞌ dꞌa e cal. 13 Junjunex tzeyal dꞌa yichan̈ Jehová co Diosal icha tic:
Toxo ix vicꞌcanel dꞌa in pat masanil tas to ic yaji, aton dꞌa tas ix vicꞌ dꞌa in munlajel dꞌa sat lum luum tic. Toxo ix vicꞌpaxel yic ebꞌ levita yedꞌ yic ebꞌ chꞌoc chon̈abꞌil ayecꞌ dꞌa co cal, ebꞌ mebꞌaꞌ unin yedꞌ ebꞌ ix ix chamnac yetbꞌeyum. Toxo ix in cꞌanabꞌajej masanil tas ix alaꞌ, malaj junoc a checnabꞌil tic sbꞌat satcꞌolal vuuj. Malaj junoc to max in cꞌanabꞌajej.
14 Malaj val jabꞌoc juntzan̈ chiꞌ ix in va dꞌa scꞌual ayic ayin och dꞌa cuscꞌolal yuj chamel yedꞌ dꞌa scꞌual man̈ vachꞌoc vaj icha yalan ley. Maj valtejoch dꞌa ebꞌ chamnac. Ix in cꞌanabꞌajej masanil tas ix alaꞌ.
15 Ilon̈emta dꞌa satchaan̈, dꞌa lugar to ic yaji, acꞌ a vachꞌcꞌolal dꞌa quibꞌan̈ a on̈ a chon̈abꞌ Israel on̈ tic yedꞌ dꞌa sat lum luum te yax sat ix acꞌ dꞌayon̈ bꞌaj cajan on̈ tic, icha ajnac acꞌan a tiꞌ dꞌa ebꞌ co mam quicham, xe chi.
Yic Jehová yaj chon̈abꞌ Israel
16 A Jehová co Diosal ix alan masanil juntzan̈ checnabꞌil yic tze cꞌanabꞌajej yedꞌ e bꞌeybꞌalani. Tze cꞌanabꞌajej dꞌa smasanil e cꞌool yedꞌ dꞌa smasanil e pensar. 17 Toxo ix eyal ticnaic to a Jehová e Diosal yaji. Ix eyacꞌan e tiꞌ e cꞌanabꞌajani, e bꞌeybꞌalan schecnabꞌil, scꞌaybꞌubꞌal yedꞌ scachnabꞌil. 18 Axo pax Jehová tzꞌalani to a on̈ israel on̈ tic, schon̈abꞌon̈xo icha ajnac yalancani, yuj chiꞌ yovalil sco cꞌanabꞌajej schecnabꞌil. 19 A Jehová chiꞌ ol ex acꞌanoch dꞌa nivac chon̈abꞌil, ol ex bꞌinaj dꞌa vachꞌil, nivan ol aj eyelcꞌoch dꞌa yichan̈ juntzan̈xo nación sbꞌonac. Schon̈abꞌ ex paxi, sicꞌbꞌilexpaxel yuuj, icha ix aj yalani, xchi vin̈aj Moisés chiꞌ.