25
Tato ay chavan̈oc anima syacꞌ oval, yovalil sbꞌat ebꞌ dꞌa yichan̈ ebꞌ yajal, yic sbꞌo yaj yoval ebꞌ chiꞌ. 2 Tato a vin̈ ay smul chiꞌ smoj smacꞌji, syalan vin̈ juez to tzꞌecꞌ jichan vin̈ dꞌa sat luum dꞌa yichan̈. Smacꞌji vin̈ ay smul chiꞌ icha jantac smul chiꞌ. 3 Ayic smacꞌji vin̈ chiꞌ, max yal-laj yecꞌ dꞌa yibꞌan̈ 40 tzꞌuum tzꞌoch dꞌa vin̈. Tato tzꞌecꞌ dꞌa yibꞌan̈, man̈xalaj yelcꞌoch vin̈ dꞌa yol sat anima syabꞌi.4 Man̈ eyacꞌoch spail stiꞌ nocꞌ nocꞌ stecꞌvi trigo.
Sleyal dꞌa yibꞌan̈ junoc vin̈ vinac syicꞌ ix smuꞌ
5 Tato ay chavan̈oc ebꞌ vin̈ vinac yucꞌtac sbꞌa, junn̈ej patil bꞌaj ay ebꞌ vin̈, axo tzꞌaji scham junoc vin̈, mantalaj yuninal vin̈ yedꞌ ix yetbꞌeyum. A ix yetbꞌeyum vin̈ chiꞌ, max yal-laj yicꞌan junocxo chꞌoc vinaquil ix. Palta a vin̈ yucꞌtac vin̈ yetbꞌeyum ix ix cham chiꞌ, a vin̈ tzꞌicꞌanxican ix. Icha chiꞌ tzꞌaj scꞌanabꞌajan sleyal vin̈ yuj ix smuꞌ chiꞌ. 6 A sbꞌabꞌel unin ebꞌ sjavi, a sbꞌi vin̈ yetbꞌeyum ix chamnac chiꞌ tzꞌoch dꞌay, yic vachꞌ max satel sbꞌi vin̈ dꞌa scal co chon̈abꞌ. 7 Palta tato malaj sgana vin̈ syicꞌ ix smuꞌ chiꞌ jun, syal sbꞌat ix dꞌa yichan̈ ebꞌ juez yedꞌ dꞌa yichan̈ ebꞌ yichamtac vinaquil chon̈abꞌ, syalan ix icha tic: A vin̈ in muꞌ malaj sgana vin̈ sbꞌinajcan vin̈ yucꞌtac dꞌa scal co chon̈abꞌ. Max stacꞌlaj vin̈ vicꞌan in bꞌa yedꞌoc icha dꞌa sleyal, tato xchi ix. 8 Slajvi chiꞌ tzꞌavtaj vin̈ yuj ebꞌ yichamtac vinaquil chon̈abꞌ chiꞌ, scꞌanbꞌan ebꞌ vin̈ dꞌa vin̈. Tato max yal scꞌol vin̈ syicꞌ ix smuꞌ chiꞌ, 9 scꞌoch ix dꞌa stzꞌey vin̈ dꞌa yichan̈ ebꞌ vin̈ yichamtac vinaquil chon̈abꞌ chiꞌ, syicꞌanel junoc xan̈abꞌ vin̈ ix, stzubꞌanpax och ix dꞌa sat vin̈, syalan ix: Icha tic tzꞌutaj ebꞌ vin̈ malaj sgana syacꞌcan bꞌinaj yucꞌtac, xcham ix. 10 Yuj chiꞌ, a tzꞌaj sbꞌinaj yin̈tilal vin̈ smuꞌ ix chiꞌ dꞌa scal co chon̈abꞌ, “yin̈til vin̈ icꞌbꞌilel xan̈abꞌ”, xcham ebꞌ anima.
Juntzan̈xo ley
11 Tato ay chavan̈oc ebꞌ vin̈ vinac van yacꞌan oval, sjavi ix yetbꞌeyum junoc vin̈ yic scolan vin̈ yetbꞌeyum ix chiꞌ snaani, tato a svinaquil vin̈ van smacꞌlan sbꞌa yedꞌ vin̈ yetbꞌeyum ix chiꞌ syamchaj yuj ix, stocꞌancot vin̈ ix, 12 tato icha chiꞌ, man̈xalaj nivancꞌolal, xicjiel scꞌabꞌ ix.
13-14 Man̈ e cꞌan echlabꞌ man̈ tzꞌacanoc ayic tzex chon̈vaji, ma ayic tzex manvaji, 15 palta to a val echlabꞌ tzꞌacan, yic vachꞌ ol najatbꞌoc e qꞌuinal dꞌa lum luum ol yacꞌ Jehová co Diosal dꞌayex, 16 yujto malaj sgana co Diosal chiꞌ dꞌa ebꞌ max bꞌeybꞌalan tojolal.
Yovalil satjiel ebꞌ amalecita
17 Naeccoti, tas on̈ yutej ebꞌ cajan dꞌa chon̈abꞌ Amalec ayic ayon̈ecꞌ dꞌa yoltac bꞌe ayic toxo on̈ elta dꞌa Egipto. 18 Tze naanpaxcoti to malaj jabꞌoc xivcꞌolal ebꞌ dꞌa Dios. A ebꞌ quetisraelal najat tzacꞌanto scot cuuj yuj cꞌunbꞌelal, ix laj miljicancham ebꞌ yuj ebꞌ aj Amalec chiꞌ. 19 Yuj chiꞌ ayic ol ex coljoquel yuj Jehová co Diosal dꞌa ebꞌ ajcꞌol oyanoch dꞌa spatictac lum luum ol acꞌjoc eyiquej chiꞌ, yovalil tze satel ebꞌ yin̈til Amalec chiꞌ, man̈xo ol bꞌinaj ebꞌ dꞌa yolyibꞌan̈qꞌuinal tic dꞌa juneln̈ej. Mocabꞌ bꞌat satcꞌolal jun checnabꞌil tic eyuuj.