Sleyal puclajbꞌail
24
Tato ay junoc vin̈ vinac syicꞌlaj sbꞌa yedꞌ junoc ix ix, axo tzꞌecꞌ jabꞌoc tiempo, ay tas syabꞌ vin̈ dꞌa spatic ix, man̈xalaj sgana vin̈ dꞌa ix, syal spucan sbꞌa ebꞌ, palta yovalil syacꞌ yumal yic puclajbꞌail vin̈ dꞌa ix, slajvi chiꞌ tzꞌelta ix dꞌa yol spat vin̈ chiꞌ. 2 Ayic toxo ix spuc sbꞌa ix yedꞌ vin̈, syal yicꞌan junocxo vinac ix. 3 Palta tato a junxo vin̈ syicꞌ ix chiꞌ schami, mato ton̈ej man̈xa sgana vin̈ dꞌa ix, syacꞌanpax yumal yic puclajbꞌail vin̈ dꞌa ix, spechanelta ix vin̈ dꞌa yol spat, 4 maxtzac yal-laj yicꞌan ix vin̈ bꞌabꞌel yetbꞌeyum chiꞌ, yujto man̈ vachꞌoc tato syicꞌxi ix vin̈. Chucxo dꞌa yol sat Jehová co Diosal. Yuj chiꞌ man̈ eyixtejbꞌat lum luum ol yacꞌ Jehová chiꞌ eyiquej.Juntzan̈xo ley
5 Tato ay junoc vin̈ vinac toto ix och yetbꞌeyum, max yal-laj sbꞌat vin̈ dꞌa oval. Max yalpaxlaj yoch vin̈ dꞌa junoc opisio. Jun abꞌil libre tzꞌajcan vin̈ dꞌa spat yic syacꞌan tzalajbꞌoc scꞌol vin̈ yedꞌ ix yetbꞌeyum chiꞌ.
6 Tato ay junoc mach smajnan tumin dꞌayex, man̈ e cꞌanecꞌ smolino, ma schaꞌ yuj smajananubꞌaloc. Tato icha chiꞌ tze cꞌulej, ichato tzeyamoch vaan svaꞌi.
7 Tato tzꞌabꞌchaji to ay junoc vin̈ israel tzꞌelcꞌanbꞌat junoc yetchon̈abꞌ yic tzꞌoch schecabꞌoc, ma yic schon̈aneli, yovalil scham jun vin̈ elcꞌum anima chiꞌ, tzꞌel jun chucal chiꞌ dꞌa e cal.
8 Tato ay mach bꞌaj spitzvichaan̈ jun yabꞌil scuchan lepra, yovalil scꞌanabꞌajej sleyal jun yabꞌil chiꞌ, icha tzꞌaj yalan ebꞌ sacerdote, aton juntzan̈ ix valcan dꞌayex. 9 Naeccoti tas scꞌulejnac ix María dꞌa yol bꞌe yuj Jehová co Diosal, ayic quelnaccot dꞌa Egipto.
10 Tato ay qꞌuen tumin tzeyacꞌ smajnej junoc eyetanimail, man̈ ex och dꞌa yol spat tzeyicꞌanelta junoc tas yic scan smajananubꞌaloc qꞌueen. 11 Palta to tzex can dꞌa stiꞌ spat, tze tan̈van yicꞌcanelta tas ol yacꞌ smajananubꞌaloc qꞌueen chiꞌ dꞌayex. 12 Tato te mebꞌaꞌ jun anima bꞌaj ix eyacꞌ qꞌuen tumin chiꞌ majanil, tato a scꞌapac aycan smajananubꞌaloc qꞌueen, man̈ eyamcan vanaj dꞌay yic tzꞌecꞌ acꞌval. 13 Ayic sqꞌuicꞌbꞌi tzeyacꞌan meltzajoc, qꞌuinaloc malaj tas scꞌuej tzꞌecꞌ acꞌval. Tato icha chiꞌ tzeyutej, a jun anima chiꞌ ol yal vachꞌ lolonel dꞌa eyibꞌan̈, vachꞌ pax tzex can dꞌa yichan̈ Jehová co Diosal.
14 Man̈ eyixtej ebꞌ mebꞌaꞌ smunlaj dꞌayex, ebꞌ eyetchon̈abꞌ, ma ebꞌ chꞌoc chon̈abꞌil ayecꞌ dꞌa e cal. Tze tup ebꞌ dꞌa jun cꞌu chiꞌ. 15 Tze tup ebꞌ e majan dꞌa junjun yemcꞌualil, yujto yovalil sman ebꞌ tas sva dꞌa jun cꞌu chiꞌ. Tato maay, syal sbꞌa ebꞌ dꞌa Jehová, axo yoch e mul dꞌa Jehová chiꞌ.
16 Max yal-laj scham ebꞌ mamabꞌil nunabꞌil yuj smul yuninal. An̈ejaꞌ ebꞌ uninabꞌil chiꞌ, max yalpaxlaj scham ebꞌ yuj smul smam snun chiꞌ.
17 Man̈ e cꞌulej tas man̈ tojoloc dꞌa ebꞌ chꞌoc chon̈abꞌil ayecꞌ dꞌa e cal, ma dꞌa ebꞌ man̈xa smam. Man̈ e cꞌanecꞌ scꞌapac ebꞌ ix ix chamnacxo yetbꞌeyum yuj smajananubꞌaloc junoc tas smajnej. 18 Mocabꞌ bꞌat satcꞌolal eyuuj to ecꞌnac on̈ checabꞌoc dꞌa Egipto, axo Jehová co Diosal on̈ icꞌanelta taꞌ. Yuj chiꞌ sval dꞌayex to tze cꞌanabꞌajej masanil juntzan̈ checnabꞌil tic.
19 Tato ayic van e jochan ixim e trigo, sat e cꞌool scan junoc manoja ixim dꞌa e patic, man̈xo ex meltzaj eyicꞌcot ixim. Canocabꞌ ixim taꞌ, yic a ebꞌ chꞌoc chon̈abꞌil ayecꞌ dꞌa e cal yedꞌ ebꞌ man̈xa smam, ma ebꞌ ix ix chamnac yetbꞌeyum, a ebꞌ ol ecꞌ sicꞌan ixim, yic vachꞌ ol yacꞌ svachꞌcꞌolal Jehová co Diosal dꞌa eyibꞌan̈ yedꞌ masanil tas tze cꞌulej.
20-21 Ayic tze bꞌixan sat teꞌ eyolivo yedꞌ te eyuva, man̈ pilanoc tzeyutej e molanel sat teꞌ dꞌa scꞌabꞌ. A teꞌ scan chiꞌ, man̈xo ex meltzaj e molel teꞌ. Yicxo ebꞌ chꞌoc chon̈abꞌil, ebꞌ man̈xa smam yedꞌ ebꞌ ix chamnac yetbꞌeyum yaji. 22 Mocabꞌ bꞌat satcꞌolal eyuuj to a ex tic ecꞌnac ex checabꞌoc dꞌa Egipto. Yuj chiꞌ sval dꞌayex to tze cꞌanabꞌajej masanil juntzan̈ checnabꞌil svalcan tic dꞌayex.