2 Ix smolbꞌej masanil ebꞌ yetchon̈abꞌ vin̈aj Moisés, ix yalan vin̈ dꞌa ebꞌ icha tic:

A ex tic, eyilnac val tas utajnac vin̈ sreyal Egipto yedꞌ ebꞌ ayoch yajalil yedꞌ vin̈ yedꞌ masanil smacbꞌen Egipto chiꞌ yuj Jehová. 3 Testigo eyaj dꞌa juntzan̈ yaelal yedꞌ tas satubꞌtac yilji scꞌulejnac Jehová chiꞌ. 4 Palta masanto ticnaic maxto yacꞌlaj eyojtaquejeli tas syalelcꞌoch juntzan̈ chiꞌ. 5 40 abꞌil ix ex in cuchbꞌej dꞌa taquin̈ luum. A dꞌa jun tiempoal chiꞌ, maj lajvoquel-laj e pichul, maj lajvoquel-laj e xan̈abꞌ. 6 Maj e valaj ixim pan, maj eyucꞌlaj vino, ma yal sat teꞌ avbꞌen teꞌ pajbꞌinac, yic vachꞌ snachajel eyuuj to a Jehová aton co Diosal.

7 Ayic ix on̈ javi dꞌa jun lugar tic, ix elta vin̈aj Sehón sreyal Hesbón yacꞌ oval quedꞌoc yedꞌ vin̈aj Og sreyal Basán, palta ix cacꞌ ganar ebꞌ. 8 Ix quicꞌancan sluum ebꞌ, ix cacꞌan dꞌa ebꞌ yin̈tilal Rubén, dꞌa ebꞌ yin̈tilal Gad yedꞌ dꞌa nan̈alxo ebꞌ yin̈tilal Manasés. 9 Yuj chiꞌ, cꞌanabꞌajejec e bꞌeybꞌalan jun trato tic, yic vachꞌn̈ej ol aj eyelcꞌoch dꞌa masanil tastac ol e cꞌulej.

10 A ticnaic, tic val molan on̈ ecꞌ dꞌa yichan̈ Jehová co Diosal. Masanil ebꞌ yajal dꞌa eyin̈tilal, ebꞌ yichamtac vinaquil chon̈abꞌ, ebꞌ ay yopisio yedꞌ masanil ebꞌ quetisraelal: 11 Ebꞌ vin̈ vinac, ebꞌ unin, ebꞌ ix ix yedꞌ ebꞌ chꞌoc chon̈abꞌil ayecꞌ cajan dꞌa co cal, aton ebꞌ cꞌatzitzvum yedꞌ ebꞌ cuchum aꞌ, 12 molan on̈ eqꞌui yic vachꞌ sco chacan strato Jehová co Diosal bꞌaj syacꞌcan stiꞌ dꞌayon̈. 13 A val ticnaic scheclajcaneli to tzon̈ ochcan schon̈abꞌoc Jehová co Diosal, axo tzꞌochcan co Diosaloc, icha yutejnac yacꞌan stiꞌ dꞌa vin̈aj Abraham, dꞌa vin̈aj Isaac yedꞌ dꞌa vin̈aj Jacob, aton ebꞌ co mam quicham. 14 Man̈ocn̈ej quedꞌ a on̈ molan on̈ ecꞌ tic sbꞌo jun trato tic Jehová chiꞌ, 15 palta yedꞌ pax ebꞌ quin̈tilal toto ol aljoc. 16 A ex tic eyojtac val sicꞌlabꞌil tas val aj quecꞌnac dꞌa Egipto yedꞌ tas ajnac co cꞌaxpajecꞌta dꞌa yol smacbꞌen juntzan̈ nación dꞌa yoltac bꞌe. 17 Ataꞌ quilnac juntzan̈ comon dios, juntzan̈ yechel nabꞌa teꞌ, nabꞌa qꞌueen, nabꞌa plata yedꞌ nabꞌa oro, te chuclaj scꞌulej juntzan̈ anima chiꞌ, ayic tzꞌoch ebꞌ ejmelal dꞌay. 18 Comonoc malaj junoc anima dꞌa co cal tic, vinac, ma ix, ma junoc yin̈tilal ebꞌ quetchon̈abꞌ tzꞌactancan Jehová co Diosal, axo dꞌa sdiosal juntzan̈ nación chiꞌ tzꞌoch ejmelal. Tato icha chiꞌ scꞌulej, lajan icha junoc yibꞌ teꞌ svolani, a svol chiꞌ te cꞌaꞌ, scham anima yuuj. 19 Tato ay junoc mach dꞌa co cal tic te n̈ican syutej sbꞌa snaani, slajvi yabꞌan tas tzꞌajcan jun trato tic, syalan icha tic: Vachꞌchom tzin pitej in bꞌa tzin cꞌulan masanil tas snibꞌej in cꞌool, palta malaj tas ol in icꞌanoc, tato xchi, ol cot yaelal dꞌa quibꞌan̈ co masanil vachꞌchom vachꞌ on̈, ma chuc on̈. 20 Yuj chiꞌ man̈xo ol acꞌjoclaj nivancꞌolal jun anima chiꞌ yuj Jehová, a yoval scꞌol ol javoc dꞌa yibꞌan̈ jun anima chiꞌ. A masanil juntzan̈ yaelal tzꞌibꞌabꞌilcan tic, aꞌ ol cot dꞌa yibꞌan̈, ol satjocpaxel yin̈tilal dꞌa sat lum luum tic yuj Jehová. 21 A Jehová chiꞌ ol icꞌanel jun anima chiꞌ dꞌa scal masanil yin̈tilal ebꞌ quetisraelal, ol yacꞌanoch yaelal dꞌa yibꞌan̈, yuj chiꞌ masanil yaelal sbꞌinaj dꞌa trato bꞌaj tzꞌibꞌabꞌilcan masanil ley, ol cot dꞌa yibꞌan̈ jun anima chiꞌ. 22 A ebꞌ eyin̈tilal dꞌa bꞌaqꞌuin̈ yedꞌ juntzan̈xo anima chꞌoc chon̈abꞌil ol cot dꞌa najat, ol yil val yaelal ebꞌ yedꞌ ilya ol yacꞌcot Jehová dꞌa yibꞌan̈ lum luum tic. 23 Ol yil ebꞌ to a lum luum chiꞌ tzꞌanac luum smasanil, an̈ej qꞌuen azufre yedꞌ atzꞌam atzꞌam ay dꞌa luum. Man̈xalaj tas ol yal yavchaj dꞌa luum. Man̈xalaj tas ol qꞌuibꞌ dꞌa luum, vachꞌchom an̈ an̈cꞌultac man̈xo ol qꞌuibꞌlaj an̈. Icha val ajnac satel juntzan̈ chon̈abꞌ yuj yoval scꞌol Jehová, aton Sodoma, Gomorra, Adma yedꞌ Zeboim, icha val chiꞌ ol aj lum e luum tic.

24 Yuj chiꞌ, masanil anima dꞌa yolyibꞌan̈qꞌuinal tic ol scꞌanbꞌej ebꞌ: ¿Tas yuj icha chiꞌ ix yutej jun chon̈abꞌ chiꞌ Jehová? ¿Tas yuj ix te cot val yoval scꞌol dꞌa ebꞌ? xcham ebꞌ anima chiꞌ. 25 Axo ol laj spacan juntzan̈xo ebꞌ: Icha chiꞌ ix aj jun chon̈abꞌ chiꞌ, yujto ix yactejcan strato Jehová ebꞌ, aton trato sbꞌonac Jehová chiꞌ yedꞌ ebꞌ smam yicham ebꞌ, ayic yicꞌjinaquelta ebꞌ dꞌa Egipto. 26 Ix och ebꞌ ejmelal dꞌa comon dios bꞌaj max yacꞌtaxonem sbꞌa ebꞌ, man̈oc Jehová ix alan dꞌa ebꞌ to tzꞌoch ebꞌ ejmelal dꞌa juntzan̈ chiꞌ. 27 Yuj chiꞌ ix cot yoval scꞌol Jehová chiꞌ dꞌa yibꞌan̈ jun chon̈abꞌ chiꞌ, ix cot masanil juntzan̈ catabꞌ tzꞌibꞌabꞌilcan dꞌa strato dꞌa yibꞌan̈ ebꞌ. 28 Ix yiqꞌuel jun chon̈abꞌ chiꞌ yedꞌ yoval scꞌool, ix yacꞌancanbꞌat ebꞌ dꞌa scaltac juntzan̈xo nación, ichaton van yuji ticnaic, xcham ebꞌ ol pacan jun lolonel chiꞌ.

29 Ay val tas man̈ cojtacoc, a juntzan̈ chiꞌ, yic Jehová co Diosal yaji. Palta ay tas acꞌbꞌil cojtaquejel yedꞌ ebꞌ cuninal, aton masanil juntzan̈ cꞌaybꞌubꞌal tic yedꞌ cachnabꞌil yic sco cꞌanabꞌajej dꞌa masanil tiempo.