A Dios syacꞌ stiꞌ yacꞌan nivancꞌolal
30
Ayic ol ujoc masanil juntzan̈ tas ix val tic dꞌayex, aton svachꞌcꞌolal Jehová co Diosal yedꞌ pax scatabꞌ yuj e paticaneli, palta tato ol sna sbꞌa e cꞌol ayic ayexxo ecꞌ dꞌa masanil nación bꞌaj ol ex yacꞌcanbꞌati, 2 tato yedꞌ smasanil e cꞌool yedꞌ pax smasanil e pensar tze cꞌanabꞌajan yedꞌ ebꞌ eyuninal icha val tzꞌaj valancan tic dꞌayex, 3 ol sqꞌuex spensar co Diosal chiꞌ, ol yacꞌanxi svachꞌcꞌolal dꞌayex. Ol ocꞌpax scꞌol dꞌayex, ol ex smolbꞌanxicot bꞌaj ix ex saclemcanbꞌat chiꞌ. 4 Vachꞌchom ex saclemcanbꞌati, ix laj ex cꞌochcan bꞌaj slajvicꞌoch yolyibꞌan̈qꞌuinal tic, ato taꞌ ol ex yicꞌxicot Jehová co Diosal chiꞌ. 5 Ol ex smolbꞌanpax bꞌaj ecꞌnac cajan ebꞌ co mam quicham. Ataꞌ ol ex ajxoc. Ecꞌbꞌal nivan ol aj e bꞌeyumal yedꞌ e bꞌisul yuj Jehová chiꞌ dꞌa yichan̈ ebꞌ co mam quicham chiꞌ. 6 Ol yacꞌoch yechel strato Jehová dꞌa e pensar yedꞌ dꞌa spensar ebꞌ eyin̈tilal yic ol e xajanej dꞌa smasanil e cꞌool yedꞌ dꞌa smasanil e pensar yic vachꞌ ol ex ajoc. 7 Axo Jehová chiꞌ ol acꞌanbꞌat masanil catabꞌ tic dꞌa yibꞌan̈ ebꞌ ajcꞌol ix chichonoch scꞌol dꞌayex, ebꞌ ex ixtani. 8 A exxo tic, ol ex meltzajxoc dꞌa yol scꞌabꞌ Jehová e cꞌanabꞌajan masanil schecnabꞌil svalcan tic dꞌayex. 9-10 Yuj chiꞌ, te bꞌeyum ol ex ajxoc yuj Jehová chiꞌ, ol yacꞌan svachꞌcꞌolal dꞌa yibꞌan̈ tastac tze cꞌulej, dꞌa yibꞌan̈ eyuninal yedꞌ nocꞌ e molbꞌetzal nocꞌ yedꞌ dꞌa e munlajel. Tato tze cꞌanabꞌajej masanil tas syal Jehová, masanil schecnabꞌil yedꞌ cꞌaybꞌubꞌal tzꞌibꞌabꞌilcan tic, tato dꞌa smasanil e cꞌool yedꞌ dꞌa smasanil e pensar tzeyacꞌoch e bꞌa dꞌa yol scꞌabꞌ, ol tzalaj scꞌol yacꞌan svachꞌcꞌolal dꞌayex, icha ajnac yacꞌan tzalajbꞌoc scꞌol yedꞌ ebꞌ co mam quicham.Sicꞌlejec e qꞌuinal
11 A juntzan̈ checnabꞌil svacꞌ eyojtaquejel tic, man̈ ajaltacoc co cꞌanabꞌajani, man̈ najatoc ayel dꞌa co tzꞌey. 12 Man̈oc dꞌa satchan̈ ay, yic vachꞌ max eyal icha tic: ¿Mach val syal sqꞌuecꞌoch dꞌa satchaan̈ yic sbꞌat yicꞌanemta jun checnabꞌil tic, syacꞌan cojtaquejeli, yic vachꞌ sco bꞌeybꞌalej? max yal eyalan icha chiꞌ. 13 An̈ejtonaꞌ, man̈ocpax dꞌa scꞌaxepal aꞌ mar ay, yic max eyal icha tic: ¿Mach syal scꞌaxpajecꞌ dꞌa aꞌ mar chiꞌ, yic sbꞌat yicꞌancot dꞌayon̈, syacꞌan cojtacaneli sco bꞌeybꞌalani? max yal eyalan icha chiꞌ. 14 Ocxo jun, a jun checnabꞌil tic ayecꞌ dꞌa co cal, scalubꞌtan̈ej, aypaxoch dꞌa co pensar, yic vachꞌ sco cꞌanabꞌajej.
15 A ticnaic, tic val svacꞌ e sicꞌlej tas tze nibꞌej: ¿Am qꞌuinal yedꞌ vachꞌil, mato aꞌ catabꞌ yedꞌ chamel? 16 Tato tze cꞌanabꞌajej masanil tas svalcan tic dꞌayex, tze xajanan Jehová co Diosal, tzex ochn̈ej tzacꞌan yuuj, tze cꞌanabꞌajan schecnabꞌil yedꞌ scꞌaybꞌubꞌal, vachꞌ ol ex ajoc, tzijtum ol aj sbꞌisul eyuninal. Ichato chiꞌ ol yacꞌan syaxil Jehová co Diosal dꞌa eyibꞌan̈ dꞌa sat lum luum bꞌaj van eyoch tic yic tze macbꞌenej. 17 Tato max e cha eyabꞌ juntzan̈ tic jun, palta to tze bꞌec e bꞌa e montajbꞌat dꞌa spatic comon dios, tzex em cuman dꞌay, 18 tato icha chiꞌ, val dꞌa jun rato tic svalcan dꞌayex to ol ex chamoc. Man̈xo ol najtilax e qꞌuinal dꞌa sat lum luum ol eyiquej chiꞌ ayic ol ex cꞌaxpajcanecꞌ dꞌa aꞌ Jordán. 19 Val dꞌa jun cꞌu tic svacꞌcanoch satchaan̈ yedꞌ lum luum tic testigoal to svacꞌ e sicꞌlej tas tze nibꞌej, am e qꞌuinal yedꞌ vachꞌil, mato a catabꞌ yedꞌ chamel. Palta sicꞌlejec e qꞌuinal, yic vachꞌn̈ej tzex aj yedꞌ ebꞌ eyin̈tilal. 20 Tze xajanej Jehová co Diosal. Tze cꞌanabꞌajej, man̈ eyactejcani, yuj chiꞌ ol e cha e qꞌuinal, najtil ol ex ecꞌ dꞌa sat lum luum yacꞌnac stiꞌ yacꞌan dꞌa ebꞌ co mam quicham, aton dꞌa vin̈aj Abraham, dꞌa vin̈aj Isaac yedꞌ dꞌa vin̈aj Jacob, xchi vin̈aj Moisés chiꞌ.