2 Ayxo 120 abꞌil in qꞌuinal, man̈xa val vip in bꞌeyecꞌ ex in cuchbꞌej, an̈ejtonaꞌ toxo ix yal Jehová dꞌayin to man̈xo ol in cꞌaxpajecꞌ dꞌa aꞌ Jordán tic. 3 Palta a Jehová ol bꞌabꞌlajn̈ej dꞌa eyichan̈, ol satanel masanil juntzan̈ chon̈abꞌ ayecꞌ bꞌaj ol ex cꞌoch chiꞌ. A exxo ol ex cajnajcan dꞌa slum ebꞌ. Axo vin̈aj Josué ol ex cuchbꞌanoc, icha ix aj yalan Jehová dꞌayex. 4 A Jehová chiꞌ ol satanel ebꞌ anima dꞌa juntzan̈ chon̈abꞌ chiꞌ, icha ix aj satanel ebꞌ vin̈ sreyal amorreo, aton vin̈aj Sehón yedꞌ vin̈aj Og yedꞌ ebꞌ yetchon̈abꞌ ebꞌ. 5 A ol acꞌanoch juntzan̈ nación chiꞌ dꞌa yol e cꞌabꞌ, ol e satanel ebꞌ icha ix aj valan dꞌayex. 6 Tecꞌbꞌejec e bꞌa, man̈ ex xivoc ayic ol e chalan e bꞌa yedꞌ ebꞌ ajcꞌol chiꞌ, yujto a Jehová co Diosal ayoch eyedꞌoc. Man̈ e naꞌ to ol ex actajcan yuuj, man̈ ol ex yacꞌcanlaj e chꞌocoj, xchi vin̈.

7 Ix lajvi chiꞌ, ix yavtancot vin̈aj Josué chiꞌ vin̈. Dꞌa yichan̈ masanil ebꞌ chon̈abꞌ israel ix yal vin̈ dꞌa vin̈ icha tic:

Tza tecꞌbꞌej val a bꞌa, man̈ ach xivoc, yujto a ach ol icꞌbꞌat jun chon̈abꞌ tic dꞌa sat lum luum yacꞌnac stiꞌ Jehová yacꞌan dꞌa ebꞌ co mam quicham. A ach ol acꞌcan junjun macan̈ ebꞌ dꞌa smacbꞌen. 8 A Jehová ol bꞌabꞌlaj uuj. Ayn̈ejecꞌ edꞌoc, man̈ ol ach yactejcanlaj, yuj chiꞌ man̈ ach xivoc, man̈ ach meltzaj dꞌa a patic, xchi vin̈aj Moisés chiꞌ dꞌa vin̈.

9 Ix stzꞌibꞌan juntzan̈ tic vin̈aj Moisés chiꞌ, ix yacꞌancan vin̈ dꞌa yol scꞌabꞌ ebꞌ sacerdote yin̈tilal Leví tzꞌicꞌanbꞌat scaxail strato Jehová yedꞌ dꞌa masanil ebꞌ vin̈ yichamtac vinaquil chon̈abꞌ Israel. 10-11 Ix yalan vin̈ icha tic:

Ayic slajvi yuctaquil abꞌil, dꞌa yol abꞌil yic slajvican bꞌoc, ayic molanecꞌ masanil anima dꞌa yichan̈ Jehová dꞌa jun lugar sicꞌbꞌilel yuuj dꞌa juntzan̈ scꞌual qꞌuin̈ chinama, ataꞌ tzꞌavtaj ley tic yabꞌ masanil anima. 12 Smolbꞌej sbꞌa masanil anima, ebꞌ vin̈ vinac, ebꞌ ix ix yedꞌ ebꞌ cotac unin yedꞌ ebꞌ chꞌoc chon̈abꞌil ayecꞌ dꞌa e cal. Tze molbꞌej e bꞌa yuj eyabꞌani yedꞌ eyojtacanel masanil tas syal jun ley tic, yic vachꞌ ay yelcꞌoch Jehová co Diosal dꞌa yol e sat, yic tze cꞌanabꞌajan tas syalaꞌ. 13 Icha pax chiꞌ ebꞌ eyin̈tilal manto ojtannacoc jun ley tic, ol yabꞌcan ebꞌ yic vachꞌ ay yelcꞌoch Jehová chiꞌ dꞌa yol sat ebꞌ dꞌa masanil tiempo dꞌa sat lum luum ol eyiquej dꞌa scꞌaxepalecꞌ aꞌ Jordán tic, xchi vin̈aj Moisés chiꞌ.

14 Ix yalan Jehová dꞌa vin̈aj Moisés chiꞌ icha tic: Vanxo scꞌoch stiempoal yic ol ach chamoc. Yuj chiꞌ avtejcot vin̈aj Josué, tzex bꞌat dꞌa in cajnubꞌ bꞌaj tzin chꞌox in bꞌa yic vachꞌ ol vacꞌcanoch yopisio vin̈, xchi dꞌa vin̈. Ix bꞌat vin̈aj Moisés yedꞌ vin̈aj Josué chiꞌ. 15 Ataꞌ ix schꞌox sbꞌa Jehová chiꞌ dꞌa ebꞌ vin̈ dꞌa scal jun nivan asun ix och moyan dꞌa stiꞌ cajnubꞌ chiꞌ. 16 Ix lajvi chiꞌ, ix yalan dꞌa vin̈aj Moisés chiꞌ icha tic: A ach tic toxo ol ach chamoc. Slajvi chiꞌ, a jun chon̈abꞌ tic ol ochcan tzacꞌan ebꞌ yuj juntzan̈ yechel scomon diosal juntzan̈ chon̈abꞌ ay dꞌa spatic yichan̈ bꞌaj ol cꞌoch ebꞌ. Ol in yactejcan ebꞌ, ol yixtanbꞌat in trato ebꞌ ix in bꞌo yedꞌoc. 17 Yuj chiꞌ, ol cot voval dꞌa ebꞌ, ol vactancan ebꞌ schꞌocoj. Man̈xo ol vabꞌ tas ol yal ebꞌ. Man̈xo jantacoc yaelal ol cotcan dꞌa yibꞌan̈ ebꞌ, masanto ol yal ebꞌ icha tic: ¿Tas val yuj scabꞌ syail? Yuj am to man̈xo ayoc ecꞌ co Diosal dꞌa co cal, xcham ebꞌ. 18 Ayic ol yabꞌan juntzan̈ yaelal chiꞌ ebꞌ, ol viqꞌuel in bꞌa dꞌa scal ebꞌ yuj masanil chucal scꞌulej, yuj pax to tzꞌoch ebꞌ ejmelal dꞌa juntzan̈ yechel chiꞌ.

19 A ticnaic jun, tzꞌibꞌejec jun bꞌit ol val dꞌayex, ol e cꞌaybꞌan ebꞌ eyetchon̈abꞌ Israel tic dꞌay, ol sbꞌitan ebꞌ yic svacꞌoch testigoal dꞌa yibꞌan̈ ebꞌ. 20 Ayic ol lajvoc vicꞌanoch ebꞌ anima tic dꞌa sat lum luum te yax sat chiꞌ, lum vacꞌnac in tiꞌ vacꞌan dꞌa ebꞌ e mam eyicham, ol va ebꞌ sicꞌlabꞌil, ol bꞌaqꞌuechbꞌoc ebꞌ. Ol lajvoc chiꞌ, ol bꞌat ebꞌ dꞌa spatic juntzan̈ comon dios. Ol och ebꞌ ejmelal dꞌa juntzan̈ chiꞌ. Ol in spaticanel ebꞌ, ol yixtanbꞌat in trato ebꞌ in bꞌonac yedꞌoc. 21 Ayic ol javoc jantac yaelal yedꞌ ilcꞌolal dꞌa yibꞌan̈ ebꞌ, a jun bꞌit tic ol acꞌan testigoal dꞌa yibꞌan̈ ebꞌ. Axo ebꞌ yin̈tilal ebꞌ ol naancot jun bꞌit tic, ol sbꞌitan ebꞌ. Yujto ayic manto ochlaj ebꞌ dꞌa lum luum vacꞌnac in tiꞌ vacꞌan dꞌa ebꞌ, vojtacxo tas ayecꞌ dꞌa spensar ebꞌ, xchi Jehová chiꞌ.

22 A dꞌa jun cꞌu chiꞌ ix stzꞌibꞌejcan jun bꞌit tic vin̈aj Moisés, ix yacꞌan vin̈ scꞌaybꞌej ebꞌ yetisraelal.

23 Ix yalan Jehová dꞌa vin̈aj Josué, yuninal vin̈aj Nun icha tic:

Tza tecꞌbꞌej val a bꞌa, man̈ ach xivoc, yujto ayinn̈ej och edꞌoc. A ach ol icꞌ och ebꞌ etisraelal tic dꞌa sat lum luum vacꞌnac in tiꞌ vacꞌan dꞌayex, xchi dꞌa vin̈.

24 Ix lajvi stzꞌibꞌancan masanil juntzan̈ ley chiꞌ vin̈aj Moisés chiꞌ, 25 ix yalan vin̈ dꞌa ebꞌ yin̈til Leví edꞌjinac scaxail strato Jehová icha tic:

26 Iqꞌuecbꞌat jun tzꞌibꞌabꞌil tic, tzeyacꞌanoch dꞌa stzꞌey scaxail strato Jehová co Diosal, yic syacꞌ testigoal dꞌa eyibꞌan̈. 27 Yujto vojtac to te pit ex, malaj e gana sqꞌuexvi e pensar. Ayic ayinto ecꞌ eyedꞌoc, te pitn̈ej tzeyutej e bꞌa, ocxom val ol in chamoc. 28 Avtejec ebꞌ yichamtac vinaquil junjun eyin̈tilal yedꞌ ebꞌ yajalil chon̈abꞌ, yic svalancanel jun bꞌit tic dꞌa ebꞌ. Svacꞌanoch satchaan̈ yedꞌ sat luum tic testigoal. 29 Vojtacxo to ayic ol in chamoc ol eyixtancanbꞌat e bꞌa, ol eyactancan jun bꞌe bꞌaj tzex vacꞌcanoch tic. An̈ejtonaꞌ vojtacxopaxi to a dꞌa bꞌaqꞌuin̈, ol javoc yaelal dꞌa eyibꞌan̈, yujto ol e tzuntzejcot yoval scꞌol Jehová yuj chucal ol e cꞌulej dꞌa yichan̈, xchi vin̈aj Moisés chiꞌ.

30 Ix lajvi chiꞌ, ix och ijan vin̈aj Moisés yalan masanil slolonelal jun bꞌit tic dꞌa yichan̈ ebꞌ chon̈abꞌ icha tic: