32
Yabꞌocabꞌ satchaan̈ in loloni. Yabꞌocabꞌpax lum luum tas ol valaꞌ.2 A cꞌaybꞌubꞌal sval tic lajan val icha yem n̈abꞌ. A lolonel sval tic lajan val icha yal acꞌval tzꞌemi, an̈ejaꞌ icha yem n̈abꞌ dꞌa yibꞌan̈ te teꞌ yedꞌ dꞌa yibꞌan̈ an̈ an̈cꞌultac, icha chiꞌ yaji.
3 Svalcaneli to nivan yelcꞌoch Jehová. Iqꞌuecchaan̈ sbꞌi co Diosal.
4 A Jehová bꞌaj sco col co bꞌa lajan icha junoc qꞌuen nivan tenam. Te vachꞌn̈ej tas sbꞌoꞌo, te tojoln̈ej sbꞌeybꞌal. Tzꞌeln̈ejcꞌoch tas syalaꞌ.
5 A ex vetchon̈abꞌ ex tic, te man̈ e mojoc tzex och yuninaloc Jehová, te malaj e vachꞌil, te pit ex dꞌay.
6 ¿Tom yedꞌ e pital chiꞌ tzeyacꞌ spac dꞌa Jehová? A ex tic malaj e pensar, malaj jabꞌoc e jelanil. ¿Tom man̈oc Jehová co Mam yaj jun? ¿Tom man̈oc on̈ bꞌoani? A on̈ bꞌoani, on̈ yacꞌanoch dꞌa chon̈abꞌil.
7 Naeccot tas scꞌulejnac Jehová, tze naan dꞌa juntzan̈ tiempo ix ecꞌbꞌati. Cꞌanbꞌejec eyabꞌ dꞌa e mam e nun. Abꞌecpax tas syal ebꞌ vin̈ ichamtac vinac.
8 Ayic ix pucaxcanbꞌat anima dꞌa junjun nación yuj Jehová Axon̈ej Ochi, yuj yacꞌancanem stzꞌacan̈il sluum junjun chon̈abꞌ, dꞌa sbꞌabꞌelal ix sna dꞌa jantac co bꞌisul a on̈ israel on̈ tic.
9 A on̈ yin̈tilal on̈ vin̈aj Jacob ix on̈ sicꞌcanel Jehová yic tzon̈ ochcan yicoc.
10 On̈ ilchajelta yuj dꞌa jun tzꞌinan luum, bꞌaj te ov yecꞌ icꞌ. Ix on̈ stan̈vej val, ix on̈ sya ilani, icha val co ya ilan snenal yol co sat.
11 Icha tzꞌaj sjuanbꞌat soꞌ nocꞌ nivac chꞌacbꞌa, scꞌaybꞌan yuneꞌ nocꞌ yic sjen̈vi, icha pax tzꞌaj yicꞌanbꞌat yuneꞌ nocꞌ chiꞌ dꞌa yibꞌan̈ scꞌaxil, icha val chiꞌ ix on̈ yutej Jehová.
12 A ix on̈ icꞌancoti, malaj junoc comon dios ix colvaj yedꞌoc.
13 Ix laj yacꞌcan lum tzalquixtac quiquej. A tas sqꞌuibꞌqꞌue dꞌa sat luum ix yacꞌ cabꞌlej, ix yacꞌanpax nocꞌ yalchabꞌ tzꞌelta dꞌa yoltac qꞌuen qꞌueen dꞌayon̈ yedꞌ aceite tzꞌel dꞌa teꞌ olivo sqꞌuibꞌ dꞌa scaltac qꞌuen qꞌueen.
14 Te nivan yal yim nocꞌ co vacax yedꞌ nocꞌ chiva ix elta, ix co bꞌoan queso dꞌay. Ay nocꞌ quelemtac calnel ix co chiꞌa. Ix co chipax nocꞌ chꞌac calnel yedꞌ nocꞌ chiva te bꞌaqꞌuech stan̈vaj dꞌa Basán. A val ixim trigo te vachꞌ ix co vaꞌa, ix cucꞌan vino, aton yal sat teꞌ uva.
15 Ex vetchon̈abꞌ, axo yic ix ex bꞌaqꞌuechbꞌi a ex chon̈abꞌ Jesurún ex tic,* ix eyicꞌanel e bꞌa dꞌa Jehová ix on̈ bꞌoani, ix e patiquejcanel co Columal chiꞌ.
16 Ix e tzuntzej val cot yoval scꞌol Jehová, yujto ix ex och ejmelal dꞌa juntzan̈ chꞌoc diosal chacbꞌilel yuuj.
17 Ix eyacꞌan e silabꞌ dꞌa juntzan̈ enemigo, juntzan̈ man̈ diosoc, dꞌa juntzan̈ comon dios manta bꞌaj tzeyaqꞌuem e bꞌa, juntzan̈ comon dios toto sbꞌojiqꞌuei, bꞌaj man̈ yacꞌnacoc em sbꞌa ebꞌ co mam quicham.
18 A ex vetisraelal ex tic, ix bꞌat satcꞌolal eyuuj mach ix on̈ bꞌoani yedꞌ co Columal. Majxo e nacot co Diosal ix on̈ acꞌan pitzvoc.
19 Yuj chiꞌ ix cot yoval scꞌol Jehová ayic ix yilan juntzan̈ chiꞌ, ix ex spatiquejcanel a ex yuninal ex tic.
20 Ix yalan Jehová icha tic: Man̈xo ol in bꞌat qꞌuelan dꞌa ebꞌ, ol vilaꞌ tas ol yutoc sbꞌa ebꞌ. Val yel a juntzan̈ anima tic te malaj svachꞌil ebꞌ, max yal-laj vacꞌanoch ebꞌ yipoc in cꞌool.
21 Ix stzuntzejcot voval ebꞌ yuj juntzan̈ sdiosal to man̈ diosoc. Ix chichon in cꞌol dꞌa ebꞌ yuj juntzan̈ dios malaj yelcꞌoch chiꞌ. Vuuj, ol tzꞌa scꞌool ebꞌ yuj juntzan̈xo chon̈abꞌ malaj yelcꞌochi. An̈ejtonaꞌ, ol in tzuntzejcot yoval ebꞌ yuj tas ol vacꞌ dꞌa juntzan̈xo anima manto nachajel yuuj.
22 Ix te cot val yoval in cꞌool, icha sqꞌue n̈iln̈on yoc teꞌ cꞌacꞌ. Masanil tas ay dꞌa yich lum luum stzꞌacanbꞌat yuuj, scha scꞌacꞌal luum masanto scꞌoch dꞌa yich nivac vitz.
23 Ichato ol in julbꞌat juntzan̈ jul-labꞌ dꞌa yibꞌan̈ ebꞌ, syalelcꞌochi to ol vacꞌbꞌat masanil macan̈il yaelal dꞌa yibꞌan̈ ebꞌ. Aton juntzan̈ tic:
24 Vejel, cꞌacꞌal ilya te ov, jun yaelal te ov satanel anima. Ol vacꞌanbꞌat nocꞌ chium nocꞌ dꞌa scal ebꞌ yedꞌ nocꞌ chan te ov svenenoal.
25 Ol laj cham yuninal ebꞌ dꞌa yoltac calle yuj qꞌuen espada. Xivcꞌolalxon̈ej ol ajecꞌ ebꞌ dꞌa spat. Ol cham ebꞌ quelemtac, ebꞌ ix cobꞌestac, ebꞌ icham anima yedꞌ ebꞌ unin tzato chuni.
26 Ix in naꞌ to ol in saclemcanbꞌat ebꞌ israel tic, ol in satanel ebꞌ dꞌa sat lum luum tic yic vachꞌ man̈xa bꞌaj ol bꞌinaj ebꞌ.
27 Palta malaj in gana tzin sbꞌuch ebꞌ ajcꞌool, malaj in gana syicꞌchaan̈ sbꞌa ebꞌ. Talaj syal ebꞌ icha tic: A on̈ val ix co satel ebꞌ israel tic, man̈oc Jehová ix satanel ebꞌ, talaj xchi ebꞌ.
28 Malaj jabꞌoc spensar ebꞌ anima chiꞌ, max nachajel-laj yuj ebꞌ.
29 Tato ay spensar ebꞌ, tzam nachajel yuj ebꞌ tas ol elcꞌochoc.
30 ¿Tas yuj ix el lemnaj mil ebꞌ israel dꞌa junoc ebꞌ yajcꞌool? ¿Tas yuj lajun̈eꞌ mil ebꞌ ix el lemnaj dꞌa chavan̈oc ebꞌ? A ebꞌ ajcꞌol chiꞌ malaj jabꞌoc tas syal yuj ebꞌ, palta a in Jehová in Scolumal in ebꞌ israel chiꞌ, ix vacꞌoch ebꞌ dꞌa yol scꞌabꞌ ebꞌ, xchi Jehová.
31 A ebꞌ cajcꞌol chiꞌ yojtac ebꞌ to a sdiosal ebꞌ scolani, max yal slajbꞌan sbꞌa yedꞌ co Columal a on̈ tic.
32 A ebꞌ cajcꞌol chiꞌ stzalaj ebꞌ yedꞌ chucal icha schucal ebꞌ aj Sodoma yedꞌ ebꞌ aj Gomorra. Axo stzalajcꞌolal ebꞌ chiꞌ lajan icha veneno.
33 A svino ebꞌ lajan icha svenenoal stiꞌ nocꞌ chan, scham anima yuuj, xchi vin̈aj Moisés chiꞌ.
34 Ix yalanxi Jehová icha tic: Masanil chucal ix scꞌulej ebꞌ ajcꞌol chiꞌ, naann̈ej vuuj, ichato ton̈ej sicꞌan vuuj.
35 A inn̈ej ay valan vic vacꞌanoch syaelal ebꞌ. A in ol vacꞌ spac dꞌa ebꞌ icha smoj schaan ebꞌ. Ay jun cꞌual ol satel ebꞌ, yujto lacꞌanxo sja scꞌual. Jabꞌxon̈ej scꞌoch yorail satel ebꞌ, xchi.
36 A Jehová ol och yedꞌ ebꞌ schon̈abꞌ ayic ol yilani to man̈xalaj yip ebꞌ. Ol ocꞌ scꞌool Jehová chiꞌ dꞌa ebꞌ schecabꞌ, ayic ol yilani to man̈xa junoc mach syal scolvaji, man̈xalaj ebꞌ checabꞌ, ma ebꞌ yic sbꞌa.
37 Ichato chiꞌ ol scꞌanbꞌan Jehová dꞌa ebꞌ ajcꞌol chiꞌ: ¿Bꞌajtil ay e diosal ticnaic, juntzan̈ tzex colani, aton juntzan̈ tzeyacꞌoch yipoc e cꞌool,
38 juntzan̈ schianbꞌat xepual e silabꞌ yedꞌ yucꞌan e vino tzeyacꞌ dꞌay silabꞌil? Qꞌueocabꞌ van e diosal chiꞌ yic scolvaj eyedꞌoc. Cotocabꞌi yic tzex stan̈vej.
39 Naeccoti to a inn̈ej Dios in. Malaj junocxo dios dꞌa vichan̈. A in svacꞌcham anima, a in pax svacꞌxi pitzvoc ebꞌ. A in svacꞌ echnaj ebꞌ anima, svan̈tanpax ebꞌ. Malaj mach syal scolan sbꞌa dꞌa yol in cꞌabꞌ.
40 A in Jehová in tic, ayinn̈ej ecꞌ dꞌa masanil tiempo, svicꞌchaan̈ in cꞌabꞌ svacꞌan in tiꞌ
41 to ol in bꞌo yaj jun oval tic. Icha junoc sn̈icqꞌue ye qꞌuen yespada toxon̈ej scopopi yic sbꞌat dꞌa oval, icha chiꞌ ol in cꞌulej, yic ol in bꞌat vacꞌ spac dꞌa ebꞌ ayoch ajcꞌolal dꞌayin, ol vacꞌ syaelal ebꞌ icha dꞌa smojal schaan ebꞌ.
42 Chicꞌtacxon̈ej ol aj in jul-labꞌ yuj schiqꞌuil ebꞌ. Axo vespada ol xicancanbꞌat schibꞌejal ebꞌ chamnac yedꞌ pax ebꞌ yambꞌilcot dꞌa oval. Axo sjolom ebꞌ ayoch ajcꞌolal dꞌayin chiꞌ, chicꞌtacxon̈ej ol ajcanoc, xchi Jehová chiꞌ.
43 Ex anima dꞌa junjun nación, tzalajan̈ec yedꞌ schon̈abꞌ Jehová, yujto ol spactzitej schamel ebꞌ schecabꞌ. Ol satel ebꞌ ayoch ajcꞌolal dꞌa ebꞌ, ol yacꞌan tup smul ebꞌ schon̈abꞌ chiꞌ dꞌa yibꞌan̈. Ol sacbꞌitajxi slum ebꞌ yuj Jehová, aton bꞌaj ix laj emcan schiqꞌuil ebꞌ, xchi vin̈aj Moisés chiꞌ.
Slajvubꞌ checnabꞌil yalnaccan vin̈aj Moisés
44 Ix cꞌoch vin̈aj Moisés dꞌa yichan̈ masanil chon̈abꞌ Israel, tzacꞌanoch vin̈aj Josué yuninal vin̈aj Nun yuj vin̈, ix yalan masanil slolonelal jun bꞌit tic vin̈ dꞌa ebꞌ. 45 Ix lajvi chiꞌ ix yalan vin̈ icha tic:
46 A tas ix val tic dꞌayex, naann̈ejocabꞌ eyuj dꞌa masanil tiempo. Aqꞌuecoch dꞌa e cꞌool. Cꞌaybꞌejec ebꞌ eyuninal yic ol scꞌanabꞌajej jun ley tic ebꞌ sicꞌlabꞌil. 47 Man̈ comon loloneloc juntzan̈ tic, palta to ay e qꞌuinal yuuj. Tato tze cꞌanabꞌajej smasanil, ol najatbꞌoc e qꞌuinal dꞌa sat lum luum ol eyiquej dꞌa scꞌaxepalecꞌ aꞌ Jordán tic, xchi vin̈.
Ix yal Jehová tas ol aj scham vin̈aj Moisés
48 A dꞌa jun cꞌu chiꞌ ix lolon Jehová dꞌa vin̈aj Moisés chiꞌ icha tic:
49 Qꞌuean̈ dꞌa lum svitzal Abarim, tzach qꞌuecꞌoch dꞌa sjolom lum svitzal Nebo dꞌa yol lum yic ebꞌ moabita, dꞌa yichan̈ Jericó. Ataꞌ ol ilcanbꞌat lum Canaán ol vacꞌ dꞌa ebꞌ etchon̈abꞌ tic. 50 A dꞌa sjolom jun lum vitz bꞌaj ol ach qꞌue chiꞌ, ataꞌ ol ach chamoc, icha ix aj scham vin̈ ucꞌtac aj Aarón dꞌa lum jolom vitz Hor. 51 Yujto ix e tenecꞌ tas ix val dꞌayex e chavan̈il, maj in eyicꞌchaan̈ dꞌa yichan̈ ebꞌ chon̈abꞌ israel dꞌa a aꞌ scuchan Meriba-cades, dꞌa taquin̈ lum Zin. 52 Yuj chiꞌ man̈xo ol ach cꞌochlaj dꞌa lum luum ix vacꞌ in tiꞌ vacꞌan dꞌa ebꞌ etchon̈abꞌ Israel, najatxon̈ej ol ilcanbꞌat luum, xchi dꞌa vin̈.