Ix yalcan vachꞌ lolonel vin̈aj Moisés dꞌa yibꞌan̈ ebꞌ israel
33
Ayic van scꞌoch stiempoal scham vin̈aj Moisés schecabꞌ Jehová, ix och ijan vin̈ yalancan vachꞌ lolonel dꞌa ebꞌ yetisraelal. 2 Ix yalan vin̈ icha tic:Scot Jehová dꞌa lum vitz Sinaí. Ato dꞌa Edom syacꞌcot saquilqꞌuinal dꞌayon̈. Ato pax dꞌa lum vitz Parán syacꞌcot copan stziquiquial. Scot yedꞌ ebꞌ yángel man̈xo bꞌischajbꞌenoc. A dꞌa svachꞌ cꞌabꞌ yedꞌnac ley, sqꞌue n̈iln̈on scꞌacꞌal.
3 A Jehová sxajanan ebꞌ schon̈abꞌ, stan̈vej ebꞌ yicxo. A ebꞌ chiꞌ tzꞌoch ejmelal dꞌa yichan̈, scꞌanabꞌajan schecnabꞌil ebꞌ.
4 A jun ley svacꞌcan tic, ichato smacbꞌen ebꞌ yin̈tilal Jacob yaji.
5 A Jehová ayoch reyal dꞌa Jesurún,* ayic smolbꞌan sbꞌa ebꞌ yajalil chon̈abꞌ, ayic smolbꞌan sbꞌa masanil ebꞌ yin̈tilal Israel, xchi vin̈.
6 Ix syamanoch vin̈ yalancan vachꞌ lolonel dꞌa yibꞌan̈ junjun in̈tilal. Ix yalan vin̈ yuj ebꞌ yin̈tilal Rubén icha tic:
Ayn̈ejocabꞌ ecꞌ ebꞌ yin̈tilal Rubén. Mocabꞌ satel ebꞌ, mocabꞌ quenn̈ejoc ol aj sbꞌisul ebꞌ, xchi vin̈.
7 Ix yalanpax vin̈ yuj ebꞌ yin̈tilal Judá icha tic:
Mamin Jehová, abꞌ tas syal ebꞌ yin̈tilal Judá. Icꞌ meltzaj ebꞌ dꞌa schon̈abꞌ, colvajan̈ yedꞌ a poder yic syal stecꞌbꞌan sbꞌa ebꞌ dꞌa yichan̈ ebꞌ yajcꞌool, xchi vin̈.
8 Ix yalanpax vin̈ yuj ebꞌ yin̈tilal Leví icha tic:
Mamin Jehová, ic qꞌuen Tumim yedꞌ qꞌuen Urim, ix acꞌ qꞌuen dꞌa vin̈ sicꞌbꞌilel uuj, aton vin̈ ix acꞌ proval dꞌa Masah, vin̈ ix a telaj a bꞌa yedꞌoc dꞌa aꞌ Meriba.
9 Yelxo val ix ach snibꞌej ebꞌ yin̈tilal Leví chiꞌ dꞌa yichan̈ smam snun, dꞌa yichan̈ yucꞌtac, ma yuninal. A ebꞌ chiꞌ ix scꞌanabꞌajej a checnabꞌil ebꞌ, maj yixtejbꞌat a trato ebꞌ albꞌilcani.
10 Syacꞌn̈ej a ley ebꞌ scꞌaybꞌej ebꞌ yin̈tilal Jacob. Syalann̈ej a cꞌaybꞌubꞌal ebꞌ dꞌa ebꞌ yetisraelal. Sn̈usann̈ej incienso ebꞌ dꞌa ichan̈, sn̈usan juntzan̈ silabꞌ ebꞌ stzꞌa smasanil dꞌa altar.
11 Mamin Jehová, acꞌ val a vachꞌcꞌolal dꞌa yibꞌan̈ ebꞌ, schaocabꞌ a cꞌol yic syacꞌan yopisio ebꞌ dꞌayach. Tza satcanel ebꞌ yajcꞌol ebꞌ yic vachꞌ maxtzac qꞌue van ebꞌ schichon scꞌol dꞌa ebꞌ, xchi vin̈.
12 Ix yalanpax vin̈ yuj ebꞌ yin̈tilal Benjamín icha tic:
Te xajan ebꞌ yin̈tilal Benjamín yuj Jehová, dꞌa juncꞌolal ayecꞌ ebꞌ. A scolvaj yedꞌ ebꞌ. A ayoch stan̈vumaloc ebꞌ, xchi vin̈.
13 Ix yalanpax vin̈ yuj ebꞌ yin̈tilal José icha tic:
Yacꞌocabꞌ svachꞌcꞌolal Jehová dꞌa yibꞌan̈ sluum ebꞌ yin̈tilal José. Aocabꞌ yal acꞌval vachꞌ tzꞌem dꞌa luum, ayocabꞌ a aꞌ sqꞌueul dꞌa sat luum.
14 Vachꞌocabꞌ tzꞌaj sqꞌuibꞌ sat tas tzꞌel dꞌa sat sluum ebꞌ dꞌa junjun abꞌil, vachꞌocabꞌpax tzꞌaj sat te teꞌ dꞌa junjun ujal.
15 Nivanocabꞌ sat teꞌ avbꞌen teꞌ vachꞌ tzꞌel dꞌa spacꞌultac lum vitz aytaxonecꞌ dꞌa pecaꞌ smol ebꞌ.
16 Vachꞌocabꞌ tzꞌaj sat teꞌ avbꞌen teꞌ tzꞌel dꞌa sat sluum ebꞌ yuj svachꞌcꞌolal Jehová, aton schꞌoxnac sbꞌa dꞌa scal teꞌ qꞌuiix ayoch scꞌacꞌal. Cotocabꞌcan masanil juntzan̈ vachꞌcꞌolal tic dꞌa yibꞌan̈ ebꞌ yin̈tilal José, aton vin̈ sicꞌbꞌilel dꞌa scal ebꞌ yucꞌtac.
17 Te ay smay ebꞌ yin̈tilal José, aton ebꞌ yin̈tilal Efraín man̈xo bꞌischajbꞌenoc yedꞌ ebꞌ yin̈tilal Manasés, smilalxo ebꞌ. Te ay smay ebꞌ icha junoc nocꞌ mam vacax, ma icha yip junoc nocꞌ caltacteꞌal vacax nivac schꞌaac. Ol spech masanil chon̈abꞌ ebꞌ masanto bꞌaj slajvicꞌoch yolyibꞌan̈qꞌuinal, xchi vin̈.
18 Ix yalanpax vin̈ yuj ebꞌ yin̈tilal Zabulón yedꞌ ebꞌ yin̈tilal Isacar icha tic:
Tzalajan̈ec ex yin̈tilal Zabulón bꞌajtac tzex eqꞌui. An̈ejtonaꞌ ex pax tic ex yin̈tilal Isacar, tzalajan̈ec bꞌajtac cajan ex.
19 Tzeyavtejcot masanil ebꞌ eyetisraelal dꞌa tzalquixtac, tzeyacꞌan silabꞌ to scha scꞌol Jehová. Tzeyacꞌ tzalajbꞌoc e cꞌool yedꞌ bꞌeyumal ay dꞌa yol aꞌ mar yedꞌ juntzan̈ tas te vachꞌ ay dꞌa stitac aꞌ chiꞌ, xchi vin̈.
20 Ix yalanpax vin̈ yuj ebꞌ yin̈tilal Gad icha tic:
Icꞌjocabꞌ chaan̈ Jehová ix acꞌan levanbꞌoc sluum ebꞌ yin̈til Gad. Lajan ebꞌ icha nocꞌ nun choj tzꞌem cutzan, sjecchitanel scꞌabꞌ yedꞌ sjolom schibꞌej. Icha chiꞌ ol yutej ebꞌ yajcꞌool ebꞌ yin̈til Gad chiꞌ.
21 Ix sicꞌcanel lum luum te vachꞌ ebꞌ yin̈tilal Gad chiꞌ. A jun luum chiꞌ smoj val to a dꞌa ebꞌ yajal tzꞌacꞌji luum. Ayic ix smolbꞌan sbꞌa ebꞌ yajalil chon̈abꞌ Israel, a ebꞌ yin̈tilal Gad ix scꞌanabꞌajej ebꞌ icha val yalan schecnabꞌil Jehová, xchi vin̈.
22 Ix yalanpax vin̈ yuj ebꞌ yin̈tilal Dan icha tic:
A val ebꞌ yin̈tilal Dan tic lajan val ebꞌ icha junoc nocꞌ quelem choj ay dꞌa Basán sqꞌue tzꞌitnajoc, xchi vin̈.
23 Ix yalanpax vin̈ yuj ebꞌ yin̈tilal Neftalí icha tic:
A ebꞌ yin̈tilal Neftalí tic, vachꞌ yajcan ebꞌ yuj svachꞌcꞌolal Jehová, yic ebꞌ yaj lum tzꞌemcꞌoch dꞌa sur dꞌa aꞌ n̈ajabꞌ, xchi vin̈.
24 Ix yalanpax vin̈ yuj ebꞌ yin̈tilal Aser icha tic:
Tzijtumocabꞌ svachꞌcꞌolal Jehová syacꞌ dꞌa ebꞌ yin̈tilal Aser, xajanocabꞌ ebꞌ yuj ebꞌ yetisraelal. Ochocabꞌ ebꞌ bꞌeyumal yuj yaceiteal teꞌ olivo ay dꞌa sluum.
25 Aocabꞌ qꞌuen hierro yedꞌ qꞌuen bronce tzꞌecꞌ cꞌatan syamnubꞌaloc spuertail schon̈abꞌ ebꞌ. Tecꞌanocabꞌ ebꞌ dꞌa masanil tiempo.
26 Ex Jesurún, malaj mach syal slajbꞌan sbꞌa yedꞌ co Diosal. Te ay smay sbꞌeyecꞌ dꞌa yibꞌan̈ asun ayic sjavi on̈ scoloꞌ.
27 A Dios ayn̈ejecꞌ quedꞌoc. Dꞌa masanil tiempo tzon̈ stan̈vej. A jantac spoder malaj slajvubꞌ, tzon̈ scol sicꞌlabꞌil. A Jehová ol icꞌanel ebꞌ cajcꞌol dꞌa quichan̈, ol yalani to ol co satel ebꞌ.
28 A on̈ israel yin̈til on̈ vin̈aj Jacob tic, juncꞌolal ol on̈ ajn̈ejecꞌ yedꞌ quin̈tilal dꞌa co luum. Te vachꞌ ol aj ixim co trigo yedꞌ sat teꞌ co uva, yujto man̈ ol och vaan yacꞌan n̈abꞌ dꞌa co luum tic.
29 Ex vetisraelal, te vachꞌ quicoꞌ, ¿mach val junoc syal slajbꞌan sbꞌa quedꞌoc? A Jehová tzon̈ colani, a tzon̈ tan̈vani, scolvajpax quedꞌoc. Icha quespada yaj Jehová yic scacꞌan ganar ebꞌ cajcꞌool. Ol yaqꞌuem sbꞌa ebꞌ cajcꞌol chiꞌ dꞌayon̈, xchi vin̈aj Moisés chiꞌ.