A schamel vin̈aj Moisés
34
A dꞌa span̈anil yol yic Moab ayecꞌ vin̈aj Moisés chiꞌ ayic ix qꞌue vin̈ dꞌa jolom vitz Nebo ay dꞌa sjolom lum nivan vitz Pisga, aton lum ay dꞌa yichan̈ Jericó. Ataꞌ ix schꞌoxcanbꞌat masanil lum luum Jehová yil vin̈: Aton masanil lum Galaad masanto bꞌaj ay smacbꞌen ebꞌ yin̈tilal Dan, 2 lum smacbꞌen ebꞌ yic Neftalí, ebꞌ yic Efraín, ebꞌ yic Manasés yedꞌ masanil lum yic ebꞌ yic Judá, masanto scꞌoch lum dꞌa aꞌ mar Mediterráneo. 3 Scot lum dꞌa Neguev masanto scꞌoch lum dꞌa yacꞌlical stiꞌ aꞌ Jordán yedꞌ dꞌa masanil spatictac Jericó schon̈abꞌil teꞌ palma, masanto scꞌoch lum dꞌa Zoar. 4 Ix yalan Jehová chiꞌ dꞌa vin̈ icha tic:Aton jun luum tic vacꞌnac in tiꞌ vacꞌan dꞌa vin̈aj Abraham, dꞌa vin̈aj Isaac yedꞌ dꞌa vin̈aj Jacob. Valannac dꞌa ebꞌ vin̈ icha tic: A jun luum tic ol vacꞌ dꞌa ebꞌ eyin̈tilal, xin chi, yuj chiꞌ tzin chꞌoxcanbꞌat lum dꞌayach, vachꞌchom man̈xo ol ach cꞌoch dꞌa luum, xchi Jehová chiꞌ dꞌa vin̈.
5 Ix lajvi chiꞌ, ataꞌ ix cham vin̈aj Moisés schecabꞌ Jehová chiꞌ, dꞌa yol yic Moab, icha ix aj yalan Jehová chiꞌ dꞌa vin̈. 6 A dꞌa jun chꞌolan dꞌa yol yic Moab dꞌa yichan̈ Bet-peor ix mucji vin̈ yuj Jehová chiꞌ, palta malaj mach ojtannac jun bꞌaj mucancan snivanil vin̈ chiꞌ. 7 120 abꞌil sqꞌuinal vin̈ ayic ix cham vin̈. Vachꞌto yilan vin̈, tecꞌantopax vin̈ ayic ix cham vin̈ chiꞌ.
8 Jun val ujal ix och ebꞌ chon̈abꞌ israel dꞌa cuscꞌolal yuj schamel vin̈ chiꞌ dꞌa tzꞌinan luum yic Moab, icha sbꞌeybꞌal ebꞌ. 9 Ayic manto cham vin̈aj Moisés chiꞌ, ix yacꞌcanbꞌat scꞌabꞌ vin̈ dꞌa yibꞌan̈ vin̈aj Josué yuninal vin̈aj Nun yic schaancan sjelanil vin̈ yedꞌ yopisio icha ix aj yalan Jehová. Yuj chiꞌ a ebꞌ chon̈abꞌ israel, ix scꞌanabꞌajej ebꞌ tas ix yal vin̈aj Josué chiꞌ.
10 Atax dꞌa jun tiempoal chiꞌ, man̈xa junocxo schecabꞌ Jehová dꞌa scal ebꞌ chon̈abꞌ israel qꞌuelcꞌumbꞌa ix aj Jehová ix lolon yedꞌoc, icha ix aj slolon yedꞌ vin̈aj Moisés. 11 Man̈xa junocxo mach ix cꞌulan tas satubꞌtac yilji yedꞌ milagro icha scꞌulejnac Jehová yedꞌ vin̈aj Moisés chiꞌ dꞌa yol yic Egipto dꞌa yichan̈ vin̈ rey yedꞌ dꞌa yichan̈ ebꞌ ayoch yajalil yedꞌ vin̈ yedꞌ dꞌa masanil ebꞌ aj Egipto chiꞌ. 12 Malaj junocxo mach nivan yelcꞌoch scꞌulan tastac ay smay icha scꞌulejnac vin̈aj Moisés dꞌa yichan̈ ebꞌ yetisraelal.