A smacbꞌen ebꞌ ix isilabꞌil
27
Ay jun vin̈ dꞌa yin̈tilal Manasés scuch Zelofehad. Aton stzolal smam yicham vin̈ tic: Vin̈aj Hefer, vin̈aj Galaad, vin̈aj Maquir, vin̈aj Manasés yedꞌ vin̈aj José. A vin̈aj Zelofehad chiꞌ ay ovan̈ ebꞌ ix yisil vin̈: Aton ix Maala, ix Noa, ix Hogla, ix Milca yedꞌ ix Tirsa. 2 A ovan̈ ebꞌ ix snulej sbꞌa tic, ix bꞌat ebꞌ ix bꞌaj ay cajnubꞌ bꞌaj schꞌox sbꞌa Jehová. Ix yalan ebꞌ ix dꞌa vin̈aj Moisés yedꞌ dꞌa vin̈aj sacerdote Eleazar yedꞌ dꞌa masanil ebꞌ yajalil chon̈abꞌ icha tic: 3 A vin̈ co mam a on̈ tic, ix cham vin̈ dꞌa tzꞌinan luum, palta man̈ locanoclaj vin̈ yedꞌ ebꞌ yic vin̈aj Coré ix meltzajoch ajcꞌolal dꞌa Jehová. A vin̈ co mam chiꞌ yujn̈ej smul vin̈ dꞌa yol yicoꞌ ix cham vin̈, malaj junoc yuninal vin̈ ix cani. 4 Palta man̈ smojoc satcanel sbꞌi vin̈ dꞌa slistail quin̈tilal, yujn̈ej to malaj junoc yuninal vin̈ ix cani. Yuj chiꞌ ol eyacꞌ junoc macan̈ co luum dꞌa scal yic ebꞌ vin̈ yucꞌtac vin̈ co mam chiꞌ, xchi ebꞌ ix. 5 Ix yalan vin̈aj Moisés masanil tas ix yal ebꞌ ix ix chiꞌ dꞌa Jehová. 6 Ix tacꞌvi Jehová chiꞌ dꞌa vin̈ icha tic: 7 A ebꞌ ix yisil vin̈aj Zelofehad chiꞌ, yel syal ebꞌ ix. Ol acꞌ junoc macan̈ sluum ebꞌ ix dꞌa scal yic ebꞌ vin̈ yucꞌtac vin̈ smam ebꞌ ix chiꞌ, axo ebꞌ ix ol icꞌancan smacbꞌen vin̈ smam chiꞌ. 8 Alpax dꞌa ebꞌ etisraelal: Tato ay mach schami, malaj junoc yuninal vinac scani, a smacbꞌen syal scan dꞌa ebꞌ ix yisil. 9 Palta tato malaj junoc yisil chiꞌ, a dꞌa junoc yucꞌtac scan smacbꞌen chiꞌ. 10 Tato malaj junoc yucꞌtac chiꞌ jun, a dꞌa ebꞌ yucꞌtac smam scan smacbꞌen chiꞌ. 11 Tato a smam chiꞌ malaj pax yucꞌtac, a dꞌa junoc scꞌabꞌ yoc, ataꞌ scan smacbꞌen chiꞌ. A jun tic ley tzꞌajcan dꞌa scal chon̈abꞌ Israel, icha tzꞌaj valan tic dꞌayach, xchi Jehová chiꞌ dꞌa vin̈.Ochnac vin̈aj Josué sqꞌuexuloc vin̈aj Moisés
12 Ix yalanxi Jehová dꞌa vin̈aj Moisés chiꞌ icha tic:
—Qꞌuean̈ dꞌa jolom vitz Abarim, tzilancanbꞌat lum ol vacꞌ dꞌa ebꞌ etchon̈abꞌ tic. 13 An̈ej slajvi ilanbꞌat luum, ol ach chamoc, icha val ix aj scham vin̈ ucꞌtac aj Aarón, 14 yujto maj in e cꞌanabꞌajej, maj in eyicꞌchaan̈ dꞌa tzꞌinan lum yic Zin, ayic ix cot yoval ebꞌ anima dꞌayin. Maj e cꞌanabꞌajej e chꞌoxanel dꞌa yichan̈ ebꞌ eyetchon̈abꞌ to A inxon̈ej Ochi ayic ix qꞌue yav ebꞌ scꞌanan a aꞌ yuqꞌuej, xchi dꞌa vin̈. (Ix uji jun chiꞌ bꞌaj ay a aꞌ scuch Meriba dꞌa Cades, dꞌa lum tzꞌinan luum yic Zin.)
15 Ix yalan vin̈aj Moisés dꞌa Jehová chiꞌ icha tic:
16 —Mamin Jehová, a ach tzacꞌ sqꞌuinal masanil anima. A ticnaic acꞌoch a sat dꞌa junoc mach tzꞌoch yajaliloc a chon̈abꞌ, 17 yic scuchbꞌejbꞌat ebꞌ yic sbꞌatn̈ej ebꞌ, yic max satecꞌ ebꞌ icha nocꞌ calnel malaj stan̈vumal, xchi vin̈.
18 Ix tacꞌvi Jehová chiꞌ dꞌa vin̈ icha tic:
—Te ay val och Vespíritu dꞌa vin̈aj Josué yuninal vin̈aj Nun, yuj chiꞌ acꞌbꞌat a cꞌabꞌ dꞌa sjolom vin̈. 19 Dꞌa val yichan̈ vin̈aj sat sacerdote Eleazar yedꞌ dꞌa yichan̈ masanil ebꞌ anima, tzacꞌancanoch yopisio vin̈. 20 Acꞌcanoch jabꞌoc opisio chiꞌ dꞌa yibꞌan̈ vin̈, yic vachꞌ ol scꞌanabꞌajej masanil ebꞌ anima tas ol yal vin̈. 21 A dꞌa vin̈aj Eleazar ol yal vin̈, axo vin̈aj Eleazar chiꞌ ol cꞌanbꞌan dꞌayin yuj vin̈. A inxo Jehová in tic ol val yedꞌ qꞌuen Urim tas ol yutej sbꞌa vin̈. Axo vin̈ ol alan dꞌa ebꞌ chon̈abꞌ chiꞌ tas ol aj ebꞌ, xchi Jehová chiꞌ.
22-23 Yuj chiꞌ ix icꞌjibꞌat vin̈aj Josué chiꞌ yuj vin̈aj Moisés dꞌa yichan̈ vin̈aj sacerdote Eleazar yedꞌ dꞌa yichan̈ masanil ebꞌ chon̈abꞌ. Ix lajvi chiꞌ ix yacꞌanbꞌat scꞌabꞌ vin̈aj Moisés chiꞌ dꞌa sjolom vin̈aj Josué chiꞌ, ix yacꞌancan yopisio vin̈, icha ix aj yalan Jehová dꞌa vin̈aj Moisés chiꞌ.