Ix icꞌjichaan̈ sbꞌisul ebꞌ israel junelxo
26
Ayic ix lajviecꞌ jun ilya to scham anima chiꞌ yuuj, ix yalan Jehová dꞌa vin̈aj Moisés yedꞌ dꞌa vin̈aj Eleazar sat sacerdote yuninal vin̈aj Aarón: 2 —Iqꞌuecchaan̈ sbꞌisul ebꞌ israel dꞌa junjun macan̈il yaj ebꞌ, tzꞌel yich dꞌa ebꞌ 20 abꞌil sqꞌuinal stiempo val sbꞌat dꞌa oval, xchi dꞌa ebꞌ vin̈. 3 Ix smolbꞌan masanil ebꞌ vinac vin̈aj Moisés yedꞌ vin̈aj Eleazar dꞌa yacꞌlical Moab, dꞌa stiꞌ aꞌ Jordán, dꞌa yichan̈cot Jericó, 4 yic stzꞌibꞌchaj masanil ebꞌ 20 abꞌil sqꞌuinal sbꞌeyn̈ejbꞌati, icha val ix aj yalan Jehová dꞌa vin̈aj Moisés chiꞌ. Aton masanil ebꞌ ix elta dꞌa Egipto: 5-7 A ebꞌ yin̈tilalcan Rubén sbꞌabꞌel yuninal vin̈aj Israel, ay 43 mil 730 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Enoc, vin̈aj Falú, vin̈aj Ezrón yedꞌ vin̈aj Carmi. 8 A vin̈aj Falú chiꞌ ay yuninal vin̈aj Eliab, 9 axo pax vin̈aj Eliab ay yuninal vin̈aj Nemuel, vin̈aj Datán yedꞌ vin̈aj Abiram, yichamtac vinaquil chon̈abꞌ yaj ebꞌ. Aton ebꞌ junn̈ej ajnac slajtiꞌ yedꞌ vin̈aj Coré. Meltzajnacoch ebꞌ ajcꞌolal dꞌa Jehová, dꞌa vin̈aj Moisés yedꞌ dꞌa vin̈aj Aarón. 10 Palta paxnac levnaj lum luum, emnaccan ebꞌ chavan̈ chiꞌ dꞌa yol lum yedꞌ vin̈aj Coré. Masanil ebꞌ ochnac tzacꞌan yuj vin̈aj Coré chiꞌ chamnac ebꞌ, aton ebꞌ 250 chamnac yuj jun cꞌacꞌ. A juntzan̈ ebꞌ chiꞌ ochnac chꞌoxnabꞌiloc dꞌa ebꞌ israel smasanil.* 11 Axo pax ebꞌ yin̈tilalcan vin̈aj Coré chiꞌ, maj satel-laj ebꞌ.12-14 Axo pax ebꞌ yin̈tilalcan Simeón, ay 22 mil 200 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Nemuel, vin̈aj Jamín, vin̈aj Jaquín, vin̈aj Zera yedꞌ vin̈aj Saúl.
15-18 A ebꞌ yin̈tilalcan Gad, ay 40 mil 500 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Zefón, vin̈aj Hagui, vin̈aj Suni, vin̈aj Ozni, vin̈aj Eri, vin̈aj Arod yedꞌ vin̈aj Areli.
19-22 A ebꞌ yin̈tilal Judá, ay 76 mil 500 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Sela, vin̈aj Fares yedꞌ vin̈aj Zera. A ebꞌ yuninal vin̈aj Fares sbꞌinajcan dꞌa yin̈tilal: Vin̈aj Hezrón yedꞌ vin̈aj Hamul. A pax ebꞌ yuninal vin̈aj Judá ix cham dꞌa lum Canaán aton vin̈aj Er yedꞌ vin̈aj Onán.
23-25 A ebꞌ yin̈tilalcan Isacar, ay 64 mil 300 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Tola, vin̈aj Fúa, vin̈aj Jasub yedꞌ vin̈aj Simrón.
26-27 A ebꞌ yin̈tilalcan Zabulón, ay 60 mil 500 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Sered, vin̈aj Elón yedꞌ vin̈aj Jahleel.
28-34 Axo pax dꞌa yin̈tilalcan José, chabꞌ in̈tilal yaj ebꞌ, aton yic Manasés yedꞌ yic Efraín.
A ebꞌ yin̈tilalcan Manasés chiꞌ, ay 52 mil 700 ebꞌ vinac dꞌa smasanil. A ebꞌ sbꞌinajcan dꞌa scal junjun macan̈ yin̈tilal vin̈: Aton vin̈aj Maquir yedꞌ vin̈aj Galaad yuninal vin̈aj Maquir chiꞌ yedꞌ pax ebꞌ yuninal vin̈aj Galaad chiꞌ, aton vin̈aj Jezer, vin̈aj Helec, vin̈aj Asriel, vin̈aj Siquem, vin̈aj Semida yedꞌ vin̈aj Hefer. (A vin̈aj Zelofehad yuninal vin̈aj Hefer, malaj yuninal vin̈, an̈ej ebꞌ ix yisil vin̈ ay: Aton ix Maala, ix Noa, ix Hogla, ix Milca yedꞌ ix Tirsa.)
35-37 Axo ebꞌ yin̈tilalcan Efraín, ay 32 mil 500 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Sutela, vin̈aj Bequer yedꞌ vin̈aj Tahán. Ay jun yuninal vin̈aj Sutela chiꞌ sbꞌinajcan dꞌa yin̈tilal, aton vin̈aj Erán.
38-41 A ebꞌ yin̈tilalcan Benjamín, ay 45 mil 600 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Bela, vin̈aj Asbel, vin̈aj Ahiram, vin̈aj Sufam yedꞌ vin̈aj Hufam. A ebꞌ yuninal vin̈aj Bela sbꞌinajcan dꞌa yin̈tilal, aton vin̈aj Ard yedꞌ vin̈aj Naamán.
42-43 A pax ebꞌ yin̈tilalcan Dan, ay 64 mil 400 ebꞌ vinac dꞌa smasanil. A vin̈ sbꞌinajcan dꞌa yin̈tilal, aton vin̈aj Suham.
44-47 Axo pax yin̈tilalcan Aser, ay 53 mil 400 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Imna, vin̈aj Isúi yedꞌ vin̈aj Bería. A ebꞌ yuninal vin̈aj Bería chiꞌ sbꞌinajcan dꞌa yin̈tilal: Aton vin̈aj Heber yedꞌ vin̈aj Malquiel. (A vin̈aj Aser chiꞌ ay jun ix yisil vin̈ scuchan Sera).
48-50 A ebꞌ yin̈tilalcan Neftalí, ay 45 mil 400 ebꞌ vinac dꞌa smasanil. A sbꞌi ebꞌ yuninal vin̈ sbꞌinajcan dꞌa junjun macan̈ yin̈tilal, aton tic: Vin̈aj Jahzeel, vin̈aj Guni, vin̈aj Jezer yedꞌ vin̈aj Silem.
51 Yuj chiꞌ a sbꞌisul masanil ebꞌ vinac yic chon̈abꞌ Israel, ay 601 mil 730 ebꞌ dꞌa smasanil.
Sleyal tas tzꞌaj spucchajecꞌ lum luum
52 Ix lolon Jehová dꞌa vin̈aj Moisés, ix yalan icha tic:
53 Pucchajocabꞌecꞌ lum luum dꞌa scal junjun in̈tilal ato syalaꞌ jantac sbꞌisul junjun ix qꞌue vaan. 54-56 Dꞌa suerteal tzꞌaj spucchajecꞌ luum dꞌa ebꞌ. Nivan lum tzacꞌ dꞌa ebꞌ nivan sbꞌisul, quenn̈ej lum tzacꞌ dꞌa ebꞌ quenn̈ej sbꞌisul, xchi dꞌa vin̈.
A sbꞌisul ebꞌ levita
57 A ebꞌ yuninal vin̈aj Leví sbꞌinajcan dꞌa yin̈tilal: Vin̈aj Gersón, vin̈aj Coat yedꞌ vin̈aj Merari. 58 A ebꞌ yixchiquin vin̈aj Leví chiꞌ sbꞌinajcan dꞌa yin̈tilal: Vin̈aj Libni, vin̈aj Hebrón, vin̈aj Mahli, vin̈aj Musi yedꞌ vin̈aj Coré, aton ebꞌ vin̈ tic yin̈tilalcan vin̈aj Leví.
A vin̈aj Coat chiꞌ, aton vin̈ smam vin̈aj Amram. 59 A vin̈aj Amram chiꞌ ix yicꞌ sbꞌa yedꞌ jun ix yin̈tilalcan vin̈aj Leví chiꞌ, aton ix scuchan Jocabed. Ayic ayecꞌ vin̈aj Leví chiꞌ dꞌa Egipto ix alji ix. A vin̈aj Amram yedꞌ ix Jocabed chiꞌ, aton ebꞌ smam snun vin̈aj Aarón, vin̈aj Moisés yedꞌ ix María. 60 Axo ebꞌ yuninal vin̈aj Aarón, aton vin̈aj Nadab, vin̈aj Abiú, vin̈aj Eleazar yedꞌ vin̈aj Itamar. 61 A vin̈aj Nadab yedꞌ vin̈aj Abiú chiꞌ, ix cham ebꞌ vin̈ yujto ix yacꞌoch jun cꞌacꞌ ebꞌ vin̈ man̈ smojoc icha ofrenda dꞌa yichan̈ Jehová.
62 Masanil ebꞌ vinac dꞌa yin̈tilalcan vin̈aj Leví, aton ebꞌ jun ujal sqꞌuinal sbꞌeyn̈ejbꞌati, ay 23 mil ebꞌ. A ebꞌ tic man̈ ayococh ebꞌ sbꞌisuloc juntzan̈xo ebꞌ yetisraelal, yujto a ebꞌ levita tic malaj smacbꞌen ebꞌ ol schaꞌa, ayic ol cꞌoch ebꞌ dꞌa lum Canaán.
63 Icha val chiꞌ ix aj yelcꞌoch sbꞌisul ebꞌ israel ix icꞌjichaan̈ yuj vin̈aj Moisés yedꞌ vin̈aj sacerdote Eleazar dꞌa acꞌlic dꞌa yol yic Moab, dꞌa stiꞌ aꞌ Jordán dꞌa yichan̈cot Jericó. 64 Masanil ebꞌ chiꞌ, malaj junoc ebꞌ ix bꞌisji yuj vin̈aj Moisés yedꞌ vin̈aj Aarón ayic ix yicꞌanchaan̈ sbꞌisul ebꞌ vin̈ dꞌa sbꞌabꞌelal dꞌa tzꞌinan luum Sinaí, 65 yujto ix yal Jehová to ol cham ebꞌ dꞌa tzꞌinan luum chiꞌ. Man̈xa junoc ebꞌ chiꞌ ix cani, axon̈ej vin̈aj Caleb yuninal vin̈aj Jefone yedꞌ vin̈aj Josué yuninal vin̈aj Nun ix cani.