Ochnac ebꞌ israel ejmelal dꞌa yechel Baal-peor
25
Ayic ayecꞌ ebꞌ israel dꞌa Sitim, tzijtum ebꞌ vin̈ vinac ix mulan yedꞌ ebꞌ ix moabita. 2 Ix montajbꞌat ebꞌ vin̈ yuj ebꞌ ix bꞌaj tzꞌoch sqꞌuin̈al sdiosal. Ix schiꞌan nocꞌ chibꞌej ebꞌ vin̈ israel chiꞌ, nocꞌ silabꞌej ebꞌ ix dꞌa sdiosal chiꞌ. Ix ochpax ebꞌ vin̈ ejmelal dꞌa sdiosal ebꞌ ix chiꞌ. 3 Icha chiꞌ ix aj scuchbꞌajbꞌat ebꞌ vin̈ yoch ejmelal dꞌa jun yechel scuch Baal, sdiosal chon̈abꞌ Peor, yuj chiꞌ ix te cot yoval Jehová dꞌa chon̈abꞌ Israel chiꞌ, 4 ix yalan dꞌa vin̈aj Moisés icha tic:—Molbꞌej masanil ebꞌ ix cuchbꞌanbꞌat ebꞌ anima tic dꞌa juntzan̈ chucal chiꞌ, val dꞌa vichan̈ yedꞌ dꞌa yichan̈ ebꞌ etchon̈abꞌ tza dꞌun̈bꞌejqꞌue ebꞌ. Icha chiꞌ ol aj sicbꞌiem yoval in cꞌol dꞌa chon̈abꞌ Israel tic, xchi dꞌa vin̈.
5 Yuj chiꞌ ix yalan vin̈aj Moisés dꞌa ebꞌ yajalil chon̈abꞌ chiꞌ icha tic:
—Junjun ex dꞌa eyin̈tilal tze milcham ebꞌ vin̈ ix bꞌat och ejmelal dꞌa Baal, xchi vin̈.
6 Junanto rato chiꞌ ix ecꞌbꞌat jun vin̈ israel yedꞌ jun ix aj Madián van yicꞌanbꞌat ix vin̈ dꞌa smantiado. Ix ecꞌbꞌat vin̈ dꞌa slacꞌanil scajnubꞌ Jehová dꞌa yichan̈ vin̈aj Moisés yedꞌ ebꞌ anima molaneqꞌui yic tzꞌocꞌ ebꞌ dꞌa yichan̈ Jehová. 7 Ayic ix yilan vin̈aj Finees yuninal vin̈aj Eleazar, yixchiquincan vin̈aj Aarón vin̈ bꞌabꞌel sat sacerdote, ix qꞌue vaan vin̈ dꞌa scal ebꞌ anima ayecꞌ molan chiꞌ. Ix yicꞌancot slanza vin̈, ix bꞌat tzacꞌan vin̈ yuj jun vin̈ israel yedꞌ ix aj Madián chiꞌ, 8 masanto ix cꞌoch vin̈ dꞌa yol smantiado vin̈. Ix stecan cꞌaxpaj qꞌuen lanza chiꞌ vin̈ dꞌa yol scꞌol vin̈ israel yedꞌ ix aj Madián chiꞌ. Icha chiꞌ ix aj yoch vaan scham anima yuj jun ilya ix yacꞌcot Jehová dꞌa scal ebꞌ israel chiꞌ. 9 Ay 24 mil anima ix cham yuj jun ilya chiꞌ.
10 Ix lajvi chiꞌ, ix lolon Jehová dꞌa vin̈aj Moisés chiꞌ icha tic:
11 —A vin̈aj Finees ix acꞌan sicbꞌoc yoval in cꞌool, ix lajvi voval dꞌa yibꞌan̈ chon̈abꞌ Israel tic, yapax ix yabꞌ vin̈ vedꞌoc yujto ix sna vin̈ to a inn̈ej nivan velcꞌochi, yuj chiꞌ, tato man̈ ichocta ix scꞌulej vin̈, masanil am ebꞌ anima tic ix sateli. 12-13 Yuj chiꞌ al dꞌa vin̈ icha tic: Yujto ya ix abꞌ vedꞌoc, yujto ix a naꞌ to a inn̈ej nivan velcꞌochi, yuj chiꞌ ix acꞌ sicbꞌoquem yoval in cꞌol dꞌa yibꞌan̈ ebꞌ anima tic, yuj chiꞌ ol in bꞌo in trato edꞌoc yedꞌ masanil ebꞌ in̈tilal, ol ochcan ebꞌ sacerdoteal dꞌa masanil tiempo, xchi Jehová, xa chi dꞌa vin̈, xchi dꞌa vin̈aj Moisés chiꞌ.
14 A jun vin̈ ix cham yedꞌ ix aj Madián yuj vin̈aj Finees chiꞌ, Zimri sbꞌi vin̈, yuninal vin̈aj Salu, yajal yaj dꞌa scal yin̈tilal Simeón. 15 Axo pax ix ix, ix cham chiꞌ, Cozbi sbꞌi ix, yisil ix vin̈aj Zur, yajal yaj dꞌa jun macan̈ anima dꞌa Madián.
16 Ix yalanxi Jehová dꞌa vin̈aj Moisés chiꞌ icha tic:
17 —Aqꞌuec oval yedꞌ ebꞌ aj Madián, tze satanel ebꞌ, 18 yujto ix ex och dꞌa yol scꞌabꞌ yaelal yuj ebꞌ ayic ix ex yicꞌanbꞌat ebꞌ eyoch ejmelal dꞌa sdiosal dꞌa Peor. Naeccoti tas ix ex yutej ix Cozbi, aton ix yisil jun vin̈ yajal yaj dꞌa ebꞌ, yuj chiꞌ ix tecjicham ix dꞌa qꞌuen lanza, ayic ix vacꞌanbꞌat ilya dꞌa e cal, yujto tzijtum mach ix och ejmelal dꞌa sdiosal ebꞌ, xchi dꞌa vin̈.