24
Axo yic ix nachajel yuj vin̈aj Balaam to scha scꞌol Jehová ayic syalan vachꞌ lolonel vin̈ dꞌa yibꞌan̈ ebꞌ israel, majxo bꞌatlaj vin̈ scꞌanbꞌej yabꞌ icha ix yutej dꞌa sbꞌabꞌelal, an̈ej to ix bꞌat qꞌuelan vin̈ dꞌa tzꞌinan luum chiꞌ. 2 Axo ix yilanbꞌat chon̈abꞌ Israel vin̈, dꞌa stzolal yaj junjun in̈tilal ebꞌ yedꞌ scampamento, ix och Yespíritu Dios dꞌa vin̈, 3 yuj chiꞌ ix och ijan vin̈ yalan icha tic:Aton in lolonel a in Balaam in tic, yuninal in vin̈aj Beor, jichichi tzꞌaj vilani.
4 Svabꞌ tas syal Dios. Icha vayichal tzꞌaj vilan Dios Syal Yuj Smasanil. Tzin ecꞌ jichan, palta jacan in sat, te vachꞌ vilani.
5 Ex israel yin̈tilalcan vin̈aj Jacob, te vachꞌ yilji e mantiado. Te vachꞌ quilanbꞌat e campamento.
6 Icha val yaj stzolal teꞌ palma, icha val chiꞌ eyiljibꞌati. Icha val sbꞌat tzololoc junoc tas tzꞌavchaj dꞌa stiꞌ junoc a aꞌ, icha val chiꞌ eyajemi. Icha teꞌ áloes avabꞌil yuj Jehová, ma icha val yaj teꞌ cꞌuteꞌ dꞌa stiꞌ a aꞌ.
7 A bꞌaj ayecꞌ chon̈abꞌ Israel chiꞌ, man̈xo jantacoc a aꞌ. Vachꞌn̈ej yucꞌan aꞌ ebꞌ yedꞌ yacꞌanoch yalil tas syavej ebꞌ. A sreyal ebꞌ te ay smay dꞌa yichan̈ vin̈aj rey Agag. Te nivan yaj smacbꞌen sreyal ebꞌ.
8 A Jehová ix icꞌanelta ebꞌ dꞌa Egipto. A Jehová ayoch yipoc scꞌool ebꞌ, icha nocꞌ oval vacax a schꞌaac ayoch yipoc scꞌool. A chon̈abꞌ Israel ol satanel ebꞌ ayoch ajcꞌolal dꞌay. Ol smacꞌpoj sbꞌaquil ebꞌ yajcꞌol ebꞌ chiꞌ. Ol cꞌaxpajecꞌ sjul-labꞌ ebꞌ dꞌa snivanil ebꞌ yajcꞌol chiꞌ.
9 Lajan val ebꞌ icha junoc nocꞌ choj jichanecꞌ svayi, malaj mach stecꞌbꞌej sbꞌa stzuntzani. Ex israel, alchajocabꞌ vachꞌ lolonel dꞌa mach tzꞌalan vachꞌ lolonel dꞌayex, catabꞌajocabꞌ mach tzex catabꞌani, xchi vin̈.
Slajvubꞌ slolonel vin̈aj Balaam
10 Ayic ix yabꞌan juntzan̈ lolonel chiꞌ vin̈aj Balac chiꞌ, ix te cot yoval vin̈ sicꞌlabꞌil, ix smuchꞌan jun scꞌabꞌ vin̈ ix schucꞌanoch vin̈ dꞌa yol junxo scꞌabꞌ yuj yoval chiꞌ, ix yalan vin̈ icha tic:
—A yuj a catabꞌan ebꞌ ajcꞌol yajoch tic dꞌayin ix ach vavtejcoti, axo ticnaic yoxelalxo alan vachꞌ lolonel dꞌa yibꞌan̈ ebꞌ. 11 Te vachꞌ ama tzach meltzaj dꞌa a pat dꞌa elan̈chamel. Toxo ix valaꞌ to nivan tas ol vacꞌ dꞌayach, ol ach vicꞌanchaan̈, palta max schalaj scꞌol Jehová to icha chiꞌ tzꞌaji, xchi vin̈aj Balac chiꞌ.
12 Ix tacꞌvixi vin̈aj Balaam chiꞌ icha tic:
—Jichan ix aj valan dꞌa ebꞌ a checabꞌ: 13 Vachꞌchom bꞌudꞌan a palacio yuj qꞌuen oro, ma yuj qꞌuen plata, tzacꞌan qꞌuen dꞌayin, palta max yal-laj in qꞌuexan tas syal Jehová, max yal-laj vacꞌan vachꞌcꞌolal, ma in catabꞌan bꞌaj scot dꞌa in cꞌol in cꞌulani, yujto a tas schec Jehová valaꞌ, aton yovalil svalaꞌ. 14 Vachꞌ ol in meltzaj dꞌa in chon̈abꞌ. An̈ej, ayic mantzac in bꞌati, svalcan dꞌayach tas ol utaj a chon̈abꞌ tic yuj jun chon̈abꞌil anima chiꞌ dꞌa bꞌaqꞌuin̈, xchi vin̈.
15 Ix lajvi chiꞌ, ix och ijan vin̈ yalan icha tic:
Aton in lolonel a in Balaam in tic, yuninal in vin̈aj Beor, jichichi tzꞌaj vilani.
16 Svabꞌ tas syal Dios Ecꞌto dꞌa yibꞌan̈ Smasanil, vojtac tas yaj spensar, svilanpax icha vayichal. A Dios Syal yuj Smasanil chiꞌ tzꞌacꞌan vojtaquejeli. Tzin ecꞌ jichan, palta jacan in sat, te vachꞌn̈ej vilani.
17 Ay jun mach najatto ay, palta syal vilanbꞌati. Ay jun rey ol checlajqꞌue dꞌa scal ebꞌ yin̈tilal vin̈aj Jacob, tziquiqui yilji icha qꞌuen cꞌanal. A jun rey chiꞌ ol yacꞌ yajalil dꞌa scal ebꞌ yin̈tilal Israel. Aꞌ ol satanel chon̈abꞌ Moab, a pax ol satanel ebꞌ yin̈tilalcan vin̈aj Set.
18 Ol can chon̈abꞌ Edom dꞌa yalan̈ yuuj, ol ochcan lum Seir chiꞌ yicoc. A chon̈abꞌ Israel ol yicꞌ yip.
19 A dꞌa scal ebꞌ yin̈tilalcan vin̈aj Jacob ol elta jun mach ol och Yajalil. Aꞌ ol satanel jantacto mach ol can dꞌa yol jun chon̈abꞌ chiꞌ, xchi vin̈.
20 Ix lajvi chiꞌ ix yilanbꞌat chon̈abꞌ Amalec vin̈, ix yalan vin̈ icha tic:
A chon̈abꞌ Amalec yelxo ay smay dꞌa yichan̈ juntzan̈xo chon̈abꞌ, palta ol satel dꞌa juneln̈ej, xchi vin̈.
21 Ix bꞌat qꞌuelan vin̈ dꞌa schon̈abꞌ ebꞌ quenita, ix yalan vin̈ icha tic:
Ex quenita, vachꞌchom te ay smay e chon̈abꞌ yic scolan sbꞌa, vachꞌchom dꞌa schontac qꞌuen nivac tenam tzeyacꞌqꞌue e pat,
22 palta ol satcanel e chon̈abꞌ chiꞌ, a jantac exto ol ex canoc, ol ex yicꞌcanbꞌat ebꞌ vin̈ asirio schecabꞌoc, xchi vin̈.
23 Ix lajvi chiꞌ ix yalanxi vin̈ icha tic:
Ay, ¿tocval ayto mach ol canoc ayic ol scꞌulan juntzan̈ tic Dios?
24 Ay teꞌ barco ol cot dꞌa Chipre, ol ja dꞌa stiꞌ aꞌ mar yic tzul yixtan chon̈abꞌ Asiria yedꞌ chon̈abꞌ Heber, palta ol satjocpaxel ebꞌ aj Chipre chiꞌ, xchi vin̈.
25 Ix lajvi yalan juntzan̈ tic vin̈, ix meltzaj vin̈ dꞌa schon̈abꞌ, axo vin̈aj Balac ix meltzajxican vin̈ bꞌaj cajan.