23
Ix yalan vin̈aj Balaam dꞌa vin̈aj Balac chiꞌ icha tic:—Chec bꞌochajqꞌue uqueoc altar dꞌa tic, tza checan icꞌchajcot ucvan̈oc nocꞌ quelemtac vacax yedꞌ ucvan̈oc nocꞌ chꞌac calnel, xchi vin̈. 2 Ix scꞌanabꞌajej vin̈aj Balac tas ix yal vin̈ chiꞌ, ix smol acꞌan juntzan̈ silabꞌ chiꞌ ebꞌ vin̈ schavan̈il, jun nocꞌ quelem vacax yedꞌ jun nocꞌ chꞌac calnel dꞌa junjun altar. 3 Ix yalanxi vin̈aj Balaam chiꞌ dꞌa vin̈aj Balac chiꞌ icha tic:
—Canan̈ dꞌa stzꞌey juntzan̈ silabꞌ tic, ol bꞌat vilaꞌ tato sjavi Jehová yic slolon vedꞌoc, ol lajvoc chiꞌ ol valan dꞌayach tas val ol aj yalan dꞌayin, xchi vin̈.
Ix yal vachꞌ lolonel vin̈aj Balaam dꞌa yibꞌan̈ ebꞌ israel
Ix bꞌat vin̈ dꞌa jun nivan vitz malaj steꞌal. 4 Ataꞌ ix schꞌox sbꞌa Jehová dꞌa vin̈, ix yalan vin̈ dꞌay icha tic:
—Ix in bꞌoqꞌue uqueꞌ altar, ix vacꞌancanqꞌue junjun nocꞌ vacax yedꞌ junjun nocꞌ chꞌac calnel dꞌa yibꞌan̈ junjun, xchi vin̈. 5 Ix lajvi chiꞌ ix yalan Jehová chiꞌ tas ol aj slolon vin̈. Ix yalan icha tic:
—Meltzajan̈ bꞌaj ayecꞌ vin̈aj Balac chiꞌ, tzalan tas ix val tic dꞌayach, xchi dꞌa vin̈. 6 Ix meltzaj vin̈, ix cꞌochxi vin̈ bꞌaj aycan lin̈an vin̈aj Balac yedꞌ ebꞌ yichamtac vinaquil Moab dꞌa stzꞌey silabꞌ chiꞌ. 7 Ix lajvi chiꞌ, ix och ijan vin̈ yalan icha tic:
Ayinecꞌ dꞌa jun vitz dꞌa stojolal bꞌaj sjavi cꞌu dꞌa yol yic Aram, ayic ix in yavtancot vin̈aj Balac sreyal Moab. Cotan̈, tza catabꞌan ebꞌ israel. Alcan chucal lolonel dꞌa yibꞌan̈ yin̈tilal vin̈aj Jacob chiꞌ, xchibꞌat vin̈.
8 Palta, ¿tas val tzꞌaj in catabꞌan anima to man̈oc Dios scatabꞌani? ¿Tas val tzꞌaj vacꞌan chucal tato man̈oc Jehová tzꞌacꞌan chucal dꞌay?
9 Te vachꞌ vilanbꞌat jun chon̈abꞌ chiꞌ ayic ayinqꞌue dꞌa schon jun qꞌuen qꞌueen tic. Te vachꞌ vilanbꞌat dꞌa jolom vitz bꞌaj ayinecꞌ tic. A jun chon̈abꞌ chiꞌ chꞌoc yajeli, max sombꞌatlaj sbꞌa dꞌa scal juntzan̈xo chon̈abꞌ.
10 Lajanxo sbꞌisul jun chon̈abꞌ chiꞌ icha spococal lum luum, ¿tocval ay mach stzacꞌvan sbꞌisan nan̈aloc ebꞌ? Comonoc val a in tzin cham dꞌa juncꞌolal icha juntzan̈ anima to vachꞌ spensar chiꞌ, xchi vin̈ dꞌa yichan̈ ebꞌ vin̈ chiꞌ.
11 Ayic ix yabꞌan juntzan̈ lolonel chiꞌ vin̈aj Balac chiꞌ, ix och ijan vin̈ yalanoch dꞌa sat vin̈aj Balaam chiꞌ icha tic:
—¿Tas aji? A yuj a catabꞌan ebꞌ ayoch ajcꞌolal tic dꞌayin, yuj chiꞌ ach vicꞌcoti, palta axo vachꞌ lolonel tzalcan dꞌa yibꞌan̈ ebꞌ, xchi vin̈.
12 Ix tacꞌvi vin̈aj Balaam chiꞌ icha tic:
—Yovalil a tas schec Jehová valaꞌ, a svalaꞌ, xchi vin̈.
13 Palta ix ochn̈ej ijan vin̈aj Balac chiꞌ yalan icha tic:
—Con̈ vedꞌ dꞌa junocxo lugar, bꞌaj janicꞌn̈ej syal quilan dꞌa stitac scampamento ebꞌ, a val taꞌ ol a catabꞌej ebꞌ in cꞌanaꞌ, xchi vin̈.
14 Ix lajvi chiꞌ ix icꞌjibꞌat vin̈aj Balaam yuj vin̈aj Balac chiꞌ dꞌa jun jacan dꞌa sjolom lum vitz Pisga. Ataꞌ ix schec vin̈ bꞌochajxiqꞌue uqueꞌ altar, ix yacꞌanxi nocꞌ vacax yedꞌ nocꞌ chꞌac calnel chiꞌ vin̈ silabꞌil, junjun nocꞌ dꞌa junjun altar. 15 Ix yalanxi vin̈aj Balaam chiꞌ dꞌa vin̈aj Balac chiꞌ icha tic:
—Canan̈ dꞌa stzꞌey altar tic, yacbꞌan bꞌat in lolon yedꞌ Jehová, xchi vin̈.
16 Ix schꞌoxanxi sbꞌa Jehová chiꞌ dꞌa vin̈, ix yalani tas ol yutoc vin̈ yalani.
—Meltzajan̈ bꞌaj ayecꞌ vin̈aj Balac chiꞌ, tzalan icha tzꞌaj valan tic dꞌayach, xchi dꞌa vin̈.
17 Ix meltzaj vin̈ bꞌaj aycan vin̈aj Balac yedꞌ ebꞌ ay yopisio aj Moab dꞌa stzꞌey silabꞌ chiꞌ, ix scꞌanbꞌan vin̈aj Balac chiꞌ dꞌa vin̈ icha tic:
—¿Tas ix aj yalan Jehová chiꞌ dꞌayach? xchi vin̈.
18 Ix lajvi chiꞌ ix och ijan vin̈ yalan icha tic:
19 Ach Balac yuninal vin̈aj Zipor, scham val abꞌan tas ol valaꞌ: A Dios man̈ lajanoc icha anima. Max yesejlaj, max ecꞌbꞌatlaj tas syalaꞌ. Tato ay junoc tas syalaꞌ, tzꞌeln̈ejcꞌochi. Tato ay junoc tas syaltej, syacꞌn̈ej.
20 Ix yal Jehová dꞌayin to sval vachꞌ lolonel dꞌa yibꞌan̈ jun chon̈abꞌ tic. Tato icha chiꞌ tzꞌaj yalani, max yal-laj in qꞌuexani.
21 Malaj junoc yaelal syil Jehová to ol javoc dꞌa yibꞌan̈ chon̈abꞌ Israel. Te vachꞌ yic ebꞌ yin̈tilalcan vin̈aj Jacob. A Jehová sDiosal ebꞌ, a ayoch sreyaloc ebꞌ, ayn̈ejpaxecꞌ dꞌa scal ebꞌ.
22 A Jehová ix icꞌanelta ebꞌ dꞌa Egipto. A Jehová ayoch yipoc scꞌol ebꞌ, icha nocꞌ oval vacax a schꞌaac ayoch yipoc scꞌool.
23 A dꞌa yin̈tilalcan vin̈aj Jacob malaj yelcꞌoch ebꞌ naumel lolonel, malaj pax yelcꞌoch ebꞌ ajbꞌaal. A ticnaic yovalil tzꞌalchaj dꞌa chon̈abꞌ Israel icha tic: Tzijtum tas satubꞌtacxon̈ej yoch ix scꞌulej Jehová dꞌay, xchiocabꞌi.
24 A jun chon̈abꞌ tic syicꞌchaan̈ sbꞌa ichoc nocꞌ choj te ay smay. Ayic toxo ix och sat nocꞌ dꞌa junoc schibꞌej, max och vaan nocꞌ spechani masanto syamchaji syucꞌan schiqꞌuil nocꞌ, icha chiꞌ yaj ebꞌ, xchi vin̈.
25 Ix lajvi chiꞌ ix yalan vin̈aj Balac chiꞌ icha tic:
—Tato max yal a catabꞌan jun chon̈abꞌ tic, mocabꞌ alpaxcan vachꞌ lolonel dꞌa yibꞌan̈, xchi vin̈.
26 Ix tacꞌvi vin̈aj Balaam chiꞌ icha tic:
—¿Tom maj val dꞌayach jun, to a tas ol schec Jehová valaꞌ, aton yovalil svalaꞌ? xchi vin̈.
27 Ix lajvi chiꞌ, ix yalanxi vin̈aj Balac chiꞌ icha tic:
—Cotan̈, ol ach vicꞌbꞌat dꞌa junocxo lugar, talaj ataꞌ ol schaꞌ scꞌol Dios a catabꞌan ebꞌ israel chiꞌ, xchi vin̈.
28 Yuj chiꞌ ix icꞌjibꞌat vin̈ yuj vin̈aj Balac chiꞌ dꞌa jolom vitz Peor, bꞌaj te chequel quilan masanil tzꞌinan luum. 29 Ayic ayecꞌ ebꞌ vin̈ taꞌ, ix yalan vin̈ dꞌa vin̈aj Balac chiꞌ icha tic:
—Chec bꞌochajqꞌue uqueocxo altar dꞌa tic in cꞌanaꞌ, tza checan miljoccham ucvan̈oc nocꞌ quelemtac vacax yedꞌ ucvan̈oc nocꞌ chꞌac calnel, xchi vin̈.
30 Ix schecan vin̈aj Balac bꞌojoc uquexo altar chiꞌ yic sn̈usjitzꞌa juntzan̈ nocꞌ chiꞌ dꞌa yibꞌan̈.