2 Ix yabꞌan vin̈aj Balac sreyal Moab yuninal vin̈aj Zipor, tas ix utaj ebꞌ amorreo yuj ebꞌ israel. 3 Yuj chiꞌ ix xivchaan̈ vin̈ yedꞌ ebꞌ anima ay dꞌa Moab chiꞌ, yujto ix yil vin̈ to te tzijtum ebꞌ israel chiꞌ. 4 Yuj chiꞌ ix yal ebꞌ anima ay dꞌa Moab chiꞌ dꞌa ebꞌ yichamtac vinaquil chon̈abꞌ Madián icha tic: Masanil juntzan̈ anima tic, ol on̈ satel ebꞌ dꞌa co luum tic. Icha tzꞌaj slajviel an̈ an̈cꞌultac yuj nocꞌ vacax, icha chiꞌ ol on̈ yutoc ebꞌ, xchi ebꞌ.

5 Yuj chiꞌ ix yalan vin̈aj Balac chiꞌ to sbꞌat cot jun vin̈ syaloch sbꞌa jelanil scuchan Balaam, yuninal vin̈aj Beor, cajan dꞌa Petor dꞌa stiꞌ aꞌ nivan Éufrates dꞌa scal ebꞌ yetchon̈abꞌ. Ix schecanbꞌat ebꞌ yichamtac vinaquil chon̈abꞌ vin̈aj Balac chiꞌ, yic sbꞌat yal ebꞌ dꞌa vin̈aj Balaam chiꞌ icha tic: A dꞌa Egipto ix cot jun nivan chon̈abꞌil anima, toxo ix majel sat lum luum tic yuj ebꞌ, toxo ix javi ebꞌ dꞌa co tzꞌey. 6 Yuj chiꞌ cotan̈ dꞌa elan̈chamel yic tzul a catabꞌan ebꞌ, yujto yelxo nivan sbꞌisul ebꞌ dꞌa quichan̈. Tato icha chiꞌ tope ol yal vacꞌan ganar ebꞌ yic tzin pechanel ebꞌ dꞌa co lum tic, yujto vojtac to a a catabꞌ yedꞌ a vachꞌ lolonel tzalaꞌ, tzꞌeln̈ejcꞌochi, xchibꞌat vin̈.

7 Ix lajvi chiꞌ, ix bꞌat ebꞌ yichamtac vinaquil chon̈abꞌ Moab yedꞌ ebꞌ yichamtac vinaquil Madián bꞌaj ayecꞌ vin̈aj Balaam chiꞌ. Te nivan qꞌuen tumin ix yicꞌbꞌat ebꞌ yic stupan scatabꞌ vin̈ chiꞌ ebꞌ. Ix yalan schecnabꞌil ebꞌ ix yalbꞌat vin̈aj Balac chiꞌ. 8 Ix yalan vin̈aj Balaam chiꞌ dꞌa ebꞌ icha tic:

—A ticnaic, canan̈ec dꞌa tic, ato syal tas ol yal Jehová dꞌayin dꞌa jun acꞌval tic, ichato chiꞌ svacꞌan spac e lolonel chiꞌ qꞌuicꞌan, xchi vin̈. Yuj chiꞌ ix can ebꞌ ichamtac vinac chiꞌ yedꞌ vin̈aj Balaam chiꞌ dꞌa jun acꞌval chiꞌ. 9 Ix schꞌoxan sbꞌa Dios dꞌa vin̈, ix scꞌanbꞌan dꞌa vin̈ icha tic:

—¿Mach juntzan̈ anima ayecꞌ chiꞌ dꞌayach? xchi. 10 Ix tacꞌvi vin̈:

—Checabꞌ yaj ebꞌ yuj vin̈aj Balac sreyal Moab yuninal vin̈aj Zipor, tzul yal ebꞌ dꞌayin, 11 tobꞌ ay jun chon̈abꞌil anima ix cot dꞌa Egipto. Tobꞌ toxo ix majel sat lum luum yuj ebꞌ. Sgana vin̈aj Balac chiꞌ to tzin bꞌat dꞌa schon̈abꞌ vin̈ chiꞌ, yic sbꞌat in catabꞌej jun chon̈abꞌil anima chiꞌ, yic vachꞌ syal spechanel ebꞌ vin̈ dꞌa yol smacbꞌen chiꞌ yalani, xchi vin̈ dꞌa Dios chiꞌ. 12 Ix yalan Dios chiꞌ dꞌa vin̈ icha tic:

—Man̈ ach bꞌat yedꞌ ebꞌ yic sbꞌat a catabꞌej jun chon̈abꞌil anima chiꞌ, yujto a in val ix val vachꞌ lolonel dꞌa ebꞌ, xchi dꞌa vin̈. 13 Axo ix qꞌuin̈ibꞌi dꞌa junxo cꞌu, ix qꞌue van vin̈aj Balaam chiꞌ, ix yalan vin̈ dꞌa ebꞌ schecabꞌ vin̈aj Balac chiꞌ icha tic:

—A ticnaic, meltzajan̈ec dꞌa e chon̈abꞌ yujto toxo ix yal Jehová to max yal-laj in bꞌat eyedꞌoc, xchi vin̈. 14 Ix meltzaj ebꞌ dꞌa schon̈abꞌ bꞌaj ay vin̈aj Balac chiꞌ, ix yalan ebꞌ dꞌa vin̈ icha tic:

—Maj stacꞌcotlaj sbꞌa vin̈aj Balaam chiꞌ quedꞌoc, xchi ebꞌ. 15 Maj schalaj yabꞌ vin̈aj Balac chiꞌ, yuj chiꞌ ix checjibꞌat juntzan̈xo ebꞌ más nivac yopisio dꞌa yichan̈ ebꞌ ix xidꞌecꞌ chiꞌ, ecꞌtopax sbꞌisul ebꞌ ix bꞌati. 16 Yuj chiꞌ ix bꞌatxi ebꞌ yil vin̈aj Balaam chiꞌ, ix yalan ebꞌ dꞌa vin̈ icha tic:

—Ix on̈ scheccot vin̈aj Balac yuninal vin̈aj Zipor dꞌayach, syalan vin̈ dꞌayach icha tic: Malajocabꞌ mach tzach cachanoch vaan a coti, 17 yujto ol ach vicꞌ val chaan̈, ol vacꞌan masanil tas ol a cꞌanaꞌ, an̈ej to tza cꞌanabꞌajej a cot a catabꞌej juntzan̈ anima tic, xchi vin̈, xchi ebꞌ. 18 Ix tacꞌvipax vin̈aj Balaam chiꞌ icha tic:

—Vachꞌchom bꞌudꞌjinac yol spalacio vin̈ yuj qꞌuen oro, ma yuj qꞌuen plata, syacꞌan vin̈ smasanil dꞌayin, max yal-laj in cꞌulan tas scot dꞌa in pensar in tenanecꞌ tas syal Jehová in Diosal. 19 Tato syal e canpax dꞌa jun acꞌval tic, ol vabꞌ tas ol yutoc Jehová yalanxi dꞌayin, xchi vin̈. 20 Ix schꞌoxanpax sbꞌa Jehová dꞌa vin̈ dꞌacꞌvalil chiꞌ, ix yalan dꞌa vin̈:

—Yacbꞌan to ix jax ebꞌ vin̈ ach yicꞌbꞌati, ixic yedꞌ ebꞌ vin̈, palta an̈ej val tas ol val dꞌayach, an̈ej bꞌat alaꞌ, xchi dꞌa vin̈.

21 Axo yic ix qꞌuin̈ibꞌi, ix qꞌue vaan vin̈aj Balaam chiꞌ, ix yacꞌanoch stzꞌum nocꞌ snun bꞌuru vin̈, ix bꞌat vin̈ yedꞌ ebꞌ vin̈ yichamtac vinaquil Moab chiꞌ. 22 Ix qꞌue vin̈ dꞌa yibꞌan̈ nocꞌ sbꞌuru chiꞌ, ix bꞌat chavan̈ ebꞌ schecabꞌ vin̈ yedꞌoc. Axo Jehová ix cot yoval dꞌa vin̈ yujto ix bꞌat vin̈. Axo yángel Jehová chiꞌ ix och tecꞌtecꞌ dꞌa yol bꞌe yic smacan bꞌe chiꞌ. 23 Axo ix yilan nocꞌ bꞌuru chiꞌ to lin̈anoch jun yángel Jehová dꞌa nan̈al yol bꞌe, yedꞌnac jun espada, ix bꞌatcan nocꞌ dꞌa caltac teꞌ. Ix syamanoch vin̈aj Balaam chiꞌ smacꞌan nocꞌ, yic tzꞌochxi nocꞌ dꞌa yol bꞌe chiꞌ. 24 Ix ochxi lin̈an jun ángel chiꞌ bꞌaj lodꞌan bꞌe dꞌa scal teꞌ uva, latzꞌbꞌilqꞌue qꞌuen qꞌueen smactealoc teꞌ dꞌa titac bꞌe chiꞌ. 25 Axo ix yilanxi nocꞌ to lin̈anecꞌ jun ángel chiꞌ dꞌa nan̈al yol bꞌe chiꞌ, ix sn̈icanecꞌ sbꞌa nocꞌ dꞌa qꞌuen qꞌueen ayoch dꞌa titac bꞌe chiꞌ. Ix n̈icjiecꞌ yoc vin̈aj Balaam chiꞌ yuj nocꞌ dꞌa qꞌueen, ix ste macꞌanxi nocꞌ vin̈. 26 Ix el yángel Jehová chiꞌ taꞌ, ix snitzanbꞌat sbꞌa dꞌa yichan̈bꞌati, ix ochxi lin̈an bꞌaj te lodꞌan bꞌe, bꞌaj maxtzac yal yelcan junoc mach dꞌa titac bꞌe a schalan sbꞌa yedꞌ junocxo mach. 27 Ix yilanxi nocꞌ bꞌuru chiꞌ to lin̈anecꞌ jun ángel chiꞌ dꞌa nan̈al yol bꞌe chiꞌ, toxon̈ej ix em lachnaj nocꞌ dꞌa yalan̈ vin̈aj Balaam chiꞌ, yuj chiꞌ ix cot yoval vin̈ dꞌa nocꞌ, ix och ijan vin̈ smacꞌan nocꞌ yedꞌ scꞌococh. 28 A val dꞌa jun rato chiꞌ ix lolonqꞌue nocꞌ yuj Jehová, ix yalan nocꞌ dꞌa vin̈ icha tic:

—¿Tas ix ach vutej? Yoxelalxo in a macꞌani, xchi nocꞌ.

29 —Yujto yelxo val tzin ixtej svabꞌi. Ayoc val ecꞌ junoc qꞌuen espada dꞌa tic, val ticnaic tzach in tecchamoc, xchi vin̈ dꞌa nocꞌ. 30 Ix tacꞌvi nocꞌ dꞌa vin̈ icha tic:

—A in tic a chejintaxoni, tzach qꞌuen̈ej dꞌa vibꞌan̈ ayic tzach bꞌeyeqꞌui, ojtac to malaj juneloc icha tic tzach vutej, xchi nocꞌ.

—Iꞌ yel toni, xchi vin̈. 31 Ix lajvi chiꞌ axo Jehová ix acꞌan yil jun ángel chiꞌ vin̈, ayecꞌ dꞌa nan̈al yol bꞌe chiꞌ, ayoch qꞌuen espada dꞌa yol scꞌabꞌ. Ixn̈ej val yil jun ángel chiꞌ vin̈, ix em n̈ojan vin̈ dꞌa yichan̈. 32 Ix yalan jun ángel chiꞌ dꞌa vin̈ icha tic:

—¿Tas yuj oxel ix a macꞌ nocꞌ a bꞌuru tic? A in ix in och dꞌa ichan̈ ix in macan a bꞌe, yujto ix cot voval yujto ix ach cot yedꞌ juntzan̈ anima tic. 33 An̈ej nocꞌ bꞌuru tic ix in ilani, oxel ix elcan nocꞌ dꞌa yol bꞌe. Tato maj sbꞌesel sbꞌa nocꞌ dꞌa yol bꞌe chiꞌ, toxom ix ach cham vuj ticnaic, a pax nocꞌ bꞌuru tic maj am chamlaj nocꞌ, xchi jun ángel chiꞌ dꞌa vin̈. 34 Ix yalan vin̈ dꞌa yángel Jehová chiꞌ icha tic:

—Ix och in mul dꞌayach, man̈ vojtacoc tato a ach tza mac in bꞌe tic, yuj chiꞌ tato max scha a cꞌol tzin bꞌati, syal in meltzaji, xchi vin̈. 35 Ix tacꞌvi jun ángel chiꞌ dꞌa vin̈ icha tic:

—Syal a bꞌat yedꞌ ebꞌ anima tic, palta an̈ej val tas ol val dꞌayach, an̈ej ol alaꞌ, xchi dꞌa vin̈.

Yuj chiꞌ ix bꞌatn̈ej vin̈ yedꞌ ebꞌ schecabꞌ vin̈aj Balac chiꞌ.

36 Axo ix yabꞌan vin̈aj Balac to van scꞌoch vin̈aj Balaam chiꞌ, ix cot vin̈ scha vin̈ dꞌa yol bꞌe dꞌa jun chon̈abꞌ ay dꞌa yol yic Moab, dꞌa stiꞌ a aꞌ scuch Arnón, satxo smojonal ay. 37 Ix yalan vin̈aj Balac chiꞌ icha tic:

—Yelcꞌolal val ach vavtej, ¿tas yuj ijan maj a tacꞌcotlaj a bꞌa? Tecan ix a naꞌ to man̈ ol in tzacꞌvan vacꞌan jantac tas tza nibꞌej, xchi vin̈ dꞌa vin̈. 38 Ix tacꞌvi vin̈aj Balaam chiꞌ icha tic:

—Man̈ acꞌ pensar, ayinxo eqꞌui, palta max yal-laj valani tastac tzin nibꞌej svalaꞌ, an̈ej tastac schec Dios valaꞌ, an̈ej ol valaꞌ, xchi vin̈. 39 Ix lajvi chiꞌ, ix bꞌat vin̈ yedꞌ vin̈aj Balac chiꞌ dꞌa chon̈abꞌ Quiriat-huzot. 40 Ataꞌ ix schec vin̈aj Balac chiꞌ miljoccham nocꞌ vacax yedꞌ nocꞌ calnel yic schi vin̈aj Balaam chiꞌ yedꞌ pax ebꞌ ichamtac vinac schecabꞌ vin̈aj Balac chiꞌ. 41 Axo dꞌa junxo cꞌu, ix icꞌjibꞌat vin̈aj Balaam yuj vin̈aj Balac chiꞌ dꞌa jolom vitz scuch Bamot-baal, ataꞌ syal yilanbꞌat janicꞌoc scampamento ebꞌ israel ebꞌ vin̈.