Jun checnabꞌil nivan yelcꞌochi
6
Aton val juntzan̈ cꞌaybꞌubꞌal, checnabꞌil yedꞌ cachnabꞌil tic ix schec Jehová co Diosal val dꞌayex, yovalil ol e cꞌanabꞌajej ayic ol eyicꞌan lum luum dꞌa scꞌaxepal aꞌ Jordán. 2 Cꞌanabꞌajejec checnabꞌil sval tic dꞌayex yedꞌ ebꞌ eyuninal yedꞌ ebꞌ eyi e chiquin, yic vachꞌ ayn̈ej yelcꞌoch Jehová co Diosal dꞌa yol e sat ayic ayex ecꞌ dꞌa yolyibꞌan̈qꞌuinal tic. Tato icha chiꞌ, ol najatbꞌoc e qꞌuinal. 3 Yuj chiꞌ, ex vetchon̈abꞌ Israel, abꞌec, aqꞌuec val och dꞌa e cꞌol e cꞌanabꞌajan juntzan̈ checnabꞌil tic, yic te vachꞌn̈ej ol aj eyelcꞌochi, te nivan chon̈abꞌ ol aj e bꞌisul dꞌa sat lum luum yax sat chiꞌ, icha ix aj yalan Jehová co Diosal dꞌayon̈, aton pax sDiosal ebꞌ co mam quicham.4 Ex vetchon̈abꞌ Israel, abꞌec val: An̈ej Jehová co Diosal, malaj val junocxo.
5 Tze xajanej Jehová co Diosal dꞌa smasanil e cꞌool, dꞌa smasanil e pensar yedꞌ dꞌa smasanil eyip.
6 A juntzan̈ lolonel sval tic dꞌayex ticnaic, siqꞌueccan dꞌa e pensar. 7 A juntzan̈ tic ol eyacꞌn̈ej scꞌaybꞌej ebꞌ eyuninal dꞌa junjun cꞌu. Tzeyalan dꞌa ebꞌ ayic ayex ecꞌ dꞌa e pat, ayic van e bꞌeyi, ayic tzex vayi yedꞌ yic tzex qꞌue vaan. 8 Tze tzecꞌanoch juntzan̈ checnabꞌil tic dꞌa e cꞌabꞌ yedꞌ dꞌa snan̈al e sat ichoc junoc yechel yic tze naancoti.* 9 Tze tzꞌibꞌanpax och dꞌa yoyal stiꞌ e pat yedꞌ dꞌa spuertail smuroal e chon̈abꞌ.
10 A Jehová co Diosal, aꞌ ol ex icꞌanbꞌat dꞌa jun luum yacꞌnac stiꞌ yacꞌan dꞌa ebꞌ co mam quicham, aton vin̈aj Abraham, vin̈aj Isaac yedꞌ vin̈aj Jacob. Ay val nivac chon̈abꞌ man̈ jantacoc svachꞌil dꞌa jun luum chiꞌ, man̈oc ex e bꞌonac. 11 Ay val teꞌ pat bꞌudꞌan yuj tastac te vachꞌ, man̈oc ex e bꞌudꞌnac. Ay aꞌ ucꞌbꞌilaꞌ joybꞌil, man̈oc ex eyabꞌnac syail e joyani. Ay teꞌ uva yedꞌ teꞌ olivo avabꞌil, man̈oc ex eyavejnac. A juntzan̈ chiꞌ, toxon̈ej ol eyabꞌlej masanto syal e bꞌudꞌji. 12 Ayic ol ujoc juntzan̈ chiꞌ, bꞌat ta val Jehová satcꞌolal eyuuj. Naeccoti to a Jehová chiꞌ ex icꞌanelta dꞌa Egipto, bꞌaj ayex och checabꞌoc. 13 Ayocabꞌ yelcꞌoch Jehová co Diosal dꞌa yol e sat. An̈ejocabꞌ Jehová chiꞌ tzeyacꞌ servil, an̈ejocabꞌ sbꞌi tze locoꞌ ayic tzeyacꞌan e tiꞌ e cꞌulan junoc tas. 14 Man̈ ex och tzacꞌan dꞌa spatic sdiosal ebꞌ anima cajan dꞌa e lacꞌanil chiꞌ, 15 yujto scot yoval Jehová co Diosal dꞌa juntzan̈ chiꞌ. Ayecꞌ Jehová dꞌa co cal, axo talaj tzꞌaji, scot yoval scꞌool tzex sataneli, yujto max yal scꞌol scacꞌoch co pensar dꞌa junocxo chꞌoc diosal.
16 Man̈ eyacꞌ proval Jehová co Diosal, icha e cꞌulejnac dꞌa Masah. 17 Cꞌanabꞌajejec val scꞌaybꞌubꞌal yedꞌ schecnabꞌil, aton val jantac schecnabꞌil ix yalaꞌ. 18 Vachꞌn̈ej tzeyutej e pensar yedꞌ e bꞌeybꞌal dꞌa yichan̈ Jehová, yic vachꞌn̈ej tzex elcꞌochi. Ol eyiquej lum luum yacꞌnac stiꞌ yacꞌan dꞌa ebꞌ co mam quicham. 19 Ol el lemnaj ebꞌ ajcꞌol dꞌa eyichan̈ yuj Jehová, icha ix yutej yalani.
20 Tato scꞌanbꞌej ebꞌ eyuninal dꞌa bꞌaqꞌuin̈: ¿Tas yuj sco cꞌanabꞌajej juntzan̈ cachnabꞌil yedꞌ checnabꞌil yalnac Jehová co Diosal? tato xchi ebꞌ. 21 Tzeyalan dꞌa ebꞌ icha tic: A on̈ tic checabꞌ caj dꞌa vin̈ sreyal Egipto dꞌa pecaꞌ, axo Jehová icꞌannac on̈ elta yedꞌ jantac yipalil. 22 A on̈ tic quilnac val juntzan̈ tastac satubꞌtac yilji yedꞌnac yaelal yacꞌnaccot Jehová chiꞌ dꞌa yibꞌan̈ vin̈ sreyal Egipto chiꞌ yedꞌ dꞌa masanil schon̈abꞌ chiꞌ. 23 On̈ yicꞌannaquelta taꞌ, on̈ yicꞌannaccot dꞌa tic dꞌa lum luum yacꞌnac stiꞌ yacꞌan dꞌa ebꞌ co mam quicham. 24 Yuj chiꞌ schecnac Jehová co Diosal to yovalil sco cꞌanabꞌajej juntzan̈ checnabꞌil tic yuj co naancoti, yic vachꞌn̈ej co cꞌool, vachꞌn̈ej ol aj yecꞌ tiempo cuuj icha caj ticnaic. 25 Yuj chiꞌ, tato sco cꞌanabꞌajej icha ajnac yalan Jehová chiꞌ, vachꞌ on̈ dꞌa yol sat, xe cham dꞌa ebꞌ.