Ex vetchon̈abꞌ, abꞌec val ticnaic, ol valcan juntzan̈ cachnabꞌil yedꞌ checnabꞌil dꞌayex, yic scham val e cꞌaybꞌani yedꞌ e bꞌeybꞌalani.

2 A Jehová co Diosal yacꞌnac jun strato quedꞌoc dꞌa lum vitz scuchan Horeb. 3 Man̈ocn̈ej yedꞌ ebꞌ co mam quicham yacꞌnac strato chiꞌ, palta yacꞌnacpax quedꞌoc co masanil a on̈ molan on̈ ecꞌ tic. 4 A val Jehová lolonnac dꞌayon̈ dꞌa jolom vitz chiꞌ, cabꞌnac val tas yal chiꞌ ayic slolonelta dꞌa cal cꞌacꞌ. 5 A in can in dꞌa e nan̈al yedꞌ Jehová chiꞌ yic sval dꞌayex tas syalaꞌ, yujto ex xivqꞌue dꞌa jun cꞌacꞌ chiꞌ, maj ex qꞌue dꞌa jolom vitz chiꞌ, yalan Jehová chiꞌ icha tic:

6 A in Jehová e Diosal in, ex viqꞌuelta dꞌa Egipto bꞌaj ayex och checabꞌoc, man̈ eyicoc e bꞌa.

7 Malajocabꞌ junocxo dios bꞌaj tzex och ejmelal, palta an̈ejocabꞌ dꞌayin. 8 Malajocabꞌ junoc yechel junoc tas tze bꞌooch e diosaloc, tas ay dꞌa satchaan̈, tas ay dꞌa sat lum tic, ma tastac ay dꞌa yoltac a aꞌ. 9 Man̈ ex em n̈ojan dꞌay, man̈ eyaqꞌuem e bꞌa dꞌay, yujto a in Jehová e Diosal in, ste cot voval dꞌayex tato tzex och ejmelal dꞌa junocxo tasi. Ol vacꞌoch syaelal ebꞌ mamabꞌil malaj velcꞌoch dꞌay, ol vacꞌanpax yaelal dꞌa yibꞌan̈ yuninal ebꞌ, yixchiquin ebꞌ yedꞌ yin̈tilal ebꞌ. 10 Axo ebꞌ tzin xajanani, scꞌanabꞌajan in checnabꞌil, ol in xajanej ebꞌ yedꞌ yin̈tilal yic ol bꞌeyn̈ejbꞌatoc.

11 Man̈ comonoc tze loc in bꞌi a in Jehová e Diosal in tic, ma tzeyacꞌ bꞌinaj in bꞌi dꞌa junoc tas dꞌa ichn̈ej taꞌ, yujto ol vacꞌ yaelal dꞌa mach icha chiꞌ scꞌulej.

12 Nivanocabꞌ yelcꞌoch scꞌual icꞌoj ip dꞌayex yuj in eyicꞌanchaan̈, icha ix aj valancan dꞌayex. 13 Vaqueꞌ cꞌual tzex munlaj dꞌa e munlajel. 14 Axo dꞌa yuquil cꞌual, scꞌual icꞌoj ip, vic yaji. Man̈ ex munlaj dꞌa jun cꞌu chiꞌ, ma ebꞌ eyuninal, ebꞌ ix eyisil, ebꞌ vin̈ e checabꞌ, ma ebꞌ ix e checabꞌ, nocꞌ e vacax, nocꞌ e chej, ma junocxo nocꞌ e molbꞌetzal nocꞌ, ma ebꞌ chꞌoc chon̈abꞌil ayecꞌ dꞌa e cal, palta masanil ebꞌ syicꞌ yip eyedꞌoc. 15 Naeccoti to ecꞌnaquex checabꞌvumal dꞌa Egipto. A inxo Jehová e Diosal in tic vicꞌnaquexelta yedꞌ in poder. Yuj chiꞌ svalaꞌ to tze cꞌanabꞌajej scꞌual icꞌoj ip.

16 Ayocabꞌ yelcꞌoch e mam e nun dꞌa e sat, icha val ix aj valan dꞌayex, yic vachꞌ ol najatbꞌoc e qꞌuinal, yic vachꞌ ol ex ajecꞌ dꞌa sat lum luum ol vacꞌ chiꞌ dꞌayex.

17 Man̈ e milcham ebꞌ eyetanimail.

18 Man̈ ex em ajmulal dꞌa yol scꞌabꞌ eyetbꞌeyum junjun ex.

19 Man̈ ex elcꞌanoc.

20 Man̈ e naqꞌue lolonel dꞌa spatic ebꞌ eyetanimail.

21 Man̈ e nibꞌejoch ix yetbꞌeyum junocxo mach, spat, sluum, ebꞌ vin̈ schecabꞌ, ebꞌ ix schecabꞌ, nocꞌ svacax, nocꞌ sbꞌuru, ma junocxo tas ay dꞌa ebꞌ eyetanimail chiꞌ, man̈ e nibꞌejochi, xchi Jehová dꞌayon̈.

22 Aton val juntzan̈ checnabꞌil tic te chaan̈ ajnac yalanelta Jehová dꞌa scal jun nivan qꞌuicꞌal asun ayoch scꞌacꞌal, ayic molan on̈ ecꞌ co masanil dꞌa yich lum vitz chiꞌ. An̈ej val juntzan̈ checnabꞌil tic yalnac, ichato chiꞌ stzꞌibꞌanoch dꞌa chabꞌ pachan̈ qꞌuen qꞌueen, yacꞌan dꞌayin. 23 Palta a exxo tic, ayic eyabꞌan yoch jun jaj chiꞌ dꞌa scal qꞌuicꞌalqꞌuinal chiꞌ, eyilan sqꞌue n̈iln̈on cꞌacꞌ dꞌa lum vitz chiꞌ, masanil ex yajal eyaj dꞌa junjun eyin̈tilal tic yedꞌ ebꞌ yichamtac vinaquil chon̈abꞌ, ex javi eyal dꞌayin icha tic: 24 Val yel, a Jehová co Diosal ix schꞌox val stziquiquial yedꞌ yipalil dꞌayon̈, ix cabꞌ val slolon dꞌa scal cꞌacꞌ. A ticnaic toxo ix nachaj val el cuuj tobꞌan syal slolon Dios dꞌayon̈ anima on̈ tic, palta ina maj on̈ chamlaj. 25 ¿Tas yuj sco bꞌec co bꞌa co cham yuj jun cꞌacꞌ to ayxo smay chiꞌ? Tato ol cabꞌ val yoch sjaj Jehová co Diosal junelxo, ol on̈ chamoc. 26 Malaj val junoc anima syal yabꞌan yoch sjaj jun Dios pitzan dꞌa scal cꞌacꞌ icha ix cabꞌ a on̈ tic, yujto ay schamelal. 27 Vachꞌ a ach tzach och dꞌa yichan̈ Jehová co Diosal chiꞌ yic tzabꞌan masanil tas syalaꞌ, slavi chiꞌ tzalan dꞌayon̈ masanil tas syal chiꞌ, ol co cꞌanabꞌajani, xe chi dꞌayin.

28 Ayic van eyalan chiꞌ dꞌayin, van pax yabꞌan Jehová tas tzeyal chiꞌ, yuj chiꞌ yal dꞌayin: Toxo ix vabꞌ tas syal jun chon̈abꞌ tic, ix scha in cꞌol tas ix yal ebꞌ. 29 Comonoc ichan̈ej tic spensar ebꞌ, ayn̈ej velcꞌoch dꞌa yol sat ebꞌ, scꞌanabꞌajann̈ej in checnabꞌil ebꞌ yic vachꞌ ol aj sbꞌeyn̈ejbꞌat ebꞌ yedꞌ ebꞌ yuninal dꞌa smasanil tiempo. 30 Yuj chiꞌ al dꞌa ebꞌ to smeltzaj ebꞌ dꞌa scampamento. 31 A achxo tic, canan̈ vedꞌ dꞌa tic, yujto ol val masanil in checnabꞌil dꞌayach yedꞌ in cꞌaybꞌubꞌal, ol a cꞌaybꞌan ebꞌ dꞌay, yic vachꞌ ol sbꞌeybꞌalej ebꞌ bꞌaj ay lum luum ol vacꞌ chiꞌ dꞌa ebꞌ, xchi Jehová chiꞌ dꞌayin. 32 Yuj chiꞌ bꞌeybꞌalejec masanil schecnabꞌil Jehová co Diosal. Man̈ eyiqꞌuel dꞌa e pensar. 33 Bꞌeybꞌalejec bꞌeybꞌal ix schꞌoxcan Jehová co Diosal, yic te vachꞌxon̈ej ol aj e bꞌeybꞌati, ol najatbꞌoc e qꞌuinal dꞌa sat lum luum ol yacꞌ chiꞌ dꞌayex.