10 Naeccot dꞌa yic jun cꞌu ayic ayon̈ecꞌ dꞌa yichan̈ Jehová co Diosal dꞌa lum vitz Horeb, ayic yalannac dꞌayin icha tic: Molbꞌej ebꞌ etchon̈abꞌ smasanil yic vachꞌ ol vacꞌ yojtaquejel in lolonel ebꞌ, ol scꞌaybꞌancan ebꞌ, yic vachꞌ ay velcꞌoch dꞌa yol sat ebꞌ yacbꞌan pitzan ebꞌ dꞌa sat lum tic yedꞌ scꞌaybꞌancan yuninal ebꞌ, xchi Jehová chiꞌ dꞌayin. 11 Ayic ayon̈ecꞌ dꞌa yich lum vitz chiꞌ, axo dꞌa luum sqꞌue val cꞌacꞌ yedꞌ sqꞌue topan stabꞌil dꞌa chaan̈, qꞌuicꞌxon̈ej yilji satchaan̈ yuuj. 12 Lolonnac Jehová dꞌayon̈ dꞌa cal cꞌacꞌ chiꞌ. Cabꞌnac val yoch sjaj sloloni, palta maj quilochlaj jabꞌoc. 13 Ayic yalannaccan strato quedꞌoc, yalnac to sco cꞌanabꞌajej lajun̈eꞌ checnabꞌil stzꞌibꞌejnacoch dꞌa chabꞌ pachan̈ qꞌuen qꞌueen. 14 Yalannacpax Jehová dꞌayin to tzex in cꞌaybꞌej dꞌa schecnabꞌil yedꞌ dꞌa scꞌaybꞌubꞌal chiꞌ, yic vachꞌ tze cꞌanabꞌajej e bꞌeybꞌalan dꞌa sat lum luum ol e macbꞌenej dꞌa scꞌaxepalecꞌ aꞌ Jordán chiꞌ.

15 Ayic slolonnac Jehová dꞌayon̈ dꞌa lum vitz Horeb chiꞌ, a dꞌa jun cꞌu chiꞌ, malaj junoc tas eyil dꞌa cal cꞌacꞌ chiꞌ. 16 Naec val coti yic max eyixtejbꞌat e bꞌa e bꞌoanqꞌue junoc yechel tas e diosaloc, yechel junoc vinac, ma yechel junoc ix ix, 17 ma yechel nocꞌ nocꞌ ay dꞌa sat luum tic, ma yechel nocꞌ much, 18 ma yechel junoc nocꞌ tzꞌecꞌ n̈ereroc, ma tzꞌecꞌ jachjon dꞌa sat luum tic, ma yechel nocꞌ chay, ma junocxo nocꞌ ay dꞌa yol a aꞌ. 19 An̈ejtonaꞌ ayic tzex qꞌue qꞌuelan dꞌa satchaan̈ tzeyilanqꞌue cꞌu, qꞌuen uj yedꞌ jantac qꞌuen cꞌanal yedꞌ masanil tastac ay dꞌa satchan̈ chiꞌ, tzeyil val e bꞌa, yic max och dꞌa e pensar to tzex och ejmelal dꞌay, ma tzeyalan e bꞌa dꞌay, yujto a Jehová Dios ix bꞌoan masanil juntzan̈ chiꞌ yic tzꞌoch yopisio dꞌa masanil chon̈abꞌ ay dꞌa sat luum tic. 20 Palta a Jehová on̈ icꞌannaquelta dꞌa chon̈abꞌ Egipto bꞌaj man̈ jantacoc syaelal bꞌaj ayon̈ ochi, ichato ayon̈ och dꞌa scal junoc nivan cꞌacꞌ bꞌaj tzꞌulax qꞌuen qꞌueen. On̈ yiqꞌuelta yic vachꞌ tzon̈ och schon̈abꞌoc, ichaton caj ticnaic. 21 Cotnac yoval Jehová chiꞌ dꞌayin eyuuj. Yalannac to man̈xo ol in ecꞌ dꞌa scꞌaxepal aꞌ Jordán, man̈xo ol in cꞌoch dꞌa sat lum luum man̈ jantacoc svachꞌil ol yacꞌ e macbꞌenoc chiꞌ. 22 Yuj chiꞌ, a dꞌa tic ol in chamoc, man̈xo ol in cꞌaxpajecꞌlaj dꞌa aꞌ Jordán chiꞌ. A exxo tic, ol ex cꞌaxpajecꞌoc, ol ex cajnaj dꞌa lum luum man̈ jantacoc svachꞌil chiꞌ. 23 Bꞌat ta val strato Jehová co Diosal satcꞌolal eyuuj, aton strato ix yacꞌ quedꞌoc. Malajocabꞌ junoc yechel tze bꞌoꞌo, yic tzeyaloch e diosaloc, yujto ay yovalil yuj Jehová. 24 Scot yoval Jehová dꞌa mach tzꞌoch ejmelal dꞌa junocxo tasi. A val yoval scꞌol lajan icha teꞌ cꞌacꞌ stzꞌabꞌat masanil tastac yuuj.

25 A ticnaic toxo ol ex cꞌoch cajan dꞌa jun luum chiꞌ, palta ayic nivanxo tiempo ayex ecꞌ taꞌ, ayic ayxo eyuninal yedꞌ eyi e chiquin, tzeyil val e bꞌa, xe yixtejtabꞌatlaj e bꞌa tze bꞌoanqꞌue junoc yechel e diosaloc, tzeyacꞌanoch e mul dꞌa yichan̈ Jehová co Diosal. Tato icha chiꞌ, ol e tzuntzejcot yoval scꞌool co Diosal chiꞌ. 26 Svacꞌcanoch satchaan̈ yedꞌ sat luum tic testigoal, tato icha chiꞌ ol e cꞌulej, dꞌa val elan̈chamel ol ex satel dꞌa juneln̈ej. Man̈xo nivanoc tiempo ol ex ecꞌ dꞌa sat luum chiꞌ, aton lum ay dꞌa scꞌaxepal aꞌ Jordán chiꞌ. 27 Axo jayvan̈oc ex olto ex canoc, ol ex saclemcanbꞌat dꞌa juntzan̈xo chꞌoc nacional, ataꞌ ol ex yacꞌcanbꞌat Jehová. 28 Ataꞌ ol eyaqꞌuem e bꞌa dꞌa juntzan̈ comon dios bꞌobꞌil yuj ebꞌ anima dꞌa te teꞌ yedꞌ dꞌa qꞌuen qꞌueen, max yal-laj yilani, max yabꞌlaj, max yal-laj svaan junoc tasi, max yabꞌpaxlaj jabꞌoc sjabꞌ junoc tas.

29-30 Palta tato dꞌa scal eyaelal chiꞌ sna sbꞌa e cꞌool, tze naancoti to an̈ej dꞌa Jehová co Diosal smoj eyacꞌanem e bꞌa, tato tzeyalxi e bꞌa dꞌay, tze cꞌanabꞌajan dꞌa smasanil e cꞌool, tato icha chiꞌ, 31 man̈ ol ex yactejcanlaj. Man̈ ol ex satjiel yuj dꞌa juneln̈ej, man̈ ol bꞌat satcꞌolal strato yacꞌnac yedꞌ ebꞌ co mam quicham, yujto ayn̈ej yoqꞌuelcꞌolal.

32 Naeccot juntzan̈ tiempoal ecꞌnacbꞌat dꞌa pecaꞌ, atax sbꞌoannac ebꞌ anima co Mam Dios dꞌa yolyibꞌan̈qꞌuinal tic, bꞌat e cꞌanbꞌan bꞌaj scꞌoch cꞌaman yolyibꞌan̈qꞌuinal tic, tato ayxo bꞌaj ix uji, ma ayxo bꞌaj ix abꞌchaj junoc tas te nivan yelcꞌoch icha jun tzuji dꞌa co cal tic. 33 Malaj junocxo chon̈abꞌ ix abꞌan yoch sjaj co Mam Dios, yic slolonelta dꞌa cal cꞌacꞌ, icha val aj cabꞌan a on̈ tic, palta maj on̈ champaxlaj. 34 Malaj junocxo dios sicꞌanelta junoc chon̈abꞌ dꞌa scal junocxo chon̈abꞌ icha val ajnac on̈ yicꞌanelta Jehová dꞌa Egipto yuj co vachꞌiloc. Quilnac val ayic schꞌoxan jantac spoder yacꞌan oval cuuj, schꞌoxannac juntzan̈ tas satubꞌtac yilji yedꞌ yaelal yedꞌ xivcꞌolal ayic on̈ yicꞌanelta dꞌa Egipto chiꞌ. 35 A juntzan̈ chiꞌ chꞌoxji val quilaꞌ, yic scojtaquej val eli to malaj junocxo Dios, an̈ejton val Jehová. 36 Ato dꞌa satchaan̈ cabꞌnac val sloloni, on̈ scꞌaybꞌani. Axo dꞌa sat lum tic, schꞌoxnac nivac cꞌacꞌ dꞌayon̈, cabꞌannac val slolonelta dꞌa cal cꞌacꞌ chiꞌ. 37 A val Jehová xajanannac ebꞌ co mam quicham, yuj chiꞌ on̈ sicꞌnaccanel a on̈ yin̈til on̈ can ebꞌ. Slajvi chiꞌ on̈ yicꞌanelta dꞌa Egipto, ayn̈ej och quedꞌoc yedꞌ val spoder. 38 Van satanel juntzan̈ nivac chon̈abꞌ te ecꞌto yip dꞌayon̈ yic squiquejcan slum ebꞌ chiꞌ, icha val van yuji ticnaic. 39 Yuj chiꞌ, canocabꞌ dꞌa e pensar to an̈ej Jehová Dios yaj dꞌa satchaan̈ yedꞌ dꞌa sat luum tic, malaj junocxo. 40 Yuj chiꞌ cꞌanabꞌajejec scꞌaybꞌubꞌal yedꞌ schecnabꞌil svalcanel dꞌayex dꞌa jun cꞌu tic, yic vachꞌ ol aj yecꞌ tiempo eyuuj yedꞌ ebꞌ eyin̈tilal. Ol najatbꞌoc e qꞌuinal dꞌa sat lum luum ix yacꞌ Jehová dꞌayex dꞌa juneln̈ej, xchi vin̈aj Moisés dꞌa ebꞌ chon̈abꞌ israel.

41 Ix sicꞌanel oxeꞌ chon̈abꞌ vin̈aj Moisés dꞌa scꞌaxepalecꞌ aꞌ Jordán dꞌa stojolal bꞌaj sjavi cꞌu. 42 Ataꞌ syal scolan sbꞌa junoc mach smacꞌancham junoc yetanimail to man̈ scꞌanoc scꞌool, malaj bꞌaj syacꞌ oval yedꞌoc dꞌa yalan̈taxo. A jun chiꞌ, syal scolan sbꞌa dꞌa junjunoc juntzan̈ chon̈abꞌ chiꞌ. 43 A juntzan̈ chon̈abꞌ chiꞌ, aton Beser dꞌa yacꞌlical tzꞌinan luum macbꞌil yuj ebꞌ yin̈tilalcan Rubén, Ramot dꞌa yol yic Galaad, macbꞌil yuj ebꞌ yin̈tilalcan Gad. Axo junxo, aton Golán, ay dꞌa yol yic Basán, macbꞌil yuj ebꞌ yin̈tilalcan Manasés.

44-45 (Aton val juntzan̈ checnabꞌil tic ix yal vin̈aj Moisés dꞌa ebꞌ yetchon̈abꞌ. A jantac cꞌaybꞌubꞌal, cachnabꞌil yedꞌ checnabꞌil tic ix yal vin̈ dꞌa ebꞌ atax yelnaccot ebꞌ dꞌa Egipto. 46 Ix yal juntzan̈ tic vin̈ ayic aytoecꞌ ebꞌ dꞌa acꞌlic dꞌa yichan̈ chon̈abꞌ Bet-peor, dꞌa slacꞌanil stiꞌ aꞌ Jordán, dꞌa lum macbꞌil yuj vin̈aj Sehón sreyal ebꞌ amorreo. A vin̈aj Sehón chiꞌ, a dꞌa chon̈abꞌ Hesbón ecꞌnac vin̈. Acꞌbꞌil ganar vin̈ yuj vin̈aj Moisés chiꞌ yedꞌ ebꞌ yetchon̈abꞌ ayic ayxo yelta ebꞌ dꞌa Egipto. 47 Icha chiꞌ ix aj scan ebꞌ israel dꞌa lum smacbꞌen vin̈aj Sehón chiꞌ yedꞌ dꞌa lum macbꞌil yuj vin̈aj Og sreyal Basán dꞌa yalan̈taxo. A ebꞌ tic sreyal ebꞌ amorreo dꞌa stojolal bꞌaj sjavi cꞌu dꞌa aꞌ Jordán. 48 A luum chiꞌ sbꞌatn̈ej lum dꞌa chon̈abꞌ Aroer dꞌa stitac aꞌ Arnón, masanto dꞌa nivan vitz Sirión, an̈ejaꞌ scuchanpax Hermón. 49 Masanil smacbꞌen ebꞌ chiꞌ, aton pan̈an ay dꞌa stiꞌ aꞌ Jordán dꞌa stojolal bꞌaj sjavi cꞌu, masanto scꞌoch lum dꞌa aꞌ mar Muerto, aton dꞌa yich lum vitz Pisga.)