2-4 A junoc mach tzꞌelcꞌani, yovalil stup tas syelqꞌuej chiꞌ. Tato malaj stumin jun elcꞌum chiꞌ, yovalil schon̈chajeli, axo dꞌa stojol bꞌaj schon̈chaj chiꞌ, ataꞌ stup tas syelqꞌuej chiꞌ. Tato tzꞌilchaj nocꞌ nocꞌ elcꞌabꞌil chiꞌ, yovalil stupchaj nocꞌ, chavan̈xo tzꞌaj stupchaj nocꞌ, taxon̈ej junoc nocꞌ vacax, ma junoc nocꞌ bꞌuru, ma junoc nocꞌ calnel. Tato tzꞌilchaj junoc elcꞌum dꞌacꞌvalil, van yoch dꞌa junoc pat yic syelcꞌan junoc tas, tato smacꞌjicham yuj vin̈ aj pat chiꞌ, malaj tzꞌaji. Max ochlaj dꞌa spatic vin̈ smilvaj chiꞌ. Tato dꞌa cꞌualil tzuji jun, tzꞌoch dꞌa spatic vin̈ smilvaj chiꞌ.

5 Tato ay junoc mach stan̈van va nocꞌ smolbꞌetzal nocꞌ dꞌa sluum, palta axo dꞌa scal yavbꞌen teꞌ junocxo mach scꞌoch nocꞌ vael chiꞌ, yovalil syacꞌ sqꞌuexul mach ay yic nocꞌ chiꞌ. A val sat yavbꞌen te vachꞌ syacꞌ sqꞌuexuloc.

6 Tato ay junoc mach van sn̈usan spatan, tzꞌel cꞌacꞌ yuuj, stzꞌabꞌat strigo junoc mach, vachꞌchom molbꞌabꞌilxo ixim, mato manto jochchajlaj ixim, a mach tzꞌactanel cꞌacꞌ chiꞌ, yovalil stup smasanil tas tzꞌabꞌat chiꞌ.

7 Tato ay junoc mach syacꞌbꞌat stumin, ma junocxo tas ay stojol sicꞌbꞌat junocxo, axo tzꞌaji tzꞌelcꞌajelta dꞌa yol spat vin̈ sicꞌjinac chiꞌ, tato tzꞌilchaj vin̈ elcꞌum chiꞌ, cha macan̈xo tzꞌaj yacꞌan sqꞌuexul vin̈. 8 Tato max yamchaj vin̈ elcꞌum chiꞌ jun, tzꞌicꞌchajbꞌat vin̈ aj pat chiꞌ dꞌa yichan̈ vin̈ juez yic tzꞌilji tato man̈oc vin̈ ix yaman qꞌuen tumin chiꞌ, ma juntzan̈ tastac tzꞌacꞌji sicꞌcanbꞌat vin̈ chiꞌ.

9 Tato ay junoc anima smacqꞌue junoc tas yicoc: Nocꞌ vacax, nocꞌ calnel, nocꞌ bꞌuru, ma junoc pichul, ma junocxo tas ton̈ej satbꞌati, syalan junocxo to yicoꞌ, tzꞌicꞌchajbꞌat ebꞌ chavan̈ chiꞌ dꞌa yichan̈ ebꞌ juez. A jun mach tzꞌesan chiꞌ, yovalil chabꞌ tzꞌaj yacꞌan sqꞌuexul dꞌa mach ay yic chiꞌ.

10 Tato ay junoc mach ton̈ej syacꞌcan abꞌenal junoc nocꞌ bꞌuru, ma junoc nocꞌ vacax, ma junoc nocꞌ calnel, ma yaln̈ej tas molbꞌetzal nocꞌ dꞌa junocxo mach, axo tzꞌaji, a nocꞌ nocꞌ chiꞌ scham nocꞌ, ma slajvi nocꞌ, ma tzꞌelcꞌajbꞌat nocꞌ. Tato malaj mach tzꞌilani, 11 syacꞌ stiꞌ vin̈ anima chiꞌ dꞌa yichan̈ Jehová yedꞌ dꞌa yichan̈ vin̈ ay yic nocꞌ nocꞌ chiꞌ to man̈oc vin̈ ix yaman nocꞌ. Axo vin̈ ay yic nocꞌ chiꞌ schaan yabꞌ tas ix yal vin̈ chiꞌ, yuj chiꞌ max stuplaj nocꞌ vin̈. 12 Palta tato qꞌuelanoch vin̈ tzꞌelcꞌajbꞌat nocꞌ, yovalil stup vin̈ dꞌa vin̈ yajal nocꞌ chiꞌ. 13 Tato schijibꞌat nocꞌ yuj nocꞌ choj, ma yuj nocꞌ oques, yovalil syicꞌcot jabꞌocxo nocꞌ vin̈, yic vachꞌ syil vin̈ yajal nocꞌ chiꞌ. Tato icha chiꞌ, max stuplaj nocꞌ vin̈.

14 Tato ay junoc mach scꞌanan junoc nocꞌ nocꞌ smajnej: Nocꞌ chej, nocꞌ vacax, talaj scham nocꞌ, ma slajvi nocꞌ, palta max yil-laj vin̈ yajal nocꞌ chiꞌ, yovalil stup nocꞌ mach ix majnan chiꞌ. 15 Palta tato qꞌuelanoch vin̈ yajal nocꞌ chiꞌ scham nocꞌ, max stuplaj nocꞌ vin̈ smajnan nocꞌ chiꞌ, yujto strato ebꞌ yaji, an̈ej smajananubꞌal nocꞌ syacꞌ vin̈.

16 Qꞌuinaloc ay junoc vinac tzꞌacꞌan musansatil junoc ix cobꞌes mantalaj bꞌaj ay strato, svay vin̈ yedꞌ ix, yovalil syacꞌ qꞌuen tumin vin̈ yic stojoloc ix dꞌa smam ix, ichataxon bꞌeybꞌal. Yovalil syicꞌ ix vin̈. 17 Tato max yal scꞌol smam ix to syicꞌ jun vin̈ chiꞌ ix, palta yovalil syacꞌ qꞌuen tumin vin̈ dꞌa smam ix ix chiꞌ, ichataxon sbꞌeybꞌal ebꞌ anima a smojcꞌaj ebꞌ ix cobꞌestac.

18 Masanil ebꞌ ajbꞌaal, yovalil scham ebꞌ.

19 Tato ay mach smulan yedꞌ nocꞌ nocꞌ, yovalil schami.

20 Tato ay mach syacꞌ silabꞌ dꞌa comon dios, to man̈oc dꞌayin a in Jehová in tic syacꞌaꞌ, yovalil smacꞌjichamoc. 21 Man̈ eyixtej ebꞌ anima chꞌoc chon̈abꞌil ton̈ej ayecꞌ dꞌa e cal, yujto ex ecꞌpax dꞌa chꞌoc chon̈abꞌil dꞌa Egipto.

22 Man̈ eyixtej ebꞌ ix chamnacxo yetbꞌeyum, ma ebꞌ unin man̈xalaj smam. 23 Tato tzeyixtej ebꞌ, a dꞌayin ol yal sbꞌa ebꞌ, ol vabꞌ tas syal ebꞌ chiꞌ dꞌayin. 24 Ol cot voval dꞌayex, ol ex vicꞌanbꞌat dꞌa junoc oval. Icha chiꞌ ol aj ex vacꞌanchamoc. Yuj val chiꞌ, a ebꞌ ix eyetbꞌeyum scan ebꞌ ix dꞌa man̈ etbꞌeyumal, scanpax ebꞌ eyuninal dꞌa mebꞌail.

25 Tato tzeyacꞌ qꞌuen tumin majanil dꞌa junoc eyetchon̈abꞌ mebꞌaꞌ anima, man̈ e cꞌan yuneꞌ qꞌuen dꞌay icha syutej sbꞌa ebꞌ tzꞌacꞌantaxon qꞌuen majanil. 26 Tato syacꞌcan junoc spichul, yujto smajnej qꞌuen tumin chiꞌ, tzeyacꞌ meltzaj dꞌay a tzꞌemxican cꞌu, 27 talaj an̈ej jun spichul chiꞌ syacꞌoch yuj siic, an̈ej syacꞌoch dꞌacꞌvalil. Yuj chiꞌ, tato syal sbꞌa dꞌayin, dꞌa elan̈chamel tzin colvaj dꞌay, yujto a in tic elan̈chamel tzꞌocꞌ in cꞌol dꞌa anima.

28 Man̈ eyal chucal lolonel dꞌa spatic ebꞌ juez, ma dꞌa spatic vin̈ yajal e chon̈abꞌ.

29 Mocabꞌ najtilax eyicꞌancot eyofrenda dꞌayin, aton sbꞌabꞌel sat eyavbꞌen.

A ebꞌ e bꞌabꞌel vinac unin tzeyacꞌ ebꞌ dꞌayin. 30 Icha chiꞌ tzꞌajpax nocꞌ bꞌabꞌel yuneꞌ nocꞌ e vacax yedꞌ nocꞌ e calnel. Scan uqueoc cꞌual nocꞌ yedꞌ snun, axo dꞌa svajxaquil cꞌual yalji nocꞌ, tzeyacꞌan nocꞌ dꞌayin.

31 Vic eyaj a ex tic. Yuj chiꞌ man̈ e chiꞌ schibꞌejal nocꞌ nocꞌ milbꞌilcham yuj nocꞌ cꞌultaquil nocꞌ, palta a dꞌa nocꞌ tzꞌiꞌ tzeyacꞌ nocꞌ.