Ayic toxo ix satjiel chavan̈ ebꞌ rey yuj vin̈aj Moisés yedꞌ ebꞌ soldado Israel, aton vin̈aj Sehón sreyal ebꞌ amorreo cajan dꞌa Hesbón yedꞌ vin̈aj Og sreyal Basán cajan dꞌa Astarot yedꞌ dꞌa Edrei, ataꞌ yal vin̈aj Moisés chiꞌ tas schec Jehová yal vin̈ dꞌa ebꞌ.

Uxlucheꞌ cꞌual stecꞌnabꞌil dꞌa lum vitz Horeb, sbꞌat dꞌa svitzal Seir masanto scꞌoch dꞌa Cades-barnea. Vachꞌchom icha chiꞌ, palta a dꞌa bꞌabꞌel cꞌu yic yuxluchil uj yic stzꞌacvi 40 abꞌil yelta ebꞌ dꞌa Egipto, aton taꞌ ix yal vin̈aj Moisés tas syalelcꞌoch juntzan̈ checnabꞌil yalnac Jehová dꞌa vin̈ yuj ebꞌ schon̈abꞌ. Ix yalan vin̈ icha tic:

6 A Jehová co Diosal lolonnac dꞌayon̈ dꞌa lum vitz Horeb, yalannac icha tic: Nivanxo tiempo eyajecꞌ dꞌa yichtac jun vitz tic. 7 A ticnaic, ixiquecxi, tzex bꞌatcan dꞌa lum svitzal yic ebꞌ amorreo yedꞌ dꞌa masanil yol smacbꞌen ebꞌ dꞌa Arabá, dꞌa tzalquixtac, dꞌa chꞌolquixtac, dꞌa Neguev yedꞌ dꞌa stitac aꞌ mar, dꞌa lum yic ebꞌ cananeo yedꞌ dꞌa masanil yoltac yic Líbano masanto dꞌa aꞌ nivan Éufrates, 8 yujto toxo ix vacꞌ lum luum chiꞌ dꞌa yol e cꞌabꞌ. Ochan̈ec cajan dꞌay yujto vacꞌnac in tiꞌ vacꞌan lum dꞌa ebꞌ e mam eyicham, aton vin̈aj Abraham, vin̈aj Isaac yedꞌ vin̈aj Jacob yedꞌ dꞌayex yin̈tilal ex ebꞌ, xchi Jehová dꞌayon̈.

9 A dꞌa jun tiempoal chiꞌ valnac dꞌayex: Man̈ ol yal-laj ex vilan in chꞌocoj. 10 Tzijtum cuninal ix acꞌji yuj Jehová co Diosal, yuj chiꞌ a val ticnaic, te nivan chon̈abꞌxo on̈ aji, lajanxo co bꞌisul icha qꞌuen cꞌanal ay dꞌa satchaan̈ to man̈ bꞌischajbꞌenoc. 11 Aocabꞌ Jehová co Diosal, sDiosal pax ebꞌ co mam quicham, a tzꞌacꞌan qꞌuibꞌ co bꞌisul dꞌa smilalxo, ecꞌbꞌal dꞌa yichan̈ icha co bꞌisul ticnaic. Yacꞌocabꞌ val svachꞌcꞌolal, icha val ix aj yacꞌan stiꞌ. 12 Yuj chiꞌ max yal-laj vuj in chꞌocoj ex vilani yedꞌ in bꞌoanel masanil oval yedꞌ chaclajbꞌail ay dꞌa e cal. 13 Yuj chiꞌ, siqꞌuequel ebꞌ vin̈ te ay sjelanil dꞌa scal junjun in̈tilal, aton ebꞌ aj pensar, ebꞌ ojtacabꞌilxo to syal yuuj, a juntzan̈ ebꞌ chiꞌ ol vacꞌoch eyajaliloc, xin chi.

14 Axo e tacꞌvi: Scha co cꞌool masanil tas ix a naꞌ chiꞌ, xe chi. 15 Icha chiꞌ aj in sicꞌanel dꞌa scal junjun eyin̈tilal ebꞌ vin̈ ay spensar, nivan yelcꞌochi, vacꞌanoch yopisio ebꞌ vin̈ yoch eyajaliloc: Ay ebꞌ vin̈ vacꞌoch yajalil dꞌa mil anima, dꞌa cien, dꞌa cincuenta yedꞌ dꞌa lajun̈van̈, slaj och ebꞌ vin̈ yajalil chiꞌ dꞌa yin̈tilal. 16 An̈ejtonaꞌ vacꞌan juntzan̈ checnabꞌil tic dꞌa ebꞌ eyajalil chiꞌ: Tzeyilaꞌ tato ay oval ma telajbꞌail sqꞌue vaan dꞌa scal ebꞌ quetchon̈abꞌ, tato ay tas ay dꞌa scal chavan̈oc ebꞌ, mato ay tas ay dꞌa scal junoc yedꞌ junoc chꞌoc chon̈abꞌil, vachꞌn̈ej tzeyutej e bꞌoan yaj dꞌa ebꞌ dꞌa stojolal. 17 Ayic tze bꞌoan yaj dꞌa ebꞌ, malajocabꞌ sqꞌuexan̈il ebꞌ dꞌa yol e sat. Lajann̈ej tzeyutej dꞌa ebꞌ emnaquiltac yedꞌ dꞌa ebꞌ nivac yelcꞌochi. Mocabꞌa junoc bꞌaj tzex xivi, yujto a jun eyopisio chiꞌ, man̈ eyicoc, yujto acꞌbꞌil dꞌayex yuj Dios. Tato ay val tas te nivan yaj jun, tzeyicꞌcot dꞌayin, a inxo ol in bꞌo yaj dꞌa ebꞌ, xin chi dꞌa ebꞌ.

18 Ataꞌ valnac masanil dꞌa ebꞌ tastac yovalil scꞌulej ebꞌ.

19 Ayic quel dꞌa lum vitz Horeb, co dꞌin̈bꞌanbꞌat dꞌa tzalquixtac dꞌa yol yic ebꞌ amorreo, yuj co cꞌanabꞌajan tas syal Jehová co Diosal. Te ay smay eyilaꞌ ayic on̈ ecꞌn̈ej dꞌa jun nivan tzꞌinan lum chiꞌ, masanto on̈ cꞌoch dꞌa Cades-barnea. 20 Ataꞌ val dꞌayex to toxo on̈ cꞌoch dꞌa tzalquixtac dꞌa yol yic ebꞌ amorreo, aton jun chiꞌ ol yacꞌ Jehová co Diosal dꞌayon̈. 21 Ochan̈ec an, iqꞌuec ecꞌ luum, cajnajan̈ec taꞌ, icha ix aj yalan Jehová dꞌayon̈, aton co Diosal yedꞌ ebꞌ co mam quicham. Man̈ ex xivoc, mocabꞌ chabꞌaxqꞌue e cꞌool, xin chi. 22 A exxo tic ul eyal dꞌayin: Te vachꞌ ama tato ay jayvan̈oc on̈ tzon̈ bꞌabꞌlaj bꞌati yic tzon̈ bꞌat quil juntzan̈ chon̈abꞌ chiꞌ, tzon̈ paxta yic tzul calani tas bꞌeal bꞌaj ol on̈ bꞌatoc yedꞌ tas chon̈abꞌil bꞌaj ol on̈ ochoc, xe chi.

23 A tas eyal chiꞌ, vachꞌ vabꞌi. Yuj chiꞌ in siqꞌuel lajchavan̈ vinac dꞌa e cal, junjun dꞌa junjun in̈tilal. 24 Aton ebꞌ chiꞌ bꞌat dꞌa tzalquixtac, scꞌoch ebꞌ dꞌa schꞌolanil Escol, yecꞌchaj ebꞌ dꞌa juntzan̈ lugar chiꞌ smasanil. 25 Slajvi chiꞌ yicꞌancot ebꞌ jabꞌoc sat tas avabꞌil dꞌa jun luum chiꞌ dꞌayon̈. A yuj tas yal ebꞌ chiꞌ, yuj chiꞌ nachajel cuuj to te vachꞌ lum ol yacꞌ Jehová co Diosal dꞌayon̈. 26 A exxo tic, maj yal e cꞌol ex bꞌat dꞌa jun luum chiꞌ, palta to e tenecꞌ tas yal Jehová co Diosal. 27 Axo bꞌaj ayex ecꞌ chiꞌ, ex och ijan eyalan icha tic: A Jehová malaj sgana dꞌayon̈, yuj chiꞌ on̈ yiqꞌuelta dꞌa Egipto yujn̈ej on̈ yacꞌanoch dꞌa yol scꞌabꞌ ebꞌ amorreo, yic tzon̈ satanel ebꞌ. 28 Axo ticnaic jun, ¿bꞌajtil ol on̈ bꞌatoc? A ebꞌ quetchon̈abꞌ tzꞌalani to ataꞌ ay ebꞌ vin̈ vinac te tecꞌan, nivac vinac, chaan̈ steel ebꞌ vin̈ dꞌa quichan̈, nivac chon̈abꞌ juntzan̈ schon̈abꞌ ebꞌ, te chaan̈ yajoch smuroal spatictac. Ix yilanpax juntzan̈ nivac vinac yin̈tilal vin̈aj Anac ebꞌ. A yuj masanil juntzan̈ chiꞌ, juneln̈ej ix chabꞌaxqꞌue co cꞌool, xe chi.

29 Ichato chiꞌ in tacꞌvi: Man̈ ex xiv yuj juntzan̈ chiꞌ. 30 A Jehová co Diosal ol bꞌabꞌlaj dꞌa quichan̈, aꞌ ol acꞌan oval cuuj, icha val tas ix aj quilan tas ix scꞌulej cuuj dꞌa Egipto, 31 yedꞌ dꞌa tzꞌinan luum. Yedꞌ val yipal on̈ yicꞌancot dꞌa yoltac bꞌe dꞌa tzꞌinan lum chiꞌ, masanto ix yal co javi dꞌa tic, icha val junoc mamabꞌil to syaꞌilej yal yuninal, xin chi. 32 Palta a ex tic maj eyacꞌoch Jehová co Diosal dꞌa e cꞌool. 33 A val Jehová chiꞌ bꞌabꞌel dꞌa quichan̈. A dꞌacꞌvalil syacꞌ saquilqꞌuinal dꞌayon̈ icha junoc cꞌacꞌ, axo dꞌa cꞌualil, schꞌoxpax yedꞌ jun asun bꞌaj tzon̈ bꞌati yedꞌ bꞌaj tzon̈ och vaan.

34 Ayic yabꞌan Jehová tas eyal chiꞌ, te cot yoval, yacꞌan stiꞌ icha tic: 35 Malaj val junoc juntzan̈ vinac te chuc spensar tic ol ilan lum luum vacꞌnac in tiꞌ vacꞌan dꞌa e mam eyicham. 36 An̈ej vin̈aj Caleb yuninal vin̈aj Jefone ol ilan luum, yuj chiꞌ a dꞌa vin̈ yedꞌ yin̈tilal ol vacꞌ lum xidꞌ eyil chiꞌ, yujto ix scꞌanabꞌajej vin̈ yedꞌ smasanil scꞌol tas ix valaꞌ, xchi Jehová chiꞌ.

37 Eyuj val a ex tic, yuj chiꞌ cotpax yoval Jehová dꞌayin, yalan dꞌayin icha tic: Man̈ ol ach ochpaxlaj dꞌa luum a ach tic. 38 A vin̈aj Josué yuninal vin̈aj Nun scolvaj edꞌoc, a vin̈ ol och a qꞌuexuloc. Yuj chiꞌ iptzitej vin̈ yujto a vin̈ ol acꞌan jun luum chiꞌ dꞌa ebꞌ etisraelal tic, xchi dꞌayin.

Yalanpax dꞌayex icha tic: 39 Vachꞌchom a ex tic tzeyacꞌoch dꞌa e cꞌool to ol ochcan ebꞌ eyuninal checabꞌoc dꞌa ebꞌ ajcꞌool, palta a ebꞌ eyuninal mantalaj spensar chiꞌ, ol och ebꞌ dꞌa jun luum chiꞌ. A in ol vacꞌ lum smacbꞌenoc ebꞌ. 40 Yacbꞌan manto elcꞌochlaj, meltzajan̈ec dꞌa tzꞌinan luum, tzex bꞌatcan junelxo dꞌa bꞌe scꞌoch dꞌa aꞌ Chacchac Mar, xchi Jehová chiꞌ dꞌayin.

41 A ex tic, eyal dꞌayin icha tic: Ix och co mul dꞌa Jehová co Diosal, palta a ticnaic jun, coyec, caqꞌuec quip icha val ix aj yalan Jehová dꞌayon̈, xe chi. Eyicꞌanbꞌat eyamcꞌabꞌ yic oval, a e naani to secojtac ol aj eyicꞌan lum tzalquixtac chiꞌ. 42 Palta a Jehová alani to sval dꞌayex: Man̈ eyacꞌ oval, man̈ e tecꞌbꞌej e bꞌa dꞌa ebꞌ ajcꞌool, axo talaj tzꞌaji tzex yacꞌan ganar ebꞌ, yujto man̈ ol in bꞌatlaj eyedꞌoc, xchi Jehová, xa chi, xchi dꞌayin.

43 Vacꞌ juntzan̈ chiꞌ eyojtaquejeli, palta a ex tic maj e chalaj eyabꞌi. Axo aji, e tenecꞌ tas yal Jehová chiꞌ, eyacꞌan icha e gana, qꞌue ex dꞌa tzalquixtac chiꞌ. 44 Yuj chiꞌ a ebꞌ amorreo cajan taꞌ, elta ebꞌ dꞌayex icha nocꞌ nocꞌal chabꞌ, masanto yal ex yacꞌan ganar ebꞌ dꞌa Seir, cꞌochn̈ej ebꞌ dꞌa Horma. 45 Axo yic ex meltzaj jun, och ex ijan eyocꞌ dꞌa yichan̈ Jehová, palta majxo tacꞌvoclaj dꞌayex. 46 Yuj chiꞌ te nivan tiempoal on̈ ecꞌ dꞌa yol smacbꞌen Cades chiꞌ.