5 Yuj chiꞌ ix em n̈ojan vin̈aj Moisés yedꞌ vin̈aj Aarón dꞌa sat lum dꞌa yichan̈ ebꞌ anima chiꞌ smasanil. 6 Axo pax vin̈aj Josué yuninal vin̈aj Nun yedꞌ vin̈aj Caleb yuninal vin̈aj Jefone, aton ebꞌ vin̈ ix xidꞌecꞌ iloj luum chiꞌ, ix sn̈icꞌchitejel spichul ebꞌ vin̈ yuj schꞌoxanel scuscꞌolal. 7 Ix yalan ebꞌ vin̈ dꞌa ebꞌ anima smasanil icha tic:

—A lum luum ix bꞌat quil chiꞌ, te vachꞌ luum. 8 Te yax sat luum. Tato tzꞌel dꞌa scꞌol Jehová scolvaj quedꞌoc, ol quicꞌn̈ej luum, aꞌ ol acꞌan lum dꞌayon̈. 9 Yuj val chiꞌ, man̈ eyiqꞌuel e bꞌa dꞌa spatic Jehová, man̈ ex xiv dꞌa ebꞌ anima ay dꞌa jun luum chiꞌ. Icha co vaan junoc pan, icha chiꞌ ol aj co satanel ebꞌ. ¿Toc ay mach ol colan ebꞌ dꞌayon̈? A on̈xo pax tic ayoch Jehová quedꞌoc. Man̈ ex xiv dꞌa ebꞌ, xchi ebꞌ vin̈.

10 Yuj chiꞌ a ebꞌ anima chiꞌ ix yal ebꞌ to sjulqꞌuenej ebꞌ vin̈ chavan̈ chiꞌ ebꞌ. Dꞌa val jun rato chiꞌ, dꞌa yichan̈ ebꞌ chon̈abꞌ smasanil, ix schꞌox sbꞌa Jehová yedꞌ stziquiquial dꞌa stiꞌ scajnubꞌ bꞌaj schꞌox sbꞌa. 11 Ix yalan dꞌa vin̈aj Moisés chiꞌ icha tic:

—¿Bꞌaqꞌuin̈ ol yactej juntzan̈ anima tic in spaticaneli? ¿Bꞌaqꞌuin̈ ol yactej ebꞌ in schabꞌcꞌolani, tic val syil ebꞌ jantac tas satubꞌtac ix in chꞌox dꞌa scal ebꞌ? 12 A ticnaic ol vacꞌcot junoc nivan ilya dꞌa yibꞌan̈ jun chon̈abꞌ tic yic sateli. A dꞌayach ol el junoc chon̈abꞌ vuuj to yelxo nivan, te tecꞌan ol aj dꞌa yichan̈ ebꞌ chon̈abꞌ tic, xchi dꞌa vin̈.

13 Palta ix tacꞌvi vin̈aj Moisés chiꞌ dꞌa Jehová icha tic:

—Yojtac val ebꞌ aj Egipto jantac a poder ayic ix elta ebꞌ chon̈abꞌ tic dꞌa scal ebꞌ. Ayic ol yabꞌan ebꞌ to tza satel ebꞌ a chon̈abꞌ tic, 14 ol yalan a pecal ebꞌ dꞌa ebꞌ anima ay dꞌa yol yic Canaán. A ebꞌ chiꞌ, ix yabꞌpax ebꞌ to a ach Jehová ach tic, ayach ecꞌ dꞌa co cal, qꞌuelcꞌumbꞌa tzach aj quedꞌoc tzach loloni. Ayachn̈ej ecꞌ dꞌa scal jun asun ayecꞌ dꞌa quibꞌan̈. Dꞌa cꞌualil ayachoch dꞌa scal jun nivan topan̈ asun chiꞌ, tzach bꞌeyn̈ej dꞌa quichan̈. Axo dꞌacꞌvalil, dꞌa scal jun nivan cꞌacꞌ ayachochi, tzach bꞌeyn̈ej dꞌa quichan̈ a on̈ a chon̈abꞌ on̈ tic. Masanil juntzan̈ tic ix yabꞌ specal ebꞌ aj Canaán chiꞌ, 15 palta tato juneln̈ej tza satel ebꞌ a chon̈abꞌ tic, icha tzꞌaj satel junoc anima, axo ebꞌ anima ol abꞌan specal, tzijtum tas ol yal ebꞌ. Olam yal ebꞌ icha tic: 16 Maj yal-laj yicꞌjioch ebꞌ anima yuj Jehová dꞌa sat lum bꞌaj ix yacꞌ stiꞌ yacꞌan dꞌa ebꞌ, yuj chiꞌ ix satjiel ebꞌ yuuj dꞌa tzꞌinan luum, xcham ebꞌ. 17 Yuj chiꞌ, a ticnaic Mamin Jehová, tzin tevi dꞌayach to tza chꞌox a poder, icha bꞌaj ix acꞌ a tiꞌ, ix alani 18 to max cotlaj oval dꞌa elan̈chamel, te xajan ebꞌ anima uuj, tzꞌacꞌan nivancꞌolal smul ebꞌ chuc yedꞌ ebꞌ pit. Palta max ecꞌbꞌatlaj acꞌan syaelal junoc mach yuj smul bꞌaj juneln̈ej pit syutej sbꞌa dꞌayach, tzacꞌn̈ejcan yaelal dꞌa yibꞌan̈ yuninal yedꞌ yixchiquin, masanto dꞌa schan̈il macan̈ yin̈tilal.

19 Acꞌ nivancꞌolal smul juntzan̈ anima tic, icha val a nivan vachꞌcꞌolal dꞌa yibꞌan̈ ebꞌ, icha ix aj acꞌan nivancꞌolal ebꞌ yictax on̈ el dꞌa Egipto masanto ix on̈ ja dꞌa tzꞌinan lum tic, xchi vin̈aj Moisés chiꞌ.

20 Ix tacꞌvi Jehová dꞌa vin̈aj Moisés chiꞌ icha tic:

—Ujocabꞌi, svacꞌ nivancꞌolal smul ebꞌ anima tic icha val alan chiꞌ. 21 Palta svacꞌoch in bꞌa testigoal yedꞌ in poder te nivan yelcꞌochi to chequel dꞌa masanil yolyibꞌan̈qꞌuinal, 22 vachꞌchom a jantac ebꞌ tic ix yil in poder ebꞌ yedꞌ juntzan̈ tas satubꞌtac ix in bꞌo dꞌa Egipto yedꞌ dꞌa tzꞌinan lum tic, palta ma chequel jayelalxo in yacꞌan proval ebꞌ, max scꞌanabꞌajejn̈ej ebꞌ tas svalaꞌ. 23 Yuj chiꞌ man̈ ol cꞌochlaj ebꞌ dꞌa lum ix vacꞌ in tiꞌ vacꞌan dꞌa smam yicham ebꞌ. Malaj junoc ebꞌ tzin paticanel tic ol cꞌoch dꞌa sat luum. 24 Palta an̈ej vin̈ in checabꞌ aj Caleb ol cꞌoch dꞌa sat luum chiꞌ, yujto cꞌanabꞌajum vin̈ dꞌayin, vachꞌn̈ej spensar vin̈. A vin̈ ol macbꞌenan lum yedꞌ ebꞌ yuninal, aton lum ix xidꞌ yil vin̈ chiꞌ. 25 Cajan ebꞌ amalecita yedꞌ ebꞌ cananeo dꞌa chꞌolquixtac dꞌa lacꞌan tic, yuj chiꞌ qꞌuicꞌan tzex meltzaji. Axo dꞌa tzꞌinan lum dꞌa stojolalbꞌat aꞌ Chacchac Mar tzex bꞌati, xchi Jehová chiꞌ.

26 Ix yalanxi dꞌa vin̈aj Moisés yedꞌ dꞌa vin̈aj Aarón icha tic:

27 —¿Jantacto tiempo ol techaj juntzan̈ anima malaj svachꞌil spensar tic vuuj? Ix vabꞌ yalan in pecal ebꞌ. 28 Ixiquec, alec dꞌa ebꞌ icha tic: A in Jehová in, ix vacꞌ in tiꞌ to ol elcꞌoch icha ix aj vabꞌan eyalan chiꞌ. 29 Masanil ebꞌ vin̈ vinac ecꞌxo sqꞌuinal dꞌa 20 abꞌil, ebꞌ vin̈ ix icꞌjiqꞌue vaan slistail, aton ebꞌ vin̈ ix alan chuc dꞌa in patic, ol cham ebꞌ vin̈. Ol can cꞌotjabꞌ sbꞌaquil ebꞌ dꞌa tzꞌinan luum tic. 30 An̈ej vin̈aj Caleb yuninal vin̈aj Jefone yedꞌ vin̈aj Josué yuninal vin̈aj Nun, ol och dꞌa lum luum ix vacꞌ in tiꞌ vacꞌan chiꞌ dꞌayex. A exxo e masanil, mach ex to chuc tas ix eyal dꞌa in patic, man̈ ol ex ochlaj dꞌa luum. 31 A ebꞌ eyuninal ix eyalaꞌ to ol ochcan ebꞌ dꞌa yol scꞌabꞌ ebꞌ ajcꞌool, a ebꞌ ol vacꞌoch dꞌa lum luum maj schalaj e cꞌol chiꞌ. Ol yacꞌ tzalajbꞌoc scꞌol ebꞌ taꞌ. 32 A exxo pax tic jun, ol can e nivanil dꞌa tzꞌinan luum tic. 33 A ebꞌ eyuninal tic, 40 abꞌil ol ecꞌ ebꞌ tan̈voj calnel dꞌa tzꞌinan luum tic, icha chiꞌ ol aj stupanel e mul chiꞌ ebꞌ, aton bꞌaj ix in e patiquejel chiꞌ, masanto ol ex chamcan dꞌa tic e masanil. 34 Dꞌa 40 cꞌual ix eyilaꞌ tas yilji lum xidꞌ eyil chiꞌ, yuj chiꞌ 40 abꞌil ol och yaelal dꞌa eyibꞌan̈, syalelcꞌochi junjun abꞌil dꞌa junjun cꞌu. Icha chiꞌ ol aj eyojtaccaneli to svacꞌ syaelal ebꞌ tzꞌoch ajcꞌolal dꞌayin. 35 A in Jehová in tic svalaꞌ, icha chiꞌ ol vutoc dꞌayex. Yujto ix e molbꞌejoch e bꞌa ajcꞌolal dꞌayin, yuj chiꞌ a dꞌa tzꞌinan lum tic ol ex satcaneloc, xchi Jehová dꞌa ebꞌ vin̈.

36-37 A ebꞌ vin̈ ix xidꞌecꞌ iloj lum yuj vin̈aj Moisés chiꞌ, chucn̈ej ix aj yalan ebꞌ vin̈ tas yaj luum, yuj chiꞌ ix bꞌuchvaj ebꞌ anima dꞌa Jehová. 38 Axo Jehová ix acꞌancot jun ilya dꞌa yibꞌan̈ ebꞌ vin̈ ilum luum chiꞌ, yuj chiꞌ ix cham ebꞌ vin̈. Axon̈ej vin̈aj Josué yuninal vin̈aj Nun yedꞌ vin̈aj Caleb yuninal vin̈aj Jefone maj chamlaj yuj jun ilya chiꞌ.

39 Ayic ix yalan vin̈aj Moisés dꞌa ebꞌ israel tas ix yal Jehová, masanil ebꞌ ix cusqꞌue scꞌool. 40 Axo ix sacbꞌi dꞌa junxo cꞌu, ix pet qꞌue vaan ebꞌ, ix snaan ebꞌ to sbꞌat ebꞌ yacꞌ oval yedꞌ ebꞌ anima cajan dꞌa tzalquixtac. Yuj chiꞌ ix yal ebꞌ dꞌa vin̈aj Moisés chiꞌ icha tic:

—A ticnaic, val yel coyec dꞌa sat lum bꞌaj ix yacꞌ stiꞌ Jehová to ol yacꞌ dꞌayon̈. Yeltoni ix och co mul, xchi ebꞌ.

41 Ix yalan vin̈ dꞌa ebꞌ icha tic:

—¿Tas yuj tze tenecꞌ tas ix yal Jehová? A jun tas tze na chiꞌ, man̈ vachꞌoc ol elcꞌochoc. 42 Man̈ ex bꞌatoc, yujto man̈ ol ochlaj Jehová eyedꞌoc, ol ex acꞌjoc ganar yuj ebꞌ ajcꞌool. 43 Maclabꞌilexxo yuj ebꞌ amalecita yedꞌ ebꞌ cananeo, to ol yacꞌ oval ebꞌ eyedꞌoc. Ol ex smilcham ebꞌ yujto ix eyiqꞌuel e pensar dꞌa Jehová, yuj chiꞌ man̈xo ayocochlaj eyedꞌoc, xchi vin̈aj Moisés chiꞌ. 44 Palta ix spitejn̈ej sbꞌa ebꞌ, ix bꞌat ebꞌ dꞌa tzalquixtac. Axo teꞌ scaxail strato Jehová yedꞌ vin̈aj Moisés chiꞌ, maj eltalaj dꞌa yol campamento. 45 Ayic ix bꞌat ebꞌ vin̈ chiꞌ, maclabꞌil sqꞌuecꞌoch ebꞌ vin̈ yuj ebꞌ amalecita yedꞌ ebꞌ cananeo, yuj chiꞌ ix yacꞌ oval ebꞌ. Axo ix aji, ix acꞌji ganar ebꞌ israel, ix pechchaj ebꞌ masanto dꞌa Horma.