2 Al juntzan̈ tic dꞌa ebꞌ etisraelal: Ayic ol ex cꞌoch dꞌa lum luum ol vacꞌ dꞌayex yic tzex cajnaj dꞌay, 3-4 tato ayex tze n̈ustzꞌa junoc nocꞌ vacax, ma junoc nocꞌ calnel, ma junoc nocꞌ chiva silabꞌil, mato yic tze cꞌanabꞌajan bꞌaj tzeyacꞌ e tiꞌ eyacꞌani, ma ton̈ej tzꞌel dꞌa e cꞌool, ma yuj junoc qꞌuin̈ yuj chiꞌ tzeyacꞌaꞌ, yovalil tzeyacꞌpax chabꞌoc libra harina te vachꞌ calabꞌil yedꞌ junoc litro aceite yedꞌ silabꞌ chiꞌ. A jun silabꞌ chiꞌ te sucꞌuqꞌui sjabꞌ svabꞌ a in Jehová in tic. 5 A yedꞌ juntzan̈ silabꞌ toxo ix val chiꞌ tzeyacꞌ junoc litro vino ofrendail yedꞌ junjun nocꞌ calnel chiꞌ. 6 Tato a junoc nocꞌ chꞌac calnel tzeyacꞌ silabꞌil, tzeyacꞌpax vajxaqueoc libra harina scalaj yedꞌ junoc litro aceite yedꞌ jabꞌocxo, 7 ecꞌtopax jun litro vino tzeyacꞌ yedꞌoc. Te sucꞌuqꞌui sjabꞌ jun ofrenda chiꞌ svabꞌi. 8 Tato a junoc nocꞌ quelem vacax tzeyacꞌ silabꞌil to stzꞌai, ma silabꞌil yic tze cꞌanabꞌajej bꞌaj tzeyacꞌ e tiꞌ, ma silabꞌil yic juncꞌolal, 9 tzeyacꞌpax lajchaveoc libra harina, chabꞌoc litro aceite 10 yedꞌ pax chabꞌoc litro vino ofrendail yedꞌoc. A jun ofrenda chiꞌ sucꞌuqꞌui sjabꞌ svabꞌ a in Jehová in tic. 11 Aton juntzan̈ tic yovalil tzeyacꞌ yedꞌ junjun nocꞌ vacax chiꞌ, ma yedꞌ junjun nocꞌ chꞌac calnel, ma yedꞌ junjun nocꞌ yunetac calnel, ma yedꞌ junjun nocꞌ yunetac chiva. 12 Icha sbꞌisul nocꞌ tzeyacꞌ silabꞌil chiꞌ, icha pax chiꞌ sbꞌisul juntzan̈xo ofrenda chiꞌ tzeyacꞌ yedꞌoc. 13 E masanil a ex israel ex tic, yovalil tze cꞌanabꞌajej juntzan̈ ley tic smasanil ayic tze n̈usantzꞌa eyofrenda sucꞌuqꞌui sjabꞌ svabꞌ a in Jehová in tic.

14 Tato ay junoc chꞌoc chon̈abꞌil ton̈ej sbꞌeyecꞌ dꞌa e cal, mato cajan eyedꞌoc, tato sgana sn̈usantzꞌa junoc silabꞌ to sucꞌuqꞌui sjabꞌ svabꞌi, yovalil scꞌanabꞌajej masanil sleyal icha tze cꞌanabꞌajej a ex tic. 15 A jun ley chiꞌ tzꞌoch yopisio eyuuj yedꞌ ebꞌ chꞌoc chon̈abꞌil ayecꞌ cajan eyedꞌ chiꞌ. A jun ley chiꞌ ol bꞌeyn̈ejbꞌat dꞌa e cal dꞌa masanil tiempo. A ex tic yedꞌ ebꞌ chꞌoc chon̈abꞌil, lajan eyelcꞌoch dꞌa yol in sat a in Jehová in tic. 16 Junn̈ej ley eyic yaj yedꞌ ebꞌ chꞌoc chon̈abꞌil chiꞌ, xchi Jehová.

17 Ix yalanxi Jehová dꞌa vin̈aj Moisés chiꞌ icha tic:

18 Al juntzan̈ tic smasanil dꞌa ebꞌ etisraelal: Ayic cajanexxo ecꞌ dꞌa lum bꞌaj ol ex vicꞌbꞌati, 19 a ixim trigo syacꞌ dꞌa lum luum chiꞌ ol e vaꞌa, yovalil tzeyicꞌcanel jabꞌoc ixim dꞌa ofrendail yic tzeyacꞌ dꞌayin, 20 icha tzꞌaj yacꞌchaj ixim sbꞌabꞌlaj tecꞌjieli, icha chiꞌ tzꞌaj eyacꞌan ixim dꞌayin. An̈ejtonaꞌ tzeyacꞌpax jun bꞌabꞌel pan sbꞌo dꞌa ixim harina yic ixim acꞌ trigo chiꞌ ofrendail dꞌayin. 21 A jun macan̈ ofrenda chiꞌ ol eyacꞌn̈ej dꞌayin a in Jehová in tic dꞌa masanil tiempo.

22 Talaj sbꞌat satcꞌolal eyuj e cꞌulan junoc checnabꞌil ix val dꞌa vin̈aj Moisés tic dꞌa sbꞌabꞌelal, 23 yuj chiꞌ maxtzac e cꞌanabꞌajej yedꞌ pax ebꞌ eyin̈tilal ayic ol bꞌeyn̈ejbꞌatoc, aton tic ol e cꞌulej: 24 Tato ay junoc checnabꞌil sbꞌat satcꞌolal eyuj e cꞌulan e masanil, yovalil sn̈usjitzꞌa junoc nocꞌ quelem vacax eyuj e masanil dꞌa silabꞌil to sucꞌuqꞌui sjabꞌ svabꞌ a in Jehová in tic yedꞌ ixim trigo yedꞌ vino tzeyacꞌtaxon ofrendail yedꞌ silabꞌ chiꞌ, icha dꞌa sleyal. Tzeyacꞌan junoc nocꞌ mam chiva silabꞌil yuj yacꞌji tup e mul. 25 Axo junoc vin̈ sacerdote sbꞌoan jun chiꞌ eyuj e masanil ichataxon dꞌa sleyal yic stupcanel e mul dꞌa eyibꞌan̈. A in ton svacꞌ tupel e mul chiꞌ yujto man̈ scꞌanoc e cꞌool tze cꞌulani, yujto ix eyacꞌpax silabꞌ yuj e mul. 26 A yuj e silabꞌ chiꞌ, stupcanel e mul chiꞌ dꞌa eyibꞌan̈ a ex israel ex tic yedꞌ ebꞌ chꞌoc chon̈abꞌil ayecꞌ dꞌa e cal, yujto e masanil ix och e mul.

27 Palta tato junn̈ej anima tzꞌoch smul, yuj sbꞌat satcꞌolal yuuj scꞌanabꞌajan junoc checnabꞌil, a yuj smul chiꞌ, yovalil syacꞌ junoc nocꞌ cobꞌes chiva jun abꞌil sqꞌuinal silabꞌil. 28 Axo junoc vin̈ sacerdote tzꞌacꞌanoch jun silabꞌ chiꞌ dꞌa vichan̈ ichataxon dꞌa sleyal yuj smul jun anima ix och chiꞌ, ayic toxo ix acꞌchaj jun silabꞌ chiꞌ, stupcanel smul jun anima chiꞌ dꞌa yibꞌan̈. 29 An̈ejaꞌ jun ley chiꞌ tzꞌoch yopisio eyuuj yedꞌ ebꞌ chꞌoc chon̈abꞌil ayecꞌ dꞌa e cal, ayic tzꞌoch e mul to man̈ scꞌanoc e cꞌool.

30 Palta tato ay mach tzꞌoch smul to scꞌan scꞌool, vachꞌchom eyetchon̈abꞌ, ma junoc chꞌoc chon̈abꞌil, a dꞌayin Jehová in tic tzꞌoch smul yuj spitalil. Yuj chiꞌ man̈xaocabꞌ yalan yic jun anima chiꞌ dꞌa e cal. 31 Yujto ix spatiquejel in lolonel, ix stenanecꞌ in checnabꞌil, yuj chiꞌ man̈xaocabꞌ yalan yic dꞌa e cal dꞌa juneln̈ej, xchi Jehová.

32 Ayic ayecꞌ ebꞌ israel dꞌa tzꞌinan luum, ay jun vin̈ israel chiꞌ van yecꞌ cꞌatzitz dꞌa scꞌual icꞌoj ip ix yilan ebꞌ. 33 Ix icꞌjibꞌat vin̈ dꞌa yichan̈ vin̈aj Moisés, dꞌa yichan̈ vin̈aj Aarón yedꞌ dꞌa yichan̈ masanil ebꞌ chon̈abꞌ yuj ebꞌ ix ilan chiꞌ. 34 Ix tan̈vaj vin̈ yuj ebꞌ yujto manto chequeloc tas ol utaj vin̈. 35 Yuj chiꞌ ix yalan Jehová dꞌa vin̈aj Moisés chiꞌ icha tic: A jun vin̈ tic yovalil ol cham vin̈. Masanil ebꞌ chon̈abꞌ tic sjulqꞌuenan vin̈ dꞌa spatiquel campamento, xchi dꞌa vin̈. 36 Yuj chiꞌ ix yiqꞌuel vin̈ ebꞌ dꞌa spatiquel campamento chiꞌ. Ataꞌ ix sjulqꞌuenejcham vin̈ ebꞌ icha ix aj yalan Jehová.

37 Ix yalanxi Jehová dꞌa vin̈aj Moisés chiꞌ icha tic:

38 Al juntzan̈ tic dꞌa ebꞌ etisraelal: A ex tic yedꞌ ebꞌ eyin̈tilal, yovalilocabꞌ tzꞌoch yelvanubꞌ stitac e pichul. A juntzan̈ yelvanubꞌ tzꞌoch chiꞌ, a an̈ chꞌal tzecꞌbꞌil topan, stzꞌischajoch dꞌa e pichul chiꞌ yedꞌ an̈ chꞌal qꞌuicꞌmutzꞌinac. 39 Ayic ol eyilanoch juntzan̈ yelvanubꞌ chiꞌ, ol e naancot masanil checnabꞌil ix valaꞌ to yovalil tze cꞌanabꞌajej, yic vachꞌ man̈ ol ex cuchbꞌajbꞌat dꞌa juntzan̈ tas malaj svachꞌil yuj e pensar, ma yuj tas e gana dꞌa yol eyicoꞌ. 40 Icha val chiꞌ ol aj e naancot in checnabꞌil, ol e cꞌanabꞌajani. Icha chiꞌ ol aj eyacꞌanoch e bꞌa dꞌayin to vic ex, a in e Diosal in. 41 A in Jehová e Diosal in ix ex viqꞌuelta dꞌa Egipto yic tzin och e Diosaloc, yuj chiꞌ sval juntzan̈ tic dꞌayex, xchi dꞌa vin̈aj Moisés chiꞌ.