—Cꞌocbꞌilxo eyicꞌanchaan̈ e bꞌa, yujto co masanil on̈ a on̈ tic, yicxo Jehová caji, aypaxecꞌ dꞌa co cal co masanil. ¿Tas yuj tzeyacꞌoch e bꞌa yajalil dꞌa quibꞌan̈ a on̈ schon̈abꞌ on̈ Jehová tic? xchi ebꞌ vin̈. 4 A ix yabꞌan juntzan̈ chiꞌ vin̈aj Moisés chiꞌ, ix em n̈ojan vin̈ dꞌa sat luum. 5 Ix yalan vin̈ dꞌa vin̈aj Coré yedꞌ dꞌa masanil ebꞌ vin̈ tzacꞌanoch yuj vin̈ chiꞌ icha tic:

—Ato qꞌuicꞌan schꞌox Jehová dꞌayon̈ mach ebꞌ yicoꞌ. An̈ej ebꞌ sicꞌbꞌilel yuj ol yal yoch dꞌa stzꞌey yacꞌan servil dꞌa altar. 6-7 A dꞌa qꞌuin̈ibꞌalil qꞌuicꞌan, tzeyicꞌcot e chaynubꞌ yic incienso, tzeyacꞌanem tzacꞌacꞌ dꞌa yool yedꞌ incienso, tzeyacꞌanoch dꞌa yichan̈ Jehová. A mach sicꞌcanel Jehová chiꞌ, aton jun chiꞌ sicꞌbꞌiltaxonel yuuj. Cꞌocbꞌilxo eyicꞌanchaan̈ e bꞌa a ex ex vetlevitail tic, xchi vin̈. 8 Ix yalanxi vin̈ dꞌa vin̈aj Coré chiꞌ icha tic:

—A ex ex vetlevitail tic, abꞌec tas ol valaꞌ: 9 ¿Tom te jabꞌn̈ej yelcꞌoch jun tic e naani, sicꞌbꞌil ex el yuj co Diosal dꞌa scal ebꞌ quetchon̈abꞌ, ix ex yacꞌanoch dꞌa slacꞌanil yic tze tan̈vej scajnubꞌ yedꞌ eyacꞌan servil ebꞌ eyetchon̈abꞌ? 10 Ix el dꞌa scꞌool Jehová to tzex och dꞌa slacꞌanil, axo ticnaic e gana tzex ochxon̈ej sacerdoteal. 11 Val yel a vin̈aj Aarón malaj yelcꞌoch vin̈, ¿tas yuj tzeyal chucal lolonel dꞌa spatic vin̈ yedꞌ masanil ebꞌ ajun eyedꞌ tic? A dꞌa Jehová chuc tzex loloni ayic tzeyalan chuc dꞌa spatic vin̈aj Aarón chiꞌ, xchi vin̈. 12 Dꞌa elan̈chamel ix schec vin̈aj Moisés chiꞌ bꞌat icꞌjoccot vin̈aj Datán yedꞌ vin̈aj Abiram yuninal vin̈aj Eliab, palta ix yalancot ebꞌ vin̈ chiꞌ icha tic:

—Max on̈ bꞌatlaj. 13 ¿Tom jabꞌn̈ej tas tzon̈ utej? Ix on̈ iqꞌuelta dꞌa Egipto bꞌaj te vachꞌ, man̈ jantacoc tas ay dꞌa sat luum, ix on̈ icꞌancoti yic tzon̈ cham dꞌa tic. A gana to tzacꞌoch a bꞌa yajalil dꞌa tic. 14 A ach tic man̈oc dꞌa junoc lum luum te ay tas dꞌa sat bꞌaj ix on̈ icꞌcoti, malaj jabꞌoc co luum tzacꞌa yic scavej jabꞌoc co uva. ¿Tom te quistal on̈ tzilaꞌ? Actejxo on̈ acꞌan musansatil. Man̈ ol on̈ bꞌatlaj cabꞌ tas tzal chiꞌ, xchi ebꞌ vin̈. 15 Yuj chiꞌ, ix te cot yoval vin̈aj Moisés chiꞌ, ix yalan vin̈ dꞌa Jehová icha tic:

—Man̈ a cha yofrenda ebꞌ vin̈ chiꞌ. A in tic, te malaj tas svutej ebꞌ vin̈, malaj junoc sbꞌuru ebꞌ vin̈ sviqꞌueqꞌui, xchi vin̈ dꞌa Jehová. 16 Ix lajvi chiꞌ ix yalanxi vin̈ dꞌa vin̈aj Coré chiꞌ icha tic:

—A ach tic a qꞌuicꞌan tzach och dꞌa yichan̈ Jehová yedꞌ ebꞌ vin̈ 250 ajun edꞌoc. An̈ejaꞌ pax vin̈aj Aarón, scꞌochpax vin̈ taꞌ. 17 A ach tic yedꞌ vin̈aj Aarón chiꞌ, tzeyicꞌbꞌat e chaynubꞌ yic incienso, tzeyacꞌanem incienso dꞌa yool. An̈ejaꞌ icha chiꞌ syutejpax ebꞌ vin̈ ajun eyedꞌoc tic, tzeyacꞌanoch dꞌa yichan̈ Jehová, xchi vin̈aj Moisés chiꞌ.

18 Axo dꞌa junxo cꞌu chiꞌ, ix yicꞌancot schaynubꞌ ebꞌ vin̈ chiꞌ, ix yacꞌanem tzacꞌacꞌ ebꞌ vin̈ dꞌa yool yedꞌ incienso. Ix smolbꞌanoch sbꞌa ebꞌ vin̈ dꞌa stzꞌey vin̈aj Moisés yedꞌ vin̈aj Aarón dꞌa stiꞌ cajnubꞌ bꞌaj schꞌox sbꞌa Jehová. 19 A vin̈aj Coré chiꞌ toxo ix smolbꞌejoch ebꞌ vin̈ ajun yedꞌoc chiꞌ dꞌa stiꞌ scajnubꞌ Dios, aton ebꞌ vin̈ ayxo och ajcꞌolal dꞌa vin̈aj Moisés yedꞌ dꞌa vin̈aj Aarón chiꞌ. Dꞌa val jun rato chiꞌ ix schꞌoxan stziquiquial Jehová dꞌa yichan̈ ebꞌ chon̈abꞌ chiꞌ smasanil. 20 Ix yalan Jehová dꞌa vin̈aj Moisés yedꞌ dꞌa vin̈aj Aarón chiꞌ icha tic:

21 —Bꞌesequel e bꞌa dꞌa scal juntzan̈ anima tic. Dꞌa jun rato tic ol in satel ebꞌ, xchi. 22 Yuj chiꞌ ix em n̈ojjabꞌ ebꞌ vin̈ dꞌa sat luum, ix yalan ebꞌ vin̈ icha tic:

—Mamin, yajal aj dꞌa sqꞌuinal masanil anima, ¿tom tza satel masanil ebꞌ anima tic yuj smul junoc? xchi ebꞌ vin̈. 23 Ix tacꞌvi Jehová dꞌa vin̈aj Moisés chiꞌ:

24 —A ticnaic al dꞌa masanil ebꞌ molanecꞌ tic to sbꞌesel sbꞌa ebꞌ smasanil dꞌa spatictac smantiado vin̈aj Coré, vin̈aj Datán yedꞌ vin̈aj Abiram, xchi dꞌa vin̈.

25 Ix qꞌue vaan vin̈aj Moisés chiꞌ, ix bꞌat vin̈ bꞌaj ayecꞌ vin̈aj Datán yedꞌ vin̈aj Abiram chiꞌ, ix bꞌat masanil ebꞌ yichamtac vinaquil ebꞌ israel yedꞌ vin̈. 26 Ix yalan vin̈ dꞌa masanil ebꞌ chon̈abꞌ chiꞌ icha tic:

—Bꞌesequel e bꞌa dꞌa smantiado jun macan̈ ebꞌ anima chuc spensar tic. Malaj junoc tas ay dꞌa ebꞌ tzeyamaꞌ, tato maay, ol ex cham yuj syaelal smul ebꞌ, xchi vin̈. 27 Yuj chiꞌ ix sbꞌesel sbꞌa ebꞌ anima smasanil dꞌa spatictac smantiado vin̈aj Coré, vin̈aj Datán yedꞌ vin̈aj Abiram chiꞌ. A vin̈aj Datán yedꞌ vin̈aj Abiram chiꞌ, ix elta lin̈an ebꞌ vin̈ dꞌa stiꞌ smantiado yedꞌ ebꞌ ix yetbꞌeyum yedꞌ ebꞌ yuninal. 28 Ix och ijan vin̈aj Moisés yalan icha tic:

—Icha tic ol aj eyojtaccaneli to a Jehová schecan in cꞌulej masanil juntzan̈ tic, man̈ yoloc vic tzin cꞌulej. 29 Tato ilya tzꞌicꞌan scham ebꞌ tic, ichataxon tzꞌaj scham anima, syalelcꞌochi to man̈oc Jehová tzin acꞌanoch dꞌa jun opisio tic. 30 Palta tato ay junoc tas to mantalaj bꞌaj tzuji ol scꞌulej Jehová, ol spoj sbꞌa lum luum tic, axo ebꞌ anima tic pitzanto ebꞌ ol bꞌatcan ebꞌ dꞌa yol luum yedꞌ masanil tas ay dꞌay. Tato icha chiꞌ ol aj scham ebꞌ, ol eyojtaquejeli to ix spatiquejel Jehová ebꞌ, xchi vin̈. 31 Ayic ix lajvi yalan juntzan̈ chiꞌ vin̈aj Moisés chiꞌ, ix pax levnaj lum luum dꞌa yalan̈ ebꞌ vin̈ chiꞌ. 32 Ix emcan ebꞌ vin̈ dꞌa yol luum yedꞌ yalyuninal smasanil. Icha val chiꞌ ix aj satel masanil ebꞌ junn̈ej ix aj spensar yedꞌ vin̈aj Coré chiꞌ yedꞌ masanil tastac ay dꞌa ebꞌ. 33 Pitzan ebꞌ anima chiꞌ smasanil ix bꞌatcan ebꞌ dꞌa yol luum chiꞌ yedꞌ masanil tastac ay dꞌa ebꞌ. Ix lajvi chiꞌ, ix snubꞌanxi sbꞌa luum. Icha chiꞌ ix aj satcanel jun macan̈ anima chiꞌ dꞌa scal ebꞌ yetisraelal. 34 Ayic ix yabꞌan ebꞌ anima oyanecꞌ dꞌa spatictac chiꞌ, ix el yav ebꞌ, ix bꞌat ebꞌ elelal, ix yalan ebꞌ: Mocabꞌ bꞌatpax levnaj lum dꞌa calan̈ a on̈ tic, xchi ebꞌ. 35 An̈ejaꞌ ix yacꞌpaxcot cꞌacꞌ Jehová yic ix tzꞌapaxbꞌat ebꞌ 250 ix n̈usan incienso, aton ebꞌ ix yacꞌoch sbꞌa yedꞌ vin̈aj Coré, vin̈aj Datán yedꞌ vin̈aj Abiram chiꞌ. 36 Ix yalanxi Jehová dꞌa vin̈aj Moisés chiꞌ icha tic:

37 Al dꞌa vin̈aj Eleazar yuninal vin̈aj Aarón to syiqꞌuelta juntzan̈ schaynubꞌ yic incienso ebꞌ vin̈ ix tzꞌabꞌat chiꞌ vin̈, aton juntzan̈ nabꞌa bronce. Slajvi chiꞌ najat sbꞌat vin̈ stobꞌcanel tzacꞌacꞌ ayem dꞌa yool. 38 A schaynubꞌ yic incienso juntzan̈ anima ix cham yuj smul tic, vicxo ix ajcani, yujto ix cꞌanchaji a ix yacꞌan incienso ebꞌ dꞌayin. Yuj chiꞌ, a juntzan̈ yamcꞌabꞌ chiꞌ tze bꞌooch dꞌa laminail yic tzꞌoch smusiloc altar, yic vachꞌ ayic syilanoch ebꞌ israel, snaancot ebꞌ tas ix aj scham ebꞌ yuj schucal, xchi Jehová.

39 Ix smolbꞌancot masanil chaynubꞌ yic incienso nabꞌa bronce vin̈aj sacerdote Eleazar chiꞌ, aton juntzan̈ ix scꞌan ebꞌ ix tzꞌabꞌat yuj cꞌacꞌ chiꞌ, ix yalan vin̈ to tzꞌacꞌji ulaxoc, sbꞌoji dꞌa laminail yic tzꞌoch smusiloc altar. 40 A jun tic ix cani yic snaancot ebꞌ israel yedꞌ yojtacanel ebꞌ to an̈ej ebꞌ yin̈tilalcan vin̈aj Aarón syal yoch dꞌa yichan̈ altar yic sn̈usan incienso ebꞌ dꞌa yichan̈ Jehová. Tato ay junocxo comonn̈ej scꞌulej icha chiꞌ, scham icha ix aj scham vin̈aj Coré yedꞌ ebꞌ ajun yedꞌoc. Icha val ix yutej Jehová yalan dꞌa vin̈aj Moisés, icha chiꞌ ix scꞌulej vin̈aj Eleazar chiꞌ. 41 Axo dꞌa junxo cꞌu, masanil ebꞌ israel ix och ijan yavaj chaan̈ dꞌa vin̈aj Moisés yedꞌ dꞌa vin̈aj Aarón, ix yalan ebꞌ icha tic:

—A ex tic, ix e milcham ebꞌ schon̈abꞌ Jehová, xchi ebꞌ.

42 Ayic van smolbꞌan sbꞌa ebꞌ chon̈abꞌ smasanil dꞌa spatic vin̈aj Moisés yedꞌ vin̈aj Aarón chiꞌ, ix bꞌat qꞌuelan ebꞌ dꞌa scajnubꞌ Dios. Dꞌa val jun rato chiꞌ ix och moynaj asun dꞌa scajnubꞌ chiꞌ, ix schꞌoxan stziquiquial Jehová. 43 Yuj chiꞌ, ix snitzanbꞌat sbꞌa vin̈aj Moisés yedꞌ vin̈aj Aarón dꞌa yichan̈ cajnubꞌ chiꞌ. 44 Ix yalan Jehová dꞌa vin̈aj Moisés chiꞌ:

45 —Elan̈ec dꞌa stzꞌey juntzan̈ anima tic, yujto a dꞌa jun rato tic ol in satel ebꞌ dꞌa juneln̈ej, xchi. Ixn̈ej val yabꞌ ebꞌ vin̈ icha chiꞌ, ix em n̈ojjabꞌ ebꞌ vin̈ dꞌa sat luum. 46 Ix yalan vin̈aj Moisés dꞌa vin̈aj Aarón chiꞌ icha tic:

—Icꞌcot a chaynubꞌ yic incienso, tzacꞌan bꞌudꞌjoc yedꞌ tzacꞌacꞌ ayecꞌ dꞌa yibꞌan̈ altar. Tzacꞌanpaxem incienso dꞌa yool, tzach bꞌat dꞌa scal ebꞌ anima dꞌa elan̈chamel. Tza cꞌanan nivancꞌolal yuj smul ebꞌ, yujto toxo ix cot yoval Jehová. Toxo ix ja ilya yic scham anima smasanil, xchi vin̈. 47 Ix scꞌanabꞌajan vin̈aj Aarón chiꞌ, elan̈chamel ix bꞌat lemnaj vin̈ dꞌa scal ebꞌ anima bꞌaj ayecꞌ molan chiꞌ. A yuj jun ilya ix yacꞌcot Jehová chiꞌ toxo ix yamchajoch scham anima. Dꞌa val jun rato chiꞌ, ix yacꞌanem incienso vin̈ yic tzꞌacꞌji nivancꞌolal ebꞌ anima chiꞌ yuj Jehová. 48 Ix och vin̈ dꞌa scal ebꞌ anima toxo ix chami yedꞌ ebꞌ pitzanto. Ichato chiꞌ ix och vaan jun ilya chiꞌ. 49 A dꞌa jun rato chiꞌ, 14 mil 700 ebꞌ anima ix chami. Chꞌoc pax yaj juntzan̈ ebꞌ toxo ix cham yedꞌ vin̈aj Coré yuj schucal. 50 Ato yic ix och vaan scham anima chiꞌ, ix meltzaj vin̈aj Aarón bꞌaj ayecꞌ vin̈aj Moisés chiꞌ.