2 Al dꞌa ebꞌ vin̈ yajalil chon̈abꞌ dꞌa junjun in̈tilal to syicꞌcot junjunoc scꞌococh ebꞌ vin̈, syalelcꞌochi to lajchaveꞌ teꞌ scot dꞌa smasanil, tzꞌoch sbꞌi junjun ebꞌ vin̈ dꞌa teꞌ scꞌococh chiꞌ. 3 A teꞌ yic yin̈tilal Leví, a sbꞌi vin̈aj Aarón tzꞌoch dꞌa teꞌ, yujto junjun scꞌococh ebꞌ vin̈ yajalil junjun in̈tilal ol cotoc. 4 Tzacꞌcanoch teꞌ dꞌa yichan̈ scaxail trato ay dꞌa yol in cajnubꞌ bꞌaj tzin chꞌox in bꞌa. 5 Ataꞌ ol vacꞌ volan scꞌococh mach syal in cꞌool to ol in sicꞌcaneli, yuj chiꞌ ol och vaan ebꞌ anima tic yalan e pecal, xchi Jehová chiꞌ.

6 Ix lajvi chiꞌ ix yalan vin̈aj Moisés dꞌa ebꞌ vin̈ yajalil chon̈abꞌ dꞌa junjun in̈tilal. Ix yacꞌan scꞌococh junjun ebꞌ vin̈ dꞌa vin̈, lajchaveꞌ teꞌ dꞌa smasanil. Aypaxoch teꞌ yic vin̈aj Aarón chiꞌ dꞌa scal teꞌ. 7 Ix yacꞌanoch teꞌ cꞌococh chiꞌ vin̈aj Moisés chiꞌ dꞌa yichan̈ Jehová dꞌa yol cajnubꞌ yic trato. 8 Axo dꞌa junxo qꞌuin̈ibꞌalil ix cꞌoch vin̈ taꞌ, ix yilanoch teꞌ scꞌococh vin̈aj Aarón chiꞌ vin̈ dꞌa yic yin̈tilal Leví, toxo ix elta svol teꞌ, ayxo xumaquil yedꞌ pax sat, qꞌuin̈xo teꞌ almendro chiꞌ. 9 Ix lajvi chiꞌ, ix yicꞌanelta teꞌ cꞌococh chiꞌ vin̈ dꞌa yichan̈ Jehová, ix schꞌoxan teꞌ vin̈ dꞌa masanil ebꞌ yetisraelal. Axo ix lajvi yilan teꞌ ebꞌ, ix yacꞌanxi junjun teꞌ yic ebꞌ vin̈ chiꞌ vin̈.

10 Ix lajvi chiꞌ, ix yalan Jehová dꞌa vin̈ icha tic: Acꞌcanoch teꞌ scꞌococh vin̈aj Aarón dꞌa yichan̈ scaxail trato. Sicꞌcanbꞌat teꞌ taꞌ yic snacot juntzan̈ anima te pit tic. Yuj chiꞌ ol yactej ebꞌ yalan chucal lolonel dꞌayin yic max cham ebꞌ, xchi dꞌa vin̈.

11 Ix scꞌanabꞌajej vin̈aj Moisés scꞌulan masanil tas ix yal Jehová chiꞌ. 12 Axo ix yalan ebꞌ chon̈abꞌ chiꞌ dꞌa vin̈ icha tic: Juneln̈ej chamnac on̈xo el co masanil. 13 Tato jichan scham masanil ebꞌ snitzcot sbꞌa dꞌa scajnubꞌ Jehová, ol on̈ cham co masanil syal chiꞌ, xchi ebꞌ.