Tato tzꞌoch junoc palta dꞌa in cajnubꞌ, a yaelal sja yuj jun chiꞌ, a dꞌa ibꞌan̈ yedꞌ ebꞌ uninal yedꞌ dꞌa yibꞌan̈ ebꞌ etlevitail sjavi. Palta a junoc paltail dꞌa eyopisio dꞌa sacerdoteal, an̈ej dꞌa ibꞌan̈ yedꞌ ebꞌ uninal sjavi yaelal yuj jun chiꞌ. 2 Tzicꞌcot ebꞌ etlevitail yic scolvaj ebꞌ edꞌoc ayic ayachoch yedꞌ ebꞌ uninal dꞌa eyopisio dꞌa yol in cajnubꞌ yic trato. 3 Aton ebꞌ smunlaj edꞌoc dꞌa in cajnubꞌ chiꞌ, palta chequeln̈ej yaj yopisio ebꞌ. Max yal-laj sjavi ebꞌ dꞌa slacꞌanil altar, max yalpaxlaj syaman syamcꞌabꞌil in cajnubꞌ chiꞌ ebꞌ yic vachꞌ max cham ebꞌ yedꞌ ex pax tic. 4 Ajun ebꞌ smunlaj eyedꞌoc, palta a ex tzeyalaꞌ tas scꞌulej ebꞌ ayic sbꞌoan masanil smunlajel ebꞌ dꞌa in cajnubꞌ bꞌaj tzin chꞌox in bꞌa. Malaj junocxo comon anima syal sja dꞌa e lacꞌanil. 5 A exn̈ej tic ayoch dꞌa eyibꞌan̈ e bꞌoan masanil munlajel dꞌa in cajnubꞌ yedꞌ dꞌa altar yic man̈xo ol cot voval dꞌa masanil ebꞌ etchon̈abꞌ. 6 A in ix vicꞌcanel ebꞌ etlevitail dꞌa scal masanil ebꞌ etisraelal. Ix vacꞌan ebꞌ dꞌayex yic smunlaj ebꞌ eyedꞌoc dꞌa in cajnubꞌ. 7 Palta a achn̈ej yedꞌ ebꞌ uninal tzil munlajel bꞌaj ay altar yedꞌ dꞌa spaticoch cꞌapac cortina. A juntzan̈ opisio chiꞌ ix valaꞌ to a exn̈ej tic tzeyilaꞌ, yujto a in ix vacꞌ eyopisio. Tato ay junoc mach man̈ ayococh sacerdoteal dꞌa yibꞌan̈ snitzanoch sbꞌa dꞌa slacꞌanil juntzan̈ yamcꞌabꞌ chiꞌ, a jun chiꞌ tojoln̈ej schami, xchi Jehová.

8 Ix yalanpax Jehová dꞌa vin̈aj Aarón chiꞌ icha tic:

A in svacꞌ opisio a chaan masanil juntzan̈ ofrenda tzꞌacꞌji dꞌayin yuj ebꞌ etisraelal tic. Masanil tas syicꞌcot ebꞌ chiꞌ dꞌayin, ic tzꞌajcan yedꞌ ebꞌ uninal. A jun tic ley tzꞌajcan dꞌa e cal dꞌa masanil tiempo. 9 Masanil ofrenda tzꞌacꞌji dꞌayin, a in svacꞌ dꞌayach yedꞌ dꞌa ebꞌ uninal, aton juntzan̈ max tzꞌalaj: Ofrenda yic ixim trigo, silabꞌ yuj yacꞌji tup mul yedꞌ silabꞌ yuj stupchaj mul. 10 Masanil ebꞌ vinac dꞌa e cal tic, syal schiꞌan juntzan̈ silabꞌ chiꞌ ebꞌ, an̈ej dꞌa junoc lugar vic yaji, ataꞌ schi ebꞌ. Yovalil tze naꞌa to vic yaj juntzan̈ silabꞌ chiꞌ.

11 Svacꞌpax dꞌayach yedꞌ dꞌa ix etbꞌeyum yedꞌ dꞌa ebꞌ uninal juntzan̈ ofrenda syicꞌcot ebꞌ etisraelal dꞌayin, aton juntzan̈ sbꞌachchajoch dꞌa vichan̈. A jun ley tic scan dꞌa masanil tiempo, yaln̈ej mach ebꞌ ayecꞌ cajan eyedꞌoc to vachꞌ yaj icha yalan ley, syaln̈ej schiꞌan ebꞌ. 12 A sbꞌabꞌel sat tastac tzꞌavchaji aton syicꞌcot ebꞌ etisraelal dꞌayin dꞌa junjun abꞌil, svacꞌcanpax dꞌayach: Aton aceite te vachꞌ, vino te vachꞌ yedꞌ ixim trigo te vachꞌ, 13 yedꞌ pax sbꞌabꞌel sat masanil teꞌ avbꞌen teꞌ syicꞌcot ebꞌ dꞌayin. A juntzan̈ chiꞌ ic yaj yedꞌ masanil ebꞌ ayecꞌ cajan edꞌoc. Tato vachꞌ yaj ebꞌ icha yalan ley, syal svaan ebꞌ. 14 Masanil ofrenda syacꞌ ebꞌ etisraelal dꞌayin, icn̈ej yaji.

15 Masanil ebꞌ sbꞌabꞌel vinac unin ebꞌ etisraelal yedꞌ pax sbꞌabꞌel yuneꞌ nocꞌ smolbꞌetzal nocꞌ ebꞌ syacꞌ dꞌayin, icn̈ejpax yaji. Palta a yuj ebꞌ bꞌabꞌel vinac unin chiꞌ yedꞌ sbꞌabꞌel yuneꞌ nocꞌ nocꞌ max ochtaxon silabꞌil, yovalil tzꞌacꞌji qꞌuen tumin sqꞌuexuloc. 16 Ayic junxo ujal yalji, tzꞌacꞌji qꞌuen tumin chiꞌ sqꞌuexuloc. A yuj ebꞌ unin chiꞌ, oyeꞌ siclo qꞌuen plata tzꞌacꞌji, icha qꞌuen scꞌanchaj dꞌa in cajnubꞌ, 20 geras yalil. 17 Palta man̈ a cha acꞌjoc tumin sqꞌuexuloc sbꞌabꞌel yuneꞌ nocꞌ vacax, nocꞌ calnel yedꞌ nocꞌ chiva, yujto a juntzan̈ nocꞌ chiꞌ, vic yaj nocꞌ. Yovalil tze milcham nocꞌ, tze tzicanoch schiqꞌuil nocꞌ dꞌa altar, axo xepual nocꞌ tze n̈ustzꞌaoc yic tzꞌoch dꞌa ofrendail to sucꞌuqꞌui sjabꞌ svabꞌi. 18 Ic tzꞌajcan masanil schibꞌejal nocꞌ chiꞌ, icha ix aj vacꞌan schibꞌejal juntzan̈xo nocꞌ silabꞌ dꞌayach, aton nocꞌ sn̈iꞌ scꞌool sbꞌachchajqꞌue dꞌa yichan̈ altar yedꞌ sbꞌacꞌchil xubꞌ nocꞌ dꞌa svachꞌ. 19 Masanil yofrenda ebꞌ etisraelal syiqꞌueli to vic yaji, svacꞌ dꞌayach yedꞌ dꞌa ix etbꞌeyum yedꞌ dꞌa ebꞌ uninal. A jun tic, ley tzꞌajcan dꞌa masanil tiempo, a in tzin bꞌocan eyedꞌoc yedꞌ masanil eyin̈tilal, xchi dꞌa vin̈.

20 Ix yalanxi Jehová dꞌa vin̈aj Aarón chiꞌ:

A ach tic malaj lum luum ol a macbꞌenej dꞌa scal ebꞌ etisraelal tic, yujto a in tic icha a macbꞌen vaji. 21 A ebꞌ levita, a masanil sdiezmoal sat yavbꞌen ebꞌ eyetisraelal, a ix vacꞌ smacbꞌenej ebꞌ. Aton ayoch stojoloc masanil smunlajel ebꞌ dꞌa cajnubꞌ bꞌaj tzin chꞌox in bꞌa. 22 Axo masanil juntzan̈xo ebꞌ etisraelal, max yal comonn̈ej sjavi ebꞌ dꞌa slacꞌanil cajnubꞌ chiꞌ. Tato icha chiꞌ scꞌulej ebꞌ, tzꞌochcan chamel dꞌa yibꞌan̈ ebꞌ yuj smul chiꞌ. 23 Yuj chiꞌ an̈ej ebꞌ levita ay yalan yic yilan masanil tas yic in cajnubꞌ chiꞌ. Tato tzꞌoch junoc spaltail ebꞌ dꞌa smunlajel chiꞌ, an̈ej dꞌa yibꞌan̈ ebꞌ scotcan yaelal. A jun tic ley tzꞌajcan dꞌa masanil tiempo. A ebꞌ levita malaj slum ebꞌ ol scha dꞌa scal ebꞌ eyetisraelal. 24 Yic ebꞌ yaj masanil sdiezmoal tas syavej ebꞌ eyetisraelal syacꞌ dꞌayin a in Jehová in tic. Yuj chiꞌ ix valaꞌ to malaj slum ebꞌ ol schaꞌa, xchi dꞌa vin̈.

25 Ix yalanxi Jehová dꞌa vin̈aj Moisés icha tic:

26 Al dꞌa masanil ebꞌ levita to a in Jehová in sval icha tic: Ayic ol e chaan masanil sdiezmo ebꞌ eyetisraelal, yovalil tzeyicꞌpaxcanel sdiezmoal yic tzeyacꞌan dꞌayin, yujto a juntzan̈ chiꞌ ayoch e macbꞌenoc. 27 A jun diezmo tzeyacꞌ chiꞌ, icha sdiezmoal sat smunlajel ebꞌ eyetisraelal syacꞌaꞌ. 28 A dꞌa diezmo tze cha dꞌa ebꞌ eyetisraelal chiꞌ, ataꞌ tzeyicꞌpaxel eyofrenda tzeyacꞌ dꞌayin. A dꞌa vin̈aj sacerdote Aarón tzeyacꞌaꞌ. 29 Yuj chiꞌ masanil tastac tzꞌacꞌji dꞌayex, yovalil tzeyicꞌcanel junoc macan̈ dꞌay, tzeyacꞌan dꞌayin. A jun macan̈ tzeyacꞌ dꞌayin chiꞌ, yovalil aton val svachꞌil.

30 Ayic toxo ix eyicꞌcanel svachꞌil to vic yaj chiꞌ, axo jantacto scani, eyicxo tzꞌajcani ichato a ex ay e munlajel. 31 Syalxo e vaan yedꞌ eyal eyuninal yalxon̈ej bꞌaj cajan ex. E tojol yaj yuj bꞌaj tzex munlaj dꞌa in cajnubꞌ bꞌaj tzin chꞌox in bꞌa. 32 Ayic toxo ix eyicꞌcanel jun macan̈ te vachꞌ chiꞌ dꞌayin, tzaxo yal e vaan jantacto scan chiꞌ, malaj e mul tzꞌoch yuj e vaani. A dꞌa icha chiꞌ, max eyixtejbꞌatlaj yofrenda ebꞌ eyetisraelal to vic yaji. Yuj chiꞌ maxtzac javilaj chamel dꞌa eyibꞌan̈, xchi Jehová, xa chi dꞌa ebꞌ.