2 A in Jehová in svacꞌ jun checnabꞌil tic. Alec dꞌa ebꞌ eyetchon̈abꞌ to syicꞌcot junoc nocꞌ cobꞌes chacchac vacax ebꞌ malaj jabꞌoc spaltail, manto juneloc smunlaji. 3 A ex tic tzeyacꞌ nocꞌ dꞌa vin̈aj sacerdote Eleazar. Tzꞌicꞌjiel nocꞌ dꞌa spatiquel campamento, axo vin̈aj Eleazar chiꞌ schecan miljoccham nocꞌ dꞌa yichan̈. 4 Syicꞌanqꞌue schiqꞌuil nocꞌ vin̈ yedꞌ yiximal scꞌabꞌ, stzicanbꞌat uqueloc vin̈ dꞌa stojolal in cajnubꞌ bꞌaj tzin chꞌox in bꞌa. 5 Slajvi chiꞌ, sn̈usjitzꞌa nocꞌ vacax chiꞌ smasanil dꞌa yichan̈ vin̈, stzꞌumal nocꞌ, sbꞌacꞌchil nocꞌ, schiqꞌuil nocꞌ yedꞌ yol scꞌool nocꞌ. 6 Yacbꞌan van stzꞌa nocꞌ chiꞌ syicꞌanpaxqꞌue teꞌ cꞌuteꞌ vin̈ sacerdote chiꞌ yedꞌ junoc scꞌabꞌ teꞌ hisopo yedꞌ nocꞌ chacchac lana, syacꞌanoch vin̈ smasanil dꞌa yol cꞌacꞌ bꞌaj van stzꞌa nocꞌ chiꞌ. 7 Slajvi chi, sjucꞌanel spichul vin̈, sbꞌicanpaxel sbꞌa vin̈, tzꞌochxi vin̈ dꞌa yol campamento chiꞌ, vachꞌchom manto vachꞌoc yaj vin̈ icha yalan ley masanto dꞌa yemcꞌualil. 8 Axo vin̈ ix n̈usantzꞌa nocꞌ vacax chiꞌ, sjucꞌpaxel spichul vin̈, sbꞌicanpaxel sbꞌa vin̈, palta manto vachꞌoc yaj vin̈ icha yalan ley masanto dꞌa yemcꞌualil. 9 Axo junocxo vin̈ vinac vachꞌ yaj icha yalan ley, aꞌ vin̈ smolanqꞌue staan̈il nocꞌ vacax chiꞌ, sicꞌanbꞌat vin̈ dꞌa junoc lugar to vachꞌ yaj dꞌa spatiquel campamento. A juntzan̈ taan̈ chiꞌ scꞌan ebꞌ eyetisraelal ayic sbꞌoan a aꞌ ebꞌ scꞌanchaji yic sacbꞌitaj ebꞌ icha yalan ley. Masanil juntzan̈ tic scꞌulaji yic syicꞌanel mul. 10 A mach ix molanqꞌue juntzan̈ taan̈ chiꞌ, yovalil sjuqꞌuel spichul, sbꞌicanpaxel sbꞌa, palta manto vachꞌoc yaj icha yalan ley masanto dꞌa yemcꞌualil. A jun ley tic scann̈ej dꞌa juneln̈ej, tzꞌoch yopisio eyuuj a ex israel ex tic yedꞌ yuj ebꞌ chꞌoc chon̈abꞌil ayecꞌ dꞌa e cal. 11 A mach syaman snivanil junoc chamnac, man̈ vachꞌoc yaj dꞌa uqueꞌ cꞌual icha yalan ley. 12 A dꞌa schabꞌjial syaman junoc chamnac chiꞌ yedꞌ dꞌa svacꞌjial, yovalil sacbꞌitej sbꞌa yedꞌ a aꞌ scꞌanchaji yic sacbꞌi icha yalan ley, ichato chiꞌ vachꞌ tzꞌajcani. Tato max sacbꞌitej sbꞌa dꞌa schabꞌjial yedꞌ dꞌa svacꞌjial, manto vachꞌoc syal chiꞌ. 13 Yuj chiꞌ a junoc mach syaman junoc chamnac, tato max sacbꞌitej sbꞌa, a jun chiꞌ syixtejel in cajnubꞌ. Yuj chiꞌ yovalil man̈xa yalan yic dꞌa e cal dꞌa juneln̈ej, yujto maj tzicjioch a aꞌ chiꞌ dꞌay, yuj chiꞌ man̈ vachꞌoc yaj icha yalan ley.

14 Aton juntzan̈ sleyal tic dꞌa junoc mach scham bꞌaj ay scajnubꞌ: Yaln̈ej mach tzꞌoch taꞌ, ma junoc ayecꞌ taꞌ, man̈ vachꞌoc tzꞌajcan dꞌa uqueꞌ cꞌual. 15 Masanil chen to man̈ vachꞌoc yaj smacji, man̈xo vachꞌoc tzꞌajcani. 16 Axo mach syaman junoc chamnac dꞌa stiel chon̈abꞌ, taxon̈ej macꞌbꞌilchamoc, ma ton̈ej scham ichataxon tzꞌaj scham anima, mato syam sbꞌaquil junoc chamnac, ma junoc bꞌaj smucchaj ebꞌ chamnac, a jun chiꞌ man̈ vachꞌoc yaj dꞌa uqueꞌ cꞌual. 17 A yuj masanil juntzan̈ chiꞌ tzꞌicꞌchajqꞌue jabꞌoc staan̈il nocꞌ vacax tzꞌanac yuj yicꞌanel mul, tzꞌacꞌchajem dꞌa yol junoc yedꞌtal, tzꞌacꞌjiem a aꞌ dꞌa yibꞌan̈, aton aꞌ sqꞌueul sjaj. 18 Axo junoc vin̈ vinac vachꞌ yaj icha yalan ley, a vin̈ tzꞌicꞌanqꞌue junoc scꞌabꞌ teꞌ hisopo, slabꞌanem vin̈ dꞌa scal a aꞌ chiꞌ, stzicanoch vin̈ dꞌa yibꞌan̈ jun cajnubꞌ chiꞌ yedꞌ masanil tas ay dꞌa yool yedꞌ dꞌa yibꞌan̈ ebꞌ anima ayecꞌ taꞌ, an̈ejtonaꞌ stzicanpaxbꞌat vin̈ dꞌa yibꞌan̈ mach ix yaman sbꞌaquil chamnac, ma junoc bꞌaj smucchaj ebꞌ chamnac chiꞌ, ma snivanil junoc anima macꞌbꞌilchamoc, ma junoc ton̈ej ix cham ichataxon tzꞌaj scham anima. 19 A jun anima vachꞌ yaj chiꞌ, aꞌ stzicanbꞌat a aꞌ chiꞌ dꞌa yibꞌan̈ ebꞌ man̈ vachꞌoc yaj chiꞌ dꞌa schabꞌjial yedꞌ dꞌa svacꞌjial. Slajvi chiꞌ, a dꞌa svacꞌjial chiꞌ, sjucꞌanel spichul ebꞌ, sbꞌicanpaxel sbꞌa ebꞌ yic sacbꞌican ebꞌ. Icha chiꞌ vachꞌxo tzꞌajcan ebꞌ dꞌa yemcꞌualil. 20 Tato ay junoc anima max sacbꞌitej sbꞌa icha yalan ley, man̈xaocabꞌ yalan yic dꞌa e cal dꞌa juneln̈ej yujto syixtejbꞌat in cajnubꞌ. Yujto maj tzicjioch a aꞌ dꞌay yic sacbꞌi, yuj chiꞌ man̈ vachꞌocn̈ej yaji. 21 A jun ley tic scann̈ej dꞌa juneln̈ej: A mach stzicanoch a aꞌ chiꞌ dꞌa junocxo, yovalil sjuqꞌuel spichul. A mach syaman a aꞌ tzꞌacꞌan sacbꞌoc junoc mach chiꞌ, vachꞌxo tzꞌajcan dꞌa yemcꞌualil. 22 Masanil mach syamji yuj junoc anima man̈ vachꞌoc yaji, ma junoc syaman junoc anima man̈ vachꞌoc yaji, a jun chiꞌ man̈ vachꞌoc tzꞌajcan icha yalan ley masanto dꞌa yemcꞌualil, xchi Jehová.