2 Acꞌbꞌat jayvan̈oc ebꞌ vin̈ vinac, yic sbꞌat ebꞌ vin̈ yil lum Canaán, lum ol vacꞌ dꞌayex. Tza siqꞌuel junjunoc ebꞌ vin̈ yajal yaj dꞌa junjun in̈tilal, tza checanbꞌat ebꞌ vin̈, xchi dꞌa vin̈.

3 Ix scꞌanabꞌajej vin̈aj Moisés checnabꞌil ix yal Jehová chiꞌ. Ix schecbꞌat ebꞌ vin̈ ix siqꞌuel vin̈ chiꞌ, ix el ebꞌ vin̈ dꞌa tzꞌinan lum dꞌa yol yic Parán, ix bꞌat ebꞌ vin̈ yilaꞌ tas yilji lum Canaán chiꞌ. Yajal yaj ebꞌ vin̈ smasanil dꞌa scal ebꞌ yetisraelal. 4 Icha tic sbꞌi ebꞌ vin̈ yedꞌ tastac yin̈tilal: 5-15 A vin̈aj Samúa yuninal vin̈aj Zacur, dꞌa yin̈tilal Rubén. A vin̈aj Safat yuninal vin̈aj Horí, dꞌa yin̈tilal Simeón. A vin̈aj Caleb yuninal vin̈aj Jefone, dꞌa yin̈tilal Judá. A vin̈aj Igal yuninal vin̈aj José, dꞌa yin̈tilal Isacar. A vin̈aj Oseas yuninal vin̈aj Nun, dꞌa yin̈tilal Efraín. A vin̈aj Palti yuninal vin̈aj Rafú, dꞌa yin̈tilal Benjamín. A vin̈aj Gadiel yuninal vin̈aj Sodi, dꞌa yin̈tilal Zabulón. A vin̈aj Gadi yuninal vin̈aj Susi, dꞌa yin̈tilal José, syalelcꞌochi dꞌa yin̈tilal Manasés. A vin̈aj Amiel yuninal vin̈aj Gemali, dꞌa yin̈tilal Dan. A vin̈aj Setur yuninal vin̈aj Micael, dꞌa yin̈tilal Aser. A vin̈aj Nahbi yuninal vin̈aj Vapsi, dꞌa yin̈tilal Neftalí. A vin̈aj Geuel yuninal vin̈aj Maqui, dꞌa yin̈tilal Gad.

16 Aton sbꞌi ebꞌ vin̈ ix schecbꞌat vin̈aj Moisés yil lum Canaán. (Ix qꞌuexvi sbꞌi vin̈aj Oseas yuninal vin̈aj Nun yuj vin̈aj Moisés chiꞌ, Josué ix sbꞌiejcan vin̈ yuj vin̈.)

17 Ayic ix yacꞌanbꞌat ebꞌ vin̈ ilum luum vin̈aj Moisés chiꞌ dꞌa Canaán, ix yal vin̈ dꞌa ebꞌ vin̈ icha tic:

—Ixiquec, a dꞌa Neguev tzex bꞌati, tzex qꞌuecꞌoch dꞌa tzalquixtac, 18 tzeyilani tas yilji luum. Tzeyilanpaxi tas yilji anima cajan taꞌ, tecꞌan am ebꞌ mato maay. Scham eyilanpaxi, tzijtum am ebꞌ mato jayvan̈n̈ej ebꞌ. 19 Tzeyilani, yoltac am mantiado cajan ebꞌ anima chiꞌ mato oyanoch muro dꞌa spatic schon̈abꞌ ebꞌ. Tato vachꞌ luum mato maay, 20 tato yax sat luum mato taquin̈. Tzeyilani tato ay steꞌal luum. Tzeyacꞌ eyip eyicꞌancot sat tas avabꞌil dꞌa sat luum chiꞌ, tzeyicꞌcot jabꞌoc quilaꞌ, xchi vin̈ dꞌa ebꞌ vin̈.

A dꞌa stiempoal sbꞌabꞌel sat teꞌ uva, ataꞌ ix xidꞌecꞌ ebꞌ vin̈ chiꞌ. 21 Ix el ebꞌ vin̈ dꞌa lum tzꞌinan lum yic Zin masanto ix cꞌoch ebꞌ vin̈ dꞌa Rehob dꞌa slacꞌanil Hamat. 22 Ix qꞌuecꞌoch ebꞌ vin̈ dꞌa Neguev masanto ix cꞌoch ebꞌ vin̈ dꞌa Hebrón. Ataꞌ ay schon̈abꞌ vin̈aj Ahimán, vin̈aj Sesai yedꞌ vin̈aj Talmai, yin̈tilalcan vin̈aj Anac. A chon̈abꞌ Hebrón chiꞌ, uquexo abꞌil sbꞌoi ayic sbꞌonac chon̈abꞌ Zoán dꞌa Egipto. 23 Ayic ix cꞌoch ebꞌ vin̈ dꞌa jun chꞌolan scuch Escol, ataꞌ ix xiquel jun cꞌojlabꞌ sat teꞌ uva ebꞌ vin̈, ix stzecꞌanoch ebꞌ vin̈ dꞌa jun te teꞌ. Chavan̈ ebꞌ vin̈ ix icꞌancoti, ix yacꞌanqꞌue ebꞌ vin̈ dꞌa sjolom sjen̈jabꞌ. Ix yicꞌanpaxcot sat teꞌ granado ebꞌ vin̈ yedꞌ sat teꞌ higo. 24 Escol^* ix scuchcan jun chꞌolan chiꞌ, yujto ataꞌ ix xiquel jun cꞌojlabꞌ sat teꞌ uva chiꞌ ebꞌ vin̈ ilum luum chiꞌ. 25 Ix lajvi yilan lum luum chiꞌ ebꞌ vin̈ dꞌa 40 cꞌual, ix meltzaj ebꞌ vin̈ 26 dꞌa Cades, dꞌa tzꞌinan lum dꞌa yol yic Parán. Ataꞌ ayecꞌ vin̈aj Moisés yedꞌ vin̈aj Aarón yedꞌ masanil ebꞌ yetisraelal ebꞌ vin̈. Ix lajvi chiꞌ, ix och ijan ebꞌ vin̈ yalani chajtil yilji lum luum chiꞌ, ix schꞌoxan sat teꞌ avbꞌen teꞌ ix yicꞌcot ebꞌ vin̈ chiꞌ dꞌa luum. 27 Ix yalan ebꞌ vin̈ dꞌa vin̈aj Moisés chiꞌ icha tic:

—Toxo ix bꞌat quil lum luum ix alaꞌ, val yel te vachꞌ luum, te yax sat luum, ina sat tastac tzꞌel dꞌa sat lum tic. 28 Palta a ebꞌ anima cajan taꞌ te tecꞌan ebꞌ, yelxo val nivac chon̈abꞌ yilji schon̈abꞌ ebꞌ. Ayoch smuroal spatictac schon̈abꞌ ebꞌ chiꞌ. An̈ejtonaꞌ ix quilpax ebꞌ vin̈ vinac te chaan̈ steel, aton ebꞌ yin̈tilalcan vin̈aj Anac. 29 A ebꞌ amalecita cajan dꞌa sat lum Neguev, axo dꞌa siquil lum yedꞌ dꞌa tzalquixtac, ataꞌ cajan ebꞌ hitita yedꞌ ebꞌ jebuseo yedꞌ pax ebꞌ amorreo. Axo pax dꞌa stitac a aꞌ mar yedꞌ dꞌa stitac aꞌ Jordán, a ebꞌ cananeo cajan dꞌay, xchi ebꞌ vin̈.

30 Ix yalan vin̈aj Caleb dꞌa masanil ebꞌ israel lin̈anoch dꞌa yichan̈ vin̈aj Moisés chiꞌ to numan tzꞌaj ebꞌ, ix yalan vin̈ icha tic:

—A ticnaic coyec, quicxo yaj luum. Ol eln̈ej ebꞌ vin̈ chiꞌ cuuj, xchi vin̈.

31 Ix tacꞌvi juntzan̈ ebꞌ vin̈ ix xidꞌecꞌ chiꞌ icha tic:

—Man̈ ol yal-laj cacꞌan oval yedꞌ ebꞌ chon̈abꞌ chiꞌ yujto te tecꞌan ebꞌ dꞌa quichan̈, xchi ebꞌ vin̈.

32 Ix yalan ebꞌ vin̈ dꞌa scal ebꞌ chon̈abꞌ israel chiꞌ to a jun lum luum ix bꞌat yil ebꞌ vin̈ chiꞌ chuclaj luum. Ix yalanpax ebꞌ vin̈:

—A lum xidꞌ quil chiꞌ, scham anima yuj luum. Masanil ebꞌ anima ix quil taꞌ, te nivac vinacn̈ej ebꞌ. 33 Ix quilanpax ebꞌ te chaan̈ steel, ebꞌ yin̈tilalcan vin̈aj Anac. A tzon̈ och lin̈an dꞌa stzꞌey ebꞌ, lajan tzon̈ ajcan ichoc nocꞌ chil dꞌa scal yoc ebꞌ. An̈ejaꞌ icha chiꞌ tzon̈ yutej yilanpaxoch ebꞌ, xchi ebꞌ vin̈.