Smul ix María yedꞌ vin̈aj Aarón
12
Ix och ijan ix María yedꞌ vin̈aj Aarón yalan specal vin̈aj Moisés, yujto yicꞌnac jun ix cusita vin̈ yetbꞌeyumoc. 2 An̈ejaꞌ ix yalanpax ebꞌ: Tocval an̈ej dꞌa vin̈aj Moisés chiꞌ slolon Jehová. Slolonpax dꞌayon̈, xchi ebꞌ. Palta ix yabꞌ Jehová tas ix yal ebꞌ chiꞌ.3 Dꞌa val yel, an̈ej vin̈aj Moisés te emnaquil syutej sbꞌa dꞌa scal ebꞌ anima dꞌa yolyibꞌan̈qꞌuinal tic. 4 Yuj chiꞌ, elan̈chamel ix yal Jehová dꞌa vin̈aj Moisés, dꞌa vin̈aj Aarón yedꞌ dꞌa ix María chiꞌ icha tic: Cotan̈ec eyoxvan̈il dꞌa stiꞌ in cajnubꞌ bꞌaj tzin chꞌox in bꞌa, xchi.
Yuj chiꞌ ix cꞌoch ebꞌ yoxvan̈il. 5 Ix lajvi chiꞌ ix emul Jehová dꞌa scal jun nivan asun, ix och moyan dꞌa stiꞌ scajnubꞌ chiꞌ, ix avtaj vin̈aj Aarón yedꞌ ix María chiꞌ yuuj. Axo ix cꞌoch ebꞌ dꞌa yichan̈, ix yalan icha tic: 6 Abꞌec val tas ol valaꞌ: Ayic svacꞌancot junoc in checabꞌ dꞌa e cal, a in tzin chꞌox in bꞌa dꞌay, tzin lolonpax dꞌa vayichal dꞌay. 7 Axo pax yedꞌ vin̈ in checabꞌ aj Moisés tic, man̈ ichoctaꞌ svutej, yujto an̈ej vin̈ cꞌanabꞌajum syutej sbꞌa dꞌa scal ebꞌ vic yaji. 8 Qꞌuelcꞌumbꞌa tzin aj yedꞌ vin̈ tzin loloni, te jichichi tzꞌaj in loloni yedꞌ in yilan vin̈. Tato qꞌuelcꞌumbꞌa tzꞌaj in sat in lolon yedꞌ vin̈ ¿tas val yuj tze tecꞌbꞌej e bꞌa eyalan specal vin̈? xchi dꞌa ebꞌ.
9 Ix te cot yoval Jehová dꞌa ebꞌ, ix lajvi chiꞌ ix bꞌati. 10 Ayic ix qꞌue vaan asun chiꞌ dꞌa yibꞌan̈ scajnubꞌ Dios, axo ix María chiꞌ sacvequinac yilji snivanil ix yuj lepra. Ix och qꞌuelan vin̈aj Aarón chiꞌ dꞌa ix, ix yilan vin̈ to ayxo och lepra dꞌa ix. 11 Yuj chiꞌ ix yalan vin̈ dꞌa vin̈aj Moisés chiꞌ icha tic: Mamin, acꞌ val nivancꞌolal dꞌayon̈, yujto yuj co man̈ pensaril ix och co mul. 12 Comonoc tzꞌel dꞌa a cꞌol max can ix icha junoc neneꞌ unin chamnacxo ayic tzꞌalji, ixtaxnacxobꞌat snivanil, xchi vin̈aj Aarón chiꞌ.
13 Ix lajvi chiꞌ, ix och ijan vin̈aj Moisés chiꞌ yalan dꞌa Jehová: Mamin, tzin tevi dꞌayach to tziqꞌuel jun ilya tic dꞌa ix vanabꞌ tic, xchi vin̈.
14 Ix tacꞌvi Jehová chiꞌ dꞌa vin̈: Qꞌuinaloc tato a smam ix stzubꞌanoch dꞌa sat, ¿tom max can ix qꞌuixvelal uqueoc cꞌual? Ocxom yuj jun smul ix ix och tic, yovalil tzꞌel ix uqueoc cꞌual dꞌa spatiquel campamento. Slajvi chiꞌ, schajixioch ix, xchi dꞌa vin̈.