4 Tzijtum ebꞌ chꞌoc chon̈abꞌil ayxo och dꞌa scal ebꞌ israel. A jun macan̈ anima chiꞌ, an̈ej vael naan yuj ebꞌ. Ajun pax ebꞌ israel ix alubꞌtan̈ani, ix ocꞌqꞌue ebꞌ, ix yalan ebꞌ icha tic: Comonoc val ay mach tzꞌacꞌan jabꞌoc nocꞌ chibꞌej co chiꞌa. 5 Sco navalcoti to te ay nocꞌ chay max co manlaj ix co chiꞌ dꞌa Egipto. Ay pax an̈ pepino, teꞌ melón, an̈ puerro, an̈ cebolla yedꞌ an̈ axux, masanil juntzan̈ chiꞌ ix cabꞌlej. 6 Axo pax dꞌa tic, te man̈xa jabꞌoc tas scabꞌlej, toxon̈ej squixtej co cꞌool co vaan jun maná tic, xchi ebꞌ.

7 (A juntzan̈ maná chiꞌ, lajan yilji icha sat an̈ culantro, cꞌan yilji icha stzatajil teꞌ taj. 8-9 Axo sjabꞌ, lajan icha sjabꞌ ixim cꞌoxox pan sbꞌo yedꞌ aceite. A tzꞌem yal acꞌval, tzꞌemcan maná chiꞌ dꞌa scampamento ebꞌ. Ayic sacbꞌi tzꞌelta ebꞌ anima chiꞌ smol yicoꞌ, sjaxan chojoc ebꞌ, sbꞌoan ebꞌ icha tzꞌaj sbꞌo ixim pan dꞌa horno. Ay bꞌaj stenpoj ebꞌ, stzꞌan̈an ebꞌ.)

10 Ix yabꞌ vin̈aj Moisés yocꞌ masanil ebꞌ israel dꞌa stiꞌ smantiado junjun. Ix te cot yoval Jehová, an̈ejaꞌ ix te ja schabꞌcꞌolal vin̈aj Moisés chiꞌ. 11 Ix yalan vin̈ dꞌa Jehová icha tic:

—¿Tas yuj tzacꞌ vil yaelal a in a checabꞌ in tic? ¿Tas val yoval a cꞌol dꞌa in patic, yuj chiꞌ tzacꞌ jun chon̈abꞌ tic in tan̈vej? 12 Tocval mamabꞌil nunabꞌil vaji, yuj chiꞌ tzalaꞌ to tzin chelbꞌat ebꞌ icha junoc neneꞌ unin dꞌa sat lum luum alnaccan dꞌa ebꞌ co mam quicham. 13 ¿Bꞌajtil sbꞌat vicꞌ nocꞌ chibꞌej svacꞌ schi juntzan̈ anima tic? Tzꞌocꞌ val ebꞌ, tzul yalan ebꞌ dꞌayin: Acꞌcot nocꞌ chibꞌej yic sco chiꞌa, xchi ebꞌ. 14 Maxtzac yal-laj in tacꞌvanoch dꞌa vibꞌan̈ vicꞌanbꞌat jun chon̈abꞌ tic. Icha junoc icatz te al, icha val chiꞌ yaj svabꞌi. 15 Tato ol acꞌn̈ej jun yaelal tic dꞌayin, vachꞌ ama tzin acꞌ chamoc. Tato xajan in uuj jun, iqꞌuinel dꞌa scal tzijtum yaelal tic, xchi vin̈.

16 Ix yalan Jehová chiꞌ dꞌa vin̈ icha tic:

—Molbꞌej 70-oc ebꞌ yichamtac vinaquil chon̈abꞌ, ebꞌ vin̈ nivac yelcꞌoch dꞌa scal ebꞌ anima tzilaꞌ, tzicꞌancot ebꞌ vin̈ dꞌa stiꞌ in cajnubꞌ bꞌaj tzin chꞌox in bꞌa, tzin a tan̈van taꞌ yedꞌ ebꞌ vin̈. 17 Axo yic ol in cꞌochoc, ol in lolon edꞌoc. Ol viqꞌuel jabꞌoc espíritu ayoch dꞌayach, ol vacꞌanoch dꞌa ebꞌ vin̈, yic vachꞌ ol colvaj ebꞌ vin̈ yilan ebꞌ anima tic edꞌoc, yic man̈ a chꞌocojoc ol il ebꞌ.

18 Slajvi chiꞌ, tzalan dꞌa ebꞌ anima chiꞌ to sbꞌo sbꞌa ebꞌ, yujto a qꞌuicꞌan schi nocꞌ chibꞌej ebꞌ ix scꞌan chiꞌ. Toxo ix vabꞌ yocꞌ ebꞌ, ix vabꞌan yalan ebꞌ: Comonoc ay jabꞌoc chibꞌej sco chiꞌa. Te vachꞌn̈ej cajecꞌ dꞌa Egipto, xchi ebꞌ. Yuj chiꞌ ol vacꞌ nocꞌ schibꞌej ebꞌ chiꞌ. 19 Man̈ junn̈ejoc cꞌual, man̈ chabꞌoc cꞌual, man̈ oyeoc cꞌual, man̈ lajun̈eoc cꞌual, man̈ junqꞌuin̈oc, 20 palta jun ujal ol schi nocꞌ chibꞌej chiꞌ ebꞌ. Ol schi nocꞌ ebꞌ masanto ol xej ebꞌ yuj nocꞌ. Ol laj ja nocꞌ dꞌa yoltac sn̈iꞌ ebꞌ, masanto ol syaj nocꞌ ebꞌ. Yujto emnaquiltac ix in yutej ebꞌ a in Jehová in ayinecꞌ dꞌa e cal. Tzꞌocꞌ ebꞌ dꞌa vichan̈ syalan ebꞌ: ¿Tas yuj ix on̈ iqꞌuelta dꞌa Egipto? xchi ebꞌ, xchi dꞌa vin̈.

21 Ix tacꞌvi vin̈aj Moisés chiꞌ icha tic:

—Mamin Jehová, a ebꞌ anima vedꞌnac tic, ay 600 mil ebꞌ vinac stiempoal yoch soldadoal. Chꞌoc pax yaj ebꞌ ix ix yedꞌ ebꞌ cotac unin, tzalani to jun ujal ol acꞌ nocꞌ chibꞌej co chiꞌa. 22 ¿Bꞌajtil ol cot jantacoc nocꞌ calnel yedꞌ jantacoc nocꞌ vacax sco milchamoc yic syabꞌ schiꞌan juntzan̈ anima tic? Yedꞌ pax cacꞌan nocꞌ chay schi ebꞌ, vachꞌchom slajviqꞌueta nocꞌ smasanil dꞌa yol aꞌ mar, an̈ejtonaꞌ max yabꞌlaj nocꞌ, xchi vin̈.

23 Ix tacꞌvi Jehová chiꞌ dꞌa vin̈ icha tic:

—¿Am a naani to jabꞌn̈ej in poder? A ticnaic ol ilaꞌ tato ol elcꞌoch icha sval tic, mato maay, xchi dꞌa vin̈.

24 Ix lajvi chiꞌ, ix elta vin̈aj Moisés yal dꞌa scal ebꞌ anima tas ix yal Jehová. Ix smolbꞌan 70 ebꞌ yichamtac vinaquil chon̈abꞌ vin̈, ix och oyan ebꞌ vin̈ dꞌa spatictac scajnubꞌ Dios yuj vin̈. 25 Ix lajvi chiꞌ, ix emul Jehová dꞌa scal asun, ix lolon yedꞌ vin̈aj Moisés chiꞌ. Ataꞌ ix icꞌjiel jabꞌoc espíritu ayoch dꞌa vin̈ yuj Jehová, ix yacꞌanoch dꞌa ebꞌ vin̈ 70 ichamtac vinac chiꞌ. Ataꞌ ix och ijan ebꞌ vin̈ slolon icha ebꞌ yalumalel slolonel Dios, palta an̈ej junel chiꞌ ix lolon ebꞌ vin̈ icha chiꞌ. 26 Ay chavan̈ ebꞌ vin̈ ayoch sbꞌisuloc ebꞌ vin̈ 70 chiꞌ, jun vin̈ scuch Eldad, axo junxo vin̈ scuchan Medad. A ebꞌ vin̈ chavan̈ chiꞌ, ix can ebꞌ vin̈ dꞌa campamento, maj bꞌatlaj ebꞌ vin̈ dꞌa scajnubꞌ Dios. Ajun pax ebꞌ vin̈ ix chaan espíritu chiꞌ, ix och ijan ebꞌ vin̈ yalanel slolonel Dios dꞌa campamento chiꞌ. 27 Axo ix yabꞌan jun vin̈ quelem, ix bꞌat lemnaj vin̈ yal dꞌa vin̈aj Moisés chiꞌ icha tic:

—A vin̈aj Eldad yedꞌ vin̈aj Medad, van slolon ebꞌ vin̈ bꞌaj ay campamento, ichato yalumalel slolonel Dios ebꞌ vin̈, xchi vin̈.

28 Yuj chiꞌ a vin̈aj Josué yuninal vin̈aj Nun, vin̈ scolvaj yictax dꞌa squelemal yedꞌ vin̈aj Moisés chiꞌ, ix yal vin̈ icha tic:

—Mamin Moisés, a ticnaic albꞌati to scachjioch vaan ebꞌ vin̈ chiꞌ sloloni, xchi vin̈.

29 Ix tacꞌvi vin̈aj Moisés chiꞌ icha tic:

—¿Tom a gana a inn̈ej nivan velcꞌoch dꞌa scal ebꞌ anima tic? Comonoc tzꞌel dꞌa scꞌol Jehová to syacꞌ Yespíritu dꞌa masanil anima tic yic vachꞌ tzꞌochcan ebꞌ schecabꞌoc, xchi vin̈. 30 Ix lajvi chiꞌ, ix meltzaj vin̈ yedꞌ ebꞌ yichamtac vinaquil chon̈abꞌ bꞌaj ay campamento chiꞌ.

31 Junanto val rato chiꞌ ix cot jun icꞌ te ov dꞌa yol aꞌ mar yuj Jehová, axo jun icꞌ chiꞌ ix icꞌancot nocꞌ tzijtumal much scuchan ubꞌ. Ix em nocꞌ dꞌa yol campamento yedꞌ dꞌa spatictac, ay am junoc cꞌual stecꞌnabꞌil spatictac campamento chiꞌ bꞌaj ix cꞌoch cꞌaman yem nocꞌ. Junxon̈ej am val metro schaan̈il tzꞌecꞌ jen̈en̈oc nocꞌ dꞌa yibꞌan̈ luum. 32 Masanil dꞌa jun cꞌu chiꞌ yedꞌ masanil jun acꞌval yedꞌ masanil dꞌa junxo cꞌu ix syam nocꞌ ebꞌ anima chiꞌ. A mach quenn̈ej nocꞌ ix yamchaj yuuj, ayn̈ejam lajun̈eoc bꞌulan̈ nocꞌ ix syamaꞌ. Masanil ebꞌ anima ix och ijan sbꞌoan nocꞌ, ix yacꞌan tacjoc nocꞌ ebꞌ dꞌa spatictac campamento chiꞌ. 33 Ayic van schiꞌan nocꞌ ubꞌ chiꞌ ebꞌ, ix cot yoval scꞌol Jehová dꞌa ebꞌ, ix yacꞌancot jun yaelal dꞌa yibꞌan̈ ebꞌ. Te nivan ebꞌ ix chami. 34 Yuj chiꞌ ix scuchcan jun lugar chiꞌ Quibrot-hataava,^* yujto ataꞌ ix mucchajcan ebꞌ pecꞌchibꞌej chiꞌ.

35 Ix lajvi chiꞌ, ix el ebꞌ dꞌa Quibrot-hataava chiꞌ, ix bꞌat ebꞌ, ix cꞌoch ebꞌ dꞌa jun lugar scuch Hazerot. Ataꞌ ix cajnajcan ebꞌ jun tiempoal.