2 Bꞌochajocabꞌ chabꞌoc qꞌuen trompeta nabꞌa plata, stenchaj dꞌa qꞌuen martillo. A juntzan̈ qꞌuen trompeta chiꞌ spuchaji a tze molbꞌan ebꞌ anima, ayic tzex bꞌeypaxbꞌati. 3 A spuji chabꞌ qꞌuen trompeta chiꞌ, masanil chon̈abꞌ sja molan dꞌa ichan̈ bꞌaj ay in cajnubꞌ bꞌaj tzin chꞌox in bꞌa. 4 Palta tato junn̈ej qꞌuen spuji, an̈ej ebꞌ yajal yaj dꞌa junjun macan̈il in̈tilal smolbꞌej sbꞌa. 5 Tato junip syacꞌ spuji qꞌuen trompeta chiꞌ, sqꞌue vaan campamento ay dꞌa stojolal bꞌaj sjavi cꞌu bꞌaj ay in cajnubꞌ syal chiꞌ. 6 Axo yic spuchaj qꞌuen dꞌa schaelal sbꞌat ebꞌ ayecꞌ dꞌa stojolal sur. Yuj chiꞌ a spuchaj qꞌuen trompeta dꞌa icha chiꞌ, chꞌoxnabꞌil yaji ayic sbꞌeybꞌat ebꞌ chon̈abꞌ. 7 Tato man̈ junipoc syacꞌ spuchaj qꞌueen, syalelcꞌochi to ton̈ej smolbꞌaj anima. 8 A mach spuꞌan qꞌuen trompeta chiꞌ, aton ebꞌ sacerdote yin̈til vin̈aj Aarón. A jun tic ley tzꞌajcan dꞌayex dꞌa masanil tiempo.

9 Tato ay ebꞌ ajcꞌol sjavi yacꞌ oval dꞌayex dꞌa yol e macbꞌen, tzex el eyacꞌ oval chiꞌ yedꞌ ebꞌ, elan̈chamel spuchaj qꞌuen trompeta, yic tzex in nacot a in Jehová e Diosal in tic, tzex in colanel dꞌa ebꞌ ajcꞌol chiꞌ. 10 Axo dꞌa scꞌual ay e tzalajcꞌolal, icha dꞌa scꞌual qꞌuin̈, ma dꞌa yic tzꞌalji qꞌuen uj, tze puꞌan qꞌuen trompeta chiꞌ yic tzeyacꞌan silabꞌ stzꞌai, ma silabꞌ yic juncꞌolal. Icha chiꞌ tzex in nacoti. A in ton Jehová e Diosal in tic svalaꞌ, xchi dꞌa vin̈.

11 Ayic 20 yoch schabꞌil uj yic schabꞌil abꞌil yelta chon̈abꞌ Israel dꞌa Egipto, ix qꞌue vaan jun asun dꞌa yibꞌan̈ cajnubꞌ yic trato. 12 Ichato chiꞌ ix el ebꞌ israel dꞌa tzꞌinan lum yic Sinaí, cꞌojancꞌolal ix bꞌeycot ebꞌ masanto ix javi ebꞌ dꞌa tzꞌinan lum yic Parán, yujto ataꞌ ix och vaan jun asun chiꞌ. 13 Sbꞌabꞌelalto sbꞌey ebꞌ tic dꞌa stzolal icha val ix aj yalan Jehová dꞌa vin̈aj Moisés. 14 Bꞌabꞌel ebꞌ soldado edꞌjinac sbandera yin̈tilal Judá. A vin̈aj Naasón yuninal vin̈aj Aminadab ayoch yajaliloc ebꞌ. 15 Axo dꞌa yichan̈ ebꞌ soldado yic yin̈tilal Isacar, ataꞌ ayoch vin̈aj Natanael yuninal vin̈aj Zuar. 16 A vin̈aj Eliab yuninal vin̈aj Helón ayoch dꞌa yichan̈ ebꞌ soldado yic yin̈tilal Zabulón. 17 Ix lajvi chiꞌ, ix xuyanqꞌue vaan scajnubꞌ Jehová ebꞌ, axo ebꞌ yin̈tilalcan vin̈aj Gersón yedꞌ ebꞌ yin̈tilalcan vin̈aj Merari ix icꞌanbꞌati, yujto a ebꞌ ayoch dꞌa yibꞌan̈ yicꞌanbꞌeyoc.

18 Ichato chiꞌ ix cot ebꞌ soldado edꞌjinac sbandera yin̈tilal Rubén. A vin̈aj Elisur yuninal vin̈aj Sedeur ayoch yajaliloc ebꞌ. 19 A vin̈aj Selumiel yuninal vin̈aj Zurisadai ayoch dꞌa yichan̈ ebꞌ soldado dꞌa yin̈tilal Simeón. 20 A vin̈aj Eliasaf yuninal vin̈aj Deuel ayoch dꞌa yichan̈ ebꞌ soldado dꞌa yin̈tilal Gad. 21 Tzacꞌanto scotpax ebꞌ yin̈tilalcan vin̈aj Coat. A ebꞌ edꞌjinac masanil syamcꞌabꞌil scajnubꞌ Jehová. Axo ix cꞌoch ebꞌ, toxo ix bꞌojiqꞌue scajnubꞌ Jehová chiꞌ.

22 Ichato chiꞌ ix cot ebꞌ soldado edꞌjinac sbandera yin̈tilal Efraín. A vin̈aj Elisama yuninal vin̈aj Amiud ayoch yajaliloc ebꞌ. 23 A vin̈aj Gamaliel yuninal vin̈aj Pedasur ayoch dꞌa yichan̈ ebꞌ soldado dꞌa yin̈tilal Manasés. 24 A vin̈aj Abidán yuninal vin̈aj Gedeoni ayoch dꞌa yichan̈ ebꞌ soldado dꞌa yin̈tilal Benjamín.

25 Slajvubꞌalxo masanil juntzan̈ soldado chiꞌ, ix cot ebꞌ edꞌjinac sbandera yin̈tilal Dan. Aton ebꞌ stan̈van ebꞌ chon̈abꞌ dꞌa spatic chiꞌ. A vin̈aj Ahiezer yuninal vin̈aj Amisadai ayoch yajaliloc ebꞌ. 26 A vin̈aj Pagiel yuninal vin̈aj Ocrán ayoch dꞌa yichan̈ ebꞌ soldado dꞌa yin̈tilal Aser. 27 Axo vin̈aj Ahira yuninal vin̈aj Enán ayoch dꞌa yichan̈ ebꞌ soldado dꞌa yin̈tilal Neftalí. 28 Icha chiꞌ tzꞌaj stzolan sbꞌa ebꞌ israel ayic sbꞌeybꞌat ebꞌ.

29 Ay jun cꞌual, ix yal vin̈aj Moisés dꞌa vin̈ sbꞌaluch, aton vin̈aj Hobab yuninal vin̈aj Ragüel aj Madián, vin̈ sn̈iꞌ vin̈aj Moisés chiꞌ icha tic:

—A on̈ tic van co bꞌat dꞌa jun luum ix yacꞌ stiꞌ Jehová yacꞌan dꞌayon̈. Con̈ quedꞌoc, vachꞌ ol ach quilaꞌ, yujto ix yacꞌ stiꞌ Jehová on̈ syailani, xchi vin̈aj Moisés chiꞌ.

30 Palta ix yalan vin̈aj Hobab chiꞌ icha tic:

—Maay, a in tic ol in paxcan dꞌa in chon̈abꞌ, bꞌaj ay masanil ebꞌ in cꞌabꞌ voc, xchi vin̈.

31 Ix yalanxi vin̈aj Moisés chiꞌ dꞌa vin̈:

—Man̈ on̈ actejcani, yujto a ach tic ojtac yecꞌ masanil juntzan̈ lugar bꞌaj vachꞌ coch vaan dꞌa tzꞌinan luum tic, a ach ol on̈ a cuchbꞌej. 32 Tato tzach bꞌat quedꞌoc, a tastac vachꞌ ol yacꞌ Jehová dꞌayon̈, ol cacꞌpax icoꞌ, xchi vin̈.

33 Ix lajvi chiꞌ, ix el ebꞌ dꞌa Sinaí, aton jun tzalan bꞌaj ix schꞌox sbꞌa Jehová. Oxeꞌ cꞌual ix bꞌey ebꞌ. Bꞌabꞌel teꞌ scaxail strato Jehová yuj ebꞌ, a schꞌoxan junoc bꞌaj vachꞌ syicꞌ yip ebꞌ. 34 Ayic sbꞌeybꞌat ebꞌ, tzꞌoch jun asun yic Jehová dꞌa yibꞌan̈ ebꞌ dꞌa cꞌualil. 35 Ayic tzꞌicꞌjibꞌat teꞌ caxa chiꞌ syalan vin̈aj Moisés chiꞌ icha tic:

36 Ayic tzꞌoch vaan teꞌ caxa chiꞌ, syalanxi vin̈ icha tic: