Ix bꞌochaj teꞌ scaxail trato
37
Ix sbꞌoan teꞌ scaxail strato Dios vin̈aj Bezaleel. A teꞌ acacia ix och dꞌay. Jun metro yedꞌ 10 centímetro ix aj scꞌatul, 70 centímetro ix aj sat. An̈ejaꞌ 70 centímetro ix ajpax schaan̈il. 2 Ix och qꞌuen oro dꞌa yool yedꞌ dꞌa spatic yedꞌ dꞌa stitac tzalanqꞌuei. 3 Ix bꞌopax chan̈eꞌ argolla nabꞌa oro tzꞌoch dꞌa yoc schan̈il, chabꞌchabꞌ dꞌa junjun pacꞌan̈. 4 Ix bꞌopax juntzan̈ te sbꞌachlabꞌil dꞌa teꞌ acacia, ix ochpax qꞌuen oro dꞌa spatictac teꞌ. 5 Ix lajvi chiꞌ, ix ecchajecꞌ teꞌ dꞌa yol qꞌuen argolla chiꞌ, yic vachꞌ syal sbꞌachchaj teꞌ.6 Ix bꞌopax jun smacul nabꞌa oro bꞌaj tzꞌacꞌji tup mul, jun metro yedꞌ 10 centímetro scꞌatul, 70 centímetro sat. 7 Ay chabꞌ yechel querubín nabꞌa oro tenbꞌil dꞌa qꞌuen martillo ix och dꞌa yibꞌan̈ jun smacul chiꞌ. 8 Junn̈ej ix aj jun smacul chiꞌ yedꞌ chabꞌ yechel querubín chiꞌ, junjun ix can dꞌa stitac jun smacul chiꞌ, 9 dꞌan̈dꞌumbꞌa ix aji. Ix em qꞌuelan juntzan̈ querubín chiꞌ dꞌa yibꞌan̈ smacul teꞌ scaxail trato chiꞌ, axo scꞌaxil, syil-laj sbꞌa sn̈iꞌ dꞌa yibꞌan̈, ichato yen̈ul yaji.
Ix bꞌochaj smexail ixim pan
10 Ix sbꞌopax jun teꞌ mexa vin̈aj Bezaleel chiꞌ. An̈ejaꞌ teꞌ acacia ix och dꞌa teꞌ. 90 centímetro ix aj scꞌatul, 45 centímetro ix aj sat, 70 ix ajqꞌue steel. 11 Ix och qꞌuen oro dꞌa teꞌ, ix bꞌopax jun tzꞌecꞌ oyan dꞌa spatic yoc teꞌ schan̈il, nabꞌa oro ix aji. 12 Ix bꞌopax qꞌue stitac ix ecꞌ oyan dꞌa yibꞌan̈, uqueꞌ centímetro ix ajqꞌuei, ix och oro dꞌay. 13 Ix bꞌopax chan̈eꞌ argolla nabꞌa oro, ix och dꞌa teꞌ yoc schan̈il dꞌa yesquinail. 14 Ix och juntzan̈ argolla chiꞌ dꞌa slacꞌanil bꞌaj ayem stitac chiꞌ. A dꞌa yol juntzan̈ chiꞌ ix ecꞌ teꞌ sbꞌachlabꞌil yic syal yicꞌchajbꞌat teꞌ mexa chiꞌ. 15 A teꞌ sbꞌachlabꞌil chiꞌ, aton teꞌ acacia, ix ochpax qꞌuen oro dꞌa spatictac teꞌ. 16 Ix bꞌochajpax syamcꞌabꞌil nabꞌa oro scꞌanchaj dꞌa jun mexa chiꞌ, aton juntzan̈ tic: Qꞌuen plato, nivac cuchara, xalu yedꞌ ucꞌabꞌ bꞌaj schaji ofrenda aꞌ yaji.
Ix bꞌochaj sbꞌachnubꞌ candil
17 Ix sbꞌopax jun sbꞌachnubꞌ candil vin̈aj Bezaleel chiꞌ, nabꞌa oro ix aji, ix tenchaj dꞌa qꞌuen martillo. A scꞌojnubꞌ bꞌaj tzꞌem bꞌachan, steꞌal yedꞌ scopail icha sfloral, junn̈ej yaman ix aji. 18 Oxox scꞌabꞌ ix elta dꞌa stzꞌeytac. 19 Junjun juntzan̈ scꞌabꞌ ayelta dꞌa steꞌal chiꞌ, ay oxeꞌ sfloral icha yic teꞌ almendro. 20 A jun steꞌal chiꞌ, ay pax chan̈eꞌ sfloral icha yic teꞌ almendro chiꞌ. 21 A dꞌa yalan̈ bꞌaj ayelta chabꞌchabꞌ scꞌabꞌ chiꞌ, ay junjun sfloral. 22 A juntzan̈ sfloral yedꞌ scꞌabꞌ chiꞌ, junn̈ej ix aj yedꞌ sbꞌachnubꞌal chiꞌ. A jun chiꞌ, nabꞌa oro ix aji, tenbꞌil dꞌa qꞌuen martillo. 23 Ix bꞌopax uqueꞌ candil, an̈ejtonaꞌ ix bꞌopax qꞌuen qꞌueen tzꞌicꞌanel stan̈il cꞌapac bꞌaj tzꞌoch scꞌacꞌal yedꞌ splatoal. Nabꞌa oro ix aj smasanil. 24 A jantac qꞌuen oro ix och dꞌa jun bꞌachnubꞌ candil chiꞌ yedꞌ syamcꞌabꞌil, oxeꞌ arroba ix ochi.
Ix bꞌochaj jun altar yic incienso
25 Ix sbꞌoanpax jun altar yic incienso vin̈aj Bezaleel chiꞌ dꞌa teꞌ acacia. Lajann̈ej ix aj dꞌa schan̈il pacꞌan̈, 45 centímetro ix aji, axo pax steel, 90 centímetro ix ajqꞌuei. Ix bꞌopax juntzan̈ schꞌaac dꞌa junjun yesquinail, yaman ix aj yedꞌ jun altar chiꞌ. 26 Ix och qꞌuen oro yelxo val vachꞌ dꞌa yibꞌan̈ yedꞌ dꞌa spatictac schan̈il pacꞌan̈ yedꞌ dꞌa schꞌaac chiꞌ. Ix qꞌuepax tzalan qꞌuen oro chiꞌ dꞌa yibꞌan̈ stitac. 27 A dꞌa yalan̈ stitac chiꞌ, ataꞌ ix och chabꞌchabꞌ argolla nabꞌa oro dꞌa schabꞌil pacꞌan̈. Ix ecꞌ teꞌ sbꞌachlabꞌil dꞌa yool yic syal sbꞌachchaji. 28 A teꞌ sbꞌachlabꞌil ix och chiꞌ, aton teꞌ acacia, ix ochpax qꞌuen oro dꞌa teꞌ.
A tas tzꞌaj sbꞌo aceite scꞌanchaji
29 Ix bꞌojipax aceite scꞌanchaji yic sicꞌchajel junoc mach, ma junoc tas tzꞌochcan yicoc Dios. Ix bꞌopax incienso te vachꞌ, icha tzꞌaj sbꞌoan ebꞌ bꞌoum perfume.