—A ticnaic, co gana to tza bꞌo juntzan̈oc co diosal tzon̈ cuchbꞌani, yujto a vin̈aj Moisés, vin̈ ix on̈ icꞌanelta dꞌa Egipto, man̈ cojtacoc tas ix icꞌan vin̈, xchi ebꞌ chon̈abꞌ chiꞌ.

2 Ix tacꞌvi vin̈aj Aarón chiꞌ dꞌa ebꞌ:

—A ticnaic, molbꞌejeccot masanil qꞌuen uchiquin nabꞌa oro yic ebꞌ ix eyetbꞌeyum yedꞌ yic ebꞌ eyuninal, ebꞌ ix eyisil, tzeyicꞌancot dꞌayin, xchi vin̈.

3 Masanil anima ix yiqꞌuel yuchiquin, ix yicꞌancot ebꞌ dꞌa vin̈aj Aarón chiꞌ. 4 Ix schaanecꞌ vin̈, ix yacꞌan ulax qꞌuen vin̈ dꞌa scal teꞌ cꞌacꞌ, ix yacꞌanem vin̈ dꞌa yol jun smoldeal, ix bꞌo jun yechel jun quelem vacax. Ix ochn̈ej ijan vin̈ svachꞌ bꞌoan jun yechel vacax chiꞌ. Ix yalan ebꞌ chon̈abꞌ chiꞌ smasanil:

—Ex quetchon̈abꞌ israel, a jun co diosal tic ix on̈ icꞌanelta dꞌa Egipto, xchi ebꞌ.

5 Ayic ix yilan jun chiꞌ vin̈aj Aarón chiꞌ, ix sbꞌoanqꞌue jun altar vin̈ dꞌa yichan̈ jun yechel vacax chiꞌ, te chaan̈ ix yal vin̈:

—A qꞌuicꞌan scacꞌoch junoc nivan qꞌuin̈ dꞌa yichan̈ Jehová, xchi vin̈.

6 Axo ix qꞌuin̈ibꞌi dꞌa junxo cꞌu, ix smolbꞌan sbꞌa anima smasanil, ix sn̈usan juntzan̈ silabꞌ ebꞌ yedꞌ silabꞌ yic juncꞌolal. Ix lajvi chiꞌ ix em cꞌojjabꞌ ebꞌ, ix va ebꞌ, ix yucꞌan aꞌ ebꞌ. Ix lajvi chiꞌ, ix qꞌue bꞌulnaj ebꞌ schan̈alvi yedꞌ scꞌulan chucal dꞌa yichan̈ sdiosal chiꞌ. 7 Yuj chiꞌ, ix yalan Jehová dꞌa vin̈aj Moisés chiꞌ:

—Ixic, eman̈xi yujto a ebꞌ a chon̈abꞌ ix iqꞌuelta dꞌa Egipto, toxo ix sjuel sbꞌa ebꞌ. 8 Yelxo val dꞌa elan̈chamel ix yiqꞌuel sbꞌa ebꞌ dꞌa tas ix valaꞌ. Dꞌa elan̈chamel ix sbꞌo jun yechel quelem vacax ebꞌ, syacꞌanem sbꞌa ebꞌ ejmelal dꞌay. Syacꞌan silabꞌ ebꞌ, syalan ebꞌ: Ex quetchon̈abꞌ israel, a val jun co diosal tic ix on̈ icꞌanelta dꞌa Egipto, xchi ebꞌ. 9 Toxo ix vilaꞌ to a juntzan̈ anima tic, yelxo val pit spensar ebꞌ. 10 A ticnaic man̈xo ach tevoc dꞌayin yuj ebꞌ, scot val voval dꞌa juntzan̈ anima tic. Ol in satel ebꞌ smasanil, an̈ej edꞌoc ol in bꞌo jun nivan nación yedꞌ ebꞌ in̈tilal, xchi dꞌa vin̈.

11 Axo vin̈aj Moisés chiꞌ, ix och ijan vin̈ scꞌanan nivancꞌolal dꞌa Jehová sDiosal yuj ebꞌ schon̈abꞌ, ix yalan vin̈:

—Mamin Jehová, ¿tas val yuj scot yoval a cꞌol dꞌa yibꞌan̈ a chon̈abꞌ to a ach ix iqꞌuelta dꞌa Egipto yedꞌ ipalil? 12 ¿Tas val yuj ol a cha ach yal ebꞌ aj Egipto chucal? Ol am yal ebꞌ icha tic: Tobꞌan chuc spensar Dios dꞌa ebꞌ, yuj chiꞌ ix yiqꞌuel ebꞌ dꞌa tic, sbꞌat smilancham ebꞌ dꞌa jolomtac vitz, satjiel ebꞌ yuuj dꞌa sat lum luum tic, xcham ebꞌ. Yuj chiꞌ comonoc max te cot yoval a cꞌol dꞌa yibꞌan̈ ebꞌ, mocabꞌ acꞌoch yaelal dꞌa yibꞌan̈ ebꞌ. 13 Comonoc tza nacot ebꞌ a checabꞌ, aton vin̈aj Abraham, vin̈aj Isaac yedꞌ vin̈aj Israel. A locnac a bꞌi acꞌannac a tiꞌ dꞌa ebꞌ, alannac icha tic: Ol vicꞌchaan̈ e bꞌisul yedꞌ eyuninal. Lajan ol aj sbꞌisul ebꞌ icha qꞌuen cꞌanal dꞌa satchaan̈. An̈ejaꞌ jun lum luum tic, toxo ix valaꞌ to ol vacꞌ dꞌa eyin̈tilal dꞌa masanil tiempo, xa chinac dꞌa ebꞌ, xchi vin̈aj Moisés chiꞌ.

14 Yuj chiꞌ ix snaan Jehová to man̈xo ol satel-laj schon̈abꞌ chiꞌ. 15 Ix meltzajemta vin̈aj Moisés dꞌa jolom vitz chiꞌ, yedꞌnacxo chabꞌ pachan̈ qꞌueen vin̈ bꞌaj tzꞌibꞌabꞌiloch checnabꞌil yuj Jehová, dꞌa schabꞌil pacꞌan̈ qꞌueen. 16 A val Jehová ix bꞌoan qꞌuen qꞌueen chiꞌ schabꞌil, ix stzꞌibꞌanoch letra chiꞌ dꞌa qꞌueen.

17 Axo yic ix yabꞌan vin̈aj Josué yel yav ebꞌ anima, ix yalan vin̈ dꞌa vin̈aj Moisés chiꞌ:

—A val scabꞌan yel yav ebꞌ anima chiꞌ, icha val to ayoch oval dꞌa yol campamento, xchi vin̈.

18 Ix tacꞌvi vin̈aj Moisés chiꞌ:

—A juntzan̈ av tzꞌoch scabꞌ chiꞌ, man̈ avoc yic tzalajcꞌolal yic tzꞌacꞌji ganar junoc oval, man̈ avocpax yic cuscꞌolal yic tzꞌacꞌji ganar anima yuj ebꞌ ajcꞌool, palta bꞌit tzꞌoch svabꞌi, xchi vin̈.

19 Axo yic ix javi vin̈aj Moisés chiꞌ dꞌa slacꞌanil campamento chiꞌ, ix yilanoch jun yechel quelem vacax chiꞌ vin̈, axo ebꞌ anima van schan̈alvi ebꞌ. Ix te cot yoval vin̈, ix syumanel qꞌuen qꞌueen bꞌaj tzꞌibꞌabꞌiloch checnabꞌil chiꞌ vin̈, yuj chiꞌ ix pojbꞌat qꞌuen dꞌa yich vitz chiꞌ. 20 Ix lajvi chiꞌ, ix bꞌat stzacꞌanelta jun yechel vacax chiꞌ vin̈, ix syumanoch vin̈ dꞌa scal cꞌacꞌ. Ix lajvi chiꞌ ix smacꞌanpoj vin̈, chocꞌxon̈ej ix aji, ix yacꞌanem vin̈ dꞌa scal a aꞌ, ix schecan vin̈ yucꞌ ebꞌ anima chiꞌ. 21 Ix yalan vin̈ dꞌa vin̈aj Aarón chiꞌ:

—¿Tas yuj ach montaj yuj juntzan̈ anima tic ix a cuchbꞌan ebꞌ scꞌulan jun nivan chucal tic? xchi vin̈.

22 Ix yalan vin̈aj Aarón chiꞌ:

—Mamin, mocabꞌ cot oval dꞌayin, ojtac val sicꞌlabꞌil to a jun chon̈abꞌ tic, sganan̈ej ebꞌ scꞌulan chucal. 23 A ebꞌ ix alan dꞌayin: Bꞌo junoc co diosal tzon̈ cuchbꞌani, yujto a vin̈aj Moisés ix on̈ icꞌanelta dꞌa Egipto, ma chequel tas ix icꞌan vin̈, max jaxlaj vin̈, xchi ebꞌ dꞌayin. 24 Yuj chiꞌ ix valan dꞌa ebꞌ: Machtac ex ay qꞌuen oro dꞌayex, ma qꞌuen uchiquin, iqꞌuequeli, tzeyicꞌancoti, xin chi dꞌa ebꞌ. Ix lajvi chiꞌ, ix yicꞌancot ebꞌ dꞌayin, ix vacꞌan ulax dꞌa cal cꞌacꞌ, axo ix aji ix comon elta jun yechel vacax tic, xchi vin̈ dꞌa vin̈.

25 Ix nachajel yuj vin̈aj Moisés chiꞌ to a ebꞌ anima chiꞌ, bꞌecanxon̈ej scꞌol ebꞌ yacꞌan qꞌuixvelal sbꞌa dꞌa yichan̈ ebꞌ chon̈abꞌ ayoch ajcꞌolal dꞌa ebꞌ, axo vin̈aj Aarón chiꞌ maj scachoch vaan jabꞌoc ebꞌ vin̈. 26 Yuj val chiꞌ ix och tecꞌtecꞌ vin̈aj Moisés chiꞌ dꞌa stiꞌ campamento chiꞌ, ix yalan vin̈:

—A ticnaic a mach syal scꞌol syacꞌoch sbꞌa dꞌa yol scꞌabꞌ Jehová, cotocabꞌ dꞌa in tzꞌey tic, xchi vin̈.

Masanil ebꞌ yetlevitail vin̈, ix snitzcot sbꞌa ebꞌ dꞌa stzꞌey vin̈.

27 Ix lajvi chiꞌ, ix yalanpax vin̈ dꞌa ebꞌ:

—Ix schec Jehová co Diosal val dꞌayex to junjun ex tzeyicꞌbꞌat eyespada, tzex bꞌat dꞌa campamento, tzex ecꞌ dꞌa caltac mantiado, tze milancham ebꞌ eyucꞌtac, ebꞌ eyamigo yedꞌ ebꞌ cajan dꞌa e lacꞌanil, xchi Jehová, xchi vin̈aj Moisés chiꞌ.

28 Ix scꞌanabꞌajej checnabꞌil ebꞌ vin̈ levita ix yacꞌ vin̈. Yuj chiꞌ, ay am oxeoc mil anima ix smilcham ebꞌ. 29 Ix lajvi chiꞌ, ix yalanxi vin̈aj Moisés chiꞌ:

—A ticnaic ix eyacꞌoch e bꞌa dꞌa yol scꞌabꞌ Jehová, ina to a ex ix e milcham eyuninal yedꞌ eyucꞌtac. Yuj val chiꞌ, ol yacꞌ svachꞌcꞌolal Jehová dꞌa eyibꞌan̈, xchi vin̈ dꞌa ebꞌ.

30 Axo dꞌa junxo cꞌu, ix yalan vin̈aj Moisés chiꞌ dꞌa ebꞌ anima:

—Te nivan e mul ix ochi. A ticnaic tic tzin bꞌatxi dꞌa jolom vitz bꞌaj ayecꞌ Jehová. Ataꞌ ol in lolon yedꞌoc, talaj ol yacꞌ lajvoc e mul chiꞌ dꞌa eyibꞌan̈, xchi vin̈.

31 Ix lajvi chiꞌ, ix bꞌat vin̈ dꞌa jolom vitz bꞌaj ayecꞌ Jehová chiꞌ. Ix yalan vin̈:

—Val yel Mamin, te nivan smul jun chon̈abꞌ tic ix och dꞌa ichan̈, ix sbꞌo jun sdiosal ebꞌ oro yic syaqꞌuem sbꞌa ebꞌ dꞌay. 32 Yuj val chiꞌ tzin tevi dꞌayach to tzacꞌ lajvoc smul ebꞌ chiꞌ. Tato max acꞌ nivancꞌolal smul ebꞌ chiꞌ jun, tza sucsat in bꞌi dꞌa yol chꞌan̈ libro bꞌaj tzꞌibꞌabꞌil sbꞌi ebꞌ to icxo yaji, xchi vin̈ dꞌa Jehová.

33 Axo ix tacꞌvi Jehová chiꞌ dꞌa vin̈:

—A ebꞌ tzꞌoch smul dꞌayin, aton ebꞌ chiꞌ tzin sucsat sbꞌi dꞌa yol chꞌan̈ libro chiꞌ. 34 Yuj chiꞌ ixic, tzicꞌanbꞌat ebꞌ chon̈abꞌ chiꞌ dꞌa jun lugar ix val dꞌayach. A jun vángel ol bꞌabꞌlaj eyuuj, palta ol cꞌoch scꞌual yic ol vacꞌanoch syaelal ebꞌ anima tic yuj smul, xchi.

35 Ix lajvi chiꞌ, a Jehová ix acꞌancot jun nivan ilya to smilvaj dꞌa yibꞌan̈ ebꞌ chon̈abꞌ israel chiꞌ, yujto ix yacꞌoch sbꞌa ebꞌ sbꞌoan jun yechel vacax, aton jun ix sbꞌo vin̈aj Aarón chiꞌ.