—A ticnaic elan̈ dꞌa tic yedꞌ ebꞌ chon̈abꞌ ix iqꞌuelta dꞌa Egipto, tzicꞌanbꞌat ebꞌ dꞌa sat lum luum valnac dꞌa vin̈aj Abraham, dꞌa vin̈aj Isaac yedꞌ dꞌa vin̈aj Jacob to ol vacꞌ dꞌa yin̈tilal ebꞌ vin̈. 2 A in ol in chec bꞌabꞌlaj jun vángel dꞌa eyichan̈. Aꞌ ol ex cuchbꞌanbꞌatoc. A juntzan̈ chon̈abꞌil anima, aton ebꞌ cananeo, ebꞌ amorreo, ebꞌ hitita, ebꞌ ferezeo, ebꞌ heveo yedꞌ ebꞌ jebuseo, ol viqꞌuel ebꞌ dꞌa sat luum chiꞌ. 3 Ixiquec dꞌa jun lum te yax sat chiꞌ, palta man̈ ol in bꞌatlaj dꞌa e cal, yujto te pit ex, ay smay tzex in satel dꞌa yoltac bꞌe, xchi Jehová.

4 Ayic ix yabꞌan ebꞌ anima jun lolonel cuseltac yalji chiꞌ, ix och ebꞌ dꞌa ilcꞌolal, man̈xalaj mach ix yacꞌoch yuchiquin yedꞌ ston̈. 5 Yujto a Jehová ix alan dꞌa vin̈aj Moisés chiꞌ:

—Al dꞌa ebꞌ etisraelal tic: A ex tic te pit ex. Tato tzin cꞌoch dꞌa e cal junoc rato, ay smay tzex in sateli. A ticnaic iqꞌuequel eyuchiquin chiꞌ yedꞌ e ton̈ dꞌa e jaj chiꞌ, ol vilani tas ol ex vutoc, xa chi, xchi dꞌa vin̈.

6 Yuj val chiꞌ, atax ix el ebꞌ dꞌa yich vitz Horeb, man̈xo junoc ebꞌ ix yacꞌoch ston̈ yedꞌ yuchiquin.

7 Ix yacꞌ bꞌochajqꞌue jun mantiado vin̈aj Moisés dꞌa stibꞌat campamento. Ix yacꞌan vin̈ scuch jun mantiado chiꞌ: Dꞌa Bꞌaj Schꞌox Sbꞌa Jehová. Tato ay junoc mach sbꞌat scꞌanbꞌej junoc tas dꞌa Jehová, yovalil sbꞌat dꞌa jun mantiado chiꞌ. 8 Ayic sbꞌat vin̈aj Moisés dꞌa mantiado chiꞌ, tzꞌelta lin̈an ebꞌ anima smasanil dꞌa stitac smantiado, sbꞌat qꞌuelan ebꞌ dꞌa vin̈ masanto tzꞌochcan vin̈ dꞌa yol mantiado chiꞌ. 9 Ayic tzꞌoch vin̈, tzꞌemul moynaj jun asun dꞌa stiꞌ mantiado chiꞌ yacbꞌan slolon Jehová yedꞌ vin̈. 10 A syilan ebꞌ anima chiꞌ yemul moynaj jun asun chiꞌ, tzꞌem n̈ojan ebꞌ smasanil ejmelal dꞌa Jehová.

11 Qꞌuelcꞌumbꞌa val tzꞌaj Jehová slolon yedꞌ vin̈aj Moisés chiꞌ, icha val tzꞌaj co lolon yedꞌ junoc co vachꞌcꞌool. Slajvi slolon vin̈ yedꞌ Jehová chiꞌ, sjax vin̈ dꞌa campamento. Palta axo vin̈ scolvaj yedꞌ vin̈aj Moisés chiꞌ, aton vin̈aj Josué quelem vinac, yuninal vin̈aj Nun, scann̈ej vin̈ dꞌa yol mantiado chiꞌ.

12 Ix yalan vin̈aj Moisés chiꞌ dꞌa Jehová:

—Mamin Jehová, a ach ix al dꞌayin to a in tzin cuchbꞌej jun a chon̈abꞌ tic, palta maj al-laj dꞌayin mach ol a chec colvaj vedꞌoc. Ix alani to ojtac in to ay a tzalajcꞌolal vedꞌoc alani. 13 Yuj chiꞌ, tato yel icha chiꞌ, acꞌ vojtaquejeli tas nabꞌil uuj, yic cham tzach vojtaquejeli, ol vacꞌann̈ej tzalajbꞌoc a cꞌool. Ojtac val to a jun chon̈abꞌ tzacꞌcanoch dꞌa yol in cꞌabꞌ tic to a chon̈abꞌ yaji, xchi vin̈.

14 —A in val lacꞌan ol in bꞌat edꞌoc, ol ex vacꞌ cajnaj dꞌa juncꞌolal dꞌa lum luum chiꞌ, xchi Jehová dꞌa vin̈.

15 Yuj val chiꞌ, ix tacꞌvi vin̈aj Moisés chiꞌ:

—Yel val Mamin, tato max ach bꞌat quedꞌoc, vachꞌ to max on̈ iqꞌuel dꞌa tic. 16 Tato max ach bꞌat quedꞌ ticnaic, ¿tas val tzꞌaj yojtacajeli, tato ay a tzalajcꞌolal vedꞌoc yedꞌ dꞌa ebꞌ a chon̈abꞌ tic? Tato ayachn̈ejoch quedꞌoc jun, ol checlajeloc to a chon̈abꞌ ton caji, sicꞌbꞌil on̈ el uuj dꞌa scal masanil chon̈abꞌ, xchi vin̈.

17 —A juntzan̈ lolonel tzal tic ol in cꞌulej, yujto te ay in tzalajcꞌolal edꞌoc, vojtac val a pensar sicꞌlabꞌil, xchi Jehová dꞌa vin̈.

18 —Mamin, tzin tevi val dꞌayach to tza chꞌox snivanil elcꞌoch dꞌayin, xchi vin̈.

19 Ix tacꞌvi Jehová dꞌa vin̈:

—Masanil in vachꞌcꞌolal ol in chꞌox dꞌayach. A val dꞌa ichan̈ ol valel in vachꞌil to a in ton Jehová in, ol vacꞌ in vachꞌcꞌolal dꞌa ebꞌ bꞌaj syal in cꞌol svacꞌaꞌ, ol ocꞌ in cꞌool dꞌa ebꞌ bꞌaj syal in cꞌool. 20 Palta sval dꞌayach to man̈ ol yal-laj och qꞌuelan dꞌa in sat, yujto malaj junoc mach syal yilan in sat. Tato tzꞌoch qꞌuelan junoc mach dꞌayin, elan̈chamel schami. 21 Ina dꞌa in lacꞌanil ay jun lugar bꞌaj ol yal a qꞌuecan lin̈an dꞌa yibꞌan̈ jun nivan qꞌueen. 22 Ayic ol ecꞌbꞌat in tziquiquial taꞌ, ol ach vacꞌanoch dꞌa yol spojelal qꞌuen qꞌueen chiꞌ, ol ach in macchancanoch yedꞌ in cꞌabꞌ yacbꞌan tzin ecꞌcanbꞌati. 23 Ayic ol lajvoc vecꞌcani, ol vicꞌanel in cꞌabꞌ, axon̈ej in patic ol yal ilani, axo in sat man̈ val jabꞌoc ol yal ilani, xchi Jehová.