2-3 Tato a dꞌa juntzan̈ chon̈abꞌ ol yacꞌ Jehová co Diosal chiꞌ dꞌayex, ol el specal to ay junoc vinac, ma junoc ix ix max cꞌanabꞌajan strato Jehová chiꞌ, axo dꞌa juntzan̈ comon dios tzꞌoch ejmelal, dꞌa cꞌu, dꞌa qꞌuen uj, ma dꞌa qꞌuen cꞌanal, aton juntzan̈ ix yal Jehová to max yal-laj coch ejmelal dꞌay, 4 ayic tzꞌabꞌchaj specal chiꞌ, scham val sbꞌeycꞌolaji. Tato yel ix scꞌulej jun yajbꞌentac chiꞌ jun anima chiꞌ, 5 yovalil tzeyiqꞌuel dꞌa stiel e chon̈abꞌ yic tze julqꞌuenanchamoc.

6 Palta max yal-laj yoch chamel dꞌa yibꞌan̈ jun anima chiꞌ tato junn̈ej testigo. Yovalil ay chavan̈oc, ma oxvan̈oc testigo, ichato chiꞌ tzꞌoch chamel chiꞌ dꞌa yibꞌan̈. 7 A ebꞌ testigo chiꞌ sbꞌabꞌlaj julanoch qꞌueen dꞌa jun anima chiꞌ. Ichato chiꞌ sjulanoch qꞌueen masanil ebꞌ anima dꞌay. Icha chiꞌ tzꞌaj yel jun chucal chiꞌ dꞌa e cal.

8 Tato ay junoc tas tzꞌacꞌji e chꞌolbꞌitej yaji, palta tato max nachajel eyuuj tas tzeyutej e bꞌoan yaji, icha junoc oval yic chamel, ma yuj junoc mach slajvi, ma junocxo comon oval sqꞌue vaan dꞌa e cal, tzex bꞌat dꞌa jun lugar sicꞌbꞌilel yuj Jehová co Diosal scajnubꞌoc, 9 tze mol alej yedꞌ ebꞌ sacerdote yin̈tilal Leví yedꞌ ebꞌ juez ayoch dꞌa yopisio. A ebꞌ chiꞌ tzꞌalani tas tzꞌaj sbꞌoi. 10 A exxo tic tze cꞌanabꞌajej tas tzꞌaj yalan ebꞌ chiꞌ. 11 Icha val tzꞌaj yalchaj chiꞌ, icha chiꞌ tze cꞌulej. Malaj val jabꞌoc tas tze qꞌuexaꞌ. 12 Palta tato ay mach tzꞌecꞌ dꞌa yibꞌan̈, scomon bꞌoan dꞌa yol yicoꞌ, man̈ ichoc ix aj yalan ebꞌ sacerdote ay yopisio yuj Dios, mato max scꞌanabꞌajej pax tas ix yal vin̈ juez, a jun chiꞌ tzꞌoch chamel dꞌa yibꞌan̈. Icha chiꞌ tzꞌaj satel jun pital tzꞌoch dꞌa tas syal ebꞌ yajal chiꞌ dꞌa e cal. 13 Ayic ol yabꞌan jun chiꞌ ebꞌ chon̈abꞌ, ol xiv ebꞌ, man̈xo ol scꞌulej ebꞌ icha chiꞌ.

14 Ayic ayexxo och dꞌa sat lum luum ol yacꞌ Jehová co Diosal dꞌayex, ayic toxo ix eyacꞌ ganar eyicꞌan luum, cajan exxo taꞌ, talaj tze comon alej icha tic: Caqꞌuecoch junoc co reyal ol acꞌan yajalil dꞌayon̈, icha juntzan̈ chon̈abꞌ ay dꞌa co lacꞌanil tic. Tato ol eyal icha chiꞌ, 15 a junoc quetchon̈abꞌ ol siqꞌuel Jehová co Diosal, aꞌ ol eyacꞌoch e reyaloc. Man̈oc junoc chꞌoc chon̈abꞌil ol eyacꞌoch e reyaloc, yujto man̈ quetchon̈abꞌoc. 16 Palta a jun rey chiꞌ, mocabꞌ tzijtumoc nocꞌ schej smolbꞌej, mocabꞌ schecbꞌat ebꞌ vinac dꞌa Egipto yic sbꞌat ebꞌ yicꞌcot jantacoc nocꞌ chej taꞌ, yujto a Jehová alannaccani to man̈xa bꞌaqꞌuin̈ tzex bꞌatxi dꞌa Egipto chiꞌ. 17 Mocabꞌ tzijtumoc tzꞌaj ebꞌ ix yetbꞌeyum, yic max juviel dꞌa yichan̈ Jehová yuj ebꞌ ix. Mocabꞌ ste molbꞌej qꞌuen oro yedꞌ qꞌuen plata.

18 Ayic tzꞌoch jun rey chiꞌ dꞌa yopisio, schec tzꞌibꞌchajelta scopiail juntzan̈ scꞌaybꞌubꞌal Dios tic, aton juntzan̈ ayecꞌ dꞌa yol scꞌabꞌ ebꞌ sacerdote yin̈tilalcan Leví. 19 Yovalil yedꞌnacn̈ej scopiail jun scꞌaybꞌubꞌal Dios tic, scꞌaybꞌan dꞌa junjun cꞌu, yic vachꞌ ay yelcꞌoch Jehová co Diosal dꞌa yol sat, ay pax yelcꞌoch jun cꞌaybꞌubꞌal tic dꞌa yol sat, sbꞌeybꞌalan tas syal juntzan̈ checnabꞌil tic. 20 Yic vachꞌ max snaꞌpaxi to nivan yelcꞌoch dꞌa yichan̈ ebꞌ quetchon̈abꞌ, max yiqꞌuel sbꞌa dꞌa juntzan̈ schecnabꞌil Jehová tic. Icha chiꞌ ol aj snajtilax yopisio yedꞌ yin̈tilal dꞌa e cal.