A smacbꞌen ebꞌ sacerdote yin̈tilalcan vin̈aj Leví
18
A ebꞌ sacerdote yin̈tilalcan Leví yedꞌ masanil ebꞌ yetlevitail ebꞌ, malaj smacbꞌen lum ebꞌ ol yicꞌaꞌ, icha juntzan̈xo ebꞌ quetisraelal. A juntzan̈ silabꞌ sn̈usjitzꞌa dꞌa Jehová ol schi ebꞌ, ma ol sva ebꞌ yic ol ecꞌ tiempo yuj ebꞌ. A tas yic Jehová, a chiꞌ yic ebꞌ. 2 Man̈ ol scha slum ebꞌ icha yic juntzan̈ ebꞌ quetchon̈abꞌ, yujto a tas yic Jehová, a ayoch smacbꞌenoc ebꞌ, icha ajnac yalan Jehová.3 A tas yictaxon ebꞌ sacerdote dꞌa nocꞌ vacax yedꞌ dꞌa nocꞌ calnel syacꞌ ebꞌ anima silabꞌil, aton juntzan̈ tic: Sjen̈jabꞌ nocꞌ, sbꞌacꞌchil stiꞌ nocꞌ yedꞌ spimal stzucutz nocꞌ. 4 Yic pax ebꞌ yaj ixim bꞌabꞌel trigo, bꞌabꞌel vino, bꞌabꞌel aceite yedꞌ nocꞌ bꞌabꞌel lana tzꞌel dꞌa nocꞌ calnel ayic sjoxchaj nocꞌ. 5 Yujto a Jehová co Diosal ix sicꞌanel ebꞌ yin̈tilal Leví dꞌa scal masanil juntzan̈xo quin̈tilal, yic syacꞌ servil Jehová ebꞌ dꞌa masanil tiempo.
6 Tato ay junoc levita dꞌa e cal, te ay sgana sbꞌat dꞌa jun lugar ix sicꞌcanel Jehová yic tzꞌoch scajnubꞌoc yic bꞌat munlaj taꞌ, 7 syal smunlaji. Lajan tzꞌaj icha ebꞌ yetlevitail smunlaj taꞌ, 8 schaan svael icha yic ebꞌ chiꞌ, vachꞌchom ay tas ay dꞌay.
Cachnabꞌil yuj sbꞌeybꞌal ebꞌ chꞌoc chon̈abꞌil
9 Ayic ayexxoecꞌ dꞌa lum luum ol yacꞌ Jehová co Diosal dꞌayex, man̈ e bꞌeybꞌalej sbꞌeybꞌal juntzan̈ ebꞌ anima cajan taꞌ. 10 Malajocabꞌ junoc ex tze n̈ustzꞌa eyuninal silabꞌil. Malajocabꞌ junoc ex tzeyacꞌ chum, ma tze naanel tastac ol ujoc, ma ajbꞌaalil, 11 ma tze cꞌuman spixan ebꞌ chamnac eyalani. 12 Yujto a masanil ebꞌ scꞌulan juntzan̈ chucal chiꞌ, te aycot yoval scꞌol Jehová dꞌa yibꞌan̈ ebꞌ. Yujto yuj juntzan̈ tas te chuc scꞌulej ebꞌ chiꞌ, yuj chiꞌ ol satjoquel ebꞌ dꞌa eyichan̈ yuj Jehová chiꞌ. 13 Yovalil te vachꞌ tzeyutej e bꞌeybꞌal dꞌa yichan̈ Jehová chiꞌ.
Jun schecabꞌ Jehová ol javoc
14 A ebꞌ anima ay dꞌa juntzan̈ chon̈abꞌ ol eyiquej chiꞌ, syacꞌoch scꞌool ebꞌ tas syal ebꞌ ajchum yedꞌ dꞌa ebꞌ ajbꞌaal. A exxo jun, max schalaj scꞌol Jehová co Diosal tato icha chiꞌ tze cꞌulej. 15 A co Diosal chiꞌ ol sicꞌanel junoc quetchon̈abꞌ tic schecabꞌoc, icha ix yutej in sicꞌanel a in tic. Yovalil ol e cꞌanabꞌajej tas ol yalaꞌ. 16 Aton tic e cꞌannac dꞌa Jehová co Diosal ayic ayon̈ ecꞌ dꞌa lum vitz Horeb, dꞌa jun cꞌu a molan on̈ ecꞌ taꞌ, eyalan icha tic: Man̈xalaj co gana scabꞌ sjaj Jehová co Diosal chiꞌ, ma quilan jun nivan cꞌacꞌ chiꞌ, yic vachꞌ max on̈ chami, xe chi. 17 Yuj chiꞌ yal Jehová dꞌayin icha tic: Vachꞌ tas ix yal ebꞌ anima chiꞌ.
18 Ol vicꞌchaan̈ junoc in checabꞌ dꞌa e cal icha ach tic, junoc eyetchon̈abꞌ. Aꞌ in ol vacꞌ yojtaquejel tas ol yalaꞌ, ol yalan dꞌayex masanil tas ol val chiꞌ. 19 A mach max chaan yabꞌ tas ol in chec yal jun in checabꞌ chiꞌ, yovalil ol vacꞌ yovalil dꞌay, yujto a jun in checabꞌ chiꞌ ol lolon in qꞌuexuloc.
20 Axo pax mach syaloch sbꞌa in checabꞌoc, palta malaj tas sval dꞌay, ma jun, schecabꞌ junocxo comon dios, a jun chiꞌ yovalil schami, xchican Jehová chiꞌ. 21 Palta tato a ex tic ol e naꞌa: ¿Tas val ol aj cojtacaneli tato man̈oc Jehová schecan yal jun checabꞌ chiꞌ? tato xe chi. 22 Tato max elcꞌoch tas syal jun syesejoch sbꞌa schecabꞌoc Jehová chiꞌ, snachajel eyuuj to man̈oc Jehová tzꞌacꞌan yalaꞌ, an̈ej dꞌa yol yic snaqꞌuei. Yuj chiꞌ man̈ ex xiv dꞌay.