A Chꞌan̈ Libro
ÉXODO
Ya ecꞌnac ebꞌ yin̈tilal vin̈aj Jacob dꞌa Egipto
1
Aton sbꞌi ebꞌ yuninal vin̈aj Israel tic, ebꞌ ajun yedꞌ vin̈ ayic scꞌochnac vin̈ dꞌa Egipto yedꞌ yal yuninal junjun ebꞌ: 2 Aton vin̈aj Rubén, vin̈aj Simeón, vin̈aj Leví, vin̈aj Judá, 3 vin̈aj Isacar, vin̈aj Zabulón, vin̈aj Benjamín, 4 vin̈aj Dan, vin̈aj Neftalí, vin̈aj Gad yedꞌ vin̈aj Aser. 5 Ay 70 sbꞌisul ebꞌ yin̈tilal vin̈aj Jacob chiꞌ dꞌa smasanil. A vin̈aj José, aytaxon ecꞌ vin̈ dꞌa Egipto chiꞌ.6 A vin̈aj José chiꞌ yedꞌ masanil ebꞌ yucꞌtac yedꞌ ebꞌ ajun yedꞌ vin̈aj Jacob chiꞌ, junjunal ix laj chamel ebꞌ, 7 palta tzijtumto yin̈tilal ebꞌ ix elcani, ix te qꞌuibꞌ sbꞌisul ebꞌ. Yelxo val te ay smay ix aj ebꞌ. Ix bꞌudꞌjiel masanil yol yic Egipto chiꞌ yuj ebꞌ.
8 Nivanxo tiempo ayecꞌ ebꞌ taꞌ, axo ix aji, ix och junxo vin̈ rey dꞌa Egipto chiꞌ. Man̈xo yojtacoc jabꞌoc yabꞌixal vin̈aj José chiꞌ vin̈. Ix yalan vin̈ dꞌa smasanil ebꞌ chon̈abꞌ: 9 Tzam eyil ticnaic te tzijtum ix aj juntzan̈ ebꞌ israel tic, yelxo val ay smay ebꞌ dꞌa quichan̈. 10 A ticnaic yovalil sco naꞌ tas tzꞌaj ebꞌ, yic vachꞌ man̈ ol te qꞌuibꞌ sbꞌisul ebꞌ, yujto talaj ay bꞌaqꞌuin̈ ay mach scot ul yacꞌ oval dꞌayon̈, syacꞌanoch sbꞌa ebꞌ yedꞌ ebꞌ cajcꞌol chiꞌ, axo ebꞌ vin̈ smolan sbꞌa yacꞌan oval chiꞌ quedꞌoc. Tzam elcan ebꞌ libre dꞌa tic, xchi vin̈ rey chiꞌ.
11 Yuj chiꞌ, ix acꞌjioch yilumal ebꞌ israel chiꞌ, ix acꞌjioch ebꞌ dꞌa munlajel te ya. Ix checji sbꞌo ebꞌ juntzan̈ chon̈abꞌ te nivac, aton Pitón yedꞌ Ramesés. A dꞌa juntzan̈ chon̈abꞌ chiꞌ ix smolbꞌej ixim trigo vin̈ rey. 12 Vachꞌchom te ya tzꞌecꞌ ebꞌ israel yuj ebꞌ aj Egipto chiꞌ, palta an̈ejaꞌ ste qꞌuibꞌ sbꞌisul ebꞌ, yuj chiꞌ ix te xiv ebꞌ aj Egipto chiꞌ dꞌa ebꞌ.
13 Ix acꞌjioch ebꞌ dꞌa munlajel te ya. 14 Yelxo te ya tzꞌutaj ebꞌ vin̈ dꞌa munlajel. Ix acꞌchajoch ebꞌ dꞌa tecꞌoj socꞌom yedꞌ bꞌoꞌoj xan. Man̈ocn̈ej chiꞌ, ay ebꞌ smunlajpax dꞌa avoj trigo yedꞌ juntzan̈xo munlajel. Yelxo val ilbꞌajcꞌol tzꞌutaj ebꞌ. 15 Ay val junxo ix utaj ebꞌ yuj vin̈ rey chiꞌ. Ay jun checnabꞌil ix yacꞌ vin̈ dꞌa ix Sifra yedꞌ dꞌa ix Fúa, aton ebꞌ ix vetzꞌvajum yaj dꞌa scal ebꞌ ix hebrea (ma ebꞌ ix israel), ix yalan vin̈ icha tic:
16 —Ayic tzeyilan sbꞌo scꞌol ebꞌ ix hebrea chiꞌ, tzan̈ej val alji jun neneꞌ unin chiꞌ, tzeyilani tato vinac, tze macꞌchamoc. Tato ix, qꞌuibꞌocabꞌi, xchi vin̈.
17 Palta a ebꞌ ix vetzꞌvajum chiꞌ, xiv ebꞌ ix dꞌa Dios. Maj scꞌanabꞌajejlaj ebꞌ ix icha ix yal vin̈ rey chiꞌ, ton̈ej syiloch ebꞌ ix ayic tzꞌalji ebꞌ vinac unin chiꞌ. 18 Ayic ix yabꞌan jun chiꞌ vin̈ rey, ix avtaj ebꞌ ix yuj vin̈, ix yalan vin̈ dꞌa ebꞌ ix:
—¿Tas yuj ton̈ej tzeyiloch juntzan̈ vinac unin tzꞌalji chiꞌ? xchi vin̈ dꞌa ebꞌ ix. Yuj chiꞌ ix yalan ebꞌ ix:
19 —Mamin, man̈ lajanoc ebꞌ ix hebrea yedꞌ ebꞌ ix quetchon̈abꞌ. A ebꞌ ix hebrea chiꞌ te ay yip snivanil ebꞌ ix, manto on̈ cꞌochlaj, sbꞌo scꞌol ebꞌ ix, xchi ebꞌ ix.
20 A yuj jun tas ix scꞌulej ebꞌ ix vetzꞌvajum chiꞌ, ix te qꞌuibꞌ sbꞌisul ebꞌ israel. Yelxo val ay smay ebꞌ. 21 Yujto ay yelcꞌoch Dios dꞌa yol sat ebꞌ ix vetzꞌvajum chiꞌ, yuj chiꞌ ix yacꞌ svachꞌcꞌolal Dios chiꞌ dꞌa yibꞌan̈ ebꞌ ix. 22 Ayic ix yilan vin̈ rey to max yal-laj icha chiꞌ, ix yalan vin̈ dꞌa ebꞌ yetchon̈abꞌ smasanil icha tic: Masanil ebꞌ vinac unin tzꞌalji dꞌa scal ebꞌ hebreo tic, tzeyumcanbꞌat ebꞌ dꞌa yol aꞌ Nilo. Tato ix unin jun, qꞌuibꞌocabꞌi, xchi vin̈.