A yaljubꞌal vin̈aj Moisés
2
A dꞌa jun tiempoal chiꞌ, ay jun vin̈ vinac dꞌa scal ebꞌ yin̈tilal vin̈aj Leví, ix yicꞌ jun ix ix vin̈, an̈ejaꞌ yin̈tilal pax ix vin̈aj Leví chiꞌ. Ay chavan̈ yuneꞌ ebꞌ. 2 Ix alji junxo svinac unin ix, ix yilan ix to te vachꞌ yilji, oxeꞌ ujal ix scꞌubꞌejel ix. 3 Axo yic majxo yal-laj scꞌubꞌanel jun neneꞌ unin chiꞌ ix jun, ix yicꞌancot jun xuuc ix, ix yacꞌanoch juntzan̈ asfalto ix dꞌay icha tzataj yic snubꞌlaj sbꞌa, yic vachꞌ max ochlaj aꞌ dꞌa yool. Ix lajvi chiꞌ ix yacꞌanem vin̈ neneꞌ unin chiꞌ ix dꞌa yool, ix bꞌat yacꞌancan ix dꞌa scal juntzan̈ te teꞌ icha teꞌ aj dꞌa stiꞌ aꞌ nivan Nilo. 4 Axo jun ix yanabꞌ vin̈ unin chiꞌ, najatto ix can ix yic syilbꞌat ix tas ol aj vin̈.5 Axo ix aji, ix cꞌoch ix yisil vin̈ rey sbꞌic sbꞌa dꞌa stiꞌ aꞌ chiꞌ. Yacbꞌan van sbꞌeyecꞌ ebꞌ ix schecabꞌ ix dꞌa stitac aꞌ chiꞌ, ix yilanbꞌat ix dꞌa scal juntzan̈ teꞌ icha teꞌ aj chiꞌ to ayecꞌ jun teꞌ xuuc taꞌ, ix schecanbꞌat jun ix schecabꞌ ix yic bꞌat yicꞌancot jun xuuc chiꞌ. 6 Ayic ix sjacan teꞌ ix, ix yilan ix to neneꞌ unin jun ayem dꞌa yool, van yoqꞌui, yuj chiꞌ ix ocꞌ scꞌol ix dꞌay, ix yalan ix:
—Yic am ebꞌ ix hebrea jun unin tic, xchi ix.
7 Axo ix yanabꞌ vin̈ unin chiꞌ, ix cꞌoch ix dꞌa ix yisil vin̈ rey chiꞌ, ix yalan ix:
—¿Ma max yal a cꞌol bꞌat vavtej junoc ix hebrea yic vachꞌ syacꞌ chunoc jun neneꞌ unin tic ix dꞌayach? xchi ix.
8 —Ixic, avtej junoc ix, xchi ix dꞌa ix unin chiꞌ. Yuj chiꞌ ix bꞌat ix yal dꞌa ix snun. Axo ix ja ix nunabꞌil chiꞌ, ix yalan ix yisil vin̈ rey chiꞌ icha tic:
9 —Icꞌbꞌat jun neneꞌ unin tic, tzilan qꞌuibꞌoc, ol ach in tupuꞌ, xchi ix. Ix yicꞌanbꞌat vin̈ neneꞌ unin chiꞌ ix snun chiꞌ, ix sqꞌuibꞌtzitan vin̈ ix. 10 Axo yic vachꞌtacxo vin̈, ix bꞌat acꞌjican vin̈ yuj ix snun chiꞌ dꞌa ix yisil vin̈ rey chiꞌ. Axo ix yisil vin̈ rey chiꞌ, icha val yuneꞌ ix ix yutej vin̈. Moisés ix yacꞌ ix sbꞌioc. Ix yalan ix icha tic:
—Yujto a dꞌa yol a aꞌ ix vicꞌqꞌueta jun unin tic, yuj chiꞌ Moisés* ol sbꞌiej, xchi ix.
Ix el vin̈aj Moisés dꞌa Egipto
11 Ayic tecꞌanxo vin̈aj Moisés chiꞌ, ix bꞌat vin̈ yil ebꞌ yetisraelal chiꞌ, ix yilan vin̈ to te ya munlajel bꞌaj ayoch ebꞌ. Van smacꞌjipax jun vin̈ yetchon̈abꞌ vin̈ yuj jun vin̈ aj Egipto ix yilan vin̈. 12 Ix ecꞌ qꞌueleloc vin̈, malaj mach van yilani. Yuj chiꞌ ix smacꞌcham jun vin̈ aj Egipto chiꞌ vin̈, ix smucancanem vin̈ dꞌa scal qꞌuen arena. 13 Axo dꞌa junxo cꞌu ix bꞌatxi vin̈ yil ebꞌ yetchon̈abꞌ chiꞌ, axo ix yilan vin̈ van yacꞌan oval chavan̈ ebꞌ vin̈ yetchon̈abꞌ vin̈ chiꞌ. Ix scꞌanbꞌan vin̈ dꞌa vin̈ ix macꞌvaj chiꞌ:
—¿Tas yuj tza macꞌ vin̈ etchon̈abꞌ tic? xchi vin̈.
14 Ix tacꞌvi vin̈ chiꞌ:
—¿Mach ix ach acꞌanoch yajalil, ma juezal dꞌa co cal tic? ¿Mato tza nibꞌej tzin a macꞌcham icha utej vin̈ aj Egipto evi? xchi vin̈. Ayic ix yabꞌan vin̈ tas ix yal vin̈ chiꞌ, ix xiv vin̈, yujto ix nachajel yuj vin̈ to ix el specal to ix smacꞌcham vin̈ aj Egipto chiꞌ vin̈. 15 A ix yabꞌan specal jun chiꞌ vin̈ rey, ix yacꞌanbꞌat sayumal vin̈aj Moisés chiꞌ vin̈ yic smiljicham vin̈. Yuj chiꞌ ix bꞌat vin̈aj Moisés chiꞌ elelal dꞌa yol yic Madián. Ayic ix cꞌoch vin̈ dꞌa stiꞌ jun aꞌ ucꞌbꞌilaꞌ, ix em cꞌojan vin̈ taꞌ.
16 Ay jun vin̈ sacerdote scuchan Reuel cajan dꞌa jun lugar chiꞌ, ay ucvan̈ yisil vin̈. Ix xidꞌecꞌ ebꞌ ix dꞌa aꞌ ucꞌbꞌilaꞌ chiꞌ, yic syacꞌan bꞌudꞌjoc teꞌ jucubꞌ ebꞌ ix yic syucꞌ aꞌ nocꞌ scalnel vin̈ smam ebꞌ ix chiꞌ. 17 Ix javi juntzan̈ ebꞌ vin̈ tan̈vum calnel, ix spechanel ebꞌ ix ebꞌ vin̈ taꞌ. Ix yilan vin̈aj Moisés, ix qꞌue jucnaj vin̈, ix bꞌat vin̈ scol ebꞌ ix, ix yacꞌan aꞌ vin̈ yucꞌ nocꞌ scalnel ebꞌ ix chiꞌ. 18 Ayic ix cꞌochxi ebꞌ ix dꞌa vin̈ smam chiꞌ, aton vin̈aj Reuel,* ix scꞌanbꞌan vin̈ dꞌa ebꞌ ix:
—¿Tas yuj ix pet ex jax ticnaic? xchi vin̈.
19 Axo ix tacꞌvi ebꞌ ix:
—Ay jun vin̈ aj Egipto ix on̈ colan dꞌa ebꞌ vin̈ tan̈vum calnel, ix yicꞌanqꞌueta aꞌ vin̈ yucꞌ nocꞌ co calnel tic, xchi ebꞌ ix.
20 —¿Bꞌajtil ix can vin̈ eyuuj? ¿Tas yuj maj eyicꞌcot vin̈ dꞌa tic? Ixiquec elan̈chamel eyavtejcot vin̈ yic ol va vin̈, xchi vin̈ mamabꞌil chiꞌ.
21 Icha chiꞌ ix aj scꞌochcan vin̈aj Moisés dꞌa spat vin̈aj Jetro chiꞌ. Ayic ix ecꞌbꞌat jabꞌoc tiempo, ix yacꞌan jun yisil vin̈ yetbꞌeyumoc vin̈aj Moisés chiꞌ, aton ix Séfora. 22 Ix alji jun yuneꞌ ix, Gersón* ix yacꞌ vin̈aj Moisés chiꞌ sbꞌiej, ix yalan vin̈: Chꞌoc chon̈abꞌil vaj dꞌa jun lugar tic, xchi vin̈.
23 Ayic ayxo tiempo yajecꞌ vin̈ dꞌa Madián chiꞌ, ix cham vin̈ sreyal Egipto. Palta axo ebꞌ israel an̈ejaꞌ yabꞌan syail ebꞌ yujto checabꞌ yaj ebꞌ taꞌ. Ichato chiꞌ bꞌian, ix abꞌji scuscꞌolal ebꞌ yedꞌ syaelal yuj Dios. 24 Ix abꞌji yocꞌ ebꞌ yuuj, ix snaancot strato yedꞌ vin̈aj Abraham, vin̈aj Isaac yedꞌ vin̈aj Jacob. 25 Yuj chiꞌ ix ilji syaelal ebꞌ yuj Dios, ix ocꞌ scꞌol dꞌa ebꞌ.