Ix avtaj vin̈aj Moisés yuj Dios
3
A vin̈aj Moisés chiꞌ tan̈voj calnel ix yacꞌ vin̈ yuj vin̈ sn̈iꞌ, aton vin̈aj Jetro, sacerdote dꞌa ebꞌ aj Madián. Ay jun cꞌu ix bꞌat vin̈aj Moisés chiꞌ tan̈voj calnel, ix cꞌaxpajecꞌ vin̈ dꞌa tzꞌinan luum masanto ix cꞌoch vin̈ dꞌa yich jun lum vitz scuchan Horeb* aton dꞌa jun lum vitz chiꞌ bꞌaj ix schꞌox sbꞌa Dios dꞌa vin̈. 2 Ataꞌ ix schꞌox sbꞌa jun yángel Jehová dꞌa scal jun teꞌ qꞌuiix ayoch scꞌacꞌal. Vachꞌchom te ov sqꞌue tin̈ton scꞌacꞌal teꞌ, palta max tzꞌaemlaj teꞌ. 3 Ix snaan vin̈aj Moisés chiꞌ: Te satubꞌtac yilji jun tic, tas yuj max tzꞌaem jun teꞌ qꞌuiix chiꞌ. Tecan bꞌat vilaꞌ, xchi vin̈.4 Ayic ix yilan Jehová to van snitzancot sbꞌa vin̈, ix avajelta dꞌa scal teꞌ cꞌacꞌ chiꞌ:
—Moisés, Moisés, xchi.
—Oy, Mamin, xchi vin̈.
5 Ix yalan Jehová:
—Man̈ a nitzcot a bꞌa dꞌa tic. Iqꞌuel a xan̈abꞌ yujto a jun lugar tic vicoꞌ, a in ayinecꞌ dꞌay. 6 A in tic, sDiosal in a mam, sDiosal in pax ebꞌ a mam icham, aton vin̈aj Abraham, vin̈aj Isaac yedꞌ vin̈aj Jacob, xchi.
Ayic ix yabꞌan vin̈aj Moisés icha chiꞌ, ix smacan sat vin̈, yujto ix xiv vin̈ yoch qꞌuelan dꞌa Dios chiꞌ. 7 Ix yalan Jehová chiꞌ dꞌa vin̈:
—Svil val to ilbꞌajcꞌol tzꞌutaj ebꞌ in chon̈abꞌ dꞌa Egipto. Yelxo val svabꞌ yocꞌ ebꞌ yuj tas tzꞌutaj yuj ebꞌ ayoch yilumaloc. Vojtac to yelxo val ilbꞌajcꞌol scꞌulej in chon̈abꞌ taꞌ. 8 Yuj chiꞌ ix in emuli, tzin colanel ebꞌ dꞌa yol scꞌabꞌ ebꞌ aj Egipto chiꞌ. Ol viqꞌuel ebꞌ dꞌa jun lugar chiꞌ, ol vicꞌanbꞌat ebꞌ dꞌa junxo lum luum yelxo te vachꞌ, levan, te yax sat. A ebꞌ cajan dꞌa sat jun luum chiꞌ, aton ebꞌ cananeo, ebꞌ hitita, ebꞌ amorreo, ebꞌ ferezeo, ebꞌ heveo yedꞌ pax ebꞌ jebuseo. 9 Yelcꞌolal sqꞌue yav ebꞌ in chon̈abꞌ Israel stevi dꞌayin, yujto te ya yaj ebꞌ dꞌa chon̈abꞌ Egipto chiꞌ. 10 Yuj chiꞌ, tzach bꞌat ticnaic, tzach vacꞌbꞌat dꞌa yichan̈ vin̈ sreyal Egipto chiꞌ, yic sbꞌat ach lolonoc yedꞌ bꞌat icꞌanelta in chon̈abꞌ dꞌa Egipto chiꞌ, xchi dꞌa vin̈.
11 Ix yalan vin̈aj Moisés chiꞌ:
—¿Tas vaj a in tic, yuj chiꞌ ol yal bꞌat in lolon dꞌa yichan̈ vin̈ rey chiꞌ, yic ol vicꞌanelta ebꞌ vetchon̈abꞌ chiꞌ? xchi vin̈.
12 Yuj chiꞌ ix tacꞌvixi Jehová icha tic:
—Man̈ acꞌ pensar, a in ol in och edꞌoc. Tic svacꞌ junoc chꞌoxnabꞌil dꞌayach to a in tzach in checbꞌati: Ayic toxo ix iqꞌuelta in chon̈abꞌ dꞌa Egipto chiꞌ, ol ex ja eyaqꞌuem e bꞌa dꞌayin dꞌa jun vitz tic, xchi.
13 Ix tacꞌvixi vin̈aj Moisés chiꞌ icha tic:
—A ol aj jun tic, qꞌuinaloc bꞌat in lolon dꞌa ebꞌ vetisraelal, ol valan dꞌa ebꞌ to a co Diosal yedꞌ ebꞌ co mam quicham, a ix in checancot dꞌayex, ta xin chi dꞌa ebꞌ, axom ol yalan ebꞌ dꞌayin: ¿Tas sbꞌi jun mach tzal chiꞌ? xcham ebꞌ dꞌayin. ¿Tas svutejpax tacꞌvoc in bꞌa? xchi vin̈.
14 Yuj chiꞌ ix tacꞌvi Jehová dꞌa vin̈: A IN TIC AYIN TAXON EQꞌUI. Icha tic tzutej alan dꞌa ebꞌ etchon̈abꞌ chiꞌ: A jun mach A IN TON TIC sbꞌi, aꞌ tzin checancot dꞌayex, xa chi, xchi Jehová chiꞌ.
15 Ix yalanxi Jehová chiꞌ dꞌa vin̈aj Moisés chiꞌ:
—Tzalpax dꞌa ebꞌ etchon̈abꞌ chiꞌ icha tic: A Jehová* co Diosal yedꞌ ebꞌ co mam quicham, aton vin̈aj Abraham, vin̈aj Isaac yedꞌ vin̈aj Jacob, aꞌ ix in checancoti yic tzul in colvaj dꞌayex, xa chi dꞌa ebꞌ. A jun in bꞌi tic ay dꞌa juneln̈ej, aton in bꞌi tic ol bꞌinaj yuj ebꞌ eyin̈tilal ayic ol bꞌeyn̈ejbꞌatoc. 16 Ixic, tza molbꞌan ebꞌ yichamtac vinaquil Israel, tzalani: A Jehová co Diosal yedꞌ ebꞌ co mam quicham, aton vin̈aj Abraham, vin̈aj Isaac yedꞌ vin̈aj Jacob, aꞌ ix schꞌox sbꞌa dꞌayin, ix yalani to syilaꞌ tas tzex utaj dꞌa Egipto tic. 17 Ix yalan dꞌayin to ol ex scolel dꞌa syaelal dꞌa tic, ol ex yicꞌanbꞌat dꞌa jun lum luum te vachꞌ, te ay syaxil sat, aton lum bꞌaj cajan ebꞌ cananeo, ebꞌ hitita, ebꞌ amorreo, ebꞌ ferezeo yedꞌ ebꞌ jebuseo, xa chi dꞌa ebꞌ. 18 Ol scha yabꞌ ebꞌ yichamtac vinaquil chon̈abꞌ chiꞌ tas ol alaꞌ, ol bꞌat och ebꞌ edꞌoc bꞌaj ay vin̈ sreyal Egipto chiꞌ. Ol alani: A Jehová co Diosal a on̈ hebreo on̈ tic, aꞌ ix schꞌox sbꞌa dꞌayon̈. Yuj chiꞌ tzon̈ a chabꞌat dꞌa tzꞌinan luum yic scacꞌ co silabꞌ dꞌa co Diosal a on̈ tic. 19 Vachꞌchom tzin chec al jun tic, palta vojtac to man̈ ol ex chajiel-laj yuj jun rey chiꞌ. An̈ej dꞌa acꞌbꞌil puralil ol aj ex schaanel vin̈. 20 Yuj chiꞌ ol in chꞌox val vipalil dꞌa vin̈, ol vacꞌ yaelal dꞌa yibꞌan̈ nación Egipto yuj tas satubꞌtac ol in cꞌulej taꞌ, axo eyactajelta chiꞌ yuj vin̈ bꞌian. 21 Yuj pax chiꞌ, a in ol vacꞌoch dꞌa spensar ebꞌ aj Egipto chiꞌ yic nivan ol aj eyelcꞌoch dꞌa yol sat ebꞌ. Yuj chiꞌ ayic ol ex el chiꞌ nivan silabꞌ ebꞌ ol yacꞌ dꞌayex, man̈ ton̈ejoc ol e muchꞌ e cꞌabꞌ ol ex bꞌatoc. 22 Junjun ebꞌ ix israel ol scꞌan tastac ay dꞌa ebꞌ ix aj Egipto cajan dꞌa slacꞌanil, ma yaln̈ej mach ixal cajan taꞌ, yic syacꞌ plata ebꞌ, ma oro, ma pichul yic tzeyacꞌoch yedꞌ eyuninal. Icha chiꞌ ol aj eyicꞌanbꞌat sbꞌeyumal ebꞌ aj Egipto chiꞌ, xchi Jehová chiꞌ.