—Man̈ ol yacꞌochlaj ebꞌ dꞌa scꞌool, man̈ ol scꞌanabꞌajejlaj ebꞌ tas ol valaꞌ, axom ol yutej ebꞌ yalan dꞌayin: Mato val yel ix schꞌox sbꞌa Jehová chiꞌ dꞌayach mato maay, scham ebꞌ dꞌayin, xchi vin̈.

2 —¿Tas jun edꞌnac chiꞌ? xchi Jehová dꞌa vin̈.

—A teꞌ in cꞌococh, xchi vin̈.

3 —Actejem teꞌ dꞌa sat lum chiꞌ, xchi Jehová chiꞌ. Ix yactanem teꞌ scꞌococh vin̈ chiꞌ dꞌa sat luum, elan̈chamel ix och teꞌ chanil. Ayic ix yilan jun chiꞌ vin̈aj Moisés chiꞌ, ix el lemnaj vin̈. 4 Ix yalanxi Jehová dꞌa vin̈:

—Yam sn̈e nocꞌ chan chiꞌ, xchi. Ix syaman sn̈e nocꞌ chiꞌ vin̈, ix ochxi scꞌocochoc vin̈.

5 —Yuj tas toxo ix il tic, ol yacꞌoch ebꞌ dꞌa scꞌol to ix in chꞌox in bꞌa dꞌayach, a in ton Jehová a Diosal in, sDiosal in pax ebꞌ e mam eyicham, aton vin̈aj Abraham, vin̈aj Isaac yedꞌ vin̈aj Jacob, xchi. 6 Ix yalanxi Jehová chiꞌ dꞌa vin̈:

—A ticnaic, aqꞌuem a cꞌabꞌ dꞌa sn̈iꞌ a cꞌool, xchi. Ix yacꞌanem scꞌabꞌ vin̈ chiꞌ dꞌa sn̈iꞌ scꞌool, axo ix yicꞌanelta scꞌabꞌ vin̈ chiꞌ, ayxo och yabꞌil lepra dꞌay, toxon̈ej sacvequinac yilji icha qꞌuen cheev. 7 Ix yalanxi Jehová chiꞌ:

—Acꞌxiem a cꞌabꞌ chiꞌ dꞌa sn̈iꞌ a cꞌool, xchi. Ix yacꞌanxiem scꞌabꞌ vin̈aj Moisés chiꞌ dꞌa sn̈iꞌ scꞌol chiꞌ, axo ix yicꞌanxiqꞌueta scꞌabꞌ vin̈ chiꞌ, te vachꞌxo icha val snivanil vin̈ smasanil. 8 Ix yalan Jehová:

—Tato max yacꞌoch ebꞌ anima chiꞌ dꞌa scꞌol tas tzalaꞌ, tato max scꞌanabꞌajej pax ebꞌ yuj jun bꞌabꞌel chꞌoxnabꞌil tic, yuj jun schabꞌil ol yacꞌoch ebꞌ dꞌa scꞌool. 9 Palta tato max yacꞌoch ebꞌ dꞌa scꞌool, max schaanpax ebꞌ yabꞌ yuj chabꞌ chꞌoxnabꞌil tic, tzicꞌqꞌueta jabꞌoc a aꞌ dꞌa aꞌ nivan Nilo, tza secanem aꞌ dꞌa sat luum, tzan̈ej val em aꞌ dꞌa sat lum chiꞌ, tzꞌoch aꞌ chicꞌal, xchi Jehová.

10 Ix lajvi chiꞌ, ix yalan vin̈aj Moisés chiꞌ dꞌa Jehová icha tic:

—Ay, ach Mamin Vajalil. Comonoc man̈oc in tzin a checbꞌati, yujto yelxo val max yal-laj in loloni, man̈octo tzalan dꞌayin tic svalani, palta toxonton in cꞌolbꞌal, teveln̈ej syal in loloni, xchi vin̈. 11 Ix tacꞌvi Jehová chiꞌ:

—¿Mach yuj syal slolon ebꞌ anima tza naꞌa? ¿Tom man̈ vujoc slolon ebꞌ? An̈ejtonaꞌ in svacꞌ chacan̈bꞌoc ebꞌ yedꞌ ebꞌ max yal sloloni yedꞌ ebꞌ max yal yilani. A in svacꞌ yil ebꞌ vachꞌ yilani. 12 Yuj chi, ixic, ol in ochn̈ej edꞌoc ayic ol ach lolonoc. An̈ejaꞌ in ol val tas ol alaꞌ, xchi Jehová chiꞌ.

13 Ix tacꞌvixi vin̈aj Moisés chiꞌ, ix yalan vin̈:

—Ay Mamin Vajalil, comonoc man̈oc in tzin a checbꞌati. Vachꞌ tza say junocxo mach, xchi vin̈.

14 Ix cot yoval Jehová dꞌa vin̈ ix yalani:

—A dꞌa Egipto chiꞌ, ataꞌ ayecꞌ vin̈ ucꞌtac aj Aarón, yin̈tilal vin̈aj Leví. Vojtac to bꞌecan scꞌool vin̈ sloloni. Ol cot vin̈ ach schaꞌa. Ol te tzalaj vin̈ ayic ol ach yilani. 15 A ach ol ach lolon dꞌa vin̈. Ol alani tas ol yutoc vin̈ sloloni. A inxo ol val dꞌayex ayic van e lolon chiꞌ, ol vacꞌan e nael masanil tas ol e cꞌulej. 16 A ach tzach lolon dꞌa vin̈aj Aarón chiꞌ in qꞌuexuloc, axo vin̈ ol lolon dꞌa ebꞌ chon̈abꞌ a qꞌuexuloc. 17 Icꞌbꞌat teꞌ a cꞌococh chiꞌ, yujto a teꞌ ol acꞌlabꞌej ayic ol a chꞌoxan juntzan̈ chꞌoxnabꞌil ix val dꞌayach.

18 Ix meltzaj vin̈aj Moisés dꞌa spat vin̈ sn̈iꞌ, aton vin̈aj Jetro, ix yalan vin̈:

—Ol in meltzaj dꞌa Egipto yic sbꞌat vilan ebꞌ ayto vuj in bꞌa yedꞌoc, yic svilaꞌ tato pitzanto ebꞌ, xchi vin̈.

—Ixic, tzil val a bꞌa dꞌa yoltac bꞌe, xchi vin̈aj Jetro chiꞌ.

19 Ayic aytoecꞌ vin̈aj Moisés dꞌa yol yic Madián chiꞌ, ix yalanxi Jehová dꞌa vin̈:

—Ixic dꞌa Egipto, man̈ ach xiv a bꞌati, yujto chamnacxo ebꞌ sgana ach smilanchamoc, xchi.

20 Ix yicꞌanbꞌat ix yetbꞌeyum vin̈aj Moisés yedꞌ ebꞌ yuninal, ix yacꞌanqꞌue ebꞌ vin̈ dꞌa yibꞌan̈ nocꞌ bꞌuru, ix bꞌat ebꞌ dꞌa Egipto chiꞌ. Yedꞌnac teꞌ scꞌococh vin̈, aton teꞌ ix yal Dios to ol och yopisio yuj vin̈. 21 Ix yalan Jehová dꞌa vin̈:

—Ayic ol ach cꞌoch dꞌa Egipto chiꞌ, naann̈ej uuj to ol a chꞌox juntzan̈ chꞌoxnabꞌil te satubꞌtac dꞌa yichan̈ vin̈ rey, aton juntzan̈ ix vacꞌ a cꞌulej. Palta a in ol vacꞌ pitbꞌoquel spensar vin̈, yuj chiꞌ man̈ ol ex schael-laj vin̈. 22 Slajvi chiꞌ, ol alan dꞌa vin̈: Icha tic yalan Jehová: A jun chon̈abꞌ Israel tic, icha val to sbꞌabꞌel vuninal yaji. 23 Toxo ix val dꞌayach to tza chabꞌat ebꞌ vuninal tic yic tzꞌoch ebꞌ ejmelal dꞌayin. Palta toxonton malaj a gana tzactejeli, yuj chiꞌ ol in milcham vin̈ a bꞌabꞌel unin, xchi Jehová, xa chi.

24 Ix lajvi chiꞌ, ix bꞌat vin̈aj Moisés dꞌa Egipto chiꞌ. A dꞌa yoltac bꞌe bꞌaj dꞌin̈an svay vin̈ yedꞌ ebꞌ ajun yedꞌoc, ataꞌ ix schꞌox sbꞌa Jehová dꞌa vin̈, ijan ix miljicham vin̈ yuuj. 25 Elan̈chamel ix yicꞌcot jun cuchilubꞌ ix Séfora, nabꞌa comon qꞌueen, ix spolanel stzꞌumal sjolom svinaquil vin̈ yuneꞌ ix, ix sjulanoch ix dꞌa yoc vin̈aj Moisés chiꞌ, ix yalan ix: Yujto vetbꞌeyum ach, yuj chiꞌ locan in dꞌa jun chicꞌ tzꞌel tic, xchi ix. 26 Ix lajvi chiꞌ majxo miljichamlaj vin̈ yuj Jehová.

27 Ix yalan Jehová dꞌa vin̈aj Aarón:

—Ixic bꞌat a cha vin̈ ucꞌtac aj Moisés dꞌa tzꞌinan luum, xchi dꞌa vin̈. Yuj chiꞌ ix cot vin̈aj Aarón scha vin̈aj Moisés chiꞌ dꞌa jun vitz bꞌaj ix schꞌox sbꞌa Dios. Axo yic ix schalan sbꞌa ebꞌ vin̈, ix yacꞌlan stzatzil scꞌol ebꞌ vin̈, ix stzꞌubꞌlanelta stiꞌ ebꞌ vin̈. 28 Ix lajvi chiꞌ, ix och ijan vin̈aj Moisés yalan dꞌa vin̈aj Aarón chiꞌ masanil tas ix schec Jehová yalaꞌ yedꞌ juntzan̈ chꞌoxnabꞌil ix checchaj schꞌox vin̈. 29 Ix bꞌat ebꞌ vin̈ schavan̈il, ix smolbꞌan ebꞌ yichamtac vinaquil chon̈abꞌ Israel ebꞌ vin̈ dꞌa Egipto chiꞌ. 30 Ix lajvi chiꞌ, ix och ijan vin̈aj Aarón yalan dꞌa ebꞌ smasanil tas ix yal Jehová dꞌa vin̈aj Moisés chiꞌ, ix schꞌoxanpax juntzan̈ chꞌoxnabꞌil vin̈ yil ebꞌ chon̈abꞌ chiꞌ. 31 Yuj chiꞌ, ix yacꞌoch ebꞌ dꞌa scꞌool tas ix yal ebꞌ vin̈. Ayic ix yabꞌan ebꞌ to ix iljicot ebꞌ yuj Jehová, yujto te ilbꞌajcꞌol tzꞌutaj ebꞌ, yuj chiꞌ ix em n̈ojan ebꞌ ejmelal dꞌa yichan̈ Jehová.