Lolonnac vin̈aj Moisés yedꞌ vin̈aj Aarón dꞌa vin̈ rey
5
Ayic ix lajvi yecꞌcanbꞌat juntzan̈ chiꞌ, ix bꞌat lolon vin̈aj Moisés yedꞌ vin̈aj Aarón dꞌa yichan̈ vin̈ sreyal Egipto chiꞌ, ix yalan ebꞌ vin̈:—Mamin rey, icha val tic yalan Jehová co Diosal a on̈ hebreo on̈ tic dꞌayach: Chabꞌat in chon̈abꞌ dꞌa tzꞌinan luum yic tzin yicꞌanchaan̈ ebꞌ yedꞌ junoc qꞌuin̈, xchi Jehová, xchi ebꞌ vin̈.
2 Ix tacꞌvi vin̈ rey chiꞌ:
—Man̈ vojtacoc jun Jehová tzeyal chiꞌ. ¿Tas yuj tzin cꞌanabꞌajej tas syalaꞌ, tzin chaanbꞌat jun chon̈abꞌ Israel tic? Max in chabꞌat-laj ebꞌ, xchi vin̈.
3 Ix yalan ebꞌ vin̈:
—A co Diosal a on̈ hebreo on̈ tic, ix schꞌox sbꞌa dꞌayon̈. Yuj chiꞌ chaon̈bꞌat dꞌa tzꞌinan luum yic bꞌat cacꞌan co silabꞌ dꞌa Jehová co Diosal, oxeꞌ cꞌual stecꞌnabꞌil bꞌaj ol on̈ bꞌat chiꞌ. Tato max on̈ bꞌati, axo talaj tzꞌaji tzon̈ yacꞌancham co Diosal chiꞌ yuj junoc yaelal, ma yuj oval, xchi ebꞌ vin̈ dꞌa vin̈ rey chiꞌ.
4 Yuj chiꞌ ix yalan vin̈:
—¿Tas yuj tzeyiqꞌuecꞌ tiempo dꞌa juntzan̈ eyetchon̈abꞌ tic dꞌa smunlajel? A ex pax tic, ixiquec dꞌa e munlajel. 5 ¿Tom max eyilaꞌ to tzijtum ebꞌ eyetchon̈abꞌ dꞌa yol chon̈abꞌ Egipto tic? ¿Tas yuj tzeyamoch vaan ebꞌ dꞌa smunlajel? xchi vin̈.
6 An̈ejtonaꞌ dꞌa jun cꞌual chiꞌ ix yalbꞌat vin̈ rey dꞌa ebꞌ vin̈ yajal munlajel yedꞌ pax dꞌa ebꞌ vin̈ caporal icha tic:
7 —Man̈xo eyacꞌ an̈ ac yic sbꞌat dꞌa scal lum socꞌom dꞌa ebꞌ vin̈ israel chiꞌ, ichataxon tzꞌaji, palta to axo ebꞌ vin̈ ol bꞌat sayan yicoꞌ. 8 Palta an̈ejaꞌ sbꞌisul lum xan chiꞌ sbꞌo ebꞌ vin̈ ichataxoni. Yujto sjaraganail ebꞌ vin̈ tzꞌicꞌani, yuj chiꞌ tzijtum yavaj ebꞌ icha tic: To tzon̈ bꞌat cacꞌ co silabꞌ dꞌa co Diosal, xchi ebꞌ. 9 Aqꞌuecoch más munlajel dꞌa yibꞌan̈ ebꞌ, yic vachꞌ man̈xalaj stiempo ebꞌ yabꞌan juntzan̈ esal lolonel tzꞌalchaj chiꞌ, xchibꞌat vin̈ rey chiꞌ.
10 Yuj chiꞌ ix yal ebꞌ vin̈ aj Egipto ayoch yajal munlajel dꞌa ebꞌ israel ayoch caporalil yic syal ebꞌ dꞌa ebꞌ munlajvum chiꞌ icha tic:
—Toxo ix yal vin̈ rey to man̈xo ol acꞌchaj an̈ ac dꞌayex. 11 A ticnaic a exxo ol bꞌat e say eyic ol e cꞌanaꞌ, palta an̈ejaꞌ sbꞌisul lum xan ol e bꞌoꞌo, xchi ebꞌ vin̈.
12 Icha chiꞌ ix aj saclem ebꞌ vin̈ israel dꞌa masanil yol yic Egipto sayoj yoc trigo yic scꞌan ebꞌ vin̈ sqꞌuexuloc an̈ ac chiꞌ. 13 Vachꞌchom icha chiꞌ ix aji, palta a ebꞌ yajalil ebꞌ caporal chiꞌ, syal ebꞌ to an̈ejaꞌ sbꞌisul lum xan yovalil sbꞌo ebꞌ, icha sbꞌo ebꞌ ayic tzꞌacꞌchaj an̈ ac dꞌa ebꞌ. 14 Slaj macꞌji ebꞌ israel ayoch dꞌa caporalil yuj ebꞌ ayoch yajalilal dꞌa yibꞌan̈ ebꞌ yuj vin̈ rey. Syalan ebꞌ vin̈ icha tic dꞌa ebꞌ: ¿Tas yuj man̈ tzꞌacanoc e bꞌo lum e xan evi yedꞌ ticnaic ichataxon e bꞌoan luum? xchi ebꞌ vin̈ yajalil ebꞌ chiꞌ.
15 Ix bꞌat ebꞌ vin̈ caporal yal dꞌa vin̈ rey icha tic:
—Mamin rey ¿tas yuj obꞌiltacxon̈ej tzon̈ utej a on̈ a checabꞌ on̈ tic? 16 Maxtzac acꞌjilaj an̈ ac dꞌayon̈ yic tzꞌoch scaloc lum co xan sco bꞌoꞌo, tobꞌ yovalil tzꞌacan sco bꞌopax luum icha dꞌa yalan̈taxo, tzon̈ macꞌji. A on̈ tic malaj co mul, palta a ebꞌ vin̈ a checabꞌ ay smul, xchi ebꞌ vin̈.
17 Ix tacꞌvi vin̈ rey chiꞌ:
—A ex tic yuj e jaraganail icha chiꞌ tzeyalaꞌ. Tzon̈ bꞌat cacꞌ co silabꞌ dꞌa Jehová, xe chi. 18 Ixiquec munlajel, vachꞌchom a ex tze say an̈ ac tzeyacꞌoch dꞌa scal lum xan chiꞌ, an̈ejaꞌ icha sbꞌisul lum tze bꞌoꞌo, xchi vin̈ rey chiꞌ dꞌa ebꞌ vin̈.
19 Yuj chiꞌ a ebꞌ vin̈ israel ayoch dꞌa caporalil chiꞌ, yelxo val ix chabꞌax scꞌol ebꞌ vin̈, yujto ix alchaj dꞌa ebꞌ vin̈ to an̈ejaꞌ sbꞌisul lum xan chiꞌ sbꞌo ebꞌ vin̈ dꞌa junjun cꞌu. 20 Ayic ix elta ebꞌ vin̈ caporal chiꞌ dꞌa yol sdespacho vin̈ rey chiꞌ, ix schalan sbꞌa ebꞌ vin̈ yedꞌ vin̈aj Moisés yedꞌ pax vin̈aj Aarón, van stan̈vaj ebꞌ vin̈ yuj ebꞌ vin̈. 21 Ix yalan ebꞌ vin̈ caporal chiꞌ:
—Olxom yil Jehová tas ol ex yutoc, yujto a ex ay e mul, yuj chiꞌ a vin̈ rey yedꞌ ebꞌ vin̈ ay yopisio yedꞌ vin̈, tzon̈ syaj val ebꞌ ticnaic. Ichato a ex ix eyacꞌ qꞌuen espada dꞌa ebꞌ vin̈ yic tzon̈ smilancham ebꞌ vin̈, xchi ebꞌ vin̈.
A slesal vin̈aj Moisés
22 Ix lajvi chiꞌ, ix yalan vin̈aj Moisés dꞌa slesal: