—Olto val ilaꞌ tas ol vutoc vin̈ sreyal Egipto tic. Yedꞌ vipal ol ex yactanel vin̈. A in ol vacꞌ pural vin̈, ol ex spechanel vin̈ dꞌa yol schon̈abꞌ tic, xchi.

2 Ix lolonxi Jehová yedꞌ vin̈aj Moisés, ix yalani:

—A inton Jehová in. 3 In chꞌoxnac in bꞌa dꞌa vin̈aj Abraham, dꞌa vin̈aj Isaac yedꞌ dꞌa vin̈aj Jacob, dꞌa in bꞌi, Dios Syal Yuj Smasanil. Palta a in bꞌi JEHOVÁ, maj vacꞌlaj yojtaquejel ebꞌ vin̈ tas syalelcꞌochi. 4 In bꞌonac in trato yedꞌ ebꞌ vin̈, vacꞌannac in tiꞌ vacꞌan lum Canaán dꞌa ebꞌ vin̈, aton lum bꞌaj ecꞌlejnac cajan ebꞌ vin̈. 5 A ticnaic, toxo ix vilaꞌ to te ilbꞌajcꞌol tzꞌutaj ebꞌ in chon̈abꞌ dꞌa Egipto tic, yelxo val tzꞌixtaj ebꞌ dꞌa munlajel yuj ebꞌ aj Egipto tic. Yuj chiꞌ, ix in nacot in trato yedꞌ ebꞌ e mam eyicham chiꞌ. 6 A ticnaic, bꞌat al dꞌa ebꞌ etisraelal chiꞌ: A Jehová tzꞌalan icha tic: A in Jehová in, ol ex in colel bꞌaj ayex och checabꞌoc tic, bꞌaj ilbꞌaj ex cꞌol yuj munlajel dꞌa Egipto tic. Ol in chꞌox val vipalil, ol vacꞌanoch nivac yaelal dꞌa yibꞌan̈ jun chon̈abꞌ tic. Icha val chiꞌ ol aj ex in colanel dꞌa yol scꞌabꞌ jun chon̈abꞌ tic. 7 Ol ex och in chon̈abꞌoc, a inxo ol in och e Diosaloc. Icha chiꞌ ol aj eyojtacaneli to a in Jehová e Diosal in tzex in colel dꞌa yol scꞌabꞌ ebꞌ aj Egipto tic bꞌaj ayex och dꞌa syaelal yuj munlajel. 8 Ol ex vicꞌanbꞌat dꞌa sat lum luum bꞌaj vacꞌnac in tiꞌ vacꞌan dꞌa vin̈aj Abraham, dꞌa vin̈aj Isaac yedꞌ dꞌa vin̈aj Jacob. A inxo Jehová in tic svalpax dꞌayex to eyic ol aj luum, xchi Jehová, xa chi dꞌa ebꞌ.

9 Masanil tas ix yal Jehová, aꞌ ix yal vin̈aj Moisés dꞌa ebꞌ yetisraelal chiꞌ, palta maj schalaj yabꞌ ebꞌ, yujto te somchajnaquel scꞌol ebꞌ yuj syail munlajel. 10 Ix lajvi chi, ix yalanxi Jehová dꞌa vin̈aj Moisés chiꞌ:

11 —Ixic al dꞌa vin̈ sreyal Egipto chiꞌ to tzex yactejel vin̈ dꞌa sat sluum tic, xchi Jehová.

12 Ix tacꞌvi vin̈aj Moisés chiꞌ dꞌay:

—Ina max schalaj yabꞌ ebꞌ vetchon̈abꞌ tas svalaꞌ, ocxom val vin̈ rey, tom ol scha yabꞌ vin̈, ina to max val yal-laj in loloni, xchi vin̈.

13 Yuj chiꞌ ix checjibꞌat vin̈ yedꞌ vin̈aj Aarón yuj Jehová yic bꞌat lolon ebꞌ vin̈ dꞌa ebꞌ yetisraelal yedꞌ dꞌa vin̈ rey, yujto albꞌilxo dꞌa ebꞌ to ol yiqꞌuelta ebꞌ yetchon̈abꞌ ebꞌ dꞌa Egipto chiꞌ.

14 Aton sbꞌi ebꞌ yajal dꞌa junjun macan̈il ebꞌ yin̈tilal Israel dꞌa stzolal: A vin̈aj Rubén sbꞌabꞌel yuninal vin̈aj Israel. Axo ebꞌ yuninal vin̈, aton ebꞌ tic: Vin̈aj Hanoc, vin̈aj Falú, vin̈aj Ezrón yedꞌ vin̈aj Carmi. Aton ebꞌ tic yajal yaj dꞌa scal junjun macan̈ yin̈tilal vin̈aj Rubén chiꞌ.

15 A ebꞌ yuninal vin̈aj Simeón, aton ebꞌ tic: Vin̈aj Jemuel, vin̈aj Jamín, vin̈aj Ohad, vin̈aj Jaquín, vin̈aj Zohar yedꞌ vin̈aj Saúl yuneꞌ jun ix aj Canaán. Aton ebꞌ tic yajal yaj dꞌa scal junjun macan̈ yin̈tilal vin̈aj Simeón chiꞌ.

16 A vin̈aj Leví, 137 abꞌil ix ecꞌ vin̈. A sbꞌi ebꞌ yuninal vin̈ dꞌa stzolal aton ebꞌ tic: Vin̈aj Gersón, vin̈aj Coat yedꞌ vin̈aj Merari. 17 A ebꞌ yuninal vin̈aj Gersón, aton ebꞌ tic: Vin̈aj Libni yedꞌ vin̈aj Simei. Aton ebꞌ tic yajal yaj dꞌa junjun macan̈. 18 A vin̈aj Coat chiꞌ, 133 abꞌil ix ecꞌ vin̈. A sbꞌi ebꞌ yuninal vin̈, aton tic: Vin̈aj Amram, vin̈aj Izhar, vin̈aj Hebrón yedꞌ vin̈aj Uziel. 19 Ebꞌ yuninal vin̈aj Merari, aton ebꞌ tic: Vin̈aj Mahli yedꞌ vin̈aj Musi. Aton ebꞌ tic yajal yaj dꞌa junjun macan̈ yin̈tilal vin̈aj Leví yedꞌ yuninal ebꞌ.

20 A vin̈aj Amram ix yicꞌlaj sbꞌa vin̈ yedꞌ ix Jocabed yanabꞌ vin̈ smam vin̈, aton ebꞌ ay yic vin̈aj Aarón yedꞌ vin̈aj Moisés. A vin̈aj Amram chiꞌ 137 abꞌil ix yil vin̈, ix cham vin̈.

21 A ebꞌ yuninal vin̈aj Izhar, aton ebꞌ tic: Vin̈aj Coré, vin̈aj Nefeg yedꞌ vin̈aj Zicri.

22 A ebꞌ yuninal vin̈aj Uziel, aton ebꞌ tic: Vin̈aj Misael, vin̈aj Elzafán yedꞌ vin̈aj Sitri.

23 A vin̈aj Aarón ix yicꞌ sbꞌa vin̈ yedꞌ ix Elisabet, yisil vin̈aj Aminadab, yanabꞌ vin̈aj Naasón. Axo yuninal ebꞌ, aton ebꞌ tic: Vin̈aj Nadab, vin̈aj Abiú, vin̈aj Eleazar yedꞌ vin̈aj Itamar.

24 Ebꞌ yuninal vin̈aj Coré, aton ebꞌ tic: Vin̈aj Asir, vin̈aj Elcana yedꞌ vin̈aj Abiasaf. Aton ebꞌ tic yajal yaj dꞌa junjun macan̈ ebꞌ yin̈tilal vin̈aj Coré.

25 Axo vin̈aj Eleazar yuninal vin̈aj Aarón, ix yicꞌ sbꞌa vin̈ yedꞌ ix yisil vin̈aj Futiel. Ix alji jun yuneꞌ ix, aton vin̈aj Finees. Aton ebꞌ tic yajal yaj dꞌa junjun macan̈ ebꞌ yin̈tilal vin̈aj Leví.

26 Axo vin̈aj Aarón yedꞌ vin̈aj Moisés sbꞌinaj dꞌa jun lista tic, aton dꞌa ebꞌ vin̈ tic ix yal Jehová to a ebꞌ vin̈ ol icꞌanelta ebꞌ israel dꞌa Egipto dꞌa stzolal. 27 Aton ebꞌ vin̈ ix xidꞌecꞌ lolonel yedꞌ vin̈ sreyal Egipto yic vachꞌ syactejelta ebꞌ chon̈abꞌ israel chiꞌ vin̈.

28 Ix lolon Jehová dꞌa vin̈aj Moisés dꞌa Egipto, ix yalani:

29 —A in ton Jehová in. Al dꞌa vin̈ sreyal Egipto masanil tastac sval tic dꞌayach, xchi dꞌa vin̈.

30 Ix tacꞌvi vin̈aj Moisés chiꞌ icha tic:

—Mamin, yelxo val max yal-laj in loloni, ¿tas val ol aj yabꞌan vin̈ rey tas ol valaꞌ? xchi vin̈.